Lajmet

Gazetarja në Kabul: Plane të rrënuara, ëndrra të shkatërruara

Rahila Elena: Për disa ditë, Kabuli ishte si një qytet fantazmë.

Published

5 years ago

September 1, 2021

Betim Gashi

Rahila Elena është një nga gratë e pakta gazetare në Kabul që vazhdon të punojë, edhe pse grupi taliban mori kontrollin e Afganistanit dhe urdhëroi gratë që punojnë, të qëndrojnë në shtëpi.

Elena, gazetare për një medium lokal, e cila përdor këtë pseudonim për shkak të sigurisë, thotë në një intervistë për Radion Evropa e Lirë se planet e saj për të ardhmen janë shkatërruar.

Radio Evropa e Lirë: Pse keni vendosur të ktheheni në punë me gjithë kërcënimet për sigurinë?

Rahila Elena: Vendi im i punës është mbyllur për dy-tri ditë, pasi të gjithë jemi larguar papritmas nga zyra, kur talibanët kanë hyrë në Kabul, më 15 gusht. Disa ditë më vonë, punëdhënësit na kanë dërguar tekst-mesazhe, duke na thënë se mund të kthehemi në punë. Unë kam qenë ndër punëtorët e parë që jam kthyer në zyrë.

Ka disa arsye përse jam kthyer. Para së gjithash, unë jam person në vete dhe asnjë qeveri apo pushtet nuk duhet të marrë vendime për mua apo jetën time. Nuk e di se çfarë pasojash do të ketë vendimi im, por, së paku, do të jem në gjendje të them se kam bërë atë që kam menduar se është e drejtë, pavarësisht nga të gjitha rreziqet.

Arsyeja e dytë është se Qeveria afgane ka investuar para në shkollimin dhe trajnimin tim. Mendoj se ia kam borxh shoqërisë të punoj.

Po ashtu, kam ndjerë se është përgjegjësi e imja si gazetare që të dal dhe të raportoj për atë që po ndodh. Është detyrë e një gazetari të nxjerrë në pah problemet në shoqëri, keqbërjet e Qeverisë dhe çështjet e njerëzve. Unë nuk mund t’i zgjidh problemet e njerëzve, por është punë e imja të bëhem zëri i tyre.

Për kthimin tim në punë kam pasur edhe arsye financiare. Unë jam fëmija më i madh në familje dhe ajo varet nga paga ime.

Radio Evropa e Lirë: Çfarë ndryshimesh keni hasur në punë qëkur talibanët kanë marrë pushtetin në Kabul?

Rahila Elena: Kemi pasur liri të shprehjes. Unë kam mundur të zgjedh lirshëm temat e mia, të kritikoj lirshëm Qeverinë dhe të tjerët dhe nuk ka pasur censurë në raportet e mia. Tani është ndryshe.

Ka një vakuum në pushtetin afgan këto ditë dhe nuk është ende e qartë nëse do t’i kemi përsëri këto liri. Po përpiqemi të jemi të kujdesshëm në raportimin tonë, po bëjmë shumë autocensurë.

Për shembull, dy ditë më parë kam pasur një artikull për krijimin e Qeverisë së re dhe shqetësimet e njerëzve për këtë. Besoj se kam qenë jashtëzakonisht e kujdesshme dhe kam censuruar veten. Por, redaktori e ka redaktuar në masë të madhe artikullin tim, duke hequr shumë pjesë, që, sipas tij, do të na vinin në rrezik. Këto kanë qenë thjesht citate nga njerëz që ndanin shqetësimet e tyre. I kam thënë vetes: ky është realiteti im i ri në punë – nuk mund të them ose shkruaj më atë që dua.

Kur njerëzit ankohen për talibanët ose bëjnë komente të pafavorshme për ta, unë nuk mund t’i publikoj ato në raportin tim, sepse kam frikë se ato, jo vetëm që do të më rrezikojnë mua, por edhe kolegët e mi. Mediumi ynë madje mund të mbyllet.

Radio Evropa e Lirë: Si e shihni të ardhmen tuaj si gazetare që punoni në Kabulin e kontrolluar nga talibanët?

Rahila Elena: Kjo është pyetja që ia bëj vetes çdo ditë gjatë dy javëve të fundit dhe nuk kam përgjigje. Nëse do të ma bënit të njëjtën pyetje tri orë përpara se talibanët të hynin në Kabul, unë do t’ju jepja një listë të gjërave që kam planifikuar për të ardhmen time.

Kam pasur plane të hollësishme dhe plane mbështetëse për së paku 30 vjetët e ardhshëm të jetës sime. Kam pasur një fletore me një listë të projekteve të ndryshme personale, me shënime se si t’i realizoj ato. Në ditën që jemi larguar nga zyra, më 15 gusht – duke mos ditur se çfarë do të ndodhë – unë e kam shkatërruar atë fletore, së bashku me disa dokumente të tjera.

Kam pasur shumë ëndrra. Kam planifikuar të filloj studimet master në dy vjetët e ardhshëm. Gjithashtu kam qenë duke u përgatitur për testet e programit të bursave American Fulbright.

Kam dashur të punoj – si praktikante ose pjesë e një programi trajnimi – edhe për një agjenci të huaj të lajmeve dhe ta sjell atë njohuri në vendin tim.

Në afat të gjatë kam ëndërruar të punoj si korrespondente e çështjeve të jashtme, jashtë vendit, për ca kohë. Me pak fjalë, doja të raportoja për vendin tim.

Kam shkuar në punë në këmbë, edhe pse Kabuli nuk ka qenë vend i sigurt për gratë e reja gjatë Qeverisë së kaluar. Por, më pëlqente të ecja, duke menduar për të ardhmen time. Tani, kam frikë se planet e mia janë rrënuar dhe ëndrrat e mia janë shkatërruar. Nuk e di se çfarë e ardhmeje më pret. Qeveria talibane do të jetë ajo që do të bëjë plane për mua. Kjo më dhemb.

Tani për tani, talibanët thonë se gratë do të kthehen në punë, mediat mund të funksionojnë. Nuk e di nëse ata do t’i mbajnë premtimet e tyre dhe nëse do të jem në gjendje të vazhdoj punën time, ose nëse do të vritem apo do të arrestohem.

Radio Evropa e Lirë: Si është disponimi në rrugët e Kabulit këto ditë, për të rinjtë si ju?

Rahila Elena: Njerëzit po kthehen ngadalë në punë. Për disa ditë, Kabuli ishte si një qytet fantazmë. Rrugët ishin të shkreta. Tani është më i mbushur me njerëz, por qyteti është ende larg të qenët ai vendi i gjallë që ishte më parë.

Unë kaloj çdo ditë në pjesët më të ngarkuara të Kabulit dhe duket se qyteti është bërë një qytet burrash. Ka shumë më pak gra në punë dhe në rrugë. Shumica e grave mbajnë hixhab të zi ose burka. Pamja e meshkujve ka ndryshuar gjithashtu – ata tani veshin rroba tradicionale afgane, që talibanët i konsiderojnë të përshtatshme.

Kufizimet e lirive tona janë vetëm një pjesë e problemit.

Të rinjtë dhe të moshuarit janë të shqetësuar për gjendjen financiare. Njerëzit janë shumë të varfër dhe shumë nuk kanë punë të qëndrueshme. Shumë kanë pasur punë të rastësishme dhe kanë fituar aq sa për të blerë ushqim për ditën.

Afganistani, gjatë 20 vjetëve të fundit, është varur shumë nga ndihma e huaj, e cila mund të marrë fund. Nëse kjo ndodh, ne nuk e dimë nëse do të paguhemi edhe nëse na lejohet të punojmë. Kemi frikë se njerëzit do të përballen me urinë.

Lajmet

Profesoresha e UBT-së, Marigona Bekteshi-Ferati, ftohet si studiuese kërkimore në një nga bibliotekat më prestigjioze në botë

Published

6 minutes ago

July 14, 2026

ubtnews

Profesoresha e UBT-së, Marigona Bekteshi-Ferati, është ftuar zyrtarisht si Guest Researcher në Herzog August Bibliothek në Wolfenbüttel të Gjermanisë, një prej bibliotekave kërkimore më prestigjioze në botë dhe ndër institucionet më të rëndësishme për studimet humanistike.

Ky angazhim përbën një vlerësim të rëndësishëm ndërkombëtar për punën e saj shkencore, duke e pozicionuar atë në një prej qendrave më elitare të kërkimit në Evropë, ku studiues nga e gjithë bota zhvillojnë projekte mbi historinë, kulturën dhe trashëgiminë intelektuale evropiane.

E themeluar në vitin 1572, Herzog August Bibliothek ka një histori mbi 450-vjeçare dhe në shekullin XVII njihej si “Mrekullia e Tetë e Botës”, falë koleksionit më të madh të librave në Evropë. Biblioteka ruan mijëra dorëshkrime mesjetare, inkunabula, harta historike, dokumente arkivore dhe koleksione unike me rëndësi botërore. Ndër pasuritë e saj më të çmuara është edhe Evangeliari i Henrikut të Luanit, një nga dorëshkrimet më të rëndësishme të Mesjetës evropiane. Institucioni është udhëhequr ndër shekuj edhe nga personalitete të shquara të mendimit evropian, si Gottfried Wilhelm Leibniz dhe Gotthold Ephraim Lessing.

Gjatë qëndrimit në këtë institucion, Prof. Bekteshi-Ferati do të zhvillojë projektin e saj kërkimor me titull “Cultural Encounters and Theatrical Representation: The Balkans between the Ottoman and Habsburg Worlds (16th–18th Century)” (“Takimet kulturore dhe përfaqësimi teatror: Ballkani ndërmjet botës Osmane dhe asaj Habsburge (shekujt XVI–XVIII)”), duke hulumtuar në një nga fondet më të pasura arkivore në Evropë.

Ky projekt synon të analizojë ndërveprimet kulturore dhe mënyrën e përfaqësimit të Ballkanit në teatër gjatë periudhës ndërmjet shekujve XVI dhe XVIII, duke u mbështetur në burime të rralla historike dhe materiale arkivore me vlerë të jashtëzakonshme shkencore.

Lajmet

Vdes një grua në Fushë Kosovë si pasojë e një aksidenti të ndodhur në qershor

Published

15 minutes ago

July 14, 2026

UBTNews

Një grua ka vdekur dje në Prishtinë, si pasojë e lëndimeve të marra nga një aksident trafiku që kishte ndodhur më 5 qershor 2026 në rrugën “Nënë Terezë” në Fushë Kosovë.

Sipas raportit 24-orësh të Policisë së Kosovës, asaj i është keqësuar gjendja shëndetësore të hënën, me ç’rast është dërguar me autoambulancë në Emergjencën e QKUK-së në Prishtinë, ku mjeku kujdestar ka konstatuar vdekjen e saj.

Me vendim të prokurorit, trupi i pajetë i viktimës është dërguar për obduksion në Institutin e Mjekësisë Ligjore (IML) në Prishtinë. /E.A/

Lajmet

Sulmohet seksualisht një grua ne Prishtinë

Published

43 minutes ago

July 14, 2026

UBTNews

Një grua në Prishtinë ka raportuar dje në Policinë e Kosovës së është sulmuar seksualisht nga një burrë.

Sipas raportit 24 orësh të, pasi është raportuar rasti, Policia ka arrestuar të dyshuarin.

I njëjti është dërguar në mbajtje me vendim te prokurorit.

“Viktima femër kosovare ka deklaruar se ka qenë e sulmua seksualisht nga i dyshuari mashkull kosovar. I dyshuari është arrestuar dhe i njëjti pas intervistimit në prezencë të avokatit, me vendim të prokurorit është dërguar në mbajtje”, thuhet në raport.

Lajmet

Ditari: Lajmet kryesore që shënuan datën 14 korrik 1993-1998?

Published

51 minutes ago

July 14, 2026

UBTNews

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Ibrahim Rugova u rizgjodh kryetar i Lidhjes Demokratike të Kosovës

14 korrik 1993

Për tetë ditë në Deçan u bastisën 247 familje

Gjatë ditës së djeshme, nga ora 10, polica serbe në fshatrat Gramoçel, Drenoc, Kodrali dhe Llukë e Poshtme të Deçanit, bastisi 35 familje shqiptare, kryesisht familje të ish-punëtorëve të sigurimit dhe të veprimtarëve politikë.

Që nga 4 korriku deri më 9 korrik, në fshatrat e komunës së Deçanit u bastisën 212 familje, ndërsa me bastisjet e djeshme, numri i tyre arriti në 247 familje të bastisura në këtë komunë.

14 korrik 1994

Ibrahim Rugova u rizgjodh kryetar i Lidhjes Demokratike të Kosovës

Delegatët e kuvendit të dytë zgjedhor të LDK-së zgjodhën sonte (në orën 19 e 30) minuta Dr.Rugovën me aklamacion kryetar të LDK-së. Në fjalën e rastit kryetari Rugova i falënderoi delegatët për besmin që ia dhanë.

Zgjedhja për kryetar të LDK-së është edhe një përgjegjësi për të realizuar synimet tona programore dhe deklarimin e vullnetit të Kosovës për një Kosovë të pavarur e neutrale, theksoi Rugova.

Zgjedhja është edhe një përgjegjësi për të realizuar edhe më mirë jetën dhe institucionet. Duhet të jemi poashtu në kontakt me botën tha dr. Rugova.

Në këtë situatë të vështirë duhet ta ruajmë mirëkuptimin, mirëbesimin te njëri tjetri dhe lirinë që e kemi krijuar ndërmjet veti. Ndoshta këto duken si përsëritje, por në këto punë përsëritjet janë përforcim dhe mësim, tha kryetari Rugova.

Dëshiroj t’i falënderoj anëtarët e Këshillit qëndror dhe Kryesinë e LDK-së që kanë punuar deri tash. Bashk me ju kemi punuar dhe jemi në një rrugë, në një front të rezistencës. Ju falënderoj ta ruajm vetëbesimin dhe unititin tonë, tha kryetari Rugova duke iu falënderuar delegatëve të kuvendit të dytë zgjedhor.

Sipas statutit të ri mandati i kryetarit të LDK-së zgjatë katër vjet.

14 korrik 1997

Gjendje më e mirë e të plagosurve në spitalet e Shkupit

Në klinikën e Spitalit Shtetëror të Shkupit dhe në Qendrën për Intervenime Urgjente, siç i deklaroi “Bujkut” prof. dr. Jordan Savevski, janë të shtrirë për shërim dhe janë operuar Muharrem Ibrahimi, Qazim Gjakovica, Beqir Aqimi, Driton Hyseni, Feta Kadriu dhe Fazli Ismaili, të cilët, siç tha ai, tashmë po ndihen më mirë dhe kanë filluar të këndellen. Në klinikat e këtij spitali dhe në Qendrën për Intervenime Urgjente ndihmë kanë kërkuar edhe Shemsedin Osmani, fotoreporter i “Flakës”, i cili është lëshuar për shërim në shtëpi nga lëndimet e pësuara si dhe pesë persona të tjerë, të cilët, menjëherë pas ofrimit të ndihmës së parë urgjente, gjithashtu janë lëshuar për shërim nëpër shtëpitë e tyre. Asnjëri nga pacientët e lartpërmendur, të cilët edhe më tutje janë të shtrirë në klinikat e Spitalit Shtetëror të Shkupit, nuk e ka jetën në rrezik.

Pacientët civilë, që janë duke u shëruar në Spitalin Ushtarak të Shkupit, janë Ismail Ibrahimi, Arben Sylejmani dhe Burhan Menga. Edhe në këtë spital ndihmë mjekësore kanë kërkuar më shumë pacientë që e pësuan në Gostivar, por pas marrjes së ndihmës adekuate mjekësore ata janë lëshuar për shërim nëpër shtëpitë e veta, njofton “Bujku”.

14 korrik 1998

Katër të plagosur nga granatimet serbe në fshatrat e Shalës së Bajgorës

Gjatë luftimeve të ditëve të fundit mes forcave ushtarako-policore serbe dhe pjesëtarëve të UÇK-së, që u zhvilluan në rajonin e Shalës së Bajgorës, u plagosën 4 pjesëtarë të UÇK-së, ndërsa humbjet në anën e forcave serbe janë të konsiderueshme.

KI i Degës së LDK-së në Mitrovicë njofton se jeta e të plagosurve nuk është në rrezik.

Nga granatimet në fshatin Bare janë dëmtuar shtëpitë e Nezir, Idriz dhe Jonuz Feratit, ndërsa granatime ka pasur edhe në Stantërg, Vidishiq, Mazhiq, Rashan dhe Pasomë.

Në Mal të Zi kanë shkuar mbi 17. 000 të ikur nga Kosova

Vlerësohet se në Mal të Zi numri i të ardhurve nga Kosova të jetë rritur në mbi 17. 000 vetë, njoftoi sot “Zëri i Amerikës”.

I njëjti burim theksonte se sulmet e fundit të policisë serbe mbi fshatin Loxhë dhe qytete të tjera të Pejës i shtyri me mijëra banorë të braktisin vatrat e tyre dhe të vendosen në Mal të Zi.

Tri ditët e fundit në komunën e Plavës, e cila gjendet vetëm 20 km. larg Kosovës, sipas anëtarit të Këshillit të Emergjencës në Plavë z. Fadil Alidemaj, vetëm gjatë dhjetë ditëve të fundit nga Kosova janë vendosur mbi 1000 vetë.

Të ardhurit e fundit në Plavë janë kryesisht nga Peja me rrethinë.

Në sulmit e mbrëmshëm në Isniq u vra Isuf Hysen Imeraj

Mbrëmë pas orës 18:00 përgjatë gjithë vijës së frontit në komunën e Deçanit ka pasur shkëmbime zjarri ndërmjet forcave ushtarako-policore serbe dhe forcave të vetëmbrojtjes shqiptare, të cilat kanë zgjatur rreth tri orë. Në shënjestër të armëve artilerike të forcave serbe, siç bëhet e ditur, ishte fshati Carrabreg i Poshtëm, ndërsa forcat shqiptare, të ndihmuara nga njësitë e UÇK-së ndërmorrën një kundërsulm që i detyroi forcat serbe të tërhiqen nga pozicionet e tyre. Në anën e shqiptarëve nuk pati as të vrarë e as të plagosur, kurse forcat serbe, në shenjë hakmarrjeje, dogjën në Deçan dhe në Carrabreg disa shtëpi të shqiptarëve.

Komisioni për Informim i Degës së LDK-së në Deçan njofton se në të njëjtën kohë forcat serbe sulmuan fshatrat Isniq, Llukë e Epërme, Strellc i Epërm dhe Strellc i Poshtëm.

Gjatë sulmit në fshatin Isniq është vrarë veterani i arsimit Isuf Hysen Imeraj (67). Varrimi i të ndjerit u bë sot në Isniq, me nderimet më të larta, në praninë e një numri të madh pjesëmarrësish. Në fjalën e përmortshme që e mbajti Maxhun Tishuku, Kryetar i Këshillit Komunal të Arsimit në Deçan, u theksua se shembëlltyra e mësuesit Isuf, i cili dha kontribut të madh në fushën e arsimit në këtë komunë, do të përkujtohet përgjithëmonë.