Real Madridi i dha fund serisë negative prej katër ndeshjeve pa fitore duke mposhtur Deportivo Alavesin me rezultatin 2-1 në xhiron e 33-të të La Ligës. Megjithatë, në vend të festës, atmosfera në “Santiago Bernabeu” ishte e tensionuar, me 61,000 spektatorë që shfaqën hapur pakënaqësinë e tyre.

Golat për “Mbretërit” u shënuan nga Kylian Mbappe në minutën e 30-të dhe Vinicius Junior në të 50-tën, ndërsa mysafirët ngushtuan epërsinë në minutat shtesë përmes Toni Martinez. Pavarësisht triumfit, vërshëllimat e tifozëve ishin konstante gjatë gjithë takimit, si pasojë e zhgënjimit të madh nga eliminimi i fundit në garat evropiane.

Caku kryesor i kritikave ishin dy yjet kryesorë, Mbappe dhe Vinicius. Ky i fundit, pas shënimit të golit të dytë, zgjodhi të mos festonte, por i kryqëzoi duart në shenjë faljeje drejt tribunave.

Situatën më të rëndë e përjetoi Eduardo Camavinga. Mesfushori francez, i cili ishte ndëshkuar me karton të kuq në humbjen dramatike 4-3 ndaj Bayern Munich, u prit me fishkëllima të forta sapo hyri në fushë si zëvendësues në minutën e 63-të. Reagimi negativ i turmës vazhdoi i tillë sa herë që ai kishte kontakt me topin.

Ky sukses në kampionat, ndonëse i rëndësishëm për pikët, tregon se hendeku mes lojtarëve dhe tifozërisë madrilene mbetet i thellë pas dështimeve të fundit në arenën ndërkombëtare.

Sipas raportit të fundit të Policisë së Kosovës, brenda një dite janë regjistruar gjashtë raste të dhunës në familje në rajone të ndryshme. Kryeqyteti prin me numrin më të madh të incidenteve, ku u raportuan tri raste të sulmeve, ndërsa situata të ngjashme janë shënuar edhe në Pejë, Gjakovë e Malishevë.

Në Prishtinë, policia ka ndërhyrë në tri incidente të ndara. Në rastin e parë, një grua ka raportuar se është sulmuar fizikisht nga një burrë, i cili pas intervistimit është liruar që rasti të vazhdojë në procedurë të rregullt.

Ngjashëm ka ndodhur edhe në incidentin e dytë në kryeqytet, ku viktima ka pranuar tretman mjekësor pas dhunës së ushtruar ndaj saj. Ndërkaq, në rastin e tretë, policia ka dërguar në mbajtje një burrë i cili dyshohet se nën ndikimin e alkoolit ka sulmuar fizikisht një grua.

Në Pejë, një grua ka kërkuar ndihmën e autoriteteve pas keqtrajtimit psiqik që ka pësuar nga një burrë. Edhe për këtë rast, prokurori ka vendosur që procedurat të vazhdojnë në rrugë të rregullt pas marrjes në pyetje të palëve.

Një situatë më specifike është raportuar në Malishevë, ku një grua dyshohet se është sulmuar fizikisht dhe psiqikisht nga tre persona – dy gra dhe një burrë. Viktima ka marrë ndihmë mjekësore, ndërsa të dyshuarit janë shoqëruar në stacionin policor për sqarimin e rrethanave të ngjarjes.

Ndërkohë, në Gjakovë është arrestuar një burrë i cili dyshohet se ka ushtruar dhunë të vazhdueshme psiqike ndaj familjarëve të tij. Për shkak të rrezikshmërisë dhe vazhdimësisë së veprës, me vendim të prokurorit, ai është dërguar direkt në mbajtje.

Dy ditët e fundit janë përcjellë me zhvillime dramatike dhe kthesa të papritura lidhur me konfliktin në Lindjen e Mesme.

Edhe pse të martën skadoi afati i armëpushimit gati dy-javor mes SHBA-së dhe Iranit, Presidenti amerikan, Donald Trump, vendosi ta zgjasë atë, pavarësisht kërcënimeve të tij të mëparshme për rifillimin e bombardimeve në rast të mungesës së një marrëveshjeje.

Kjo kthesë u bë e ditur përmes një njoftimi të Trumpit në orët e vona të së martës, ku ai sqaroi se armëpushimi do të vazhdojë derisa Teherani të paraqesë një “propozim të unifikuar” për të çuar përpara negociatat e paqes.

Brenda 24 orëve të fundit, situata diplomatike ishte tejet e paqartë. Fillimisht pritej që Zëvendëspresidenti amerikan, JD Vance, së bashku me ekipin negociator, të udhëtonte drejt Islamabadit për bisedime me palën iraniane.

Megjithatë, Irani shfaqi hezitim, duke deklaruar përmes Ministrisë së Jashtme se ende nuk kishte vendosur për dërgimin e një delegacioni në Pakistan. Ambasadori i Iranit në OKB, Amir Saeid, e bëri të qartë se negociatat do të ndodhnin vetëm nëse SHBA-ja jepte shenja konkrete për përfundimin e bllokadës së porteve iraniane.

Pavarësisht këtij kushtëzimi, Presidenti Trump deklaroi për CNBC se Irani “nuk ka zgjidhje tjetër” përveçse të ulet në tryezën e bisedimeve, duke përsëritur se opsioni i bombardimeve mbetet mbi tavolinë nëse nuk arrihet përparim.

Tensioni u rrit kur u raportua se Vance kishte pezulluar udhëtimin e tij drejt Islamabadit, ndërkohë që zyrtarët e lartë amerikanë ishin mbledhur në Shtëpinë e Bardhë për të përcaktuar hapat e radhës.

Në fund, Trump njoftoi zgjatjen e armëpushimit, por konfirmoi se bllokada e marinës amerikane mbi portet iraniane do të mbetet në fuqi. Ai theksoi se ky vendim u mor me kërkesë të Pakistanit, veprim për të cilin u falënderua nga kryeministri pakistanez.

Ndërkohë, Sekretari i Thesarit, Scott Bessent, nënvizoi se vazhdimi i bllokadës detare synon të dobësojë sistematikisht aftësinë e Teheranit për të qarkulluar dhe riatdhesuar fonde. Deri më tani, përveç disa reagimeve jozyrtare në rrjetet sociale, Teherani nuk ka dhënë ende një përgjigje zyrtare ndaj këtyre zhvillimeve.

Në raportin njëditor të Policisë së Kosovës, është raportuar një rast i veprës penale – Vrasje e rëndë në tentativë në Prishtinë.

Dy persona dyshohet se janë therur me thikë nga një person i panjohur.

Viktimat më pas janë dërguar për trajtim në QKUK, ndërsa lidhur me rastin në polici janë shoqëruar dy persona të cilët më pas janë dërguar në mbajtje.

“Viktimat janë trajtuar në QKUK. Lidhur me rastin me datë 21.04.2026, janë identifikuar dhe arrestuar dy të dyshuar meshkuj kosovarë. Me vendim të prokurorit, të dyshuarit pas intervistimit janë dërguar në mbajtje”, thuhet në raport.