Aktualitet

Gafat e Borrellit, bën gabime të njëpasnjëshme në deklaratën për dialogun

Ai hasi në shumë vështirësi deri në përfundimin e kësaj deklarate, gabimet e tij ishin të njëpasnjëshme.

Published

on

Para se të nis takimet me kryeministrin e Kosovës, Albin Kurti dhe presidentin e Serbisë, Aleksandër Vuçiq, përfaqësuesi i Lartë i Bashkimit Evropian për Politika të Jashtme dhe Politika të Sigurisë, Joseph Borrell ka dhënë një deklaratë se dialogu nuk do të jetë i lehtë, por duhet të vazhdojë.

Por, si asnjëherë më parë, ai hasi në shumë vështirësi deri në përfundimin e kësaj deklarate.

Gabimet e tij, ishin të njëpasnjëshme.

Konferencën u përpoq ta niste kështu: “Okej? Mirëmëngjes. Sot së bashku me përfaqësuesin special të BE-së, Miroslav Lajcak, do të mirëpresim…..ohhh, harroje këtë”.

Nuk ia doli të përfundonte fjalinë e parë të deklaratës së tij.

Ai vazhdoi të ketë pengesa. Nuk arrinte assesi të zgjidhte fjalët e duhura, pa gabuar ndonjërën prej tyre.

“Mirmëngjesi. Sot, në këtë moment….do të fillojë prapë!!!!….Mirmengjesi, sot së bashku…Tani, në këtë moment. Oh bre! Do të vazhdojë nga aty. A po?”, kështu përsëriti ai disa herë fjalinë me të cilën synonte ta niste deklaratën.

Kujtojmë se në orën 11:00, Borrell do të ketë takime bilaterale, te ndara, fillimisht me kryeministrin e Kosovës, Albin Kurti, e pastaj edhe me presidentin e Serbisë, Aleksandër Vuçiq.

Ndërsa, një tryezë e përbashkët plenare është planifikuar për orën 11:15.

Në orën 12:30 është paralajmëruar një konferencë për media e përfaqësuesit Special të BE-së për dialogun Prishtinë – Beograd dhe çështje tjera të Ballkanit Perëndimor, Miroslav Lajçak.

Lajmet

Aktakuzë ndaj 12 personave në Pejë për shitblerje të patentë shoferëve

Published

on

By

Prokuroria Themelore në Pejë ka njoftuar zyrtarisht ngritjen e një aktakuze  prej 391 faqesh kundër 12 personave, të cilët dyshohen për një rrjet të organizuar të korrupsionit në procesin e pajisjes me patentë shoferë. Grupi i të pandehurve, ku përfshihen zyrtarë të Qendrës për Patentë Shoferë dhe përfaqësues të auto-shkollave, akuzohet për një sërë veprash penale, duke filluar nga keqpërdorimi i detyrës zyrtare e deri te dhënia e ryshfetit dhe manipulimi me prova.

Sipas aktakuzës së Departamentit për Krime të Rënda, skema funksiononte duke u mundësuar kandidatëve kalimin e provimeve teorike dhe praktike në mënyrë të kundërligjshme. Në qendër të këtyre dyshimeve është ish-koordinatori i Njësisë në Pejë, A.Sh., i cili sipas Prokurorisë, përgjatë tri viteve “ka planifikuar dhe organizuar mbajtjen e provimeve teorike edhe në data dhe rrethana të kundërligjshme”, duke testuar persona që as nuk figuronin në listat zyrtare.

I pandehuri R.S. dyshohet se ka shërbyer si urë lidhëse mes auto-shkollave dhe zyrtarëve, ku shumat e ryshfetit për një patentë shofer “variojnë nga 300 deri në 1,000 euro”. Përveç përfitimeve financiare, hetuesit kanë gjetur prova edhe për manipulim fizik të procesit; në një rast specifik, tre nga të pandehurit akuzohen se brenda zyrës së koordinatorit kanë bashkëpunuar për “manipulimin me prova”.

Roli i pyetësve teorikë dhe ekzaminuesve praktikë ishte vendimtar në këtë skemë. Sipas Prokurorisë, pyetëset e pjesës teorike u kanë treguar kandidatëve përgjigjet e sakta, ndërsa ekzaminuesit e pjesës praktike kanë zhvilluar testime jashtë orarit zyrtar të punës, duke shkelur çdo kriter profesional. Kjo mënyrë e operimit u kishte krijuar disa auto-shkollave një “avantazh të padrejtë konkurrues në treg”, duke rritur artificialisht numrin e kandidatëve të regjistruar.

Në përfundim të kësaj komunikate, Prokuroria ka bërë të ditur se i ka propozuar gjykatës shpalljen fajtorë të të gjithë të pandehurve. Përmes këtij rasti, institucioni i akuzës ka rikonfirmuar përkushtimin e tij në luftimin e korrupsionit që “cenon sundimin e ligjit, sigurinë publike dhe besimin e qytetarëve në institucionet e drejtësisë”.

 

Continue Reading

Lajmet

Kosova konfirmon miqësoret e radhës: Ndeshje me Çekinë në Pragë dhe me Andorrën në Prishtinë

Published

on

By

Federata e Futbollit e Kosovës ka njoftuar se “Dardanët” do të zhvillojnë dy ndeshje miqësore gjatë muajve maj dhe qershor, si pjesë e përgatitjeve për sfidat e ardhshme zyrtare. Përzgjedhësi dhe ekipi do të kenë mundësinë të testojnë formën e lojtarëve kundër dy kundërshtarëve me stile të ndryshme loje.

Sfida e parë do të luhet në udhëtim më 31 maj 2026, ku Kosova do të përballet me Çekinë. Kjo ndeshje do të zhvillohet në stadiumin “Epet Arena” në Pragë, një impiant i njohur që pritet të dhurojë një atmosferë të fortë për futbollistët tanë.

Pas duelit në Pragë, përfaqësuesja do të kthehet në Prishtinë për ndeshjen e dytë. Më 7 qershor 2026, në stadiumin “Fadil Vokrri”, Kosova do të jetë nikoqire e Andorrës. Ky takim u shërben tifozëve vendas për të parë nga afër ekipin kombëtar dhe lojtarëve për të konsoliduar strategjitë e tyre përpara ndeshjeve kualifikuese.

Këto dy miqësore shihen si një mundësi e mirë për të provuar emra të rinj dhe për të rritur kohezionin e grupit para nisjes së ciklit të ri garues.

Continue Reading

Kronikë e zezë

Pejë: Arrestohet një person për armëmbajtje pa leje

Published

on

By

Policia e Kosovës ka arrestuar një burrë në rrugën “Bill Klinton” në Pejë, pasi gjatë kontrollit në veturën e tij është gjetur një armë zjarri.

Në mjetin e të dyshuarit, zyrtarët policorë kanë konfiskuar një pistoletë dhe një karikator me 15 fishekë të kalibrit 9x19mm.

Pas përfundimit të procedurave të intervistimit, me vendim të prokurorit, i dyshuari është liruar në procedurë të rregullt, ndërsa ndaj tij është iniciuar rasti për posedim të paautorizuar të armës.

Continue Reading

Lajmet

Dëmtohet një kamion nga shpërthimi dhe digjet një shtëpi në rajonin e Mitrovicës

Published

on

By

Në raportin e fundit 24-orësh të Policisë së Kosovës janë raportuar dy raste si – shkaktim i rrezikut të përgjithshëm, që kanë ndodhur gjatë ditës së djeshme në rajonin e Mitrovicës dhe Vushtrrisë. Rasti i parë ka ndodhur në rrugën “Ajet Gërguri” në Vushtrri, ku menaxheri i një kompanie ka njoftuar policinë se një kamion i tyre ishte dëmtuar nga një mjet shpërthyes.

Pas ekzaminimit nga njësia e specializuar për deminim, zyrtarët policorë kanë konstatuar se dëmtimi në mjet nuk ishte i ri, por dyshohet se kishte ardhur si pasojë e shpërthimit të një granate dore në një kohë më të hershme.

Prokurori është njoftuar menjëherë për këtë rast të shkaktimit të rrezikut të përgjithshëm, i cili tashmë po trajtohet.

Ndërkohë, një tjetër incident është raportuar pasditen e së hënës në zonën e Trepçës në Mitrovicën e Jugut, ku një shtëpi është përfshirë nga flakët.

Pronari i shtëpisë ka njoftuar menjëherë autoritetet, gjë që ka mundësuar ndërhyrjen e shpejtë të ekipeve të zjarrfikësve dhe njësive policore. Megjithëse zjarri u lokalizua dhe u fik plotësisht, dëmet materiale në objekt janë të konsiderueshme. Fatmirësisht, nga ky incident nuk ka pasur persona të lënduar apo pasoja në njerëz. Edhe për këtë rast, Policia e Kosovës ka nisur hetimet.

Continue Reading

Të kërkuara