Lajmet

G7 mbështet iniciativën gjermane dhe krijon një “Klub të Klimës”

Një klub që bashkon vendet që kanë objektiva veçanërisht ambicioze klimatike.

Published

3 years ago

December 13, 2022

Betim Gashi

Me propozimin e kancelarit gjerman, Olaf Scholz, grupi G7 ra dakord për krijimin e një “Klubi të Klimës”. Një klub që bashkon vendet që kanë objektiva veçanërisht ambicioze klimatike. Kjo është ideja që qëndron pas “Klubit të Klimës” që krijoi të hënën në Berlin grupi i shteteve të G7. Kancelari gjerman Olaf Scholz e kishte iniciuar këtë bashkëpunim në fillim të vitit, në krye të presidencës gjermane të G7. Grupi i shteteve të fuqive ekonomike demokratike miratoi tani statutin, i cili i lejon Klubit të fillojë punën e tij.

Që nga samiti i G7 në Elmau këtë verë, grupi ka punuar intensivisht për këtë, thotë Scholz. Ai është inkurajuar shumë për këtë projekt, edhe përtej kufijve të G7-ës. Është një lloj marrëveshjeje tregtare shumëkombëshe për transformimin industrial miqësor ndaj klimës. Kjo marrëveshje synon të parandalojë që industritë thjesht të largohen nga një vend, kur standardet klimatike aty ngrihen. Në të njëjtën kohë, ajo synon të parandalojë kompanitë në vendet që i vendosin vetes objektiva ambicioze për mbrojtjen e klimës nga konkurrenca e pandershme nga shtetet me standarde të dobëta mjedisore ose nga zhvendosja e vendeve të prodhimit në ato vende.

Për t’u bashkuar me klubin, duhet të merren masa për mbrojtjen e klimës. Klubi synon të mbështesë konkretisht zbatimin e Marrëveshjes së Parisit për Klimën dhe të avancojë në veçanti reduktimin e emetimeve në sektorin industrial. Është një “mburojë globale” për vendet më të cenueshme. Gjermania vë në dispozicion 170 milionë euro, tha Scholz në Egjipt. Ekspertë të ndryshëm e vlerësojnë Klubin si një veprim në drejtimin e duhur, por shumën e përmendur më parë e vështrojnë vetëm si hap të parë.

Projekti i Klubit të Klimës ka të bëjë me transformimin e industrisë në miqësore ndaj klimës. Nisma synon të mbështesë përpjekjet për të kufizuar ngrohjen globale në 1.5 gradë, tha ministri gjerman i Ekonomisë Robert Habeck (Të Gjelbrit). Klubi në parim është i hapur për të gjitha vendet, pavarësisht nga madhësia, niveli i zhvillimit ekonomik dhe sistemi politik. Scholz gjithashtu ftoi shprehimisht Kinën të marrë pjesë në iniciativë. Vendet e varfra që bashkohen duhet të mbështeten në transformimin e industrisë së tyre për të qenë neutrale ndaj klimës.

Edhe në fjalimin e tij në Konferencën Botërore për Klimën në Egjipt, Scholzi ftoi anëtarë të rinj.

“Klubi i klimës është i hapur për këdo që dëshiron të përparojë me ne në transformimin neutral ndaj klimës së ekonomive tona dhe industrisë sonë”, tha ai.

Norvegjia, Australia dhe Emiratet e Bashkuara Arabe, ndër të tjera, kanë shprehur interes për t’u bashkuar.

Statuti i miratuar tani i Klubit të Klimës përbën bazën për zhvillimin e mëtejshëm dhe për fazën e parë të zbatimit të tij. Organizata për Bashkëpunim dhe Zhvillim Ekonomik (OECD) do të krijojë një sekretariat të përkohshëm për Klubin e Klimës së bashku me Agjencinë Ndërkombëtare të Energjisë (IEA)./DW

Related Topics:G7 kancelari gjerman Olaf Scholz

Up Next

Rizvanolli: Gjatë muajit nëntor kemi ulje 15 për qind të konsumit të energjisë elektrike

Don't Miss

Kryeministri britanik njofton marrëveshjen e re me Shqipërinë për kthimin e azilkërkuesve

Aktualitet

UBT shpall thirrjen për Konferencën Ndërkombëtare të Gjuhës dhe Kulturës 2025

Published

20 hours ago

September 27, 2025

Driton Iseni

UBT ka bërë hapjen e thirrjes për pjesëmarrje në Konferencën Ndërkombëtare të Gjuhës dhe Kulturës 2025 (IC-LAC), e cila këtë vit organizohet në kuadër të Konferencës së 14-të Ndërkombëtare të UBT-së për Biznes, Teknologji dhe Inovacion.

Ky aktivitet shkencor do të bashkojë studiues, akademikë, studentë të cikleve të avancuara, doktorantë, ekspertë të fushës dhe profesionistë të arsimit nga vende të ndryshme të botës, me synim shkëmbimin e njohurive, përvojave dhe praktikave më të mira mbi gjuhën, kulturën dhe ndërthurjen e tyre në sistemet bashkëkohore arsimore.

Tema kryesore e këtij edicioni është: “Ndërtimi i sistemeve arsimore reziliente për një të ardhme të qëndrueshme.”

Datat kryesore:

Dorëzimi i abstrakteve: 10 tetor 2025
Njoftimi i pranimit & rishikimi shkencor: 17 tetor 2025
Regjistrimi i hershëm: deri më 17 tetor 2025
Regjistrimi i vonuar: deri më 20 tetor 2025
Dorëzimi i punimit të plotë: 14 nëntor 2025

Qëllimet dhe objektivat

Konferenca IC-LAC synon të hapë një hapësirë të gjërë diskutimi mbi rolin e gjuhës dhe kulturës në shoqëritë moderne, duke nxitur qasje multidisiplinare për edukimin dhe komunikimin ndërkulturor.

Fushat e diskutimit përfshijnë:

Gjuha dhe kultura në arsim
Përdorimi i teknologjisë në mësimdhënie dhe të nxënë
Komunikimi ndërkulturor dhe shumëgjuhësia
Praktikat e qëndrueshme në edukimin gjuhësor
Inteligjenca artificiale dhe ndikimi i saj në të nxënit e gjuhëve
Përkthimi, interpretimi dhe komunikimi global
Rezilienca arsimore dhe dizajnimi i kurrikulave

Dorëzimi i punimeve

Punimet e paraqitura duhet të jenë origjinale, të papublikuara më parë dhe të mos jenë në proces shqyrtimi në konferenca të tjera. Gjatësia maksimale e një punimi është 6 faqe. Punimet që nuk respektojnë kriteret e formatimit nuk do të merren në konsideratë.

Organizatorët ftojnë të gjithë të interesuarit që të kontribuojnë me hulumtimet e tyre shkencore dhe praktikat profesionale, duke u bërë pjesë e një platforme ndërkombëtare shkëmbimi idesh që synon të forcojë lidhjen mes gjuhës, kulturës dhe arsimit për një të ardhme më të qëndrueshme.

Lajmet

Gjykata spanjolle liron Dani Alves-in

Published

2 days ago

September 26, 2025

UBT News

Gjykata e Lartë e Katalonjës ka rrëzuar të premten dënimin për përdhunim ndaj ish-futbollistit brazilian Dani Alves, duke arsyetuar se çështja kishte mospërputhje dhe kontradikta në dëshmitë e paraqitura.

Alves, 41 vjeç, ishte dënuar vitin e kaluar me katër vjet e gjysmë burg për përdhunimin e një gruaje në një klub nate në Barcelonë në vitin 2022. Megjithatë, gjykata e apelit vendosi se dëshmia e akuzueses nuk kishte besueshmëri të mjaftueshme, duke theksuar se mungonin prova të qarta për të mbështetur akuzën.

“Dani Alves është shumë i lumtur. Ai është i pafajshëm, kjo është demonstruar. Drejtësia ka folur,” deklaroi avokatja e tij, Ines Guardiola.

Ndërkohë, avokatja e akuzueses, Ester Garcia, paralajmëroi se do ta çojë çështjen në Gjykatën Supreme të Spanjës, proces që mund të zgjasë deri në një vit./S.K/KP/Morung Express/

Lajmet

Caktohet data, Pogba rikthehet në fushë

Published

2 days ago

September 26, 2025

UBT News

Paul Pogba është shumë pranë rikthimit në futboll pas një periudhe të gjatë mungese tha trajneri i Monacos, Adi Hütter. Ai zyrtarisht ka konfirmuar se mesfushori francez po përparon ndjeshëm.

“Fizikisht dhe mendërisht po shkon mirë. Është stërvitur për tre muaj dhe është afër kthimit në skuadër,” deklaroi Hütter.

Sipas mediave franceze, Pogba pritet të jetë i disponueshëm më 5 tetor, në ndeshjen e Ligue 1 kundër Nice në Stade Louis II.

Ndërkohë, rikthimi në sfidën e së shtunës kundër Lorient shihet më pak i mundshëm.

Ish-mesfushori i Juventusit nuk ka luajtur një ndeshje zyrtare që prej 3 shtatorit 2023, kur u aktivizua ndaj Empolit.

Pak javë më vonë, ai u pezullua për doping dhe u dënua fillimisht me katër vite jashtë fushave. Megjithatë, në tetor 2024, Gjykata e Arbitrazhit Sportiv uli ndalimin në 18 muaj, që skadoi më 11 mars 2025.

Pas ndarjes me Juventusin, Pogba refuzoi një transferim në MLS dhe verën e kaluar nënshkroi një kontratë dyvjeçare me Monacon, e vlefshme deri më 30 qershor 2027.

Klubi monegask e ka regjistruar 31-vjeçarin edhe për Ligën e Kampionëve, ku pritet të rikthehet në tetor.

Ky rikthim do të shënojë një moment të rëndësishëm për kampionin e botës 2018, i cili synon të rifitojë formën dhe të lërë pas periudhën më të vështirë të karrierës së tij./S.K/KP/CNN/