Ministria e Industrisë, Ndërmarrësisë dhe Tregtisë, në bashkëpunim me KIESA-n, organizoi sot forumin “Kosova–Japan Business Forum”, me qëllim të zgjerimit të bashkëpunimit ekonomik ndërmjet dy vendeve.

Ministrja në detyrë Hajdari, theksoi se Japonia është një partner i rëndësishëm për Kosovën në fushën e ekonomisë dhe edukimit.

Ajo vuri në dukje rritjen e shpejtë ekonomike të vendit, përmirësimin në indeksin e korrupsionit, klimën e favorshme të biznesit dhe potencialin në rritje në inovacion dhe teknologji.

Sipas saj, pesë kompani japoneze tashmë veprojnë në Kosovë, ndërsa tregtia dypalëshe po rritet vazhdimisht.

“Ky forum synon forcimin e lidhjeve ekonomike ndërmjet vendeve tona dhe zhvillimin ekonomik. Japonia është një mik i rëndësishëm për Kosovën për ekonominë dhe edukimin. Tani në këtë forum me dy shtete synojmë të thellojmë këtë miqësi edhe në fushën e ekonomisë. Kosova është një ekonomi dinamike me një fuqi punëtore të re dhe konkurruese dhe me një klimë të favorshme për biznes. Vendi ynë ka shënuar rritje të shpejtë ekonomike me një mesatare 6,2 për qind, një nga më të lartat në rajon. Kemi përmirësuar dukshëm rezultatin në indeksin e korrupsionit. Kosova ofron edhe kushte fiskale, pozita jonë strategjike në Ballkan rrit potencialin logjistik. Kosova po shfaqet si qendra e inovacionit dhe teknologjisë. Bashkëpunimi ekonomik me Japoninë ka potencial më të madh për shfaqjen e potencialit për të dy vendet. Eksportet dhe importet tona po rriten në mënyrë të qëndrueshme, janë 5 kompani japoneze të regjistruara në Kosovë. Jam e bindur se prezantimet e sotme do të sjellin rezultate konkrete për bizneset e dy vendeve”, ka theksuar Hajdari.

Ambasadori i Japonisë në Kosovë, Kiminori Iwama, tha se Kosova dhe Japonia ndajnë vlera dhe respekt të ndërsjellë, duke theksuar se ky takim individual mes bizneseve të dy vendeve është një hap i rëndësishëm drejt thellimit të marrëdhënieve ekonomike.

Ai shprehu mirënjohje për KIESA-n dhe JETRO-n për organizimin e forumit.

“Ka kaq shumë aspekte që duhet t’i eksplorojmë në marrëdhëniet dypalëshe të biznesit, sepse Kosova dhe Japonia ndajnë vlera, ndajnë respekt të ndërsjellë dhe ndajnë përkushtimin ndaj zhvillimit të qëndrueshëm. Por njëkohësisht, dua të theksoj se kjo është hera e parë që takohemi individualisht, së bashku me partnerët e biznesit nga Japonia dhe partnerët nga Kosova. Dhe besoj fuqimisht se kjo duhet të vazhdojë të zhvillojë më tej marrëdhëniet midis dy sektorëve të udhëheqësve të biznesit. Duke shfrytëzuar këtë mundësi, dëshiroj të shpreh mirënjohjen time të sinqertë për KIESA-n dhe të gjitha institucionet e tjera përkatëse në Kosovë, si dhe për JETRO-n, për organizimin e këtij eventi të rëndësishëm”, theksoi ai./S.K/EO/

Moti i lig në Borizanë të Krujës, ka shkaktuar përmbytje të shumta në lagjen “Hima” pranë shkollës.

Banorët thanë se janë përmbytur shtëpi, toka, ullinj, duke sjellë kështu dëme të mëdha.

Sipas banorëve, përmbytja vjen si pasojë e inerteve të hedhura pa kriter dhe se kanë bllokuar grykën e përroit, i cili ka dalë nga shtrati si pasojë e shiut./S.K/EO/

Njësitet Antikontrabandë të Doganës së Kosovës, në bashkëpunim me Policinë e Kosovës, gjatë zbatimit të një plani operativ në rajonin e Leposaviqit, në fshatin Junake, kanë ndaluar një automjet që kishte hyrë në territorin e Republikës së Kosovës përmes vijës së gjelbër, rrugëve të paautorizuara.

“Gjatë kontrollit të automjetit është konstatuar se transportoheshin rreth 600 kg djathë, veshmbathje tekstili dhe medikamente, me vlerë të përafërt rreth 7,000 euro, njofton Dogana e Kosovës.

Sipas njoftimit, malli është sekuestruar dhe procedurat ligjore janë iniciuar sipas kompetencave të Doganës së Kosovës. Rasti po trajtohet në koordinim me organet hetimore për të përcaktuar të gjitha rrethanat dhe përgjegjësitë e mundshme.

“Dogana e Kosovës mbetet e përkushtuar në parandalimin e kontrabandës dhe mbrojtjen e tregut të ligjshëm përmes veprimeve të koordinuara me institucionet e sigurisë”./S.K/EO/

Këshilli i Sigurimit i Kombeve të Bashkuara e miratoi një rezolutë të hartuar nga Shtetet e Bashkuara, e cila e mbështet planin e presidentit Donald Trump për t’i dhënë fund luftës në Rripin e Gazës.

Rezoluta gjithashtu autorizon një forcë ndërkombëtare për stabilizim në enklavën palestineze.

Izraeli dhe grupi palestinez i shpallur terrorist nga SHBA dhe fuqi të tjera, Hamas, u pajtuan muajin e kaluar për fazën e parë të planit 20-pikësh të Trumpit për Gazën- një armëpushim në luftën e tyre dyvjeçare dhe një marrëveshje për lirimin e pengjeve.

Por, rezoluta e OKB-së shihet si thelbësore për ta legjitimuar një organ të përkohshëm qeverisës dhe për t’iu ofruar garanci vendeve që po shqyrtojnë dërgimin e trupave në Gazë.

Teksti i rezolutës thotë se shtetet anëtare mund të marrin pjesë në Bordin e Paqes të kryesuar nga Trumpi, i konceptuar si një autoritet tranzitor që do ta mbikëqyrte rindërtimin dhe rimëkëmbjen ekonomike të Gazës.

Ai gjithashtu autorizon forcën ndërkombëtare të stabilizimit, e cila do të siguronte procesin e çmilitarizimit të Gazës, përfshirë shkatërrimin e armëve dhe infrastrukturës ushtarake.

Hamas, në një komunikatë, e përsëriti se nuk do të çarmatoset dhe argumentoi se lufta e tij kundër Izraelit është qëndresë legjitime.

“Rezoluta vendos një mekanizëm të kujdestarisë ndërkombëtare mbi Rripin e Gazës, të cilin populli ynë dhe fraksionet tona e kundërshtojnë”, tha Hamas në komunikatën e lëshuar pas miratimit të rezolutës.

Çdo të enjte, zhvillimet më të rëndësishme përpiqemi t’jua zbërthejmë dhe t’jua sjellim sa më thjesht, shkurt e shqip. Regjistrohuni falas këtu për ta pranuar të parët në emailin tuaj çdo numër të newsletter-it tonë.

Mike Waltz, ambasadori amerikan në OKB, tha se rezoluta, e cila përfshin planin 20-pikësh të Trumpit si aneks, hap një rrugë të mundshme drejt vetëvendosjes për palestinezët … ku në vend të raketave do të ketë degë të ullirit dhe ku ekziston mundësia për t’u pajtuar për një horizont politik.

Rusia, e cila ka të drejtën e vetos në Këshillin e Sigurimit, e kishte lënë të hapur më herët mundësinë e kundërshtimit, por u përmbajt nga votimi, duke lejuar që rezoluta të kalojë.

Ambasadorët e Rusisë dhe Kinës në OKB, që gjithashtu u përmbajtën, u ankuan se rezoluta nuk i jep OKB-së rol të qartë në të ardhmen e Gazës./S.K/EO/REL/