Sport

Forma e futbollistëve shqiptarë në Evropë

Lojtarët tanë aktivizohen në liga të ndryshme evropiane siç janë: La Liga, Bundesliga, Superliga e Turqisë, Superliga e Rumanisë.

Published

on

Futbollistët shqiptarë po përjetojnë paraqitje mjaft të mira me skuadrat e tyre në Evropë. Paraqitjet e tyre po u ndihmojnë skuadrave për t’i arritur objektivat dhe në të njëjtën kohë lojtarët po zhvillohen mjaft mirë në aspekt individual.

Lojtarët po aktivizohen në liga të ndryshme evropiane siç janë: La Liga, Bundesliga, Superliga e Turqisë, Superliga e Rumanisë.

Lista fillon me Albion Rrahmanin, i cili këtë verë u transferua nga kampionët në fuqi të Kosovës, Ballkani, për te Rapid Bucuresti, në Rumani. Qendersulmuesi 23-vjeçar, me Rapid Bucuresti-n gjatë këtij sezoni numëron 14 paraqitje në të gjitha garat ku edhe arriti të shënoj plot 11 herë dhe të asistoj dy herë. Mirëpo përveç paraqitjeve me kryeqytetasit rumun, shtatlarti kosovar gjatë këtij edicioni regjistroi edhe katër paraqitje me Ballkanin në kuadër të kompeticioneve të UEFA-s (Play-Off te Champions League dhe Conference League) ku po ashtu shënoi dy gola dhe dhuroi tri asiste.

Më pas është Florent Muslija, i cili këtë sezon e filloi te skuadra e Paderborn në Bundesliga 2, për t’u transferuar më pas në kampionatin elitar të Gjermanisë, te Freiburg. 25-vjeçari luan në pozitën e mesfushorit të avancuar dhe gjatë këtij sezoni me të dyja klubet ka arritur të shënoj nëntë gola dhe katër asistime në 23 paraqitje.

Ernest Muci është lojtari i radhës i cili po shkëlqen këtë sezon. 22-vjeçari së fundmi u transferua te Besiktas nga kampionati polak ku aktivizohej te Legia Warszawa. Sulmuesi i kombëtares shqiptare, në gjysmën e parë të sezonit arriti të shënoj nëntë gola dhe të asistoj vetëm një herë me fanellën e Leigias në të gjitha garat. Kurse pas transferimit te Besiktas, ai gjeti rrugën e rrjetës njëherë në katër ndeshje të luajtura.

Pastaj kalojmë te Arbnor Muja, i cili po ashtu gjatë afatit kalimtar të dimrit bëri një lëvizje drejt superligës turke te Samsunspor. Muja në fillim të këtij edicioni luante me Antwerpin, në Belgjikë ku pati 34 paraqitje në të cilat shënoi gjashtë gola dhe tri asistime në të gjitha garat. Ndërsa pas transferimit në kampionatin turk, 25-vjeçari shënoi një gol në tri ndeshje.

Listës nuk i mungon edhe Myrto Uzuni. 28-vjeçari po bën mjaft mirë me fanellën e Granada-s në La Liga këtë edicion. Sulmuesi i Kombëtares së Shqipërisë ka luajtur 25 ndeshje deri më tani ku shënoi shtatë herë dhe dhuroi një asistim.

Krejt në fund kësaj renditje i bashkohet Vedat Muriqi, i cili deri më tani me fanellën e Mallorca-s ka arritur shifrën e pesë golave në 18 paraqitje. Po ashtu, qendërsulmuesi i Kombëtares së Kosovës asistoi edhe dy herë të tjera gjatë këtyre ndeshjeve./UBTNews/

Shkroi: Arti Haziraj

Aktualitet

​Nora Gjakova nis rrugëtimin si trajnere e xhudos

Published

on

Federata e Xhudos së Kosovës ka nisur një kapitull të ri me përfshirjen e kampiones olimpike, Nora Gjakova, në rolin e trajnere asistente të ekipit të meshkujve. Ajo tashmë i është bashkuar stafit teknik dhe po punon me plot energji e përkushtim në stërvitjet që po mbahen në Bordeaux të Francës.

Në këtë grumbullim, ekipi i meshkujve po përgatitet intensivisht për garat e rëndësishme që i presin në muajt e ardhshëm. Nën drejtimin e trajnerëve dhe me mbështetjen e Norës, xhudistët Akil Gjakova, Shpati Zekaj, Dardan Cena dhe Anes Veseli po zhvillojnë seanca të forta stërvitore, duke dhënë maksimumin në çdo hap të përgatitjeve.

Përfshirja e Nora Gjakovës në stafin e trajnerëve shihet si një vlerë e madhe për ekipin, duke sjellë përvojën e saj të pasur ndërkombëtare dhe frymën e suksesit që ka shoqëruar karrierën e saj si sportiste.

Kosova shpreson se ky kombinim i përvojës dhe energjisë së re do të sjellë rezultate të reja pozitive për xhudon kosovare në arenën ndërkombëtare.

Continue Reading

Sport

Presioni mbi Ruben Amorim rritet, Manchester United përgatit plan emergjent për trajnerin

Published

on

By

Problemet e Manchester United vazhduan mbrëmjen e së mërkurës me humbjen e papritur ndaj Grimsby Town në Kupën e Ligës, e cila u vendos pas penalltive. Pas kësaj, pronarët e klubit, Grupi Ineos, kanë kërkuar nga departamenti i futbollit të përgatisë një listë të shkurtër me kandidatë për trajner në rast se do të duhet shkarkimi i Ruben Amorim.

Sipas mediave, trajneri portugez, i sjellë në “Old Trafford” nga Sporting Lisbona me një kontratë të majme, po përballet me presion të madh pas pozicionit të dobët të skuadrës në renditje, duke zënë vendin e 16-të në Premier League.

Në listën e kandidatëve për zëvendësimin e tij përfshihen Andoni Iraola, trajneri i Bournemouth, i njohur për performancën e tij të mirë në Ligën Premier dhe eksperiencën në Spanjë me Mirandes dhe Rayo Vallecano, si dhe Oliver Glasner, trajneri aktual i Crystal Palace.

Manchester United duket i gatshëm të ndërmarrë veprime drastike në rast se rezultatet nuk përmirësohen në ditët në vijim.

Continue Reading

Sport

Leart Paçarada kalon te FC Heidenheim

Published

on

By

FC Heidenheim 1846 ka konfirmuar nënshkrimin e mbrojtësit kosovar Leart Paçarada, i cili vjen nga FC Köln.

Paçarada, 30 vjeç, ka zgjedhur të ndryshojë ambientin, por do të vazhdojë të luajë në Bundesligë, pasi kalon në skuadrën gjermane të Heidenheim. Mbrojtësi i majtë ka firmosur një kontratë që do ta mbajë te klubi deri në verën e vitit 2027.

Njoftimi është bërë zyrtar nga faqja e klubit, ku theksohet se Paçarada i bashkohet skuadrës së Bundesligës nga rivalët e FC Köln.

Në skuadrën e re, ai do të luajë së bashku me dy futbollistë tjerë me prejardhje shqiptare, Arijon Ibrahimovic dhe Diant Ramaj.

Continue Reading

Sport

Drita përballë Differdange në ndeshjen kthyese të Ligës së Konferencës, synon kualifikimin historik

Published

on

By

Drita do të luajë si mysafire ndaj Differdange në ndeshjen kthyese të fazës ‘play-off’ të Ligës së Konferencës, me synimin për t’u kualifikuar për herë të parë në grupet e një gare evropiane.

Takimi zhvillohet në “Stade Municipal de la Ville de Differdange” me fillim nga ora 20:00. Ekipi i trajnerit Zekirija Ramadani do të kërkojë të ruajë avantazhin 2-1 nga ndeshja e parë në Prishtinë.

“Intelektualët” synojnë të fitojnë apo të sigurojnë të paktën një barazim, që do t’i çonte në fazën e grupeve të Ligës së Konferencës për herë të parë në histori.

Nëse arrin kualifikimin, Drita do të bëhet klubi i dytë kosovar që e arrin këtë sukses, pas Ballkanit, i cili ka luajtur dy herë në grupet e këtij kompeticioni.

Continue Reading

Të kërkuara