E fejuara e të ndjerit Liam Payne, Maya Henry, raportohet se po përgatit një dokumentar mbi marrëdhënien e tyre, një vit pas vdekjes tragjike të këngëtarit, i cili humbi jetën pas rënies nga ballkoni i një hoteli në tetor të vitit 2024.

Payne, ish-anëtar i One Direction, dhe modelja Henry ishin së bashku për tre vite, derisa fejesa e tyre u ndërpre në vitin 2022.

Sipas “The Sun”, Henry po bashkëpunon me HBO dhe një kompani të pavarur prodhimi për realizimin e tij. Ky dokumentar ka ngritur shqetësime tek familja e artistit, e cila ende po përballet me humbjen e tij.

Një burim tha: Dokumentari do të jetë i dhimbshëm për familjen, që po jetojnë humbje të paimagjinueshme. Ekziston frika se filmi mund të jetë i njëanshëm. Liam nuk është më për të dhënë versionin e ngjarjeve e kjo e bën gjithçka edhe më të rëndë. Thjesht është e trishtueshme.

Projekti pritet të ndalet tek marrëdhënia e tyre, por edhe tek vala e kritikave dhe sulmeve që Henry mori nga fansat e One Direction kur çifti bëri publike lidhjen. Në shkurt të këtij viti, Maya Henry foli për herë të parë për Payne, katër muaj pas vdekjes së tij, e deklaroi se këngëtari luftonte me varësinë nga heroina dhe se dërgonte mesazhe me përmbajtje seksuale fansave femra.

Ajo shtoi se dashuria për të ishte e madhe, por se sjelljet e tij nën ndikimin e drogës e kishin vënë në situata të rrezikshme dhe të dëmshme.

Duke folur për Rolling Stone, Henry u shpreh: “Në fillim ishte përdorimi i drogës dhe varësia që na larguan. Kushdo që ka qenë pranë një personi të varur e kupton sa e vështirë është. Edhe pse e doja thellë, më lëndoi në mënyra që nuk do t’i kuptoj kurrë e vazhdoi të më lëndonte edhe vite pasi u ndamë.” /A.Z/UBT News/

Ornella Vanoni, një nga ikonat më të mëdha të muzikës italiane, ka ndërruar jetë në moshën 91-vjeçare në shtëpinë e saj në Milano, duke lënë pas një trashëgimi artistike që ka shkelur kufijtë e Italisë.

Me një karrierë që zgjati më shumë se shtatë dekada, Vanoni u bë e njohur që në vitet ’60, një periudhë kur skena muzikore italiane po lulëzonte, dhe festivalet televizive u bënë porta e saj drejt famës.

Këngë si “Senza fine” dhe “L’appuntamento” i dhanë Vanonit një identitet unik dhe dashurinë e publikut, duke e vendosur si një nga gurët themelorë të muzikës moderne italiane.

Me 40 albume në diskografi e mbi 55 milionë disqe të shitura, ajo mbetet një nga artistet më të suksesshme dhe më të dashura për dëgjuesit.

Jo vetëm në Itali, Vanoni u bë e njohur edhe globalisht, duke përfshirë edhe paraqitjen në “Ocean’s Twelve”, ku zëri i saj solli elegancë dhe nostalgji. Ajo la një gjurmë të pashlyeshme në kulturën pop dhe klasike, duke u konsideruar simbol i artit dhe integritetit artistik.

Sipas dëshirës së saj, ceremonia mortore do të jetë e thjeshtë, pa luks të madh, një zgjedhje që pasqyron modestinë dhe natyrën e sinqertë.

Edhe pse Vanoni nuk është më, fjalët dhe tingujt e këngëve të saj vazhdojnë të jetojnë, duke ruajtur shpirtin e një artiste që ndryshoi botën me muzikën e saj. /A.Z/UBT News/

Këngëtarja dhe aktorja Ariana Grande konfirmoi se ka rezultuar pozitive me COVID-19, pas një periudhe intensive udhëtimesh dhe paraqitjesh publike për promovimin e filmit të saj të ri, Wicked: For Good.

Lajmin ajo e bëri të ditur përmes një postimi në Instagram Story, ku ndau një foto nga paraqitja e saj në The Tonight Show Starring Jimmy Fallon, vetëm pak çaste para se të shfaqte simptomat, me mbishkrimin: “Moments before Covid”.

Ariana ka qenë këto ditë në një tur global, duke udhëtuar nga një kontinent në tjetrin për premierat dhe eventet promocionale të filmit.

Gjatë premierës në New York, nuk doli në tapetin e kuq për të treguar solidaritet me Cynthia Erivo, e cila humbi zërin për shkak të një viroze. Infektimi e detyroi Arianën të anulojë paraqitjen në The Kelly Clarkson Show, si dhe disa sesione Q&A me fansat.

Interesante është si Ariana, ashtu dhe Cynthia, rezultuan pozitiv me COVID edhe gjatë xhirimeve të filmit, por në periudha të ndryshme.

Megjithatë, filmi pritet të ketë një start të suksesshëm në kinema, me të ardhura të parashikuara rreth 150 milionë dollarë në hapje, duke shënuar një nga daljet më të shumëpritura të vitit. /A.Z/UBT News/