Në prag të 20-vjetorit të themelimit të saj, YouTube nuk është më thjesht platformë për video amatore pa përpunim. Sot, numëron 2.7 miliardë përdorues dhe është bërë një nga mjetet më të fuqishme të medias globale.

Kur nisi më 2005, YouTube ishte hapësirë ku përdoruesit e zakonshëm ngarkonin video të thjeshta dhe autentike, shpesh me cilësi të ulët dhe pa ndihmën e profesionistëve.

Por, krijuesit janë më të specializuar dhe mes tyre ka edhe emra të mëdhenj nga fusha të ndryshme, përfshirë edhe yje të njohur ndërkombëtarisht si këngëtarja shqiptare Dua Lipa, e cila ndan me fansat video me cilësi të lartë.

YouTube ka ndryshuar mënyrën se si amerikanët konsumojnë media, duke u bërë kanali kryesor për shikimin e përmbajtjeve televizive. Statistikat tregojnë se platforma ka më shumë përdorues dhe vizita sesa televizionet tradicionale, duke u bërë alternativa kryesore për argëtim në mbarë botën.

Parashikohet që YouTube të tejkalojë këtë vit të ardhurat e Disney-t, një tregues i fuqisë së jashtëzakonshme që ka arritur. Në të njëjtën kohë, platforma po investon në Inteligjencën Artificiale për të përmirësuar krijimin e përmbajtjeve të reja.

Së fundmi, YouTube prezantoi produkte të reja e përzgjodhi disa prej krijuesve më të suksesshëm në platformë, si Dua Lipën, Mark Roberin, Smoshin dhe Brandon B, siç raportoi Reuters të mërkurën. /A.Z/UBT News/

Vrasja e aktivistit amerikan Charlie Kirk, më 10 shtator, ka tronditur opinionin publik në Shtetet e Bashkuara, duke shkaktuar reagime të shumta dhe masa të ashpra nga autoritetet.

Departamenti i Shtetit ka njoftuar se do të revokojë ose refuzojë vizat për personat që kanë festuar publikisht humbjen e jetës së Kirk.

Në këtë klimë tensioni, ish-guvernatori i Kalifornisë dhe aktori i njohur Arnold Schwarzenegger ka dhënë një deklaratë të fortë, duke paralajmëruar se vendi po rrezikon të humbasë themelet demokratike.

“Duhet të jemi të kujdesshëm të mos afrohemi pranë greminës. Sepse, nëse rrëzohemi, aty poshtë nuk ka demokraci,” u shpreh ai.

Schwarzenegger theksoi se qytetarët kanë në dorë fuqinë për të ndryshuar situatën përmes pjesëmarrjes aktive në zgjedhje.

“Populli ka fuqinë përfundimtare dhe kjo shprehet përmes votës,” deklaroi ai, duke bërë thirrje për angazhim politik.

Në X, aktori reagoi duke nënvizuar se shumica e njerëzve në jetën reale tregojnë respekt, ndryshe nga pakicat që shpërndajnë urrejtje.

“Mos lejoni që platformat dhe influencerët të ju bindin se e keqja është shumicë. Ajo është një pakicë e zhurmshme që merr shumë vëmendje,” shkroi Schwarzenegger. /A.Z/UBT News/

Reperja e njohur Cardi B ka zbuluar lajmin e madh se është në pritje të fëmijës së saj të katërt, dhe për herë të parë me partnerin e saj, futbollistin e NFL, Stefon Diggs.

Lajmin e konfirmoi gjatë intervistës në “CBS Mornings” ku shprehu emocionet për këtë fazë të re të jetës.

“Jam duke sjellë në jetë një fëmijë me të dashurin Stefon Diggs,” – u shpreh Cardi, duke shtuar se është në muajt e fundit të shtatzënisë dhe pritet të lindë para turit të ri, Little Miss Drama, që nis në shkurt.

Ndërkohë, ajo është në prag të publikimit të albumit të ri Am I The Drama, më 19 shtator. Ylli theksoi se ndihet e lumtur dhe në harmoni, ajo dhe Stefon e mbështesin fuqishëm njëri-tjetrin.

“Ai më bën të ndihem e sigurt dhe e fuqishme, sikur mund të pushtoj botën,” tha ajo e emocionuar.

Ky lajm vjen disa muaj pas përfundimit të marrëdhënies me Offset, me të cilin Cardi ka tre fëmijë: Kulture (7), Wave (4) dhe Blossom (1).

Divorci është ende në proces, por ajo ka nisur një kapitull të ri në jetë.

Lidhja me Diggs u bë publike në maj 2025, kur çifti u shfaq në ndeshje basketbolli të New York Knicks.

Që atëherë, kanë ndarë momente romantike, përfshirë një ditë Shën Valentini në Miami dhe surpriza të shtrenjta, si ora luksoze Patek Philippe prej 73 mijë dollarësh që futbollisti i dhuroi artistes këtë verë.

/A.Z/UBT News/

Aktori i njohur Leonardo DiCaprio ka bërë një dedikim prekës për kolegun e tij, legjendën e Hollywood-it Robert Redford, i cili ndërroi jetë dje në moshën 89-vjeçare.

Gjatë jetës, Redford u dallua jo vetëm për karrierën në kinema, por edhe për angazhimin e tij në çështje mjedisore dhe përkrahjen e artistëve të rinj. Ai ishte themelues i Sundance Institute, një organizatë që ka ndihmuar me mijëra kineastë të pavarur të tregojnë historitë e tyre përmes festivalit me të njëjtin emër.

Në një postim në Instagram, DiCaprio shkroi:

“Ai ishte një aktor i shkëlqyer, aktivist, ambientalist i pasionuar dhe kampion i arteve. Angazhimi i tij për të mbrojtur planetin tonë dhe për të nxitur ndryshimin u shoqërua me një talent të jashtëzakonshëm. Ndikimi i tij do të jetojë përtej brezave.”

Gjatë premierës së filmit One Battle After Another, DiCaprio u shpreh më tej:

“Ai ishte një udhëheqës i palëkundur në mbrojtjen e mjedisit, një zë i fuqishëm për të drejtat e njerëzve dhe një koleg frymëzues. Sot, humbëm një legjendë të madhe.”

Përveç Sundance-it, më 2005, Redford me djalin e tij, James, themeluan Qendrën Redford – një organizatë që mbështet prodhimin e filmave që trajtojnë çështje mjedisore dhe ndryshimet klimatike. /A.Z/UBT News/