Ish-bashkëshorti i këngëtares australiane Sia ka kërkuar më shumë se 250 mijë dollarë në muaj si pagesë për mbështetje bashkëshortore, sipas dokumenteve të dorëzuara në një gjykatë në SHBA, raporton BBC.

Sia, e njohur për hitet ndërkombëtare “Chandelier” dhe “Titanium”, paraqiti kërkesën për divorc në mars, duke përmendur “mospërputhje të papërmirësueshme” me bashkëshortin e saj, Daniel Bernard.

Në dokumentet gjyqësore, Bernard një ish-mjek – tha se kishte nevojë për këtë shumë për të ruajtur “stil jetese luksoz dhe të klasës së lartë” që kishte pasur gjatë martesës me këngëtaren.

Ai pretendoi se ishte bërë financiarisht i varur nga Sia, pasi kishte lënë profesionin e tij për të ndjekur një biznes të përbashkët mjekësor, i cili zgjati shumë pak. Çifti, që u martua në dhjetor 2022, ka një djalë 18-muajsh. Dokumentet zbulojnë se ata shpenzonin më shumë se 400 mijë dollarë në muaj për udhëtime me avion privat, pushime luksoze, darka në restorante ekskluzive dhe staf të përhershëm shtëpiak.

“Nuk kemi pasur kurrë nevojë të kontrollonim shpenzimet tona,” – ka shkruar Bernard në deklaratën e tij.

47-vjeçari theksoi se kërkesa për mbështetje të përkohshme financiare është “e domosdoshme”, pasi Sia ishte mbajtësja kryesore e familjes.

Ai shtoi se për t’u rikthyer në profesionin e tij si mjek do t’i duheshin vite trajnimi dhe disa provime të vështira për të rifituar licencën e punës. Bernard ka kërkuar që Sia të mbulojë kostot ligjore dhe shpenzimet e auditimeve financiare të procesit. /A.Z/UBT News/

Dizajnerja e njohur Maria Grazia Chiuri është rikthyer te brendi romak “Fendi”, këtë herë si drejtoreshë kreative e shtëpisë së njohur të modës.

Ajo do të prezantojë koleksionin e saj të parë për vjeshtë/dimër 2026 gjatë Javës së Modës në Milano, në shkurt të vitit të ardhshëm.

Emërimi vjen gjashtë muaj pas largimit nga “Dior”, shënon rikthim “në shtëpi”, pasi Chiuri kishte punuar në “Fendi” për 10 vjet, nga 1989 deri 1999, si dizajnere e aksesorëve. Gjatë kësaj periudhe, krijoi një nga simbolet më të njohura të markës, çantën ikonike “Baguette”.

“Maria Grazia Chiuri është një nga talentet më të mëdha kreative në botën e modës sot, jam i lumtur që ka zgjedhur të kthehet te ‘Fendi’ për të vazhduar të shprehë kreativitetin e saj brenda grupit LVMH. Jam i bindur se ajo do të kontribuojë në rilindjen artistike dhe suksesin e ardhshëm të shtëpisë, duke ruajtur trashëgiminë e saj unike,” tha Bernard Arnault, kryetar dhe CEO i LVMH Group.

Pas largimit të Kim Jones në tetor 2024, “Fendi” kishte mbetur pa drejtor të përhershëm për linjën e grave. Deri tani, Silvia Venturini Fendi, mbesa e themeluesve Adele dhe Edoardo Fendi, kishte marrë përsipër edhe drejtimin e linjës së grave, përveç asaj të burrave.

Më 29 shtator, ajo u promovua në një rol të ri si presidente nderi.

“Jam i lumtur që mirëpres Maria Grazia-n në ekip. Sot, roli i një drejtori kreativ nuk është thjesht të dizajnojë rroba të bukura, por të krijojë kulturë ereflektojë botën ku jetojmë. Talenti dhe vizioni i saj do të jenë thelbësorë për forcimin e trashëgimisë së ‘Fendit’ dhe zhvillimin e gjeneratës së re të talenteve,” tha Ramon Ros, kryetar dhe CEO i “Fendit”.

Chiuri e përshkroi rikthimin e saj si një moment personal dhe profesional shumë të rëndësishëm.

“Unë kthehem në Fendi me nder dhe gëzim, pata privilegjin të filloja karrierën time nën udhëheqjen e pesë motrave Fendi. Kjo shtëpi ka qenë vatër talentesh e pikënisje për shumë krijues në industri. Jam mirënjohëse ndaj z. Arnault që më ka besuar detyrën për të shkruar një kapitull të ri në historinë e këtij brendi të jashtëzakonshëm që u themelua nga gratë,” tha ajo.

Përveç aspektit profesional, rikthimi është i përshtatshëm edhe personalisht, pasi “Fendi” ka selinë në Romë, aty ku Chiuri është zhvendosur pas largimit nga “Dior”, që ka seli në Paris. Kohët e fundit, ajo ka punuar në projekte që i apasionojnë, përfshirë restaurimin e Teatro Della Cometa, një hapësirë historike për shfaqje në kryeqytetin italian.

Karriera ka qenë e lidhur me modën italiane. Pas “Fendi”, Chiuri dhe bashkëpunëtori Pierpaolo Piccioli u bashkuan me brendin tjetër të njohur, “Valentino”, ku u bënë drejtorë kreativë të përbashkët në vitin 2008.

Më 2016, u bashkua me “Dior”, duke u bërë gruaja e parë që drejtoi linjën e veshjeve të grave në historinë e shtëpisë franceze. Gjatë periudhës atje, Chiuri i dha modës një dimension të ri, duke e lidhur me mesazhe feministe, qartësisht të dukshme në koleksionin e saj të parë me bluzat “We should all be feminists”.

Ajo bashkëpunoi me si Judy Chicago, Faith Ringgold e Mickalene Thomas, duke zgjeruar horizontin kulturor të markës. Sipas të dhënave të HSBC, shitjet e “Dior” u rritën nga 2.2 miliardë euro më 2017 në 9.5 miliardë euro më 2023, gjatë drejtimit të saj. /A.Z/UBT News/

Pas shprehjes së shqetësimit nga ish-bashkëshorti i saj, Kevin Federline, ylli i popit Britney Spears publikoi një mesazh të fuqishëm dhe reflektiv në Instagram, që nxiti shumë diskutime.

Ajo u kërkoi ndjekësve të saj të ndërtojnë një familje sipas zgjedhjes së tyre, veçanërisht nëse ndihen të pa respektuar nga familja e tyre biologjike, raporton E! News.

“Ndero babanë dhe nënën tënde, por mbroje gjithmonë zemrën tënde. Nderoji vetëm nëse të kanë nderuar ty! Nëse jo, gjej një familje të re,” shkroi Britney më 14 tetor.

Ky postim enigmatik erdhi vetëm disa orë pasi u publikuan fragmentet e librit të Federline, “You Thought You Knew”, botuar më 21 tetor.

Në librin e tij, Federline pretendon se Britney dyshohet se ka vëzhguar djemtë e tyre, Sean Preston dhe Jayden James, duke fjetur me një thikë pranë tyre. /A.Z/UBT News/