Pas konferencës për shtyp të presidentit Donald Trump në Shtëpinë e Bardhë, ku ai shprehu dëshirën që SHBA të “marrë nën kontroll Gazën dhe ta rindërtojë atë”, reagoi  dhe zyrtari i lartë i Hamasit, Sami Abu Zuhri.

Ai kundërshtoi planin e SHBA-ve dhe e quajti propozimin “qesharak” dhe “absurd”.

“Çdo ide e këtij lloji është në gjendje të ndezë rajonin,” tha ai për agjencinë e lajmeve Reuters.

Abu Zuhri reagoi gjithashtu ndaj sugjerimit të Trump për zhvendosjen e palestinezëve nga Gaza në vendet fqinje, duke e cilësuar atë si një “recetë për krijimin e kaosit dhe tensionit në rajon”.

“Populli ynë në Rripin e Gazës nuk do të lejojë që këto plane të realizohen. Ajo që kërkohet është t’i jepet fund okupimit dhe agresionit kundër popullit tonë, jo dëbimi i tyre nga toka e tyre,” deklaroi ai.

Propozimi i Trump për marrjen e kontrollit të Gazës dhe zhvendosjen e popullsisë palestineze, ka shkaktuar reagime të forta në skenën ndërkombëtare, veçanërisht mes vendeve arabe dhe organizatave ndërkombëtare që kanë kundërshtuar më parë iniciativa të ngjashme.

Jordania dhe Egjipti kanë qenë dy vendet e para që kanë refuzuar planin e Trump.

Presidenti i SHBA-së Donald Trump lëshoi një memorandum duke urdhëruar qeverinë amerikane të ushtrojë “presion maksimal” ndaj Iranit.

Ai thotë se SHBA duhet t’i jep fund “tolerancës së administratës së mëparshme ndaj kërcënimeve të Iranit ndaj qytetarëve dhe bizneseve amerikane” dhe se Trump “nuk do të tolerojë që Irani të ketë armë bërthamore”.

Ai gjithashtu nënshkroi një urdhër ekzekutiv që pezullon fondet për agjencinë palestineze të refugjatëve UNRWA.

“Departamentet dhe agjencitë ekzekutive nuk do të përdorin asnjë fond për kontribute, grante apo pagesa të tjera për UNRWA”, thuhet në urdhër.

Ai thotë se agjencia ishte “gjoja e infiltruar nga anëtarë të grupeve të përcaktuara prej kohësh nga SHBA si organizata të huaja terroriste” dhe se punonjësit e saj ishin të përfshirë në sulmin e Hamasit ndaj Izraelit më 7 tetor.

Izraeli ka akuzuar 18 punonjës të UNRWA për pjesëmarrje në sulm. Një hetim i OKB-së më pas zbuloi se nëntë punonjës mund të kenë qenë të përfshirë dhe agjencia i pushoi ata. Megjithatë, zyrtarët e OKB-së hedhin poshtë shumicën e akuzave të Izraelit kundër tyre dhe këmbëngulin se UNRWA është e paanshme.

Një sulm me armë zjarri që ndodhi një ditë më parë në kampusin e qytetit suedez Örebro ka shkaktuar vdekjen e 11 personave dhe plagosjen e gjashtë të tjerëve, në atë që kryeministri suedez e ka cilësuar si të shtënat masive më të rënda në historinë e vendit.

Shefi i policisë lokale, Roberto Eid Forest, deklaroi se viktimat ende po identifikohen, por besohet se sulmuesi kryesor, i cili nuk ishte i njohur më parë për policinë është mes të vdekurve.

Sipas tij, nuk ka pasur asnjë shenjë paralajmëruese për këtë sulm, i cili ndodhi rreth orës 12:30 pasdite me orën lokale të martën. Kampusi ku ndodhi ngjarja përfshinte një qendër edukimi për të rritur dhe ambiente të tjera mësimore.

Autoritetet lokale konfirmuan se gjashtë persona janë dërguar në spital, pesë prej tyre me plagë nga arma e zjarrit. Njëri prej pacientëve ndodhet në gjendje kritike për jetën.

Policia ka nisur një hetim mbi ngjarjen, duke e cilësuar atë si vrasje, zjarrvënie dhe një vepër të rëndë me armë. Ndërkohë, kampusi dhe shkollat përreth janë evakuuar dhe autoritetet kanë siguruar se nuk ka më rrezik për sulme të tjera, megjithëse nuk përjashtohet mundësia e përfshirjes së personave të tjerë në ngjarje.