Galatasaray ka nderuar kujtimin e legjendës së klubit, Xhevat Prekazit, i cili ndërroi jetë në moshën 69-vjeçare, duke publikuar një video me disa nga momentet më të bukura të tij me fanellën e skuadrës turke.

Në videon e publikuar, klubi nga Stambolli ka rikthyer në vëmendje golat spektakolarë të futbollistit nga Mitrovica, i cili shquhej për teknikën, goditjet e fuqishme nga distanca dhe aftësitë e jashtëzakonshme individuale.

Prekazi ishte një prej figurave të rëndësishme në historinë e Galatasarayt, me të cilin fitoi dy tituj të kampionit të Turqisë, në sezonet 1986/87 dhe 1987/88. Para ardhjes së tij, klubi turk kishte pritur plot 17 vjet për të fituar titullin e kampionit.

Gjatë periudhës 1985–1991, Prekazi regjistroi 229 paraqitje me fanellën e Galatasarayt, duke shënuar 44 gola.

Videoja e publikuar nga klubi përmban edhe një deklaratë të veçantë të vetë Prekazit, ku ai kishte shprehur dëshirën që edhe pas vdekjes të mbetet i lidhur me dy klubet e zemrës, Galatasarayn dhe Partizanin.

“Kur të vdes, pasi të gjithë asaj rruge jemi, i them gruas time, dua të ma vendosin në arkivol fanellën e Galatasarayt, por edhe të Partizanit, natyrisht”, dëgjohet duke thënë Prekazi në videon e publikuar.

Me golat, teknikën dhe kontributin e tij, Xhevat Prekazi la gjurmë të pashlyeshme në historinë e Galatasarayt, duke mbetur një emër i paharruar për tifozët e klubit turk.

D.L

KV Ferizaj ka bërë të ditur destinacionin e radhës, duke paralajmëruar pjesëmarrjen në garat evropiane të volejbollit, CEV Challenge Cup.

Përmes një postimi në rrjetet sociale, klubi ferizajas ka publikuar mesazhin “Next Stop to Czech Republic”, duke konfirmuar se Çekia do të jetë ndalesa e radhës për ekipin.

KV Ferizaj do të ketë mundësinë të përfaqësojë volejbollin kosovar në arenën ndërkombëtare, në një tjetër sfidë të rëndësishme evropiane.

D.L

Kombëtarja e Zvicrës do të jetë pa kapitenin Granit Xhaka në dy ndeshjet e fundit të këtij viti, për shkak të një lëndimi.

Federata e Futbollit e Zvicrës ka njoftuar të hënën se mesfushori nuk do të jetë në dispozicion për shkak të lëndimit në pulpë, të cilin e pësoi në ndeshjen e së dielës mes Sunderlandit dhe Chelseat.

Xhaka u detyrua të largohej nga fusha që në minutën e katërt të takimit, pas shqetësimeve fizike.

Kështu, kapiteni zviceran nuk do të mund të rikthehet në përfaqësuese, pasi kishte munguar edhe në grumbullimin e kaluar për shkak të zhvillimeve lidhur me rastin e certifikatës së falsifikuar të vaksinimit kundër COVID-19.

Zvicra në dy ndeshjet e ardhshme do të përballet me Slloveninë dhe Skocinë, në kuadër të Ligës së Kombeve.

Përveç Xhakës, përfaqësueses zvicerane do t’i mungojë edhe Miro Muheim.

D.L

Përfaqësuesja e Kosovës në karate ka arritur një rezultat të shkëlqyer në Kampionatin Ballkanik të zhvilluar në Stamboll të Turqisë, duke grumbulluar gjithsej 10 medalje, prej të cilave një e artë, tri të argjendta dhe gjashtë të bronzta.

Dita e fundit e garave solli tri medalje të bronzta në konkurrencën ekipore. Ekipi i djemve për kadetë, ekipi i vajzave për kadete si dhe ekipi i djemve për juniorë arritën të ngjiten në podiumin e fituesve duke siguruar medalje të bronzta për Kosovën.

Në garat individuale, suksesin më të madh e shënoi Emira Maqedonci, e cila u kurorëzua kampione e Ballkanit duke fituar medaljen e artë. Me medalje të argjendta u nderuan Suela Arifi, Qëndresa Ibrahimi dhe Prijam Gashi, ndërsa medaljet e bronzta në konkurrencën individuale i rrëmbyen Alea Kelmendi, Krenar Ismajli dhe Amar Daku.

Rezultati i arritur në Stamboll rikonfirmon ngritjen e karatesë kosovare në arenën rajonale, me federatën, trajnerët dhe sportistët që morën urime të shumta për përfaqësimin dinjitoz të flamurit të Kosovës. /E.A/