Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 23 gusht 1993

Në ndeshjen e trenit me autobus në Pomozotin të Fushë-Kosovës humbën jetën 19 udhëtarë

Sot, rreth orës 6.30 të mëngjesit, treni i udhëtarëve që qarkullonte në drejtimin Fushë-Kosovë – Pejë, në vendkalimin Pomozotin të Fushë Kosovës, u përplas në autobusin e Eektroekonomisë së Kosovës, që po i dërgonte punëtorët në ndërresën e parë.

Sipas njoftimeve të para jozytare, të cilat i dha gjykatësi hetues, deri tani është konstatuar se në vendin e ngjarjes kanë vdekur 19 veta, kurse 17 të tjerë janë gjendje të rëndë shëndetësore.

Udhëtarët që morën lëndime të këtë ndeshje u vendosën në Klinikat e Fakultetit të Mjekësisë në Prishtinë.

23 gusht 1994

Represioni në Kosovë

Podujevë: – Dje në Dobërdol të Podujevës, me pretekst të kërkimit të amërve, u bastis shtëpia e Selman Hashim Gashit, i cili dorëzoi një pushkë të vjetër.

Dje policia serbe ishte edhe në shtëpinë e Abdullah Hakiqit në Podujevë. Pasi Abdullahu gjendet në botën e jashtme, policia kërkoi nga anëtarët e familjes që të paraqiten në polici dhe të dorëzojnë një pushkë dhe një revole.

Prishtinë: – Dje në fshatin Vranidoll të Prishtinës, në orën 9,15, u bastisën shtëpitë e Hajdin dhe Rrahim Bekollit. Nga nëna e këtyre dy vëllezërve u morën dy revole, pronë e bashkëshortit të saj që ka vdekur para katër vjetësh.

Në këtë fshat para katër ditësh ka qarkulluar shumë herë policia. Pardje, në orën 14,30, policët serbë të stacionit të Lluzhanit, me pretekst të kërkimit të armëve, morën Ruzhdi dhe Ilmi Statovcin nga lagja Kodra e Trimave. Nga Ruzhdiu policët kërkonin një automatik dhe një mitraloz. Ai u rrah nga policia dhe mori urdhër që të paraqitet sërish në stacionin e policisë në Lluzhan. Pejë: – Më 19 gusht, me pretekst të kërkimit të armëve, policia thirri për t’u paraqitur në stacionin e policisë Sherif Kastratin, Ahmet Tafilajn, Jakup Shalën dhe Adem Shalën nga fshati Dobërdol i Pejës.

Mitrovicë: – Policia serbe arrestoi në Gazivodë Fadil Hamitin (23) nga Mitrovica, i cili ishte nisur me autobus të “Kosovatransit” të Mitrovicës për në Ulqin. Policia zbriti Fadilin nga autobusi dhe ia dorëzoi pastaj policisë ushtarake serbe, e cilai e dërgoi në një kazermë të ushtrisë në Mitrovicë. Njoftohet se Fadili është marrë në ushtrinë serbe më 18 mars të vitit 1991, por ka dezertuar nga ushtria serbe në janar të vitit 1992.

Dje në fshatin Koshtovë të Gashit, komuna e Mitrovicës, policia kërkoi armë nga Xhavit Hajredini. Policia ka kërkuar nga ai që sërish të paraqitet në stacionin e policisë në Mitrovicë.

24 gusht 1994

Nga Greqia u kthyen 4 shqiptarë të vrarë

Ministria e Rendit Publik të Shqipërisë njoftoi dje se që nga 15 gushti i këtij viti, kur edhe filloi gjykimi i pesë shtetasve shqiptarë me përkatëse greke, nga Greqia u dëbuan 12.830 persona, prej të cilëve edhe 180 me dokumente të rregullta.

I njëjti burim po ashtu përmes RTSH njoftoi se nga kjo datë u kthyen edhe katër kufoma të të rinjëve që u vranë nga policia greke, më 19 gusht u kufoma e Hysen Gjokos (23), më 20 gusht e Ali Reçit (24), më 22 gusht e Driton Elez Muços (19) dhe më 23 gusht e Renato Selatin Muços (19).

23 gusht 1995

Në Kosovë janë vendosur 5 mijë e planifikohet të sillen edhe 7 mijë refugjatë serbë nga Kroacia

Ndonëse tashmë është e ditur se refugjatët serbë nga Kroacia nuk duan të vijnë në Kosovë, regjimi i Beogradit këmbëngul që Kosovën ta kolonizojë dhe serbizojë sa më shumë, duke i sjellë refugjatët nga Kroacia me dhunë.

Një delegacion i pushtetit të instaluar serb të Kosovës me në krye Millosh Neshoviqin dhe me disa zyrtarë të tjerë të Serbisë qëndroi dje në Apatin, ku siç thuhet, biseduan për zhvendosjen e refugjatëve serbë nga atje në Kosovë. Neshoviqi, i cili është një lloj gjysmëguvernatori për Kosovën, i deklaroi gazetës “Politika ekspres”: “Në rajonin e Kosovës aktualisht gjenden rreth 5.000 refugjatë nga Kraina dhe pa kurrfarë problemi mund t’i strehojmë menjëherë edhe 7.000 njerëz. Në Kosovë sot mund të ofrojmë shumë më tepër se në çdo pjesë të Serbisë. Në të gjitha 29 komunat po përshpejtohet parcelizimi i tokës, e cila së shpejti do t’u jipet refugjatëve për ta punuar. Çdo familjeje do t’i ofrojmë nga 2 hektarë toke të klasit të parë ose nga 3 hektarë të klasit të dytë e të tretë. Fjala është për tokën cilësore, me vreshta, kopshte dhe ara. Punë ka edhe për ata që duan të punojnë në ndërmarrje. Se cili është ky numër nuk e di, por pas disa ditëve edhe kjo do të dihet, pasi janë duke u evidentuar vendet e lira të punës”.

Siç shihet ky administrator serb fare nuk fsheh qëllimet e regjimit serb për kolonizimin e Kosovës me refugjatë serbë nga Kroacia.

Po kjo gazetë shkruan se përfaqësuesit e refugjatëve serbë shkuan në Kosovë, “për t’u bindur” se çfarë u ofrohet.

Me qëllim të shprishjes së strukturës homogjene etnike shqiptare, regjimi serb ka paraparë që në Skënderaj të dërgojë 400 refugjatë, por deri më tash nuk është sjellë asnjë refugjat serb. Kryetari i instaluar serb i Skënderajt Sima Simiq i deklaroi shtypit serb se komuna do t’ia falë nga tre hektarë tokë pune çdo familjeje serbe.

Kryetari i Kryqit të Kuq të Jagodinës i deklaroi agjencisë Tanjug se janë duke u evidentuar refugjatët serbë që do të dërgohen në Kosovë. Tashmë është evidentuar grupi prej 500 refugjatësh që do të dërgohet sot në Gjakovë.

Në komunën e Prizrenit regjimi ka sjellë 700 refugjatë, kurse këto ditë pritet të sjellë edhe 700 të tjerë. Për refugjatët komunarët serbë të Prizrenit ofrojnë nga tre hektarë tokë pune ose nga tre hektarë vreshta të klasit të parë dhe punësimin e nja 100 refugjatëve.

Shtypi serb vazhdon të shkruajë për gjoja ndihmën e “madhe” humanitare që po japin (apo më mirë të thuhet që po u merret) organizatat e individët për refugjatët. Një shoqatë e romëve të Gjakovës paska grumbulluar ndihma për refugjatët serbë, kurse romët e Gjilanit gjoja paskan kërkuar vendosjen e refugjatëve serbë në Kosovë!

23 gusht 1998

Sulme masive të forcave serbe në Suharekë

Sot në orën 5:30, forcat serbe kanë urdhëruar familjet e lagjes Bajraktari në Suharekë që të largohen nga shtëpitë e veta, ndërsa pak vonë, forca të mëdha serbe janë vendosur me tankse afër kësaj lagjeje dhe kanë filluar granaitmin e fshatrave Peçan, Reshan, Studeçan e Samadraxhë dhe nga ana e Biraçit, fshatin Sllapuzhan.

Banorët e këtyre fshatrave janë larguar në panik nga shtëpitë e veta, pasi sulmi ishte i rrufeshëm.

Në orën 7:30, një burim i LDK-së në Suharekë tha se sulmi po vazhdonte ende.

Sulm i ashpër i forcave serbe në Reçak të Shtimes

Sot, në orët e pasditës forcat serbe kanë sulmuar fshatrat Reçak e Belincë të Shtimes. Komisioni për Informim i Degës së LDK-së në Shtime njofton se këto dy fshatra janë në flakë, pasi shtëpive të këtyre dy fshatrave këmbësoria serbe ua ka vënë zjarrin.

Deri tash nuk dihet për të vrarë apo të plagosur.

Gjendja në këtë komunë është shumë e rëndë. Në orët e hershme të mëngjesit forcat serbe kanë filluar një sulm masiv kundër shumë fshatrave. Në mbrëmje, të gjitha rrugët po mbahen të bllokuara nga forcat serbe.

Foto: Suhareka

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

22 gusht 1994

U gjetën kufomat e dy fëmijëve shqiptarë në Suedi

Lajmi për gjetjen e kufomave të fëmijëve të cilët u zhdukën më 29 janar të vitit 1994 në strehimoren e Valdemarshvikut të Suedisë, i tronditi thellë bashkatdhetarët tanë në Suedi. Fëmijët Merlinda Gashi (6) dhe Jeton Gashi (10) të shtunën u gjetën 2 kilometra larg strehimores. Në kohën kur u zhdukën këta fëmijë, policia, qytetarët si dhe bashkatdhetarët tanë që gjenden në Valdemarshvik, gjurmuan pas fëmijëve të cilët në mënyrë misterioze u zhdukën pasditen e 29 janarit të këtij viti, plotë katër ditë e katër net. Mjete e informimit suedez me informimet e shpeshta i dhanë rëndësi kësaj ngjarjeje tragjike. Disa ditë pas zhdukjes së fëmijëve, televizioni dhe radio suedeze bënë me dije se në policinë rajonale të Valdemarshvikut, u lajmërua një zë femre i cili tha se fëmijët gjendeshin ke ajo dhe se babai i fëmijëve i vizitonte fëmijët dy herë në javë. Pas këtij lajmi rodhi edhe një lajm se policia i akuzon prindërit se fshehjen e fëmijëve e kishin planifikuar vetë, për çka iu ishte tërhequr vërejtja se mund të përgjigjen para ligjit. Me këtë rast u tha se policia dyshon se fëmijët gjendeshin ke një i afërm i tyre në Zvicër (lajm i TV Suedez).

Të shtunën, pas lajmit të hidhur për gjetjen e kufomave të fëmijëve, u mbajt një konferencë për shtyp me përfaqësuesin e policisë rajonale, i cili në mes të tjerash tha se fëmijët ishin gjetur të zbathur dhe të zhveshur, e kjo është shenjë se ata kanë ngrirë nga të ftohtit. Sepse njeriu nga i ftohti i madh filloka të zhvishet – tha përfaqësuesi i policisë së atjeshme. Gjithashtu u tha se fëmijët u gjetën 500 metra më larg nga kufiri i gjurmimit i cili ishte 1.500 metra. Supozohet gjithashtu se fëmijët kanë ndërruar jetë disa ditë pas zhdukjes dhe se nuk janë konstatuar lëndime trupore.

22 gusht 1995

Shantazhe e kërcënime ndaj refugjatëve serbë në qendrën “Boro e Ramizi” të Prishtinës

Deri më tash në qendrën sportive “Boro e Ramizi” në Prishtinë, u vendosën mbi 480 refugjatë serbë nga Kroacia.

Nga burimet e sigurta merret vesh se gjendja shpirtërore e këtyre refugjatëve është tejet e rëndë, sepse regjimi serb po manipulon me tragjedinë e tyre. Këtyre refugjatëve organet serbe u thanë se ata do të vendosen në Nish, mirëpo i mashtruan dhe me një tren të blinduar u sollën në Prishtinë dhe me dhunë policore u vendosën në hallën sportive “Boro e Ramizi”.

Dëshmitarët thonë se këta refugjatë assesi nuk dëshirojnë të jetojnë në Kosovë. Informacionet flasin se ata qe shtatë ditë në një mënyrë po mbahen peng nga afër 40 punëtorë të sigurimit të objektit. Ndaj tyre po bëhet edhe shantazh se nga këtu mund të dalin vetëm nëse nënshkruajnë një formular të veçantë me të cilin garantojnë se do të mbesin në Kosovë!

Siç po shihet, regjimi serb i mashtroi këta refugjatë me premtimet se gjoja do t’i vendosë në Nish.

Nën anën tjetër, ata kanë probleme të mëdha edhe rreth sigurimit të ushqimit, përkundër zhurmës së madhe dhe “solidaritetit gjithëserb”, siç thuhej, me vëllezërit e tyre nga Kraina.

Organet serbe “zgjidhën” problemin e sigurimit të ushqimit për refugjatët, duke i plaçkitur firmat shqiptare të vendosura pikërisht në qendrën sportive, ku janë të vendosur edhe vetë refugjatët serbë.

22 gusht 1997

Tiranë: U plagos gazetari Mujë Buçpapaj

Gazetari i Rilindjes Demokratike, Mujë Buçpapaj u plagos parmbrëmë, në kohën kur po po shëtiste me familjen e tij në afërsi të Shkollës së Baletit, nga një breshëri plumbash, një prej të cilëve e goditi në pjesën e sipërme të këmbës, duke përshkuar atë, njofton “Bujku”.

Plumbi ka mbetur në këmbën tjetër ndërsa gjendja e tij pas ndërhyrjes së shpejtë mjekësore është jashtë rrezikut. Sipas dëshmitarëve okularë dhe gruas së tij, plumbat kanë ardhur nga një makinë ‘Tipo” blu që dyshohet se ishte me targa policie. Ndërkohë vetë policia është në kundërshtim me këtë variant dhe thotë se plagosja e gazetarit ka ndodhur për shkak të një shkëmbimi armësh midis dy grupeve. Ora ka qenë 18. 40 mbasdite dhe thuhet se rruga ishte e mbushur plot me njerëz. Në fillim ka pasur një breshëri automatiku dhe më pas dy të shtëna të veçuara, njëra prej të cilave dyshohet se ka pasur objekt gazetarin, të cilin edhe e ka goditur. Gazeta e djeshme ku punon gazetari akuzonte për një krim politik ndaj Buçpapës, ndërsa hidhte poshtë variantet e policisë. Plumbi ka qenë i një pistolete speciale të llojit 7. 62 mm. Menjëherë në vendin e ngjarjes ka shkuar policia, ndërsa janë bllokuar kryqëzimet dhe është ushtruar kontroll i rreptë mbi makinat që qarkullonin.

Sekretari i përgjithshëm i PD-së, Genc Pollo, deklaroi dje në një konferencë shtypi se plagosja e gazetarit të “RD”, Mujë Buçpapaj është krim politik dhe i organizuar nga instancat e larta shtetërore. Ai tha se PD disponon fakte të shumta dhe dëshmi që implikojnë policinë në plagosjen e gazetarit dhe për këtë ai tregoi përpara njerëzve të medias dëshmitë e gruas së Buçpapajt si dhe të disa dëshmitarëve në vendin e ngjarjes.

Të gjitha këto dëshmi flisnin për një makinë policie nga kanë ardhur plumbat. Disa prej tyre thonë se makina e policisë kishte civilë brenda, ndërsa Pollo, tha se është e mundur që të jenë aktivizuar njerëz të bandave që kanë penetruar kohët e fundit në policinë shqiptare.

22 gusht 1998

Podujevë: Të shtëna në afërsi të stacionit të policisë në Lluzhan

Sot, nga ora 6 deri në orën 6. 15 në afërsi të stacionit të policisë serbe në Lluzhan u dëgjuan të shtëna armësh, njofton KI i Degës së LDK-së në Podujevë.

Nuk ka njoftime për pretekstin e këtyre të shtënave, por bëhet me dije se polcia ka arrestuar Mehdi Bicin, shtëpia e të cilit ndodhet në afërsi të këtij stacioni.

I njëjti burim bën me dije se sot në ora 12. 30 forcat policore serbe bllokuan tregun e qytezës dhe plaçkitën një sasi të konsiderueshme të mallit. Po ashtu, policët legjitimuan të gjithë qytetarët që u gjetën në treg.

Njoftohet gjithashtu se parmbrëmë rreth orës 21. 30 në vendin e quajtur Kisha e Sallabajës janë dëgjuar të shtëna armësh, ndërsa dëshmitarët kanë parë një veturë të tipit niva që ka vëzhguar terrenin.

U gjet dhe u varros trupi i pajetë i Miradije Tahirit nga Radisheva

Pardje në fshatin Radishevë, u gjet dhe u varros Miradije Tahiri (44), e cila u masakrua nga forcat serbe më 23 korrik të këtij viti, njofton KI i Degës së LDK-së në Mitrovicë.

Të përkujtojmë se që nga 23 korriku, e ndjera Miradije Tahiri konsiderohej e zhdukur.

Njoftohet se trupi i pajetë i të ndjerës është gjetur më 20 gusht, në afërsi të pusit në oborrin e shtëpisë së saj nga Hajriz e Mursel Tahiri, të cilët kishin dalë në fshat për t’i parë dëmet e shkaktuara nga agresori serb.

Trupi i pajetë i të ndjerës është gjetur i masakruar.

Të përkujtojmë se Radisheva ka qenë nën kontroll të forcave ushtarake e paramilitare serbe deri më 20 gusht të këtij viti, me ç’rast të njëjta forca kanë masakruar edhe 12 shqiptarë të tjerë nga Radisheva e Kotorri.

Në fshatin Isniq qëndroi sot një delegacion i diplomatëve amerikanë e gjermanë

Një delegacion i diplomatëve amerikanë e gjermanë vizitoi sot pasdite fshatin Isniq.

Si njofton Komisioni për Informim i Degës së LDK-së në Deçan, ata u takuan me përfaqësues të kësaj zone dhe u informuan për çështje të ndryshme.

Deçan: Edhe 7 vetë në listën e të zhdukurve

Numri i banorëve të Deçanit e të rrethinës që konsiderohen të zhdukur po shtohet përditë. Mësohet se familjet e të afërmit e tyre nuk dijnë asgjë për fatin e vëllezërve: Fazli, Fahredin e Faruk Mirovci nga Juniku, Avdullah Çakaj nga Grabovci, Nuredin Mustafaj nga Mazniku, Binak Sylaj nga Kodralia dhe Valon Sokol Shala nga Loxha.

 Foto: Qyteti Valdemarshvik, Suedi

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

21 gusht 1993

Serbët e Vitisë mobilizohen për ushtrime ushtarake

Koncentrimi i madh i forcave ushtarake dhe policore në Kosovë, po shoqërohet me mobilizime të reja të qytetarëve serbë e malazez. Burimet e LDK-së në Viti bëjnë me dije se sot, që nga mëngjesi, qytetarët serbë e malazez i janë përgjigjur ftesës së autoriteteve ushtarake serbe, për ushtrime ushtarake. Në vendtakimin, që ishte caktuar në shkollën fillore “Kuvendi i Lezhës” në Viti, qytetarët serbë e malazez u panë të ngarkuar me gjithë pajisjen ushtarake.

Pas kontrollimit të pajisjes nga ana e eprorëve ushtarakë serbë, civilët serbë e malazez, që u tubuan në këtë shkollë, u kthyen nëpër shtëpitë e tyre bashkë me armatim.

21 gusht 1995

Në afërsi të Sarajevës vdiq diplomati Robert Frejzhër dhe dy funksionar të lartë amerikanë

Të shtunën, pas një aksidenti në afërsi të Sarajevës, vdiq Robert Frejzhër dhe dy funksionarë të lartë amerikanë, që ishin në një mision paqësor në Ballkan, njofton “Bujku”.

Të shtunën, më 19 gusht, në orën 10 e 36 minuta, automjeti i blinduar i helmektkaltërve francezë rrëshqiti nga rruga në malet e Igmanit, gjashtë kilometra pa hyrë në Sarajevë, ra në një greminë të thellë 100 metra dhe u përplas në dy mina, eksplodimi i të cilave e kalli flakë këtë automjet. Shkak i fatkeqësisë është gjendja e keqe e rrugës – thuhet në raportin zyrtar të përfaqësuesit për shtyp të komandës së forcave paqësore të OKB-së në Sarajevë.

Sipas të dhënave nga Pentagoni në këtë aksident vdiqën Robert Frejzhër, emisar special i presidentit ameikan Bill Klinton në Grupin e Kontaktit e zëvendës i nënsekretarit amerikan të shtetit për çështje të Evropës, Xhozef Kruzel, zëvendës i nënsekretarit të Mbrojtjes së SHBA-ve, i angazhuar për Evropë, për Kanada e për paktin NATO dhe Semjuel Nelson Dru, kolonel i aviacionit amerikan dhe zëvendës i Enthoni Lejkut, këshilltar i presidentit amerikan për siguri kombëtare.

Këto të dhëna i konfirmoi Stejt-Departamenti amerikan dhe precizoi se Robert Frejzhër vdiq nga plagët, rrugës për në spitalin e Splitit.

Presidenti amerikan, Bill Klinton, me të marrë vesh lajmin tragjik, u tha gazetarëve se pas kontaktit me Riçard Holbrukun, shef i delegacionit amerikan që qëndroi në ish-Jugosllavi, mund të konstatojë se të gjitha faktet flasin për fatkeqësi të zakonshme komunikacioni me pasoja të dhimbshme e tragjike.

Edhe Stejt Departamenti amerikan kumtoi se nuk ka të dhëna që automjeti ku ishin funksionarët e tjerë amerikanë të jetë sulmuar para se të rrokullisej në greminë.

21 gusht 1997

Pjetër Arbnori në grevë urie

Parmbrëmë, ish-kryetari i Kuvendit Popullor të Shqipërisë, tani deputet i Partisë Demokratike dhe anëtar i Kryesisë së kësaj partie, deklaroi futjen e tij në grevë urie. Në një konferencë shtypi që dha dje në një dhomë të vogël të selisë së Kuvendit Popullor, vendi ku ai do të bëjë grevë, deklaroi se greva e tij do të ishte pa afat. Arsyet që e kanë shtyrë në këtë grevë, sipas Arbnorit janë censura e medias shtetërore ndaj opozitës në përgjithësi dhe Partisë Demokratike në veçanti. Greva zuri fill pas një debati parlamentar të zhvilluar pardje lidhur me disa ndryshime në ligjin për genocidin. Grupi parlamenar i Partisë Demokratike ishte kundër këtyre ndryshimeve, ndërsa përkundër rregullores së Parlamentit kryesia e tij kishte vendosur që punimet e kësaj seance të mos jepeshin në televizion. Menjëherë pas kësaj Arbnori ka marrë vendimin e tij për t’u mbyllur në ambientet e Kuvendit Popullor duke refuzuar çdo ushqim. I pyetur nga gazetarët Arbnori ka thënë se greva do të vazhdojë derisa të rivendosen plotësisht ato të drejta që i janë shkelur opozitës, e cila megjithse e vogël, është e madhe për nga bindjet dhe vendosmëria që ka, njofton “Bujku”.

Dhuna e përditshme në Kosovë

Rahovec: – Nahit Thaçi, kryetar i NKMDLNJ-së në Rahovec u mor dje në bisedë informative në stacionin e policisë në Rahovec.

Për rreth një orë një inspektor i sigurimit serb e mori atë në pyetje rreth punës së Nënkëshillit, punës në arsim dhe rreth informimit në përgjithësi.

Mitrovicë: – Pardje, rreth orës 10,30, katër inspektorë serbë ndaluan në rrugë Ilmi T. Feratin (42) dhe duke ia vënë revolen pas koke e futën në veturë dhe e dërguan në lokalet e policisë. Prej tij policët kërkuan një revole dhe me këtë pretekst e keqtrajtuan fizikisht rreth dy orë, pastaj e liruan me kusht që të paraqitet të njëjtën ditë në orën 16 dhe të dorëzojë armën që i kërkohet.

Meqë ai nuk u paraqit në polici, policia shkoi sot në shtëpinë e tij në fshatin Zhabar dhe nga vëllai tij Bedriu kërkoi të mësojë ku është Ilmiu, si dhe kërcënoi Bedriun.

Me të njëjtin pretekst policia pat bastisur familjen e Ilmiut në janar të vitit 1995, me ç’rast në polici qenë marrë edhe tre vëllezërit tjerë të tij. Vetë Ilmiu është marrë në polici dhe është keqtrajtuar disa herë me këtë pretekst.

Sot, për herë të gjashtë, me pretekst të kërkimit të armëve, në pyetje në polici u mor Dervish H. Veseli (54) nga fshati Lushtë. Ai u urdhërua që të paraqitet në polici edhe më 25 gusht.

21 gusht 1998

Vushtrri: Dyshohet se policia serbe vrau një qytetar shqiptar

Sot rreth orës 9:00, në afërsi të Urës së Gurit në Vushtrri, një patrullë e policisë serbe derisa po legjitimonte kalimtarët e rastit, u konfrontua me një qytetari shqiptar, njofton KI i Degës së LDK-së në Vushtrri.

Njoftohet se gjatë përleshjes me policinë serbe, qytetari shqiptar, të cilit nuk i dihet emri, ia rrëmbeu automatikun njërit nga policët dhe iku në drejtim të panjohur.

Dëshmitarët kanë theksuar se policia serbe ka shtënë me armë në drejtim të tij dhe thuhet se është vrarë një qytetar i pafajshëm.

Bëhet e ditur se në vendin e ngjarjes kanë dalë dhjetëra policë serbë, të cilët gjatë kësaj kohe kanë keqtrajtuar fizikisht shumë qytetarë shqiptarë, të cilët ishin nisur për në Vushtrri, pasi sot është ditë tregu.

Vushtrri: Policia vrau Avni Saraçin nga Bivolaku

Sot rreth orës 9:00, në afërsi të Urës së Gurit në Vushtrri, policia vrau Avni Saraçin (29) nga Bivolaku i Vushtrrisë.

KI i Degës së LDK-së në Vushtrri njofton se Avniu, që ishte kalimtar rasti, u qëllua nga policia e cila po shtinte me armë në drejtim të një qytetari tjetër, i cili po ikte pas një kacafytjeje me policinë, e cila ndalte dhe legjitimonte qytetarët.

Më pas në vendin e ngjarjes dolën dhjetëra policë, të cilët ndaluan e keqtrajtuan shumë kalimtarë rasti. Në Vushtrri sto ishte fluks i madh i qytetarëve, pasi ishte ditë tregu.

Merret vesh se policia ndërhyri në një mulli dhe arrestoi pronarin dhe disa shqiptarë të tjerë.

Klinë: Njoftohet për tre të vrarë nga Sverka, më 21 korrik

Nga Nënkëshilli në Klinë sot më 21 gusht u informuam se janë identifikuar edhe tre shqiptarë të vrarë në sulmet e forcave ushtarako-policore serbe mbi fshatrat e Klinës më 21 korrik.

Ata janë: Nazmi Nebi Gashi (27) e Ramiz Januz Gashi (27) dhe Xhafer Latif Gashi (27) nga Sferka. Dihet se Xhaferi është varë në fshaitn Përqevë dhe se në luftime janë plagosur rëndë edhe 7 shqiptarë tjerë, emrat e të cilëve nuk dihen.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

Foto: Gorozhupi

20 gusht 1993

Në Malishevë policia serbe plaçkiti sasi të konsiderueshme malli e devizash

Në njoftimet plotësuese nga Malisheva, thuhet dje, në ditën e tregut në Malishevë, ekspedita e policisë dhe civilëve serbë e përbërë prej afro 150 vetash, nga qytetarët dhe tregtarët shqiptarë të kësaj ane, plaçkiti dhe konfiskoi një sasi të konsiderueshme malli dhe devizash.

Kështu, në dyqanin e Skënder Krasniqit, policët serbë konfiskuan mall me vlerë prej afro 5.000 markash gjermane, ndërsa në duçanin e Nuhi dhe Hamdi Zulfajt, u plaçkit mall me vlerë prej 1.000 markash gjermane. U plaçkit edhe butiku “Levis”, pronë e Xhevat Bytyçit, nga i cili u morën 1.100 marka gjermane. Nga Hilmi, Ramiz dhe Hysen Raba, policia plaçkiti mall me vlerë prej 7.500 markash gjermane, Agron R.Berishës nga Gurbardhi ia plaçkiti 500 marka gjermane, Besim Luma nga Gjakova 300 marka gjermane, ndërsa Enver Hoti nga Carralluka tekstil me vlerë prej 3.000 markash gjermane.

Komisioni për Informim i LDK-së së Malishevës, gjithashtu njofton se ekspedita e policisë serbe plaçkiti edhe Salih Telakun nga Banja, Habib Paçarizin nga Dragobili, Tasim Foniqin nga Llazica, Hasan Mazrrekun nga Malisheva, Ramadan Bytyçin nga Shkoza e të tjerë.

20 gusht 1994

Represioni në Kosovë

Podujevë: – Më 17 gusht, policia serbe nën pretekst të kërkimit të armëve, bastisi shtëpinë e Murat Makollit në fshatin Hërticë të Podujevës. Murat Makollit iu la thirrja që të paraqitet së bashku me djemtë e tij në stacionin e policisë.

Të njëjtën ditë, policia nën pretekst të kërkimit të armëve, ishte në shtëpitë e Sallah e Bajram Berishës në fshatin Zakut të Podujevës. Nga Bajram Berisha policia kërkoi një automatik, ndërsa te Sallah Berisha u gjet një revole.

Pardje, policia ishte në shtëpinë e Gani Haxhiut, nga i cili konfiskoi një revole.

Po këtë ditë, në fshatin Murgull, policia serbe ndau shumë thirrje personave të cilët kohë më parë i kanë dorëzuar armët.

Dje, policia nën pretekst të kërkimit të armëve, bastisi shtëpinë e Rrustem Shalës në Podujevë. Njoftohet se Rrustem Shalën policia e keqtrajtoi në prani të anëtarëve të familjes, ndërsa pas bastisjes atë e morën me vete në polici.

Rrustem Shala po mbahet ende në arrest.

Viti: – Këto ditë, policia mori në shtëpinë e tij, Ismet Aliun nga fshati Lybishtë i Vitisë, i cili në stacionin e policisë në Viti u rrah brutalisht nën pretekst të dorëzimit të armëve. Ismet Aliu në lokalet e policisë në Viti u mbajt prej orës 7:00 deri rreth orës 22:00.

Ndërkaq në fshatin Lubishtë, policia gjeti një revole tek Nasuf Dalipi, i cili u dërgua menjëherë në vuajtje të dënimit me 30 ditë burg.

Më 17 gusht, policia nën pretekst të kërkimit të armëve ishte në shtëpinë e Halit Arifit në fshatin Mogillë të Vitisë. Halil Arifi nuk ishte në shtëpi, ndërsa policët i thanë bashkëshortes së tij që ta thërras vëllain e Halitit, Ramiz Arifin. Nga Ramizi, policia kërkoi që të dorëzojë një pushkë, ndërsa nga Haliti kërkuan të dorëzojë një revole. Policia urdhëroi Ramiz Arifin që të nesërmen të paraqitet së bashku me vëllain e tij në stacionin e policisë në Viti.

Më 16 gusht, një ekspeditë e policisë serbe e stacionit të policisë në Ferizaj, nën pretekst të kërkimit të armëve bastisi shtëpinë e Adem Maliqit në fshatin Budrikë. Adem Maliqi nuk gjendej në shtëpi, ndërsa policia mori dy vajzat e Ademit, Ajtene dhe Fatmire Maliqin, të cilat në stacionin e policisë në Ferizaj u mbajtën rreth shtatë orë. Ato u morën në pyetje për kinse armët e babait të tyre.

Të njëjtën ditë në fshatin Budrikë e njëjta ekspeditë e policisë bastisi shtëpinë e Zeqir Rexhepit, tek i cili u gjet një pushkë.  Zeqir Rexhepi punon përkohësisht në Zvicër, ndërsa policët morën me vete bashkëshorten e tij, Remzien e cila në stacionin e policisë në Ferizaj u mbajt rreth tri orë. Ajo u pyet se nga kush është blerë arma.

Më 17 gusht, policia serbe nga Gjilani kërkoi në fshatin Budrikë, Xhevat Halilin tek i cili u gjet një pushkë.

Të njëjtën ditë, e njëjta ekspeditë e policisë, kërkoi Feriz Abazin, i cili nuk gjendej në shtëpi. Atij iu la thirrja që të paraqitet në stacionin e policisë në Gjilan.

Skënderaj: – Dje, rreth orës 11:00, policia mori të rinjtë Agron e Tahir Gashin nga Kopiliqi i Skënderajt. Nga këta të rinj policia serbe u interesua të dijë se kush ia ka djegur ushqimin e kafshëve Selim Osmanit nga i njëjti fshat.

Vushtrri: Dje rreth orës 10, tre policë serbë shkuan në shtëpinë e Selman Hasanit (62) nga fshati Strofc. Selmani i deklaroi QIK-ut se, nën pretekst të kërkimit të armëve, të cilat ai nuk i ka, në muajt e fundit policia e ka bastisur shumë herë, e ka rrahur, e ka marrë në stacion të policisë dhe e ia ka kërkuar të bijtë. Ai tha se dje policët kërkuan veçanërisht të birin e tij, Sabri Hasanin (37), i cili nuk gjendej në shtëpi.

Malishevë: – Dje rreth orës 5:00 të mëngjesit, një ekspeditë e policisë serbe, nën pretekst të kërkimit të armëve, bastisi shtëpinë e Rifat A.Krasniqit nga Domaneku i Malishevës. Bastisja zgjati rreth tri dorë. Policia pasi maltretoi të gjithë anëtarët e familjes, në prani të tyre rrahu rëndë Rifat A.Krasniqin.

Nga Malisheva bëhet me dije se Rifati së bashku me vëllain e tij, Ibrahim Krasniqin po mbahen ende në polici.

Vlenë të theksohet se familja Krasniqi është bastisur edhe dy herë më parë.

Sot policia mori plakun 95 vjeçar, Muharrem F.Kryeziun në fshatin Bubavec. Muharrem F.Kryeziu nga policia serbe është keqtrajtuar fizikisht edhe para një muaji.

20 gusht 1997

Dhuna e përditshme në Kosovë

Mitrovicë: – Më 18 gusht, dy policë shkuan në shtëpinë e Sadri Sh. Osmanit (68) në Vernicë të Mitrovicës me pretekst të kërkimit të armëve. Ata i lanë thirrjen Sadriut dhe djali të tij, Ramës (40) që të paraqiten dje në polici. Dje, ata u mbajtën në polici mbi një orë dhe u kërcënuan se duhet të dorëzojnë gjithsesi armën që u kërkohet.

Ata janë urdhëruar që të paraqiten edhe sot, ndërsa njëri nga policët u ka thënë se do t’i detyrojnë të paraqiten në polici çdo ditë në orën 8 të mëngjesit derisa të dorëzojnë armët.

Ferizaj: – Më 7 gusht, policia bastisi shtëpinë e Nazmi Krasniqit në Ferizaj në kërkim të cigareve. Me që nuk gjetën cigare, inspektorët serbë keqtrajtuan djalin e Nazmiut, Xhevatin, në prani të anëtarëve të familjes.

Prej 1 deri më 7 gusht, në qendrën e sigurimit serb në Ferizaj u morën në pyetje me pretekst të kërkimit të armëve Zeqir, Aziz e Shukri Shabani nga fshati Varosh. Azizi u keqtrajtua fizikisht nga policia, ndërsa Zeqiri e Shukriu u detyruan të paraqiten në polici edhe më 11 gusht.

Po me pretekst të kërkimit të armëve në polici u mor edhe Mustaf Aliu (69) nga fshati Balaj.

Rahovec: – Policia i la dje thirrjen për t’u paraqitur sot në stacioin e policisë në Rahovec Nahit Thaçit (33) nga Retia e kësaj komune. Z. Thaçi ishte ish i burgosur politik, ndërsa tash është kryetar i NKMDLNJ-së në Rahovec dhe përfaqësues i Shoqatës së të Burgosurve Politikë. Preteksi nuk dihet.

Gjakovë: – Mbrëmë, në orët e vona të natës, një patrullë e policisë serbe bastisi shtëpinë e Hazyr Zeqirit në fshatin Morinë, kryetar i aktivit të LDK-së në fshat dhe anëtar i kryesisë së nëndegës së LDK-së në Ponoshec. Me këtë rast, z. Zeqiri u mor në polici. Motivi nuk dihet.

20 gusht 1998

Granatime në fshatrat e Rahovecit dhe të Suharekës – Një i vrarë e tetë të plagosur

Edhe sot forcat serbe kanë vazhduar granatimin e fshatrave Zoçishtë e Opterushë të Rahovecit dhe fshatit Samadraxhë të Suharekës, ndonëse granatimet janë të një intensiteti më të ulët se dje.

KI i Degës së LDK-së në Suharekë njofton se këto granatime po bëhen nga pozicionet e forcave serbe në Hoçë të Madhe dhe në Landovicë.

Njoftohet se është vrarë Bekim Dalip Bekteshi (27) nga Samadraxha, ndërsa janë plagosur rëndë dhe lehtë Bajram Bekteshi, Selim Kusha e Ibrahim Mamaj nga Samadraxha, Nexhat Cikaçi, Fatmir Bala, Osman Cikaçi dhe Visar Bala nga Dobërdolani si dhe Muharrem Kryeziu nga Pagarusha.

Gjatë orës së mbrëmjes forcat paramilitare serbe kanë djegur fshatin Zoçishtë prej të cilit dilte tym e flakë.

U varrosën tre të vrarë në Gorozhup

Mbrëmë në Grejkoc të Suharekës u bë varrimi i Hazir Selimajt (44), Zenel Currajt (25) dhe Sabit Lushajt (23), që të tre nga Grejkoci, të cilët u vranë para dy ditësh në Gorozhup.