Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998. 

13 nëntor 1992

“The Wall Street Journal” për rrezikun e luftës në Kosovë

Gazeta autoritative amerikane “The Wall Street Journal” në një kryeartikull të saj të botuar dje thekson se “diplomatë të shumtë ndërkombëtarë dhe organizata humanitare kanë paraparë se nëse lufta arrin në Kosovë do t’ia kalojë të gjitha tmerreve të mëparshme ballkanike”. Gazeta pohon se agresorët serbë janë duke zhvilluar një fushatë të spastrimit etnik ndaj popullsisë shqiptare të Kosovës gjatë dy vjetëve të fundit. “Kjo është një spastrim etnik i heshtur”, i tha kësja gazete kryetari i Republikës së Kosovës, dr.Ibrahim Rugova duke bërë fjalë për nja 200 mijë shqiptarë që kanë qenë të detyruar të largohen nga shtëpitë e tyre në Republikën e Kosovës për shkak të kërcënimeve serbe.

13 nëntor 1993

Policia plaçkit dyqanet e shqiptarëve në Han të Elezit

Komisioni për Informim i Degës së LDK-së në Han të Elezit, njofton se policia financiare mbylli të vetmen furrë private në Han të Elezit, pronë e Ramadan Ymerit. Policia konfiskoi nga depoja e furrës 29 ton miell.

Të njëjtën ditë, policia financiare në dyqanin e Bedri Dacit konfiskoi ushqim për kafshë në një vlerë prej afro 12.000 markash gjermane.

13 nëntor 1995

Polici serb rrahu tri herë të miturin në Mitrovicë

Më 7 nëntor, rreth orës 10, në stacionin e autobusëve në Mitrovicë, një polic serb rrahu të miturin Daim H. Çubrelin (14) dhe ia plaçkiti atij 7 pako cigare, njofton Komisioni për Informim i Degës së LDK-së në Mitrovicë.

Po ky polic, më 11 nëntor, rreth orës 18, po ashtu në stacionin e autobusëve në Mitrovicë, keqtrajtoi sërish Daimin, me pretekst se nuk deshi t’ia japë një pako cigare pa para.

Më 12 nëntor, rreth orës 12, në stacionin e autobusëve në Mitrovicë polici serb, i cili kishte rrahur dy herë Daim Çubrelin e rrahu sërish dhe ia plaçkiti 70 pako cigare.

13 nëntor 1996

Në Universitetet e Shqipërisë edhe maturantë shqiptarë nga Mali i Zi

Edhe maturantët shqiptarë të këtij viti nga Mali i Zi do të vazhdojnë studimet e tyre në universitetet e Shqipërisë pasi po tejkalohen disa vështirësi procedurale.

Fjala është për 24 kandidatë që përcaktoi komisioni përkatës i LD në MZ. Mirëpo, në ndërkohë Ministria e Arsimit e Shqipërisë miratoi vendimin për t’iu nënshtruar provimeve klasifikuese edhe studentët shqiptarë nga viset e ish-Jugosllavisë. Sipas komisionit të përmendur, kandidatët shqiptarë nga Mali i Zi nuk u paraqitën në këto provime për shkaqe parimore dhe kohore. Por, me kontaktet midis përfaqësuesve të LD në MZ dhe atyre të Qeverisë Shqiptare kjo çështje po merr zgjidhje pozitive. Kështu, kryetari i LD në MZ, Mehmet Bardhi në takimin e tij të paradokohshëm me kryeministrin e Shqipërisë, Aleksandër Meksin, mori garancinë se studentët shqitparë nga Mali i Zi do të pranohen edhe këtë vit në universitetet e Shqipërisë. Kryetari Bardhi për çështjen e studentëve zhvilloi bisedime edhe me dr.Gjergj File, drejtor i Arsimit të Lartë. Në të mirë të realizimit pozitiv të kësaj çështjeje flet edhe vendimi më i ri i Ministrisë së Arsimit të Shqipërisë, sipas të cilit “nga kuotat e përcaktuara për vitin mësimor 1996/97 mund të përfitojnë kandidatët shqiptarë me banim jashtë kufijve”.

13 nëntor 1997

Serbët e pranojnë disfatën me Kroacinë

Gazeta britanike “Indipendent” vendosjen e lidhjeve hekurudhore mes Serbisë e Kroacisë e vlerëson se serbët pranuan disfatën. Sipas kësaj gazete serbët tash sikur pranojnë se kufiri me Kroacinë është i përhershëm dhe i pandryshueshëm.

13 nëntor 1998

Uiliem Uoker: Ka shqetësime serioze për sigurinë në Kosovë

Në një intervistë dhënë sot radio BBC-së shefi i Misionit Verifikues të OSBE-së në Kosovë, Uiliem Uoker duke u përgjigjur në pyetjen se për çfarë është biseduar në takimin e tij në Prishtinë me ndërmjetësin amerikan në Kosovë, Kristofer Hill, u përgjigj:

– Në thelb ambasadori Hill ishte për vizitë për disa arsye, jo më pak për t’u takuar edhe me mua, dhe për të na njoftuar se cili është statusi aktual i procesit të tij të negociatave shqiptaro-serbe. Është e qartë se kjo ka të bëjë me atë që ne po fillojmë të bëjmë këtu si p.sh. kur mund të filllojmë periudhën nëntëmujore sa i përket mbikëqyrjes së zgjedhjeve në Kosovë. Kjo vjen pas zgjidhjes politike, prandaj ne u desht të dëgjonim nga ambasadori Hill se si po ecen procesi, tha z.Uoker.

I pyetur se çfarë përshtypje kishte ai për procesin e negociatave dhe nëse ishte më afër arritja e një marrëveshjeje politike për Kosovën, z.Uoker tha:

– Ambasadori Hill na njoftoi me të rejat më të fundit, por ju duhet ta dini se unë ndodhem në Kosovë vetëm këto 24 orët e fundit dhe kjo ishte hera e parë që bisedova me z.Hill. Pra një pjesë e madhe kishte të bënte me sfondin e ecurisë së procesit. Por, do të thosha se informimi që më dha ambasadori Hill më bëri optimist se është duke shënuar progres.

Duke u përgjigjur në pyetjen se cilat janë përshtypjet e tij për gjendjen në terren, z.Uoker u përgjigj:

– Është e qartë se ka arsye për shqetësim të konsiderueshëm ndonëse kemi shënuar progres javët e fundit, dhe siç thashë dje rruga ende është e gjatë për të bërë diçka për sa i përket respektimit të marrëveshjes dhe premtimeve të palëve të përfshira por ende ka shumë punë për t’u bërë. Ditëve të fundit çdo ditë kemi dëgjuar për incidente, prandaj edhe më tej kemi shqetësime serioze për sigurinë në Kosovë.

I pyetur lidhur me incidentet e fundti se kush është fajtor për vazhdimin e dhunës në Kosovë, ambasadori Uoker tha:

– Dy incidentet më të fundit për të cilat kam dëgjuar kanë të bëjnë me ato që këtu po quhen rrëmbime dhe duket sikur janë hakmarrje midis palëve. Njëra palë i filloi ato, ndërsa tjetra u hakmor, duke bërë pothuajse të njëjtën gjë. Nga informacionet që kam nuk jamë në gjendje tani të them se çfarë i kanë bërë palët njëra tjetrës. Por vetë fakti se këto incidente kanë ndodhur, përmbajnë shqetësim.

Në pyetjen tjetër se a do të jetë në gjendje Misioni Verifikues në Kosovë të ndikojë që incidentet e tilla të mos ndodhin në të ardhmen, shefi i misionit të OSBE-së në Kosovë tha:

– Mendoj se kryesuesi i radhës i OSBE-së, ministri i jashtëm polak, Bronislav Geremek, tashmë ka thënë publikisht se ai beson se vetëm njoftimi për krijimin e Misionit Verifikues ka zbutur deri diku tensionet e këtushme. Sigurisht jo të gjithë tensionin por deri diku edhe fakti se ne kemi filluar të mbërrijmë dhe të tregojmë praninë tonë, do të ndihmojnë në këtë situatë. Se a do të ndikojë që njerëzit të ndihen rehat të gjithë që të kthehen në shtëpitë e tyre apo t’i kthehen jetës normale, kjo ende duhet të shihet, – tha ambasadori Uiliem Uoker.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998.

12 nëntor 1992

Serbët provokojnë një konflikt të përgjakshëm

Televizioni zviceran, mbrëmë dha një emision special kushtuar gjendjes në Kosovë. Në emision u transmetua edhe një bisedë me vajzën nga Peja, të cilës gjatë protestave për lirimin e shkollës shqipe, i është prerë veshi. Në emision po kështu u dhanë pamje të situatave tragjike në Kosovë. Emisioni i mbrëmshëm ishte në shenjë të vrasjes së djeshme të të riut shqiptar, Nasjet Selimi në Prishtinë, nga ushtria serbe. Redaktori tërheq vëmendjen mbi mundësinë e eskalimit të një lufte të përgjakshme nga provokimet serbe, që do të kishte pasoja tragjike jo vetëm për Kosovën, por

për tërë rajonin.

12 nëntor 1993

Klintoni përsërit kërcënimet kundër serbëve

Duke informuar për paraqitjen e djeshme të presidentit amerikan para gazetarëve, masmediumet gjermane njoftojnë se gjatë kësaj konference Klintoni theksoi me atë rast se serbët vazhdojnë sulmet ndaj Sarajevës. NATO-ja duhet të bombardojë caqet ushtarake serbe në Bosnjë. Për të mos mbetur në letër planet e NATO-s, presidenti Klinton shprehu nevojën që për realizimin e këtyre planeve duhet të bindet OKB-ja.

Ndërkaq, zëdhënësi i Ministrisë së Jashtme thekson se NATO-ja duhet të përcaktohet, sepse përgjegjja pozitive e sajë do të shpiente në aplikimin e këtyre kërcënimeve duke përdorur mundësinë e do të shpiente në aplikimin e këtyre kërcënimeve, duke përdorur mundësinë e intervenimit ajror kundër caqeve ushtarake serbe në Bosnjë.

Ministri i jashtëm gjerman sipas gazetës “Die Welt” po orvatet që plani i tij dhe ministrit të Jashtëm francez, Zhype të përkrahet edhe nga SHBA dhe Rusia. Duke e komentuar planin gjermano-francez për Bosnjën “Die Welt” në fillim e vlerëson si iniciativë të mirë e cila nuk niset nga premtimet boshe, por nga veprimet konkrete, por kjo iniciativë, shkruan komentatori i “Die Welt”-it, është kritikuar në mënyrë shumë serioze nga SHBA-të për shkak se për herë të parë shtrohet çështja e heqjes së sanksioneve ndaj Serbisë, jo për zgjidhjen globale të konflikteve në ish-Jugosllavi, por për zgjidhjen e problemeve vetëm në një pjesë të ish-Jugosllavisë. Prandaj pyet komentatori i “Die Welt”-it: çka do të ndodh në Kosovë dhe në Maqedoni nëse i hiqen sanksionet Serbisë? A nuk mund prapë loja serbe të fillon rishtazi në Kosovë dhe Maqedoni.

12 nëntor 1994

Gjatë dhjetë muajve të kaluar në Kosovë nga sëmundjet ngjitëse vdiqën 193 veta

Dje në Brezovicë u mbajt një mbledhje e drejtorëve të enteve për mbrojtjen e shëndetit të Serbisë. Me atë rast u tha se gjatë dhjetë muajve të kaluar u regjistruan 18.115 të sëmurë nga sëmundjet ngjitëse, kurse prej tyre vdiqën 193. Gazeta e sotme “Jedinstvo”, duke cituar fjlaët e drejtorit të instaluar serb të Entit Shëndetësor të Prishtinës, Komnen Tmushiq, shkruan se ky ent gati ka mbetur pa kuadro dhe pa mjete themelore për punë, kurse 80 për qind e pajisjes është amortizuar.

12 nëntor 1995

Arvanitasit – komunitet i fuqishëm dhe i rëndësishëm në historinë e vjetër dhe të re të Greqisë

Prishtinë 12 nëntor (QIK)

Arvanitasit e Greqisë janë një komunitet shumë i fuqishëm, i cili ka dhënë një kontribut të madh në historinë e vjetër dhe të re të Greqisë. Presidenti i parë i Republikës greke ishte arvanitasi Pavlo Kundrioti nga ishulli Hidra. Po nga ky komuniteti i arvanitasve numërohen mbi 15 kryeministra, si dhe një numër i madh ministrash në qeveritë e deritashme të Greqisë, ndërkohë që nga ky komunitet doli edhe një plejadë artistësh, në mesin e të cilëve edhe e famshmja Melina Merkuri, thuhet në fillim të një bisede me Aristid Kolën, kryetar i Shoqatës së Arvanitasve të Greqisë me seli në Athinë që e botoi gazeta e djeshme “Bujku”.

Që nga viti 1981 në Greqi funksionon shoqata në fjalë. Zoti Kola është jurist me profesion. Mirëpo kohën më të madhe të tij ai ia kushton Shoqatës dhe botimit të revistës së arvanitasve “Besa”. Po ashtu zoti Kola shkroi “Greqia në kurthin e serbëve të Milosheviqit” si dhe është autor i dy librave tjerë: “Arvanitasit dhe origjina e grekëve” dhe “Gjuha e perëndive”. Libri i tij i parë deri më tash u ribotua shtatë herë.

Në librin e tretë autori përpiqet të bëjë një analizë kritike të politikës ballkanike greke të viteve të fundit. Posaçërisht mbi varësinë e politikës greke në planet serbomëdha të Milosheviqit. Në dhjetevjeçarin e parë të këtij shekulli, kur serbët synonin, pas largimit të turqve, të pushtonin Kosovën dhe trojet e sotme të Republikës ish-jugosllave të Maqedonisë, gjithë bota politike dhe intelektuale greke u deklarua se serbët nuk kanë asnjë të drejtë mbi ato troje, sepse ato troje banohen nga vëllezërit tanë shqiptarë. Sot, për fat të keq, vëllezërit u bënë armiq dhe serbët u bënë vëllezër të Greqisë, thotë z. Kola.

Sot që arvanitasit, por edhe gjithë populli grek të luajnë një rol pozitiv në marrëdhëniet greko-shqiptare, së pari duhet t’i gjejnë gjurmët e humbura të historisë së tyre.

12 nëntor 1996

Kryqi i vizatuar në muret e xhamisë

Siç njofton gazeta “Bujku”, duke iu referuar Ismail Kërçelit, kryetar i nëndegës së LDK-së në fshatin Lisockë janë vizatuar më 8 nëntor në xhaminë e fshatit Zhujë të Kamenicës janë vizatuar me ngjyrë të kuqe kryqe me katër S në alfabetin cirilik dhe emrin Vuk.

Vlerësohet se me këtë akt është synuar provokimi i popullsisë së kësaj ane në bazë fetare.

12 nëntor 1997

Kontrollime në “Kurriz” në Prishtinë

Prishtinë, 12 nëntor (QIK)

Një ekspeditë e policisë serbe hyri mbrëmë rreth orës 22 në disa kafeteri e restorante të pronarëve shqiptarë në kuartin e “Dardanisë” në Prishtinë.

Policia legjitimonte dhe kontrollonte shumë mysafirë të pranishëm në këto lokale, pa dhënë asnjë shpjegim.

Në këtë kuart, në mbrëmje tubohen mijëra të rinj të Prishtinës.

12 nëntor 1998

Forcat serbe sulmuan Mleçanin e Malishevës – një i vrarë e disa të plagosur

Prishtinë, 12 nëntor (QIK) – Forcat ushtarako-policore serbe sulmuan sot fshatin Mleçan të Malishevës. Së paku një shqiptar u vra dhe disa të tjerë u plagosën.

Veprimtari i LDK-së nga fshati Vërmicë, D. Gashi, tha se rreth orës 12.30 në Mleçan hyri një konvoj i policisë dhe ushtrisë serbe, të cilat menjëherë shtinë me armë në drejtim të popullatës civile e cila ditëve të fundit ka filluar të kthehet në fshat, në shtëpitë në masë të madhe të djegura e të rrënuara gjatë ofensivave të forcave serbe.

Deri tash dihet për një të vrarë, e ai supozohet të jetë Xhafer Gashi, invalid, nga ky fshat, ndërsa ka edhe të plagosur, por nuk është mësuar ende numri i tyre.

1. Gashi tha se edhe në orët e pasdites forcat serbe nuk janë tërhequr nga fshati, por po vazhdojnë të shtijnë armë. Me armë shtihet edhe nga pozicioni i forcave serbe te pishat e Llazicës, fshat fqinj me Mleçanin.

Banorët e Mleçanit dhe të Llazicës, të përballur me këto sulme serbe, u detyruan të largohen sërish nga shtëpitë e tyre.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998.

11 nëntor 1992

Të shtëna në qendër të Prishtinës

Sot, rreth orës 5,45 të mëngjesit, në Qendër të Prishtinës, afër Komandës Ushtarake të Prishtinës, qytetarët kanë dëgjuar të shtëna automatikësh. Mjetet serbe të informimit sot kanë njoftuar se në afërsi të Komandës Ushtarake të Prishtinës, gjatë një përleshjeje, është vrarë një civil dhe është plagosur rëndë një ushtar.

Dëshmitarët thonë se tre të rinj, duke kaluar afër Komandës Ushtarake, që është në qendër të Prishtinës, u provokuan nga roja dhe me këtë rast erdhi deri te përleshja. Njëri nga të rinjtë ia mori automatikun ushtarit dhe e qëlloi. Ndërkohë, nga pozicione tjera të rojeve u gjuajt në këta të rinj, dhe siç merret vesh, njëri nga këta mbeti i vrarë.

Dëshmitarët theksojnë se dy të tjerët arritën të ikin nga vendi i ngjarjes dhe njeri mund të jetë i plagosur.

Më vonë, është vërejtur se ushtarakët kanë bërë ndërrimin e vendit ku ishte vrarë i riu, që merret vesh, është shqiptar, Naser Rushit Selimi (1966), nga rrethina e Bujanovcit, student i vitit të katër të Fakultetit të Bujqësisë në Prishtinë. Ushtarakët pasi kryen inskenimin, bënë inçizimet, të cilat pritet t`ia servojnë opinionit.

Nga të shtënat e automatikëve të ushtarakëve janë goditur objektet e banimit përreth Komandës Ushtarake të Prishtinës. Dy plumba kanë goditur banesën e Remzi Berishës, “Sheshi i Republikës”, 16/29.

 Ishim duke fjetur me gruan dhe katër fëmijët kur dëgjuam të shtëna. Nuk guxuam të dalim të shikojmë në dritare. Njëri nga dy plumbat ka arritur të depërtojë edhe në korridor, pasi ka qëlluar derën e hyrjes, deklaroi Remziu.

Gjatë natës edhe në pjesë të tjera të Prishtinës janë dëgjuar të shtëna armësh. Kjo është një praktikë e përhershme e serbëve civilë të armatosur.

Përfaqësuesit e misionit të përhershëm të KSBEsë në Kosovë, dolën në vendin e ngjarjes.

11 tetor 1993

Dojçe Wele: Policia e Maqedonisë burgosi disa shqiptarë

Radioja Dojçe Wele dje lajmëroi duke iu referuar lajmeve të Radios Maqedone se policia e këtij shteti parmbrëmë ka burgosur zëvendësministrin e mbrojtjes, Hysen Haskajn dhe zëvendësministrin e shëndetësisë Ymer Ymerin, të dy shqiptarë. Këta dy zëvendësministra shqiptarë në qeverinë e Maqedonisë, siç njofton Radioja e Kellnit u burgosën për shkak të dyshimit se kanë bërë përpjekje ose kanë formuar njësitë paraushtarake.

Radioja gjermane thekson se këto informacione që siç pohon i ka dhënë radioja e Maqedonisë, në Shkup nuk u vërtetuan zyrtarisht por as nuk u demantuan gjatë ditës së sotme. Në të njejtën kohë njoftohet se parmbrëmë gjatë natës policia e Maqedonisë ka burgosur shumë shqiptarë në Tetovë e Gostivar. Radioja nuk thekson arsyet e arrestimeve të tilla, por konfirmon se njoftimet vijnë nga burime mirë të informuara në Shkup.

11 nëntor 1994

Në komunën e Pejës gjatë periudhës janar-tetor u bastisën 59 familje

Vetëm gjatë periudhës janar-tetor të këtij viti, policia serbe kryesisht nën pretekst të kërkimit të armëve në komunën e Pejës bastisi 59 familje shqiptare, njofton Komisioni për Informim i Degës së LDK-së në Pejë.

Gjatë kësaj kohe policia serbe rrahu rëndë 178 persona, në institucione ndërhyri 10 herë, në të ashtuquajturën bisedë innformative ishin 140 sish, u plaçkitën 9 persona u konfiskuan 8 pasaporta, u maltretuan në forma të ndryshme 76 persona, në polici deri në tri ditë u mbajtën 6 persona, ndërsa procedura gjyqësore u hapën kundër 12 personave.

Vlenët të theksohet se edhe në komunën e Pejës, shifra e familjeve të bastisura shqiptare dhe e pesonave të keqtrajtuar është disa herë më e madhe, mirëpo shumica e personave rastet e bastisjeve dhe keqtrajtimeve nuk i kanë paraqitur në Komisionin për Informim të Degës së LDK-së në Pejë nga frika se do të pësojnë edhe më keq nga ana e policisë serbe, pasi që ka patur shumë raste kur policia u është kërcënuar atyre që rastet të mos i paraqesin në LDK.

11 nëntor 1995

U gjet një varrezë e përbashkët afër Shkodrës

Afër Shkodrës është zbuluar një varrezë e përbashkët, ku për më shumë se 20 vjet u pushkatuan dhe u groposën kundërshtarët politikë të regjimit komunist. Praninë e kësaj varreze e konfirmuan burimet e Komesariatit të këtij rrethi. Mësohet se varreza e përbashkët ndodhet rreth një kilometër larg Shkodrës në territorin e transmetuesit të Radio Shkodrës.

Njëri nga dëshmitarët e ekzistencës së kësaj varreze, inxhinieri i Radio Stacionit të Shkodës, Nikolin Noçi tha se ky vend ishte zgjedhur me kujdes nga ana e ekzekutorëve. Pushkatimet dhe groposjet e kufomave mendohet që të kenë filluar gjatë viteve ’70, për të vazhduar deri në fund të vitit 1990.

Burimet nga Komesariati i policisë bëjnë të ditur se veç të vrarëve në kufi, në këtë varrezë të përbashkët gjenden edhe trupat e të pushkatuarave për motive politike, në mesin e të cilëve edhe ata të revoltës të vitit 1985 në burgun e Qalbarit. Këtu gjenden edhe të pushkatuarit për krime ordinare, trupat e të cilëve nuk iu dhanë kurrë familjeve të tyre.

Ndërkohë dëshmitë rrënqethëse vinë pas zhvarrosjeve të para në këtë varrezë masive. Mendohet se janë varrosur rreth 40 kufoma. Kërkimet në këtë varrezë hasin në vështirësi nga fakti se në këtë zonë janë shtrirë një numër kabllosh të tensionit të lartë të rrjetit elektrik. Pritet të mësohen emrat e personave të groposur gjatë viteve dhe dëshmitë e tjera që lidhen me ekzistencën e kësaj varreze të përbashkët, transmeton “Bujku” njoftimi e Radio-Tiranës.

11 nëntor 1997

Malishevë: Një i ri nga Banja u mor 15 herë në polici

Brahim Xh. Shurdhaj (1968) nga Banja e Malishevës gjatë muajve të fundit në stacionin e policisë serbe në Suharekë u mor 15 herë në të ashtuquajturat biseda informative, njofton KI i Degës së LDK-së në Malishevë.

Njoftohet se i riu Brahim Xh. Shurdhaj është marrë në pyetje me pretekst të dorëzimit të armës dhe gjithashtu është pyetur për Fatmir Limajn, anëtar i Degës së PPK-së në Malishevë, i cili është arratisur në shkurt të këtij viti.

11 nëntor 1998

Shtime: Një i ri u lëndua nga granata

Shaban Dugolli (16) nga Pjetërshtica e Shtimes u lëndua të martën nga shpërthimi i një granate që kishte mbetur e pashpërthyer, njofton KMDLNJ.

Merret vesh se i plagosuri është në gjendje të rëndë shëndetësore.

Foto: Shkodra

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998.

10 nëntor 1992

“Rojter”: Kosova para shpërthimit

Agjencia “Rojter” pardje komentoi rrezikun serb i cili i kanoset çdo çast Kosovës. Agjencia thekson se funksionarët e administratës së Bushit frikësohen se Serbia do të shfrytëzojë periudhën kalimtare në SHBA, për të nisur një valë të re të “pastrimit etnik” dhe të dëbojë shumicën shqiptare nga Kosova. Një hap i tillë do të shkaktonte eskalimin e luftës civile në Jugosllavi që do të mund të zgjërohej jashtë kufinjve të ishfederatës jugosllave. “SHBAtë, do ta kenë shumë vështirë që në dy muajt e ardhshëm të ndërmarrin çfarëdo aksioni, kurse kryetari serb Milosheviq do të mund të bëjë hesap se tani është momenti i volitshëm për realizimin e planeve të tija”, tha një funksionar i cili dëshiron të mbetet anonim. Në Kosovë, shumicën dërmuese të popullsisë e përbëjnë shqiptarët, kurse vetëm 10 për qind të popullsisë janë serbë. Shqiptarët janë viktima të një represioni të hatashëm, dhe ata janë praktikisht të paarmatosur. Njësitë e ushtrisë serbe janë të përqëndruara në këtë territor, kurse sipas raportit të organizatës “Helsinki Uaç” në këtë moment në formim e sipër janë grupet paramilitare serbe. Ekzistojnë shumë raporte që flasin për frikësimin e shqiptarëve.

Ky regjion ka paraqitur djepin e nacionalizmit serb dhe Milosheviqi me përkrahësit e tij kanë bërë me dije se Kosova do të hyn në përbërje të “Serbisë së madhe”.

George Kenney, ishfunksionar i StejtDepartamentit, mendon se në Kosovë eksplodimi është i paevitueshëm.

“Forcat militante serbe në Kosovë janë të armatosura dhe të ushtruara. Ato i urrejnë shqiptarët dhe planifikojnë “pastrim etnik”, me qëllim që të detyrojnë sa më tepër shqiptarë që të shpërngulen në Shqipëri” tha Kenney.

“Kjo është më keq se Bosnja, kjo është një masakër”, shkruan ai.

Në rast se kjo do të ndodhë, Shqipëria, Maqedonia, Bullgaria por edhe Greqia dhe Turqia do të mund të inkuadroheshin në këtë konflikt.

Kryetari i ri Bill Klinton, gjatë fushatës elektorale e kritikoi kryetarin Xhorxh Bush, për mosveprim të mjaftueshëm për të ndërprerë agresionin serb në Bosnjë. Funksionarët druajnë se Milosheviqi ndoshta nuk do të presë që Klintoni të marrë detyrën, dhe do të tentojë që para kësaj të dëbojë shqiptarët nga Kosova.

Si duket edhe Klintoni është i vetëdijshëm për këtë rrezik. Në njërën nga deklaratat e tij të rëndësishme pas fitores zgjedhore, ai u tërhoqi vërejtjen armiqve të SHBAve, që të mos mendojnë se Uashingtoni do të jetë i dobët në periudhën tranzitore.

“Gabimi më i madh që ndonjë kundërshtar i ynë mund ta bënë, do të ishte dyshimi në vendosmërinë amerikane në periudhën tranzitore”, tha Klintoni.

Ai përmend disa rajone, në të cilat do të sigurojë kontinuitetin e politikës amerikane, duke përfshirë edhe kërkesat për zgjidhje paqësore të konfliktit të Jugosllavisë.

Disa funksionarë të administratës, të cilët jozyrtarisht e kanë kritikuar Bushin për shkak se nuk ka vepruar më vendosmërisht kundër serbëve të Bosnjës, dëshirojnë që ai të dërgojë një sinjal të fuqishëm për mënjanimin e rrezikut nga agresioni serb mbi Kosovën.

Mirëpo, tani nuk kanë humbur gjasat e Bushit të ndërmarrë ndonjë aksion që nuk e ndërmori para zgjedhjeve.

10 nëntor 1993

Në Shtime policia serbe arrestoi katër arsimtarë

Pardje, në Shtime rreth orës 15, policia serbe hyri në punktin e Shkollës së Mesme dhe, pasi i përzuri të gjithë nxënësit, i mori dhe i dërgoi në stacion të policisë në Shtimje arsimtarët Fehmi Baftiun, Shaban Halimin, Avdi Zenunin dhe Shaban Mustafën.

Arsimtarët, pasi u keqtrajtuan disa orë në polici, u liruan.

10 nëntor 1994

Në tregun e Prishtinës policia serbe plaçkiti sasi të konsiderueshme malli dhe parash

Sot rreth orës 10:00, një ekspeditë e policisë civile serbe ndërhyri me shpejtësi në tregun e gjelbër në Prishtinë, me ç’rast në fillim bllokoi të gjitha hyrje-daljet e tregut, mbylli dyert dhe filloi si zakonisht me plaçkitjen e tregtarëve dhe qytetarëve shqiptarë, njofton Komisioni për Informim i Degës II të LDK-së në Prishtinë.

Policinë serbe sot e ndihmoi edhe ajo financiare. Në shënjestër të kësaj ndërhyrjeje të policisë ishin sidomos të rinjtë shqiptarë, disa nga të cilët u arrestuan dhe u dërguan në Qendrën e Sigurimit serb në Prishtinë.

Bëhet me dije se policia serbe edhe sot plaçkiti sasi të konsiderushme malli dhe parash nga tregtarët dhe qytetarët shqiptarë, të cilët u gjendën në tregun e gjelbër në Prishtinë.

 10 nëntor 1995

Dhuna e përditshme në Kosovë

Klinë:- Policia serbe, me pretekst të kërkimit të armëve ka disa herë që mori në polici Miftar Krasniqin, kryetar i Nëndegës së LDK-së në Ujmirë të Klinës. Njoftohet se policia ka keqtrajtuar fizikisht djalin e Miftarit, Burim Krasniqin (15).

Istog: – Më 8 nëntor, policia serbe e postkomandës në Vrellë të Istogut thirri Kadri e Tahir Gorçajn dhe Ismajl Sadikajn, që të tre nga Studenica nga të cilët kërkuan armë.

Më 9 nëntor, policia serbe bastisi disa qytetarë në Istog, nga të cilët kërkoi deviza.

Junik: – Këto ditë, policia serbe mori në pyetje, Hysen Gjotën, kryetar i Komisionit për Solidaritet të Degës së LDK-së në Junik. Ai u pyet kryesisht rreth veprimtarisë së këtij Komisioni dhe për çështje të arsimit shqip.

Shtime: – Pas qëndrimit dy ditësh në polici, mbrëmë u lirua Shefki Rashitaj dhe dy bijtë e tij, Azem e Jakup Rashitaj nga fshati Petrovë, me kusht që të paraqiten sërish në polici. Siç kemi njoftuar, ata u morën në polici, me pretekst të kërkimit të armëve.

Ndërkaq, dje sipas thirrjes së policisë, u paraqit edhe Hasan Hasani nga Petrova, i cili u mor me pretekst të dorëzimit të armëve. Ai u lirua me kusht që të paraqitet edhe sot në polici.

10 nëntor 1997

Terrori i bandave nga Shqipëria largon njerëzit nga shtëpitë e tyre

Anëtari i Kryesisë së LDK Naip Zeka, bashkë me kryetarin e Degës së LDK në Gjakovë Aqif Shehu dhe me anëtarë të Kryesisë e aktivistë të fshatrave Koshare, Brovinë e tjerë vizituan të shtunën fshatin Koshare të Gjakovës. Këtë fshat kufitar me Shqipërinë e kanë sulmuar disa herë bandat e armatosura të Shqipërisë, duke plaçkitur e terrorizuar banorët. Delegacioni i shprehu ngushllime familjes së Hasan Zenunit, të cilit bandat e armatosura nga Shqipëria ia vranë djalin Afrimin.

Gjatë qëndrimit në këtë fshat, z. Zeka u njoftua se për shkak të terrorit dhe pasigurisë së krijuar, deri tash janë larguar 28 familje me mbi 250 banorë. Të largaurit janë vendosur si qeraxhinjë në Gjakovë apo tek farefisi.

Shkolla fillore gjashtëvjeqare me klasë të përziera është mbyllur ndërsa edhe dy familjet të mbetura në fshat, ajo e Hasan Zenunit dhe e kushëririt të tij po largonin të shtunën plaçkat e orenditë.

Në një mbledhje të aktiveve të LDK të fshatrave Brovinë, Muriq e Koshare, ku mori pjesë edhe anëtari i Kryesisë së LDK-së, Naip Zeka u bisedua për gjendjen e krijuar në fshatrat e zonës kufitare dhe për shqetësimet e qytetarëve. Aktivistët e LDK-së kërkuan nga organet e Kosovës që të bëjnë ç’ është e mundur që Qeveria e Shqipërisë të ndalojë kalimin e bandave në tëritorin e Kosovës.

U kërkua që aktivistët dhe udhëheqësit e LDK dhe të organeve të tjera të jenë më prezente në këtë zonë dhe që të ndihmojnë në tëjkalimin e situatës.

Banorët i bënë thirrje të Ngarkuarit me Punë të Shqipërisë në Beograd z. Besnik Konqi që të vizitojë këto fshatra për t’u bindur për gjendjen e rëndë.

Përkujtojmë se përkundër bisesdave me autoritetet shqiptare gjatë katër muajve të fundit gjendja nuk ka ndryshuar. Pasiguria dhe shqetësimi ekziston edhe tek qytetarët e fshatrave të tjera të brezit kufitar.

Për shkak të gjendjes së rëndë, udhëheqja e Kosovës ka bërë disa herë apele dhe ka kërkuar nga Qeveria e Shqipërisë që të pengojë kalimin e bandave të armatosura plaçkitëse në fshatrat e rrethinës së Gjakovës.

Banorët e kësaja zone kanë theksuar se bandat e armatosura nga Shqipëria po veprojnë në bashkëpunim me forcat e instaluara serbe.

Kryetari Rugova kërkoi të premtën e kaluar nga Qevreria e Shqipërisë, nga pushteti lokal në veri të Shqipërisë dhe nga vëzhguesit e misionit të Bashkimit Evropian që të ndikojnë në ndërprerjen e këtij terrori.

Qeveria e Shqipërisë, përkundër kërkesave të përsëritura nga Kosova nuk është deklaruar ende për këtë problem jashtëzakonisht të madh.

Në këtë situatë, deklaratat e autoriteteve të Tiranës për të ashtuquajturën hapje të kufinjëve, në vend se të mirëpriten në Kosovë, po shkaktojnë shqetësime të reja.

Në këtë kuadër do përmendur faktin se qeveria e federatës së Serbisë e të Malit të Zi vendosi në një mbledhje hapjen e të gjitha pikave kufitare, përkatësisht mori vendim që të hiqet gjendja e mbylljes së kufirit me Shqipërinë që u vendos gjatë trazirave të pranverës.

 10 nëntor 1998

Identifikuan trupat e pajetë të tre shqiptarëve nga Rudica e Klinës

Abaz Ahmetxhekaj nga Rudica e Klinës i tha dje KI të Degës së LDK-së në Pejë se janë identifikuar trupat e pajetë të Niman Shaban Bajraktarit (51), Haki Abaz Ahmetxhekajt (23) dhe Bashkim Xhafer Mehmetajt (22), që të tre nga Rudica e Klinës, të cilët janë zhdukur më 6 korrik të këtij viti në Gorozhdec të Pejës.

I njëjti burim bën të ditur se tre shqiptarët janë masakruar nga paramilitarët serbë, ndërsa trupave të tyre të pajetë u mungojë disa gjymtyrë.

Trupat e tyre janë varrosur me urdhër të forcave serbe më 8 korrik, pa u lejuar identifikimi i tyre.