Lajmet

Ditari: Lajmet kryesore që shënuan datën 23 qershor 1993-1998?

Published

1 month ago

on

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 Foto: Shqipëria, viti i mbrapshtë 1997

23 qershor 1993

Represioni i policisë serbe kundër shkollës shqipe po vazhdon kudo në Kosovë

Vala e represionit të policisë serbe kundër shkollës shqipe po vazhdon me intensitet të shtuar në të gjitha komunat e Kosovës. Dje, policia serbe ishte në Shkollën fillore “Çajupi” në Vushtrri dhe arrestoi drejtorin e kësaj shkolle, Izet Morinën. Me atë rast policia konfiskoi 35 dëftesa të klasës së tetë, ndërsa drejtori i kësaj shkolle u mbajt në të ashtuquajturën bisedë informative rreth tri orë në stacionin e policisë në Vushtrri. Po ashtu dje në Vushtrri, policia serbe arrestoi edhe Ismail Berishën, drejtor i Shkollës fillore “Ali Kelmendi”, i cili nga inspektorët serb u mor në pyetje rreth tri orë. Në lokalet e kësaj shkolle, policia serbe bastisi edhe lokalet e Këshillit për financim komunal. Edhe në Shkollën fillore “Zija Prishtina” të Vushtrrisë, policia serbe arrestoi drejtorin e kësaj shkolle, Ibrahim Kuçin.

Gjatë ditës së djeshme, aksione të këtilla policore për pengimin e shkollës shqipe kishte edhe në Suharekë. Dje, rreth orës 11, policia serbe arrestoi drejtorin e Shkollës fillore “7 Marsi” në Suharekë. Gjatë arrestimit, policia serbe konfiskoi 16 dëftesa, ndërsa në “bisedë informative” u mor edhe pedagogu i kësaj shkolle, Hamdi Spahiu.

Edhe në Gjakovë e rrethinë, po vazhdon i njëjti trend policor. Në Shkollën fillore “Rilindja” të fshatit Dobrigjë, policia serbe arrestoi drejtorin e kësaj shkolle, Tomë Gjergjin, konfiskoi vulën, ndërsa drejtori e mori në bisedë informative rreth dy orë në lokalet e stacionit të policisë në Gjakovë. Policia serbe kështu veproi edhe në fshatin Rogovë. Edhe këtu konfiskoi vulën e kësaj shkolle, arrestoi drejtorin, Islam Gashin, të cilin e maltretoi fizikisht. Po kështu u veprua edhe në Shkollën fillore “Selman Riza” të Piskotës, me ç’rast u arrestua drejtori, Qemajl Dulatahu.

Organet e policisë serbe në Gjakovë, për sot ftuan që të lajmërohen në polici këta persona: Ilaz Dainë, drejtor i Shkollës fillore “Mustafa Bakija” në Gjakovë dhe Sali Vulën, sekretar i kësaj shkolle, Islam Gashin, drejtor i Shkollës fillore “Gani Hoxha” të fshatit Rogovë, si dhe arsimtarin e kësaj shkolle, Musa Shalën, Jonuz Ismailin, drejtor i Shkollës fillore “Ganimete Tërbeshi” të fshatit Ponoshec, Nezir Mustën, drejtor i Shkollës fillore “Bajram Sadrija” të fshatit Berjan, si dhe Rasim Hamzën, drejtor i Shkollës fillore “Jahë Salihu” të fshatit Molliq.

Edhe në Deçan, dje rreth orës 15, policia serbe arrestoi Isuf Ismajlajn, drejtor i Shkollës fillore “Lidhja e Prizrenit”, i cili nga inspektorët serbë u mor në pyetje rreth katër orë. Gjatë ditës së djeshme u arrestua edhe Sali Haxhosaj, drejtor i Shkollës fillore të fshatit Irzniq, i cili edhe pas tetëmbëdhjetë orëve ende po mbahet në stacionin e policisë në Deçan dhe për fatin e tij nuk dihet asgjë. Si kusht për lirimin e tij, policia serbe ka kërkuar nga kujdestarët e klasëve të teta që në stacionin e policisë në Deçan, t’i dërgojnë të gjitha dëftesat e klasëve të teta! Për sot, është ftuar për në organet e policisë edhe Haki Islamaj, drejtor i

Shkollës fillore të Isniqit, ndërsa merret vesh se dje, u arrestua edhe Demë Sallaj, drejtor i Shkollës fillore në Junik si dhe u konfiskuan të gjitha dëftesat e klasëve të teta.

 

23 qershor 1994

Gjykimi në Prishtinë

Dje, ditën e tretë të procesit të montuar politik kundër 14 shqiptarëve në Prishtinë, deklaratat e tyre i dhanë Agim Krasniqi dhe Ibush Kelmendi.

Agim Krasniqi (1956), nga Drenoci i Malishevës, me vendbanim në Prishtinë, kapiten në ish-APJ, tash kryetar i Degës III të LDK-së në Prishtinë, tha se është torturuar pandërprerë prej 16 deri më 30 shtator të vitit 1993. Inspektorët, tha ai, e kanë përdorur gjatë torturimit edhe elektroshokun. Në trupin tim kanë mbetur njollat e përdorimit të dhunës, tha Agim Krasniqi dhe shpjegoi se nuk u është bërë e mundur mbrojtësve të tij që të sigurojnë certifikatën përkatëse nga eksperti i mjekësisë ligjore.

Duke folur për aktivitetin e tij në LDK, ai tha se kjo parti ka vepruar legalisht dhe se LDK-ja është një forcë reale politike. Gjatë fjalës së tij spjegoi se para arrestimit është marrë dy herë nga policia, e cila ia ka bastisur shtëpinë. Inspektorët serbë, tha ai, ia kanë sharë vazhdimisht nënën dhe i janë kërcënuar në forma të ndryshme. Agim Krasniqi spjegoi edhe se si policia ka bastisur zyrat e Degës III të LDK-së në Prishtinë, se si janë arrestuar dy anëtarë të Kryesisë së asaj dege, se ata janë rrahur nga policia dhe se si policia e ka marrë dokumentacionin e kësaj dege.

Ibush Kelmendi (1952), nga Sllatina e Vogël afër Prishtinës, ish-kryeshef i Shtabit Komunal të Mbrojtjes Territoriale, hodhi poshtë në tërësi akuzën e serbëve të instaluar në Prokurorinë e Prishtinës.

Ibush Kelmendi tha se është torturuar në mënyrën më çnjerëzore. Në shtëpinë time, gjatë bastisjes, tha ai, milicët kanë marrë një revole me leje dhe dy libra, njëri prej tyre doracak për eprorët ushtarakë rezervë dhe tjetri libër me titullin “Velike pretenzije prema SFRJ”. Ibush Kelmendi tha se kundër tij është përdorur edhe elektroshoku. Ai spjegoi edhe për rolin e dyfishtë të të ashtuquajturit gjyqtar hetues. Zvonimir Maksimoviq gjatë procedurës së hetuesisë i ka thënë disa herë Ibushit se duhet të flasë, sepse ka përgatitur gjoja kryengritjen e armatosur.

Ibush Kelmendi spjegoi se si janë krijuar dy letra të shkruara nga ai dhe të cilat gjenden në dosjen e procesit kundër 14 shqiptarëve. Inspektorët më qitën përpara një letër dhe një laps dhe më thanë shkruaj çka të diktojmë ne. Sipas diktatit të tyre, spjegoi Ibushi, shkruajti “…pranoj të japë deklaratë para gjykatësit hetues”. Ndërsa në letër tjetër Ibush Kelmendi u detyrua të shkruante: “nuk kam nevojë për mbrojtës”. Në të njëjtën mënyrë tha ai i ka nënshkruar edhe procesverbalet për kinse marrjen në pyetje para gjykatësit serb.

Procesi i montuar kundër 14 shqiptarëve vazhdoi sot me marrjen në pyetje të Halil S.Ramës, Xhelil M.Ramës dhe Salih Çitakut.

 

23 qershor 1995

Kryetari Rugova bisedoi me Senatorin amerikan Robert Dol

Kryetari i Republikës së Kosovës, dr. Ibrahim Rugova u takua dje në Uashington me liderin e shumicës në Senatin amerikan, Robert Dol.

Kryetari Rugova e njoftoi senatorin Dol me zhvillimet më të reja në Kosovë dhe për represionin e shtuar serb që ka përfshirë të gjitha shtresat e popullsisë.

Dr. Rugova tha se në Kosovë vazhdojnë të ndiqen aktivistët politikë, arsimor dhe humanitarë, gjë që krijon një gjendje tendosjeje të vazhduar. Shiptarët, përkundër represionit dhe dhunës së regjimit serb, vazhdojnë me politikën e rezistencës paqësore, duke i dhënë kontribut të çmueshëm ruajtjes së paqës në rajon. Në saje të kësaj maturie dhe vetëdijes së lartë politike është arritur evitimi i një konflikti në Kosovë që do të përfshinte tërë rajonin.

Kryetari i Republikës së Kosovës tha se është e nevojshme marrja e Kosovës nën mbrojtje ndërkombëtare. Administrimi civil ndërkombëtar do të evitionte rrezikun e shpërthimit të konfliktit të hapur dhe do të krijonte parakushtet për zgjidhjen e çështjes së Kosovës me bisedime, tha dr. Rugova.

Senatori Robert Dol, i cili është njohës i mirë i gjendjes në Kosovë dhe i çështjes shqiptare e rrethanave në rajon, tha se çështja e Kosovës është preokupim i vazhdueshëm i Senatit Amerikan dhe se SHBA-të përkrahin të drejtat legjitime të popullit shqiptar të Kosovës.

Senatori Dol përkrahu kushtëzimin e sanksioneve ndaj Serbisë dhe Malit të Zi me zgjidhjen e drejtë të çështjes së Kosovës.

Kryetari Rugova pati dje edhe dy takime të vëçanta me Senatorin amerikan Riçard Llugar dhe me ish-ambasadorin amerikan në Beograd, Uoren Zimerman.

Senatori Llugar, kryetar i komitetit të Senatit për politikë të jashtme, shprehu përkrahjen e fuqishme për shqiptarët e Kosovës, të cilët, siç tha ai, i janë nënshtruar një represioni sistematik e brutal të regjimit të Millosheviqit.

  1. Llugar vlerësoi lart politikën e kryetarit Rugova dhe maturinë e popullit shqiptar të Kosovës.

Ndërsa në takimin e përzemërt të kryetarit Rugova me Uoren Zimermanin u bisedua për aspekte të ndryshme të realitetit politik, social e ekonomik në Kosovë dhe për mundësitë e zgjidhjes së çështjes së Kosovës.

  1. Zimerman tha se problemi i Kosovës duhet të zgjidhet në pajtim me vullnetin e shprehur politik të popullit.

Kryetari i Republikës së Kosovës, dr. Ibrahim Rugova bisedoi dje në Uashington me ndihmëssekretarin e shtetit amerikan për të drejtat e njeriut, Xhon Shatak (John Shattuck).

Shatak i tha kryetarit Rugova se “kërcënimi i kërshëndellave” që presidenti Bush e Klinton i kanë drejtuar Serbisë është i qëndrueshëm në politikën amerikane.

Administrata amerikane ka respekt të madh për mençurinë që keni treguar në ruajtjen e paqës në këto kohë të tensioneve të mëdha, tha Xhon Shatak.

Kryetari i Republikës së Kosovës dr. Ibrahim Rugova, pasi bëri një paraqitje të gjendjes së përgjithshme në Kosovë, foli për projektin politik të zgjidhjes së çështjes së Kosovës. Pas shpërbërjes së ish-federatës jugosllave, populli i Kosovës është përcktuar me referendum për pavarësinë dhe neutralitetin e Ksovoës. Këtë përcaktim populli e ka verifikuar edhe me akte tjera të shrpehjes demokratike të vullnetit politik dhe për këtë kemi koncezusin e plotë të të gjitha subjekteve politike në Kosovë, theksoi dr. Rugova.

Kryetari Rugova i tha ndihmëssekretarit Shatak se vënja e përkohshme e Kosovës nën një administrim civil ndërkombëtar do të krijonte parakushtet e domosdoshme për zgjidhjen e problemit me mjete politike dhe do të evitonte rrezikun e përhapjes së konfliktit në Kosovë.

Kryetari i Republikës së Kosovës, dr. Ibrahim Rugova falënderoi SHBA-të për ndihmat humanitare për popullin e Kosovës dhe për përkahjen e zgjidhjes së drejtë të çështjes së Kosovës.

SHBA-të janë shteti i parë që ka sjellë ndihma humanitare në Kosovë, theksoi dr. Rugova.

Ndihmëssekretari amerikan për të drejtat e njeriut tha se ndihmat dhe përkrahja amerikane për popullin e Kosovës nuk do të mungojnë as në të ardhmen. SHBA-të janë të vetëdijshme për vështirësitë me të cilat ballafaqohet populli i Kosovës. Administrata amerikane mbështetë zgjidhjen e drejtë të çështjes së Kosovës, tha ai.

 

23 qershor 1997

Shqipëri: Mesatarisht mbi 10 të vrarë në ditë

Sa po afrohet data e zgjedhjeve të parakohshme në Shqipëri, tensionet po shtohen gjithnjë e më shumë. Njoftime të ditëve të fundit kanë bërë të ditur për numër të madh të eksceseve dhe për paspjë edhe të numrit të madh të qytetarëve të vrarë. Mesatarja e njerëzve të vrarë brenda 24 orëve, gjatë javëve të fundit, vazhdimisht ka kaluar numrin dhjetë.

Për ilustrim po sjellim njoftimin për 20 qershorin, ditë kur, sipas burimeve zyrtare, u vranë me armë zjarri 11 veta dhe u plagosën pesë të tjerë.

Po sipas burimeve zyrtare të Shqipërisë, deri tash, që nga fillimi i trazirave, janë vrarë mbi 1600 veta. Burimet jozyrtare, ndërkaq, flasin për një numër më të madh të viktimave, që e kalon edhe shifrën 2000.

 

23 qershor 1998

Banorët e Bellaqevcit të Madh u larguan natën nga fshati

Gjendje shumë e tensionuar mbretëron sot në komunën e Obiliqit dhe të Prishtinës. Në orën 03:00 pas mesnate një pjesë e madhe e popullsisë së fshatit Bellaqevc i Madh është larguar nga fshati i vet prej frikës së ndonjë sulmi të mundshëm të forcave serbe.

Qindra fëmijë, gra e pleq kanë shkuar në drejtim të fshatit Lismir dhe në drejtim të Fushë Kosovës e Prishtinës, njofton KI i Aktivit të LDK-së në Lismir të Fushë-Kosovës.

Në fshatin Bellaqevc ndodhet Mihja Sipërfaqësore e thëngjillit që përdoret në termocentralet e Kosovës.

Mbi Prishtinë dhe rrethinë sot prej mëngjesit kanë fluturuar aeroplanë ushtarakë dhe helikopterë.

Ndërkohë njoftohet se një pjese të madhe të Prishtinës sot i është ndërprerë rryma elektrike.

 

Klinë: Dhjetë të plagosur tri ditët e fundit

Gjatë tri ditëve të fundit në fshatrat Dush, Gjurgjevik i Madh, Jashanicë, Jellovc, Cerovik, Siçevë e Gjurgjevik të Madh të komunës së Klinës forcat serbe kanë gjuajtur rreth 500 granata.

Burimet e Degës së LDK-së në Klinë njoftojnë në këtë komunë janë plagosur 10 qytetarë shqiptarë, katër prej të cilëve janë banorë të fshatit Jashanicë e Epërme. Ndër të plagosur janë edhe Mark Mirdita nga Koshi, Imer Musaj dhe një fëmijë 13 vjeç, të dy nga Stapanica, dhe një i ri nga Siçeva.

Po këto burime bëjnë të ditur se gjatë luftimeve të sotme në Stapanicë janë plagosur dy të rinj.

Nga granatat e forcave serbe në këto fshatra janë rrënuar e janë djegur shumë shtëpi. Në Jellovc janë dëmtuar e djegur shtëpitë e Ibish Racit, Tafil Zekës dhe Daut Racit; në Gjurgjevik të Madh janë granatuar shtëpitë e Xhemë Berishës, të Gjergj, Llesh dhe Pashk Prenajt; në Dush janë janë dëmtuar shtëpitë e Avdyl, Sokol e Rexhep Marmullaku ndërsa në Jashanicë të Ulët u është vënë zjarri lagjeve Shlivova dhe Bekaj.

Ndërsa KMDLNJ njofton se fshatrat: Grabanicë, Dollovë, Bokshiq e Qeskovë, të cilat ishin në shënjestër të sulmeve serbe për javë me radhë, tani po mbahen të bllokuara tërësisht dhe në to nuk mund të hyjë askush. Në qytetin e Klinës, ndërkaq, mbretëron një gjendje shumë e rëndë. Në këtë qytet, përveç forcave policore, tanimë janë vendosur edhe shumë qytetarë serbë e malazias të larguar nga disa fshatra. Nëpër rrugët e qytetit vërehen vetëm ushtarakë, policë, paramilitarë e civilë serbë, me lloj-lloj uniformash dhe të maskuar, si dhe mjete luftarake të llojeve të ndryshme. Qendra e qytetit ësdhtë shndërruar në një poligon të makinerisë luftarake serbe.

 

Në Mirenë u gjet një kufomë e një mashkulli

NKMDLNJ në Lipjan njofton se dje, më 22 qershor, barinjtë e fshatit Mirenë kanë gjetur kufoma e një mashkulli, të moshës rreth 50 vjeçare.

Sipas dëshmitarëve, viktima është vrarë më parë, sepse kufoma është karbonizuar dhe është dëmtuar nga shpezët. Dyshohet se kufoma është sjellë në Mirenë nga ndonjë vend tjetër.

Kufoma ka të veshur një triko të kaltërt me vija dhe pantollona ngjyrë të kaltërt të mbyllët.

Related Topics:
Continue Reading

Lajmet

Ditari: Lajmet kryesore që shënuan datën 2 gusht 1993-1998?

Published

11 hours ago

on

August 2, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.
 
 
Foto: Për çdo ditë njoftime për të vrarë në rajonin e Drenicës: Skënderaj
 
 
2 gusht 1993
 
Bastisje në Prishtinë dhe Obiliq
Sot, rreth orës 5 të mëngjesit, policia serbe bastisi shtëpinë e Hamit Avdiut, në rrugën “Xhemail Ibishi” në Prishtinë. Policët kërkonin Ramadan Avdiun, ish-i burgosur i ndërgjegjes, i cili nuk gjendej në shtëpi.
Gjatë bastisjes, policët serbë me vandalizëm thyen dhe demoluan orenditë e shtëpisë, ndërsa me vete morën Hamitin dhe vëllain e Ramadanit, Rexhepin, të cilët ende po mbahen në organet e policisë në Prishtinë.
Në lagjen “Kodra e Trimave” në Prishtinë, rreth orës 8.30 u bastis shtëpia e Hajdin Krasniqit. Policia serbe kërkoi Xhavit Hazirin, ish i burgosur politik, i cili banon te Hajdini. Gjatë bastisjes policia u soll brutalisht ndaj familjes Krasniqi. Xhavit Haziri u arrestua.
Po ashtu sot rreth orës 5 të mëngjesit, policia serbe bastisi familjen e Bajram Hazirit, të cilët kërkuan djalin e tij Hazirin, ish i burgosur i ndërgjegjes.
Sot, rreth orës 5 të mëngjesit, tetë policë serbë bastisën familjet e Idriz Sveçlës dhe të Ahmet Haxhiut, ish i burgosur i ndërgjegjes. Përveç Ahmetit, policët arrestuan edhe Ismail Haxhiun, të cilët siç merret vesh ende po mbahen në lokalet e policisë në Prishtinë.
 
2 gusht 1994
Dje vazhdoi seanca në procesin e montuar në Prishtinë
Dje në Gjyqin e Qarkut në Prishtinë (të udhëhequr nga pushteti okupues serb) përfundoi marrja në pyetje e të shtatë shqiptarëve të akuzuar për gjoja ushtrime ushtarake në Fushën e Labinotit në Shqipëri.
Gjyqtarët e instaluar serbë dje morën në pytje Luan Hetën, Beqir Mulecin, Hysni Francën dhe Bajram Gallapenin. Këta të akuzuar rrëfyen për torturat që ua kishin bërë inspektorët gjatë hetuesisë.
– Nuk kemi bërë kurrfarë ushtrimesh ushtarake në Fushë të Labinotit. Ajo që shkruan në aktakuzë është rrenë. Inspektorët na rrahën e na shanë, na detyruan të nënshkruajmë deklaratat, duke na u kërcënuar edhe me likuidim, deklaruan dje para
gjykatës këta të akuzuar.
Fehmi Leshtrani madje është liruar si i paaftë për ushtri për rekrutim në Nish, meqenëse mbanë syzat minus 12. I paaftë për ushtri ishte edhe Luan Heta. Beqir Muleci nga ish-APJ e patën lëshuar si të paaftë pas gjashtë muajsh shërbimi. Beqiri është i sëmurë mentalisht.
Kryetari i trupit gjykues të të treve Zoran Saveliq kumtoi se seanca do të vazhdojë nesër, kur pritet të lexohen disa shkresa të lëndës. Shtatë mbrojtësit do të paraqesin edhe propozimet e tyre në fazën e procedurës së provave.
 
2 gusht 1995
Në burgun e Dubravës së Istogut – keqtrajtohen të burgosurit shqiptarë
Në burgun e Dubravës në Istog, në të cilin po vuajnë dënimet edhe një numër i madh të burgosurish politikë shqiptarë të Kosovës, më 23 korrik të këtij viti nga gardianët e burgut u keqtrajtuan rëndë, Hysen Gega nga Sallagrazhda e Suharekës, i cili është i dënuar për herë të dytë me 2,5 vjet burg, derisa dënimin e parë e vuajti me 10 vjet. Po për të njëjtën vepër në këtë burg gjendet edhe Gëzim Lushi, po ashtu i burgosur politik, njofton KI i Degës së LDK-së në Suharekë.
Njoftohet se ata nga gardianët e burgut janë keqtrajtuar rëndë, vetëm pse kanë përcjellë programin televiziv në gjuhën shqipe.
Bëhet e ditur se Gëzim Lushit të keqtrajtuar rëndë i është ofruar ndihmë mjekësore vetëm pas tre ditësh, ndërsa Hysen Gega pas një ndëshkimi është duke bërë grevë urie.
Ndërkaq, KI i Degës së LDK-së në Suharekë njofton se në Burgun e Qarkut në Prizren është keqtrajtuar rëndë fizikisht edhe Shaip Mustafa, i cili po mbahet nën hetime, kinse për formimin e SPB-së të Republikës së Kosovës.
Shaip Mustafa momentalisht për shkak të keqtrajtimeve të rënda fizike gjendet i shtrirë në spitalin e Prizrenit.
 
 
2 gusht 1997
Mitrovicë: Policia plaçkiti tre të rinj shqiptarë
Pardje, policia serbe plaçkiti disa tregtarë shqiptarë në lagjen Bair të Mitrovicës.
Policia ndaloi Lulzim M. Nulin (18), ia plaçkiti mallin që po e dërgonte në treg dhe pastaj e ktheu në shtëpinë e tij ku i plaçkiti mallin me vlerë prej 1500 DM.
Policia plaçkiti edhe Burhan Sahatçiun (20) duke i marrë mall me vlerë prej mbi 300 DM dhe Fadil Abitin (20) të cilit i mori mall me vlerë prej mbi 2000 DM.
Të tre tregtarët e plaçkitur u dërguan në lokalet e policisë në Mitrovicë ku u mbajtën rreth tri orë.
Lulëzim Nulit, më 28 korrik policia i pat plaçkitur mall me vlerë prej 700 DM, njofton KI i Degës së LDK-së në Mitrovicë.
 
2 gusht 1998
 
Njoftohet për 8 shqiptarë të vrarë në fshatrat e Drenicës
Gjatë sulmeve të sotme të forcave policore ushtarake serbe në disa fshatra të Drenicës, deri më tash dihet për 8 shqiptarë të vrarë.
Burimet e KMDLNJ njoftojnë se në fshatin Jashanicë të Klinës janë vrarë tre pjesëtarë të UÇK. Ndërkaq në fshatin Shtuticë të Skënderajt janë vrarë katër shqiptarë, për identitetin e të cilëve ende nuk dihet.
Në fshatin Polac dihet se është vrarë Fatmir Xhemajl Veliqi (20).
Njoftohet se sot janë sulmuar edhe fshatrat Polluzhë e Tërstenik.
 
Forcat serbe vranë katër e plagosën katër anëtarë të tjerë të familjes Zeqiri në fshatin Shtuticë të Gllogocit
Sot në fshatin Shtuticë të Gllogocit forcat serbe vranë katër dhe plagosën katër anëtarë të tjerë të familjes Zeqiri, njofton KI i degës së LDK.
Tragjedia mbi këtë familje ndodhi derisa forcat serbe po granatonin në drejtim të fshatrave Polac, Kryshec, Morinë e Shtuticë. Gjatë këtyre momenteve familja Zeqiri derisa po dilte nga shtëpia, për t’i ikur granatimeve të parreshtura të ushtrisë serbe, në oborrin e kësaj familjeje ra një granatë që ishte fatale. Me atë rast u vranë: Sofije Zeqiri (60), Vahide Zeqiri (20), Kada Zeqiri (17) dhe gruaja e Halimit, Emine Zeqiri. Ndërkaq u plagosën: Halim Zeqiri, (flitet se ka vdekur), Besim Zeqiri, Sherif Zeqiri dhe Rizah Zeqiri.
Gjithashtu sulmet serbe shkaktuan dëme të mëdha materiale, duke shkatërruar shtëpi, makina bujqësore, shtalla, e të tjera.

Continue Reading

Lajmet

Ditari: Lajmet kryesore që shënuan datën 1 gusht 1993-1998?

Published

1 day ago

on

August 1, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.
 
Foto: Eliot Engëll
 
 
1 gusht 1994
 
Represioni në Kosovë
Prizren: Parmbrëmë, disa ushtarë serbë në vendin e quajtur Mllaqne, afër liqenit të Bjeshkëve të Sharrit, rrahën rëndë Ramadan Fazliun nga fshati Lubinjë e Prizrenit, në kohën derisa ai po kthehej nga Maqedonia ku kishte blerë naftë.
Bëhet me dije se ushtarët serbë Ramadan Fazliut ia thyen hundën, nofullën, dy dhëmbë, si dhe i shkaktuan lëndime të rënda trupore.
Ramadan Fazliu njoftoi Komisionin për Informim të Degës së LDK-së në Prizren se ushtria serbe po i mban peng edhe 15 bashkëfshatarë të tij, për fatin e të cilëve nuk dihet.
Dje, policia mori në shtëpinë e tij Asllan Temajn nga Prizreni, i cili në stacionin e policisë në Prizren u lidh për radiatori dhe u keqtrajtua brutalisht. Inspektorët serbë u interesuan të dinë nga Asllan Temaj se kush ka armë, rreth veprimtarisë së tij si arsimtar dhe aktivist i LDK-së.
Asllam Temaj në polici u mbajt deri rreth orës 15:00 dhe u porosit që të mos e informojë askend. Asslan temajt policia ia plaçkiti orën e dorës.
Mitrovicë: – Parmbrëmë një patrullë e policisë serbe, nën pretekst të kërkimit të armëve, ishte në shtëpinë e Faik Ibrahimit në fshatin Rekë të Mitrovicës, nga i cili kërkuan që të dorëzojë një pushkë dhe një revole.
Policia urdhëroi Faik Ibrahimin që të paraqitet në stacionin e policisë në Mitrovicë.
Më 28 korrik, policia ishte dy herë në shtëpinë e Qerim Rrudhanit në rr.”Gjon Kenedi” në Mitrovicë për të kërkuar djalin e tij Besim Rrudhanin.
Ndërkaq, pardje policia mori Besim Rrudhanin dhe së bashku me të shkuan në fshatin Shipol në shstëpinë e Xhafer Rrudhanit, nga i cili kërkuan që të dorëzojë një pushkë dhe një revole.
Vushtri: – Më 28 korrik, një policë serb së bashku me rojën e fushës, keqtrajtuan rëndë Nazmi Sadikun dhe vëllain e tij (emrin e të cilëit nuk arritëm ta mësojmë). Rrahja e Nazmi Sadikut dhe vëllait të tij u bë pa kurrfarë shkaku.
Po këtë ditë një ekspeditë e policisë serbe, shkoi në fshatin Shilovicë të Vushtrrisë dhe bastisi nën pretekst të kërkimit të armëve shtëpitë e Ramadan Mehmetit, Hadi e Sadri Begut, Zymer Behramit dhe atë të Izet Krasniqit. Policia gjatë bastisjes rrahu brutalisht Ramadan Mehmetin dhe Sadri Begun.
1 gusht 1995
 
Eliot Engëll: Kosova është një çështje kyçe
Televizioni shqiptar emetoi parmbrëmë një bisedë me kongresistin amerikan Eliot Engëll, njohës i mirë i çështjes shqiptare dhe bashkëkryetar i Këshillit për Çështje Shqiptare në Kongresin Amerikan.
Duke u përgjigjur në një pyetje lidhur me Kosovën, z. Engëll theksoi se Kosova është një çështje kyçe në rajon dhe se një grup kongresistësh në Kongresin Amerikan janë të interesuar rreth situatës në këtë vend.
– Pas meje në mur është një tabelë e Lidhjes Demokratike të Kosovës, të cilën e kam marrë nga Kosova dhe e kam vendosur në zyrën time. Unë besoj se luftën e shqiptarëve të Kosovës për vetëvendosje do ta bënte çdo popull në botë, tha ai.
Duke folur më poshtë për Kosovën dhe angazhimin e Shqipërisë rreth saj, Eliot Engëll tha:
“Presidenti Berisha do të vijë dhe do të diskutojë për Kosovën me presidentin Klinton. Përfaqësues nga Kosova gjithashtu kanë ardhur në Shtetet e Bashkuara të Amerikës dhe kemi biseduar rreth këtij problemi. Fatkeqësisht ngjarjet në Bosnjë i kanë treguar botës dhe Shteteve të Bashkuara të Amerikës se sa brutal është regjimi i Beogradit dhe njerëzit e Millosheviqit. Ata i kanë ndihmuar më së miri serbët e Bosnjës. Unë them me shqetësim se ajo ç’po ndodh në Bosnjë mund të jetë si pikë uji në det krahasuar me atë çka mund të ndodhë në Kosovë, nëse bota nuk i shikon serbët me shumë vëmendje”.
Lidhur zhvillimet politike në katër vjetët e fundit në Shqipëri, z.Engël theksoi: “Unë mendoj se nuk ka vend që të ketë ecur në rrugë më të drejtë të demokracisë. I heq kapelën popullit shqiptar për atë që ka arritur. Është vërtetë për t’u lavdëruar demokracia në Shqipëri”, tha mes tjerash kongresisti amerikan Eliot Engëll në intervistën për Televizionin Shqiptar.
1 gusht 1997
Inspektorët serbë plaçkitën tregtarët shqiptarë në Prishtinë
Dje, rreth orës 12:00, një ekspeditë e inspektorëve dhe e policisë serbe e përbërë prej rreth 40 vetash bëri një plaçkitje të madhe në Tregun me shumicë të pemëve e perimeve në afërsi të Pallatit të Sporteve në Prishtinë.
Dhjetëra tregtarë u plaçkitën me pretekst se nuk kishin lejet për shitje. Për shkak të dëmtimit dhe drojës nga ndonjë ekspeditë e re sot në këtë treg kishte shumë më pak mall.
Disa tregtarë që ishin plaçkitur dje i thanë sot QIK-ut se
shuma e plaçkitjes individuale kapte shumën deri në 15. 000 dinarë serbë.
Bekim Deliaj nga Peja u dënua me 15 mijë dinarë, Zylbar Ramadani nga Prishtina me 800 dinarë, Ultrim Ymeri me 800 dinarë, Afrim Shala me 300 dinarë, Beqir Gashi me 200 dinarë, Besim Muja me 1. 200 dinarë, Ruzhdi Krasniqi me 350, Emin Sopi me 1. 500 dinarë, Fadil Gashi me 1. 200 dinarë, Fadil Dobratiqi me 620 dinarë etj.
Disa nga tregtarët e plaçkitur shqiptarë deklaruan se edhe përkundër kërkesave për leje të shitjes, organet e instaluara të drejtorisë së tregut në Prishtinë nuk u kanë dhënë lejet. Në këtë mënyrë inspektorët serbë mund plaçkisin se herë që dëshirojnë.
1 gusht 1998
Dihet edhe për një të vrarë e tre të plagosur në Rahovec
Gjatë sulmit të forcave serbe në Rahovec është vrarë edhe Nexhemdin Mushla (61), i cili është varrosur aty edhe ku është vrarë, në oborrin e shtëpisë së tij.
Një i afërm i tij, që kishte arritur të largohet nga Rahoveci, i tha QIK-ut se është plagosur edhe vajza e Nexhmedinit, Hajria, si edhe fqinjtë e tyre Naime e Driton Kadriu.
Skënderaji po i ngjan një baze ushtarake të forcave serbe
Edhe mbrëmë në qytetin e Skënderajt, arriti një konvoj i madh i forcave të ushtrisë serbe i përbërë nga 37 kamionë me ushtarë serbë, të cilët u vendosën në qytetin e Skënderajit dhe në fshatin Polac, njofton NKMDLNJ në Skënderaj.
I njëjti burim njofton se qyteti i Skënderajt është shndërruar në një bazë ushtarake, në të cilin janë vendosur mijëra ushtarë e policë serbë.
Dëshmitarët okularë kanë njoftuar se policia serbe ka ndëryrë pothuaj në secilën shtëpi shqiptare në Skënderaj dhe ka plaçkitur, thyer e demoluar çdo gjë që ka gjetur. Deri tash në tërësi është shkatërruar lagja “Skënderaj 2” dhe Lagjja e Re, ku tashmë nuk ka mbetur asnjë shtëpi e pashkatërruar nga forcat serbe.
Gjendje e rëndë dhe dramatike po mbretëron edhe në rrethinën e Runikut dhe të Turiçecit. Forcat serbe kanë granatuar lagjen Hajzeraj në Leçinë, si dhe ka djegur fshatrat si Padalishtin, Çitakun, Runikun, Kastriotin, Vitakun, Qubrelin, Radishevën e Kotorrin. Sipas informacioneve, forcat e policisë dhe të ushtrisë serbe në zonën e Drenicës po bëjnë spastrim etnik.
I njëjti burim njofton se deri tash nuk dihet për fatin e shumë banorëve shqiptarë si gra, pleq e fëmijë, të cilët kanë mbetur të bllokuar në fshatrat e lartëshënuara, në të cilat kanë hyrë forcat serbe.
Bëhet e ditur se vetëm në fshatin Çubrel kanë mbetur disa kufoma pleqësh ende të pavarrosura.
Ndërkaq, nga fshati Bingjë i Klinës, i banuar kryesisht me serbë, forcat serbe po granatojnë fshatrat e Drenicës, ndërsa granatime kanë arritur deri në Burojë, ku është rrezikuar popullsia civile, e cila ka filluar masovisht t’i braktisë vatrat e tyre.
Banorët shqiptarë që kanë braktisur shtëpitë e tyre, janë strehuar madje edhe në tunelet hekurudhore, ndërsa po bëhen 5 ditë që këtë trevë nuk e ka vizituar asnjë institucion humanitar.
Në këtë hapësirë tash ka filluar të ndodhë edhe katastrofa humanitare, pasi mungojnë të gjithë artikujt ushqimorë, sanitarë e higjenik, ndërsa as që mund të flitet për medikamente.
NKMDLNJ i Skënderajt pohon se propaganda serbe te popullata e këtushme shqiptare po zgjon neveri. Kjo propagandë në njërën anë po provon që ta mashtrojë opinionin botëror, se kinse në rajonin e Drenicës janë krijuar kushtet për kthimin e të ikurve nga shtëpitë e tyre, derisa në anën tjetër mijëra forca të policisë dhe ushtrisë sebe po depërtojnë dhe po i terrorizojnë banorët shqiptarë të Drenicës.

Continue Reading

Lajmet

Profesionet me rritjen më të shpejtë në botë janë pjesë e ofertës akademike të UBT-së

Published

2 days ago

on

July 31, 2026

By

Në një kohë kur teknologjia po ndryshon rrënjësisht mënyrën se si funksionojnë ekonomitë, bizneset dhe institucionet publike, një pyetje bëhet gjithnjë e më e rëndësishme për të rinjtë: cilat profesione do të jenë më të kërkuarat në pesë apo dhjetë vitet e ardhshme?

Përgjigjja vjen nga Future of Jobs Report 2025, raporti i World Economic Forum, i cili analizon transformimin e tregut global të punës përmes të dhënave të mbledhura nga mijëra punëdhënës në mbarë botën. Sipas raportit, deri në vitin 2030 do të krijohen rreth 170 milionë vende të reja pune, ndërsa miliona role tradicionale do të transformohen ose do të zëvendësohen si rezultat i inteligjencës artificiale, automatizimit, tranzicionit të gjelbër dhe transformimit digjital.

Në krye të listës së profesioneve me rritjen më të shpejtë renditen Big Data Specialists, FinTech Engineers, Artificial Intelligence and Machine Learning Specialists, Software and Applications Developers, Security Management Specialists, Information Security Analysts, Data Scientists, UI/UX Designers, Internet of Things Specialists, Environmental Engineers, Renewable Energy Engineers, si dhe specialistët e automjeteve autonome dhe elektrike.

Në këtë kontekst, një analizë e ofertës akademike të UBT-së tregon një përputhje të qartë me prioritetet që identifikon World Economic Forum. Institucioni ka ndërtuar një ekosistem të arsimit të lartë që i përgjigjet transformimit të tregut të punës, duke ofruar programe studimi në fusha që lidhen drejtpërdrejt me profesionet me rritjen më të shpejtë në nivel global.

Në fushën e teknologjisë, UBT ofron programe si Shkenca Kompjuterike dhe Inxhinieri, Sisteme të Informacionit, Inxhinieri e Mekatronikës, si dhe specializime në Inteligjencë Artificiale, Data Science, Cyber Security, Cloud Computing, Machine Learning, Internet of Things (IoT) dhe Robotikë, duke përgatitur profesionistë për rolet që raporti i World Economic Forum i rendit ndër më të kërkuarat në botë.

Një nga profesionet me rritjen më të shpejtë sipas raportit është FinTech Engineer, një profil që po transformon sektorin financiar përmes teknologjisë. Duke e parë këtë zhvillim, UBT ka zhvilluar programin FinTech, i cili kombinon financën, teknologjinë, analizën e të dhënave dhe inovacionin digjital, duke përgatitur specialistë për industrinë financiare të së ardhmes.

Transformimi global nuk kufizohet vetëm në sektorin e teknologjisë. Raporti evidenton se tranzicioni drejt ekonomisë së gjelbër po krijon një kërkesë të jashtëzakonshme për Environmental Engineers, Renewable Energy Engineers dhe specialistë të sistemeve energjetike. Për këtë arsye, programet e Inxhinierisë së Mjedisit, Inxhinierisë së Energjisë dhe Inxhinierisë Mekanike në UBT marrin një rëndësi strategjike, duke përgatitur profesionistë që do të kontribuojnë në zhvillimin e energjisë së pastër, teknologjive të qëndrueshme, efikasitetit energjetik dhe infrastrukturës moderne.

Në të njëjtën kohë, zhvillimi i industrisë automobilistike drejt automjeteve elektrike dhe autonome po krijon mundësi të reja për inxhinierët mekanikë dhe ekspertët e sistemeve inteligjente, fusha në të cilat UBT ka investuar në laboratorë modernë dhe mjedise praktike të të nxënit.

Raporti i World Economic Forum evidenton gjithashtu rritjen e vazhdueshme të kërkesës për profesionet që lidhen me sigurinë. Përveç Information Security Analysts, të cilët mbrojnë infrastrukturat digjitale nga sulmet kibernetike, raporti rendit edhe Security Management Specialists, si rezultat i sfidave të reja gjeopolitike dhe rritjes së nevojës për menaxhimin e rreziqeve. Në këtë drejtim, UBT ofron programe në Studime të Sigurisë, krahas programeve në Cyber Security, duke kombinuar sigurinë fizike, sigurinë kombëtare dhe atë digjitale në një qasje multidisiplinare.

Ndërkohë, transformimi i industrisë ushqimore dhe rritja e fokusit global në sigurinë ushqimore, teknologjitë e prodhimit dhe zhvillimin e qëndrueshëm kanë rritur rëndësinë e profesionistëve të Shkencave të Ushqimit. Përmes këtij programi, UBT përgatit ekspertë që kontribuojnë në kontrollin e cilësisë, nutricionin, inovacionin ushqimor, teknologjinë e përpunimit dhe standardet ndërkombëtare të sigurisë ushqimore.

Përtej programeve akademike, UBT ka ndërtuar zhvillimin mbi një ekosistem të plotë inovacioni. Institucioni ofron mbi 50 programe studimi, mbi 150 fusha specializimi, më shumë se 200 laboratorë modernë, bibliotekën më të madhe akademike në Kosovë. UBT Smart City, është kthyer në rol model dhe ka tërhequr interesin e institucioneve dhe studiuesve ndërkombëtarë për t’u analizuar si praktikë e zhvillimit universitar, ndërsa së fundmi USA Today e ka përshkruar UBT-në si “Silicon Valley of the Balkans”, duke theksuar rolin në ndërtimin e një ekosistemi të avancuar të teknologjisë, laboratorëve, parqeve teknologjike dhe inovacionit që përgatit profesionistë për tregun global.

Përmes laboratorëve të specializuar dhe qendrave kërkimore, studentët angazhohen në projekte që lidhen me Artificial Intelligence, Big Data, Cyber Security, Internet of Things, Cloud Computing, Virtual Reality, Extended Reality, Smart Cities, 5G, automatizimin industrial dhe transformimin digjital. Kjo qasje i afron ata me teknologjitë që sot po udhëheqin ekonominë globale dhe që sipas World Economic Forum do të përcaktojnë profesionet e dekadës së ardhshme.

Raporti vlerëson se deri në vitin 2030, rreth 39% e aftësive aktuale të fuqisë punëtore do të transformohen, ndërsa punëdhënësit do të kërkojnë gjithnjë e më shumë profesionistë me kompetenca në analizën e të dhënave, inteligjencën artificiale, zhvillimin e softuerit, sigurinë, inxhinierinë, energjinë, qëndrueshmërinë, kreativitetin dhe komunikimin.

Nëse dekada e kaluar u karakterizua nga revolucioni i internetit, dekada që po jetojmë po karakterizohet nga inteligjenca artificiale, ekonomia e të dhënave, tranzicioni i gjelbër dhe transformimi digjital. Treguesit globalë dëshmojnë se profesionet me rritjen më të shpejtë janë pikërisht ato që ndërthurin teknologjinë, inovacionin dhe qëndrueshmërinë. Përmes programeve në Shkenca Kompjuterike dhe Inxhinieri, Sisteme të Informacionit, FinTech, Studime të Sigurisë, Inxhinieri të Mjedisit, Inxhinieri të Energjisë, Inxhinieri Mekanike, Shkenca të Ushqimit, Media dhe Komunikim, si dhe dhjetëra programeve të tjera të orientuara drejt inovacionit, UBT po kontribuon në përgatitjen e profesionistëve që do të jenë pjesë e transformimit të ekonomisë globale dhe e tregut të punës të së ardhmes.

Continue Reading

Lajmet

34 të vdekur dhe mijëra migrantë në Ceutë, Spanja forcon masat në kufi

Published

2 days ago

on

July 31, 2026

By

Të paktën 34 persona kanë humbur jetën gjatë përpjekjeve për të kaluar kufirin nga Maroku drejt qytetit autonom spanjoll të Ceutës, në Afrikën e Veriut. Ndërkohë, rreth 60 mijë migrantë raportohet se kanë hyrë në territorin e Ceutës brenda 24 orëve të fundit, duke krijuar një situatë të jashtëzakonshme në kufirin mes Marokut dhe Spanjës.

Kryeministri i Spanjës, Pedro Sánchez, ka deklaruar se qeveria do të përdorë të gjitha mjetet në dispozicion për të garantuar sigurinë në Ceutë, pas tensioneve të fundit të shkaktuara nga fluksi i madh i migrantëve.

“Qeveria spanjolle qëndron me qytetin e Ceutës. Ne e kuptojmë shqetësimin dhe pasigurinë që qytetarët po përjetojnë në orët e fundit,” u shpreh Sánchez.

Ai theksoi se shteti do të angazhojë të gjitha burimet e nevojshme për të mbrojtur qytetarët dhe për të ruajtur rendin dhe bashkëjetesën në këtë territor spanjoll në bregdetin e Afrikës së Veriut.

“Qeveria do të përdorë çdo burim të shtetit për të garantuar sigurinë e qytetarëve të Ceutës,” shtoi ai, duke nënvizuar se asnjë qeveri e mëparshme nuk ka investuar aq shumë burime në këtë territor sa administrata aktuale.

Sánchez njoftoi gjithashtu se autoritetet do të vendosin barriera lundruese në zonën e molit si masë e përkohshme, ndërsa po shqyrtohen edhe ndryshime ligjore për menaxhimin e situatës.

Ceuta, e vendosur në bregun verior të Afrikës dhe e rrethuar nga territori maroken, mbetet një nga pikat kryesore të hyrjes së migrantëve drejt Bashkimit Evropian. Fluksi i ditëve të fundit ka rritur ndjeshëm tensionet në këtë zonë kufitare, duke shtuar presionin mbi autoritetet spanjolle./A.K/

Continue Reading

Të kërkuara