Live

DITARI: Çfarë lajmesh kemi lexuar në çdo 2 mars, në vitet 1993-1999

Published

9 minutes ago

on

Sot lajmet janë nga më të ndryshmet. Bota ka ndryshuar. Teknologjia ka ndryshuar shumëçka në jetën tonë, edhe në mënyrën tonë të informimit. Edhe ngjarjet janë të tjera. Të kohës. Por, cilat ishin lajmet që mund të lexonin kosovarët, dekada më herët. Ta zëmë, në kohën më të rëndë për shqiptarët e Kosovës (1990-1999), kur Serbia kishte bërë përpjekje ta instalojë terrin informativ.

Ishin gazetarët shqiptarë që nuk heshtën, edhe pse Serbia mbylli Radiotelevizionin e Prishtinës, gazetën “Rilindja” dhe të gjitha revistat e tjera.

Ishin edhe korrespondentët e mediave të huaja, që ndihmuan që, megjithatë, shqiptarët e Kosovës të mos mbesin në terr informativ.

 

2 mars 1993

Një nga lajmet kryesore ishte vazhdimi i grevës së refugjatëve shqiptarë në Norvegji. Greva e urisë, është organizuar në vendbanimin “Frostaveion”, në qytetin Trondhaim, që nga 11.02.1993, duke filluar nga ora 14.00. Kërkesat e grevistëve shqiptarë janë:

– rishqyrtimi dhe anulimi i vendimit për kthimin e refugjatëve shqiptarë nga Norvegjia dhe

– kërkesa që të gjithë kërkuesit e strehimit, të marrin statusin e refugjatit.

Titujt e tjerë ishin: Kongresi i Internacionales Demokristiane për Kosovën, në Bruksel; Konferencë për shtyp e Partisë Shqiptare Demokristiane e Kosovës.

Lajme të përditshme kishte për dhunën serbe në Kosovë. Në lajmin “Serbia ka intensifikuar aktivitetet ushtarake në Kosovë”, njoftohet edhe për sulme fizike ndaj shqiptarëve në anë të ndryshme të Kosovës.

Lajmi tjetër është se veprimtari i njohur i të drejtave të njeriut dhe i pajtimeve të gjaqeve, dr. Zekeria Cana u mor përsëri në polici. Pastaj se katër policë serbë sot rreth orës 13 arrestuan Mehmet Aliun, pronar i objektit ku mbajnë mësim nxënësit e gjimnazit “Sami Frashëri” të Prishtinës.

Titujt e tjerë: Plane për kolonizime të Prishtinës; Arsimtarët serbë në Istog bëjnë grevë; Presion i shtuar në komunën e Gjakovës; Në komunën e Klinës po intensifikohet dhuna; “Quotidien de Paris”: Në mbrojtje të një fuqie baruti; AFP: Kontakte sekrete greko-maqedonase të nivelit të lartë në kufi;

 

2 mars 1994

Lajmi kryesor: Kryetari Rugova organizoi pritje me rastin e 550-vjetorit të Kuvendit të Lezhës.

Lajme të tjera: Prizren: Policia financiare serbe konfiskoi mall në vlerë më se 5 milionë marka;

Gjashtë shqiptarë në Pejë akuzohen për armë; Në Petrovë të Shtimes serbët plaçkitën pajisjet e ambulancës; Lëvizje të ushtrisë serbe në Kosovë; “Evening standard”: Ëndrra për Serbinë e Madhe po shkapërderdhet.

Në kuadër të rubrikës “Represioni i policisë serbe në Kosovë” jepen këto lajme:

Lipjan: – Sot në orët e hershme të mëngjesit, policia serbe nën pretekst të kërkimit të armëve bastisi familjen e Ramiz Ajetit në fshatin Çollapek të Lipjanit. Policia në shtëpinë e Ramizit nuk gjeti kurrfarë arme, ndërsa të e mori me vete në stacionin e policisë në Lipjan dhe ende po mbahet në arrest.

Prizren: – Dje rreth orës 12, policia serbe nën pretekst të kërkimit të armëve bastisi familjet e Zeqir, Haki dhe Osman Qunajt në Dushanovë të Prizrenit.

Meqë asnjë nga kryefamiljarët nuk gjendeshin në shtëpi, policët gjatë bastisjes shkaktuan dëme të mëdha materiale duke thyer e demoluar shumë orendi.

Ferizaj: – Pardje rreth orës 10, dy policë serbe bastisën familjen e Shaip Sopës në Ferizaj. Meqë Shaipi nuk gjendej në shtëpi, policët i lanë ftesë që të paraqitet dje në stacionin e policisë në Ferizaj në orën 8.

Më 28 shkurt, rreth orës 11, dy policë serbë hynë në shkollën fillore “Skënderbeu” në Jezerc, të cilët i lanë ftesë Jakup Bibës, kryetar i Nëndegës VI-të të për të marrë në pyetje sot në orën 14 në stacionin e policisë në Nerodime.

Fushë-Kosovë: Më 28 shkurt, prej orës 10 deri rreth orës 13, policia serbe nën pretekst të kërkimit të armëve bastisi familjet e Hakif Sogojevës, Asllan Mëziut dhe Latif e Hatip Berishës.

 

2 mars 1995

Lajmi kryesor: Në Gjenevë u mbajt manifestimi për Kosovën i organizuar nga Amnesty International. Morën pjesë rreth dy mijë vetë, ndër të cilët edhe aktivistët të seksionit të Zvicrës dhe të seksionit të Gjenevës të organizatës Amnesty International, të huaj të tjerë, si dhe Z. Xhafer Shatri, ministër për Informim i Republikës së Kosovës, z. Adem Demaçi, kryetar i Këshillit për Mbrojtjen e të Drejtave dhe të Lirive të Njeriut-Prishtinë, drejtues i shoqatës kulturore shqiptare “Ikballe Prishtina”.

Lajme të tjera: Mesazh i kryesisë së Bashkësisë Islame të Kosovës me rastin e Bajramit të Madh; Në Belgjikë mërgimtarët shqiptarë falën Bajramin; Përfaqësuesi i UNESCO-s u takua me ministrin e qeverisë së Jugosllavisë së vetëshpallur; Gazeta daneze lidhur me zbulimin se veprimtari i kriminelit Arkan ishte angazhuar si avokat nga qeveria daneze; Muaji mars – muaj i solidaritetit në Kosovë; Në dy muajt e fundit në Kosovë policia serbe keqtrajtoi 781 persona;

U mor në pyetje drejtori i SHM “H.Tahsini” në Obiliq;  Kryetari e sekretari i LS u morën në biseda informative; Nga Fabrika e Mobiljeve në Deçan nga puna u përjashtuan 69 punëtorë shqiptarë;

Në rubrikën “Dhuna e përditshme në Kosovë” jepen këto lajme:

Vushtrri: – Më 28 shkurt rreth orës 17:00, një patrullë e policisë serbe, nën pretekst të kërkimit të armëve “vizitoi” shtëpinë e Ismail dhe Sabri Ismailit në fshatin Pasomë të Vushtrrisë.

Ismail Ismailit, policia ia mori letërnjoftimin dhe e urdhëroi që sërish të paraqitet në stacionin e policisë në Vushtrri.

Më 1 mars, nja patrullë e policisë serbe, nën të njëjtin pretekst “vizitoi” shtëpinë e Sabit Sheremetit në fshatin Gurbardh të Vushtrrisë. Policia e urdhëroi Sabit Sheremetin që të paraqitet në stacionin e policisë në Vushtrri.

Prizren: – Më 17 shkurt, policia serbe, nën të njëjtin pretekst ishte në shtëpinë e Arife Morinës me përkatësi myslimane në Prizren. Ajo u mor në pyetje rreth një orë, me ç’rast u fye në mënyrën më të ulët. Ditë më parë policia ka keqtrajtuar brutalisht bashkëshortin e saj Rifat Morinën.

Kamenicë: – Më 23 shkurt, dy inspektorë serbë, njëri nga të cilët quhej Momçillo Trajkoviq, ishin në shtëpinë e Hetem R.Latifajt në Hogosht të Kamenicës nga i cili konfiskuan një revole. Ata ia lanë thirrjen Hetemit që të paraqitet në stacionin e policisë në Kamenicë. Nga Hetem R.Latifaj kërkuan të dinë se kinse nga kush e ka blerë revolen.

 

2 mars 1997

Lajmi kryesor ka të bëjë me një deklaratë të Kryetarit Rugova për gjendjen kaotike në Shqipëri.

Lajmet në vijim trajtojnë gjendjen në Shqipëri: Gjendje dramatike në jug të Shqipërisë; Kopliku e Serreçi e vlerësojnë dorëheqjen e Meksit; Zëdhënësi i studentëve të Vlorës kërcënohet me sulm të armatosur mbi Tiranën.

Transmetohet një intervistë e Fehmi Aganit, i cili tha se përcaktim themelor i LDK-së është Republika e pavarur e sovrane e Kosovës, e cila do të realizohet me mjete paqësore politike.

Gjithashtu, një tekst nga shtypi norvegjez për gjendjen aktuale në Kosovë.

 

2 mars 1998

Titujt kryesorë: Dhjetëra mijëra shqiptarë protestojnë në Prishtinë ; Vlerësim pozitiv i organizatorit të protestës së sotme me 300 000 pjesëmarrës; Intervenim brutal i policisë serbe kundër protestuesve paqësorë në Prishtinë; Intervenim brutal i policisë te Qendra Sportive; Një kriminel serb shkeli me veturë dhe lëndoi rëndë katër protestues; Policia rrahu në banesa gra e fëmijë që solidarizoheshin me protestuesit; Studentët serbë provokuan me sharje dhe lënduan me gurë disa protestues; Ndërtesa e Presidencës dhe e QIK-ut nën kontroll të rreptë të policisë; U rrahën edhe I. Osmani, A. Spahiu, V. Surroi e Z. Cana; Të shtëna të pasqaruara me armë në Prishtinë; Helikopteri, shoqërues i aksioneve represive serbe edhe në Prishtinë; Shumë të lënduar pranë gjimnazit “Xhevdet Doda”; 320.000 protestues në Podujevë; Protestë e grave shqiptare para selisë së KKN-së në Prishtinë; Deklaratë e Qeverisë së Shqipërisë kundër dhunës e terrorit serb në Kosovë; Të shtëna me armë në disa vende të Podujevës; Policia serbe fortifikohet në Lumëmadh të Vushtrrisë; Përforcime të policisë speciale në Hajvali.

Lajme të tjera – të pasdites: Deklaratë për shtyp e z. Kinkel lidhur me situatën dhe tensionet në Kosovë; Dhjetëra të lënduar po kërkojnë ndihmë në ambulancat private; Intervenimi i policisë po vazhdon në Kodër të Trimave;  Kryetari Rugova dënoi dhunën kundër protestuesve paqësorë në Prishtinë; Kryetari Rugova priti diplomatë amerikanë dhe britanikë; Prishtinë;  Këshilli i Ministrave i UE-së diskuton nesër urgjentisht për Kosovën; Kryetari Rugova ngushëlloi familjet e viktimave të terrorit serb; Ditë zie në Kosovë më 3 mars 1998 (e martë); Shqiptarët protestojnë nesër në Bruksel; Rrahje edhe në stacionin e autobusëve në Prishtinë; U rrah fotoreporteri i QIK-ut; Studentët serbë ndihmuan policinë në rrahjen e protestuesve shqiptarë; Mbi 60 protestues të rrahur nga policia kërkuan ndihmë mjekësore; U mor në polici dhe u keqtrajtua rëndë dr. Jusuf Bajraktari; Policia arrestoi fotoreporterin e gazetës “Fjala Jonë” dhe B. Novosellën; Varrimi i të vrarëve në Qirez të Skënderajt bëhet nesër; Vdiq sepse nuk iu lejua t’i jipej ndihma mjekësore; BE paralajmëron presion më të madh mbi Millosheviqin; Deklaratë e Qeverisë së Republikës së Kosovës; Gjatë javës së ardhshme në shkollat e Skënderajt nuk do të ketë mësim; Forca të mëdha kanë ardhur nga Serbia në Podujevë; Krisma e shpërthim në Dellofc të Klinës.

Në mbrëmje ishin edhe këto lajme: Një i plagosur me armë zjarri; Një gazetari gjerman iu konfiskua kamera; Shtohet numri i të lënduarve; Protesta edhe në Malishevë; Masmediat i bëjnë jehonë protestës së sotme në Prishtinë; Gënjeshtra të policisë e të mediumeve serbe për protestën e sotme; U rrah plaku 77 vjeçar; Shpërthime në komunën e Deçanit; Një delegacion i Bashkësisë Islame të Kosovës u pengua të shkojë në fshatrat e Drenicës; Forca policore u stacionuan në Kërpimeh të Podujevës; Koncentrim i forcave ushtarake në brezin kufitar me Shqipëri; U varros viktima e parë e terrorit serb në Drenicë; Nuk dihet asgjë për Shaban Mujën nga Gradica; Policia keqtrajtoi Demaçin, disa gazetarë të “Bujkut” dhe ndërhyri në redaksinë e “Kohës”; Pas intervenimit në Kosovë, R. Gelbard kërcënon Beogradin me sanksione të reja; Reagime të ashpra në Shqipëri; Reagime të shumta në botë kundër dhunës serbe.

 

2 mars 1999

Lufta është në kulmin e saj. Përpjekjet diplomatike para dështimit.

Lajme nga politika vendore:

Hashim Thaçi u caktua mandatar për formimin e Qeverisë së Përkohshme të Kosovës; Adem Demaçi tërhiqet nga pozita e Përfaqësuesit të Përgjithshëm Politik të UÇK-së.

Nga politika ndërkombëtare:

Sekretari i përgjithshëm i NATO-s, Havier Solana: Ekziston vetëm një marrëveshje të cilën duhet ta pranojnë në tërësi të dyja palët në Kosovë;  Në Maqedoni janë vendosur mbi 6000 trupa të NATO-s për Kosovën; Ministri i jashtëm britanik Robin Kuk sot shkon në Moskë.

Lajmet kryesore vinin nga terreni: 

Forcat serbe po granatojnë fshatrat shqiptare në kufi me Maqedoninë;  Vushtrri: Forcat serbe kanë shtënë drejt fshatrave të Qyqavicës; Policia serbe arrestoi tre shqiptarë nga Okrashtica e Vushtrrisë; Vazhdojnë sulmet ndaj fshatrave shqiptare të Kaçanikut e Hanit të Elezit;  Në Rahovec arritën forca të reja të policisë serbe; Në Rahovec policia serbe tentoi të kidnapojë një të ri shqiptar;  Rahovec: Policia serbe arrestoi një shqiptar nga Opterusha; Në fshatin Tupec të Prizrenit janë gjetur dy trupat e shqiptarëve të vrarë; Dje afër fshatit Koliç të Prishtinës është sulmuar një patrullë e policisë serbe; U identifikuan dy viktimat e gjetura në Tupec të Prizrenit; Rahovec: Në Brestoc u vra një shqiptar; Mitrovicë: Forcat serbe provokuan pjesëmarrësit e varrimit të dy pjesëtarëve të UÇK-së në Vaganicë; Klinë: Koncentrime të mëdha të forcave serbe në Sverkë; Prizren: Disa serbë sulmuan dy verifikues të OSBE-së; Prishtinë: Forcat serbe kaluan nëpër fshatrat Barilevë e Drenoc;

Pejë: Në gjykatën serbe një shqiptar u dënua me 2 vjet burg; Policia serbe keqtrajtoi rëndë një shqiptar nga Druari i Vushtrrisë; Suharekë: Persona të panjohur dogjën një shtëpi shqiptare në Mushtisht; Nga Suhareka në drejtim të Prizrenit shkoi një konvoj i forcave serbe; Suharekë: Nesër pritet të hapet një Zyrë e Misionit të OSBE-së edhe në fshatin Bllacë; Kërkohet Bashkim (Hashim) Hyseni; Gjakovë: U identifikua kufoma e Shani Thaçit nga Rogova e Hasit; Në Osek Hylë të Gjakovës sot varroset Sylejman Bajrami; Në Dobrosh të Gjakovës policia serbe bastisi tri familje shqiptare; Në Maqedoni kanë kaluar mbi 320 banorë të fshatrave Krivenik e Rezhancë të Hanit të Elezit; Mitrovicë: Granatimet drejt fshatrave shqiptare; Në Trakaniq u gjet kufoma e një personi të paidentifikuar; Policët serbë bastisin shtëpitë e shqiptarëve në Bair të Mitrovicës; U gjet kufoma e një personi të vrarë në Shtavicë të Rahovecit.

 

Foto: Llogaria në Facebook e publicistit Veton Surroi

Related Topics:
Continue Reading

Live

Rafineria kryesore saudite mbyllet pas sulmit iranian me dron

Published

5 hours ago

on

March 2, 2026

By

Arabia Saudite mbylli të hënën rafinerinë e saj më të madhe të brendshme të naftës pas një sulmi me dron, sipas një burimi. Sulmi ndodhi ndërsa sulmet izraelite dhe amerikane dhe hakmarrjet iraniane detyruan ndërprerjen e prodhimit të naftës dhe gazit në të gjithë Lindjen e Mesme, raport Reuters.

Valë sulmesh në rajon zgjati deri në ditën e tretë, duke çuar në ndërprerjen e shumicës së prodhimit të naftës në Kurdistanin Irakian dhe në disa fusha të mëdha të gazit në Izrael, duke kufizuar eksportet drejt Egjiptit.

Rafineria Ras Tanura e kompanisë shtetërore Saudi Aramco, me kapacitet prej 550,000 fuçi naftë në ditë, u mbyll si masë paraprake. Rafineria është pjesë e një kompleksi energjetik në bregun e Gjirit të Arabisë Saudite dhe shërben si terminal kryesor për eksportin e naftës.

Në Kurdistanin Irakian, kompani si DNO, Gulf Keystone Petroleum, Dana Gas dhe HKN Energy ndërprenë prodhimin si masë paraprake, pa raportime dëmesh.

Në Izrael, qeveria urdhëroi ndalimin e përkohshëm të prodhimit në fushën e madhe të gazit Leviathan, e cila po zgjerohej për të arritur rreth 21 miliard metra kub në vit si pjesë e një marrëveshjeje eksporti 35 miliard dollarëshe me Egjiptin. Kompania Chevron, që operon edhe fushën Tamar, konfirmoi se objektet e saj janë të sigurta. Edhe kompania Energean ndërpreu prodhimin në fushat më të vogla të gazit.

Në Iran, të shtunën u dëgjuan shpërthime në Ishullin Kharg, ku përpunohet 90% e eksporteve të naftës së vendit. Nuk është e qartë se sa u prekën objektet. Irani, prodhuesi i tretë më i madh në OPEC, furnizon rreth 4.5% të prodhimit global të naftës, me një prodhim prej rreth 3.3 milion fuçi naftë në ditë plus 1.3 milion fuçi kondensate dhe lëngje të tjera.

Dronët u kapën në Arabinë Saudite
Situata në rafinerinë Ras Tanura është nën kontroll, tha burimi. Dy dronë u interceptuan në objekt, duke shkaktuar një zjarr të vogël nga mbetjet, por nuk pati të lënduar, sipas një zëdhënësi të ministrisë saudite të mbrojtjes. Disa njësitë e rafinerisë u mbyllën si masë paraprake, por furnizimi me karburant dhe derivatet e tij për tregun lokal nuk u ndalua, raportoi agjencia shtetërore SPA.

Megjithatë, mbyllja e Ras Tanura mund të rrisë shqetësimet për furnizimin global, pasi trafiku në Sundin e Hormuzit, përmes të cilit kalon rreth një e pesta e konsumit global të naftës, është pothuajse i ndalur pas sulmeve të anijeve të dielën.

Sulmi shihet si një eskalim i rëndësishëm
“Sulmi ndaj rafinerisë Ras Tanura është një eskalim i rëndësishëm, me infrastrukturën energjetike të Gjirit tashmë në shënjestër të Iranit,” tha Torbjorn Soltvedt, analist kryesor për Lindjen e Mesme në firmën Verisk Maplecroft. “Ky sulm mund gjithashtu ta afrojë Arabinë Saudite dhe vendet fqinje të Gjirit drejt bashkimit me operacionet ushtarake të SHBA-së dhe Izraelit kundër Iranit.”

Arabia Saudite ka objektet e saj të energjisë të fortifikuara, por janë sulmuar më parë, më së shumti në shtator 2019, kur sulmet me dron dhe raketa ndaj fabrikave Abqaiq dhe Khurais ndërprenë përkohësisht më shumë se gjysmën e prodhimit të naftës së vendit. Rafineria Ras Tanura ishte sulmuar edhe nga Houtit e Jemenit, të mbështetur nga Irani, në vitin 2021. /Reuters/

 

Continue Reading

Lajmet

REL: Droni që goditi bazën britanike ishte iranian, konfirmon presidenti i Qipros

Published

7 hours ago

on

March 2, 2026

By

Presidenti i Qipros, Nikos Christodoulides, ndau më shumë detaje për sulmin me dron në një bazë ushtarake britanike në territorin britanik në Qipron jugore.

Menjëherë pas mesnatës, “një mjet ajror pa pilot – Shahed” u rrëzua në objektet ushtarake të Mbretërisë së Bashkuar në Akrotiri, “duke shkaktuar dëme të vogla materiale”, shkroi Christodoulides në X.

Shahed është dron iranian.

Presidenti Christodoulides tha se është “në kontakt të vazhdueshëm” me udhëheqësit e Evropës dhe ata të vendeve të tjera.

Ai shtoi se Qiproja “nuk e ka ndërmend të jetë pjesë e ndonjë operacioni ushtarak”.

Reagimi vjen pas deklaratës së fundit nga Ministria britanike e Mbrojtjes, e cila tha se po zhvendoste familjarët e personelit nga baza e Akrotirit. /REL/

Continue Reading

Live

Britania e Madhe do të lejojë SHBA-në të përdorë bazat për të goditur sitet e raketave iraniane

Published

7 hours ago

on

March 2, 2026

By

Britania e Madhe ka rënë dakord me kërkesën e SHBA-së për të përdorur bazat ushtarake britanike për sulme “mbrojtëse” mbi sitet e raketave iraniane, ka thënë Sir Keir Starmer. Por kryeministri tha se Britania e Madhe kishte nxjerrë mësime nga “gabimet e Irakut” dhe nuk ishte përfshirë në sulmet fillestare mbi Iranin dhe “nuk do t’u bashkohet veprimeve ofensive tani”.

BBC raporton se SHBA-ja ka gjasa të përdorë RAF Fairford në Gloucestershire dhe Diego Garcia në Oqeanin Indian për sulme në sitet e raketave iraniane. Kryeministri e bëri njoftimin vetëm disa orë përpara se një bazë ajrore britanike RAF në Qipro të goditej nga një sulm me dron të dielën mbrëma, pa raportime për viktima.

Hetimet janë në vijim për të përcaktuar se nga ku u lëshua ai. Sulmi në RAF Akrotiri në Qipro ndodhi rreth mesnatës sipas kohës lokale (22:00 GMT), me Ministrinë e Mbrojtjes që tha më vonë se u shkaktuan “dëme minimale”. Në një deklaratë me video të lëshuar herët të dielën, Sir Keir tha se baza e vendimit për të pranuar kërkesën e SHBA-së ishte “vetëmbrojtja kolektive” e aleatëve dhe mbrojtja e jetëve britanike, duke akuzuar Iranin për ndjekjen e një “strategjie të tokës së djegur”.

Kryeministri shtoi se SHBA-ja do t’i përdorte bazat britanike për “qëllimin specifik dhe të kufizuar mbrojtës” të shkatërrimit të raketave të Iranit “në burim”. Ai shtoi se lëvizja ishte në përputhje me ligjin ndërkombëtar dhe qeveria britanike kishte publikuar atë që tha se ishte një përmbledhje e këshillave të saj ligjore. Lideri i Reform UK, Nigel Farage, tha se vendimi era “më mirë vonë se kurrë” dhe e përshkroi Sir Keir si “një ndjekës, jo një udhëheqës”. Lideri i Partisë së Gjelbër, Zack Polanski, e dënoi vendimin, duke thënë se Sir Keir ishte hedhur në “një tjetër luftë ilegale në Lindjen e Mesme”.

U raportua muajin e kaluar se qeveria britanike nuk i kishte dhënë leje SHBA-së për të përdorur bazat ushtarake të MB-së për të mbështetur ndonjë sulm të mundshëm të SHBA-së ndaj Iranit. Presidenti i SHBA-së, Donald Trump, tha se “mund të jetë e nevojshme” që SHBA-ja të përdorë RAF Fairford dhe Diego Garcia për operacione nëse Irani “vendos të mos bëjë një marrëveshje”. Të dyja bazat janë përdorur nga SHBA-ja në të kaluarën për të kryer misione bombardimi të rënda me rreze të gjatë.

Liberal Demokratët kanë kërkuar që deputetëve t’u jepet fjalë për lejimin e SHBA-së për të përdorur bazat britanike. Ndiqni përditësimet më të fundit mbi konfliktin në Lindjen e Mesme. SHBA-ja dhe Izraeli filluan sulmet ndaj Iranit herët të shtunën, me Trump që inkurajoi popullin iranian të rrëzonte qeverinë e vendit. Regjimi iranian është përgjigjur me sulme ndaj aseteve të SHBA-së dhe vendeve në rajon me prani ushtarake amerikane, duke përfshirë Bahreinin, Katarin, Emiratet e Bashkuara Arabe, Kuvajtin dhe Irakun. Sir Keir kishte thënë se avionët e MB-së ishin “në qiell” në Lindjen e Mesme si pjesë e një operacioni mbrojtës për të mbrojtur aleatët dhe qytetarët e saj në rajon, por tha se MB-ja “nuk luajti asnjë rol” në sulme. Të dielën, ai tha se avionët britanikë kishin interceptuar me sukses sulmet iraniane, por shtoi: “Partnerët tanë në Gjirin Persik na kanë kërkuar të bëjmë më shumë për t’i mbrojtur ata dhe është detyra ime të mbroj jetët britanike.” Ai e filloi deklaratën duke thënë se “mbetet rasti” që Britania e Madhe “nuk është e përfshirë në sulmet ndaj Iranit”.

Të paktën 200,000 qytetarë britanikë janë në rajon – duke përfshirë banorë, ata me pushime dhe pasagjerë në tranzit, tha Sir Keir – dhe qeveria “do të vazhdojë të bëjë gjithçka që mundet për t’i mbështetur” ata. Njerëzit britanikë, përfshirë anëtarët e forcave të armatosura, si dhe aleatët, po viheshin në “rrezik të madh” nga sulmet iraniane, tha ai, duke akuzuar regjimin se po bëhej “edhe më i pamatur”.

Sulmet iraniane kanë “goditur aeroporte dhe hotele ku po qëndrojnë qytetarët britanikë” dhe të shtunën “goditën një bazë ushtarake në Bahrein, duke humbur për pak personelin britanik”, tha Sir Keir. Ai shtoi: “E vetmja mënyrë për të ndaluar kërcënimin është shkatërrimi i raketave në burim, në depot e tyre të ruajtjes, ose lëshuesit që përdoren për të lëshuar raketat.

Shtetet e Bashkuara kanë kërkuar leje për të përdorur bazat britanike për atë qëllim specifik dhe të kufizuar mbrojtës. Ne kemi marrë vendimin për të pranuar këtë kërkesë për të parandaluar Iranin të lëshojë raketa në të gjithë rajonin, duke vrarë civilë të pafajshëm, duke vënë në rrezik jetët britanike dhe duke goditur vende që nuk kanë qenë të përfshira.” Zyra e Jashtme u ka kërkuar shtetasve britanikë në Bahrein, Izrael, Kuvajt, territoret palestineze, Katar dhe EBA të regjistrojnë praninë e tyre për të marrë përditësime. /BBC/

 

 

 

Continue Reading

Live

Izraeli sulmon Libanin, rregjistrohen 31 të vrarë dhe 149 të plagosur

Published

7 hours ago

on

March 2, 2026

By

Sulmet ajrore izraelite në Bejrut dhe në jug të Libanit kanë shkaktuar 31 viktima dhe 149 të plagosur, njoftoi Ministria e Shëndetësisë e Libanit. Sipas autoriteteve, bilanci i viktimave është paraprak.

Zhvillimet e fundit shënojnë hapjen e një fronti të ri në konfliktin që po përhapet në Lindjen e Mesme.

Mbrëmjen e kaluar, Hezbollah, grupi militant shiit libanez i mbështetur nga Irani, lëshoi raketa drejt qytetit izraelit Haifa. Në përgjigje, Izraeli ndërmori një ofensivë ajrore në shkallë të gjerë.

Sulmet shënjestruan bastionet e Hezbollahut në periferitë jugore të Bejrutit, si dhe zona pranë aeroportit të qytetit. Ndërkohë, në jug të Libanit, Izraeli u ka bërë thirrje banorëve të më shumë se 50 fshatrave që të evakuohen, ndërsa sulmet në ato zona vazhdojnë.

Hezbollahu konsiderohet i dobësuar pas goditjeve të marra nga Izraeli në luftën e zhvilluar 18 muaj më parë. Megjithatë, për shkak të lidhjeve të forta ideologjike, fetare dhe financiare me Iranin, përfshirja e tij në këtë konflikt është parë si e pashmangshme, në një situatë ku tashmë pothuajse të gjitha vendet e rajonit janë të përfshira. /Euronews/

Continue Reading

Të kërkuara