Presidenti i SHBA-së, Donald Trump, tha të mërkurën se do të shqyrtonte mundësinë e rifillimit të një fushate ushtarake në Rripin e Gazës nga Izraeli nëse Hamasi nuk arrin të zbatojë kushtet e marrëveshjes së tij të armëpushimit.

“Çfarë po ndodh me Hamasin, kjo do të sqarohet shpejt”, tha Trump për CNN në një intervistë telefonike.

“Izraeli do të kthehet në ato rrugë sapo ta them fjalën. Nëse Izraeli do të mund të hynte dhe t’i shkatërronte, do ta bënte këtë”, u përgjigj Trump kur u pyet se çfarë do të ndodhte nëse Hamasi refuzonte të çarmatosej.

“Më duhej t’i mbaja prapa”, shtoi ai.

Trump tha se lirimi i 20 pengjeve të gjallë izraelite ishte “i një rëndësie të madhe”, por Hamasi tani duhet të përmbushë angazhimin e tij për të kthyer eshtrat e të tjerëve dhe për t’u çarmatosur.

Ndërkohë, grupi palestinez tha të mërkurën se do të dorëzojë eshtrat e dy robërve të tjerë izraelitë në Gaza më vonë, sipas marrëveshjes së armëpushimit me Izraelin./KP

Ministri i mbrojtjes i Gjermanisë njoftoi të mërkurën se Berlini do t’i furnizojë Ukrainës sisteme shtesë armësh për të forcuar mbrojtjen ajrore të vendit mes sulmeve në rritje ruse.

Boris Pistorius tha në një takim të Grupit të Kontaktit për Mbrojtjen e Ukrainës se aleatët perëndimorë duhet të ruajnë vendosmërinë e tyre dhe të sigurojnë më shumë armë për Ukrainën, pasi zhvillimet e fundit në fushën e betejës tregojnë se Ukraina po mbron me sukses veten.

“Mund të mbështeteni te Gjermania. Ne do të vazhdojmë dhe zgjerojmë mbështetjen tonë për Ukrainën. Me kontrata të reja, Gjermania do të ofrojë mbështetje shtesë në vlerë mbi 2 miliardë euro”, tha Pistorius në takimin në Bruksel, në të cilin morën pjesë edhe sekretari i Mbrojtjes i SHBA-së Pete Hegseth dhe ministri i Mbrojtjes i Ukrainës Denys Shmyhal.

“Paketa trajton një numër kërkesash urgjente të Ukrainës. Ajo ofron sisteme mbrojtjeje ajrore, interceptorë Patriot, sisteme radari dhe artileri të drejtuar me precizitet, raketa dhe municione”, tha Pistorius.

Ai shtoi se Gjermania do t’i dorëzojë Ukrainës edhe dy sisteme shtesë mbrojtjeje ajrore IRIS-T, duke përfshirë një numër të madh raketash të drejtuara dhe raketash mbrojtëse ajrore me qitje nga supi.

Pistorius tha gjithashtu se Gjermania po ndërmerr hapa për të zgjeruar bashkëpunimin midis industrive të mbrojtjes gjermane dhe ukrainase dhe po planifikon të nisë një projekt gjithëpërfshirës për të modernizuar sistemet e armëve që tashmë i janë dorëzuar Ukrainës dhe për të zgjatur jetëgjatësinë e tyre të shërbimit, raporton Anadollu./D.B/KP

NATO do të zbatojë një sërë masash shtesë për të forcuar dhe përshpejtuar kapacitetin e saj për t’u përballur me kërcënimet me dronë, tha sekretari i Përgjithshëm Mark Rutte të mërkurën.

Duke folur në konferencën për shtyp pas një takimi të ministrave të mbrojtjes së NATO-s në Bruksel, Rutte theksoi se aleanca po rrit vigjilencën dhe qëndrimin e saj mbrojtës në të gjithë krahun lindor, duke përfshirë edhe përmes iniciativës së lansuar së fundmi Eastern Centry në Detin Baltik.

Ai theksoi se NATO po teston sisteme të integruara për të zbuluar, ndjekur dhe neutralizuar kërcënimet ajrore dhe do të përdorë mekanizmat e saj të prokurimit për të zhvilluar me shpejtësi aftësi kundër dronëve me kosto efektive, raporton KosovaPress.

“Më herët këtë muaj, nëntë aleatë u bashkuan së bashku me Ukrainën për të mbështetur aftësinë e Danimarkës për t’u përballur me kërcënimet e mundshme nga dronë. Mendoj se ky është një shembull i fuqishëm i bashkëpunimit të shpejtë dhe efektiv që bëhet i mundur nëpërmjet NATO-s”, tha ai.

Rutte shtoi se NATO reagon në mënyrë proporcionale ndaj kërcënimeve në hapësirën e saj ajrore.

“Ne nuk do të rrëzojmë një aeroplan në hapësirën ajrore të NATO-s nëse nuk përbën kërcënim, por nëse përbën kërcënim, mund t’ju siguroj se ushtarakët tanë kanë të gjitha autoritetet”.

Ai nënvizoi angazhimin e aleancës për të ruajtur karakterin e saj mbrojtës, duke siguruar njëkohësisht sigurinë e territorit dhe popullsisë së saj.

“NATO është një aleancë mbrojtëse. Do të mbetet një aleancë mbrojtëse, por mos u gaboni, kjo aleancë mbrojtëse është e gatshme dhe e vullnetshme të bëjë atë që duhet për të mbajtur 1 miliard njerëzit tanë të sigurt dhe territorin tonë të sigurt”, tha ai.

Rutte theksoi se nuk ka dyfishim midis përpjekjeve të NATO-s dhe BE-së në lidhje me projektet kundër dronëve, duke vënë në dukje se NATO përqendrohet në aftësitë ushtarake, ndërsa BE shfrytëzon burimet e saj industriale dhe financiare.

“Më lejoni ta them një herë e përgjithmonë, BE-ja dhe NATO-ja po punojnë krah për krah ngushtë së bashku, dhe të dy e dimë forcën tonë… Jam i lumtur me atë që po bëjnë ata. Ata janë të lumtur me atë që po bëjmë ne. Po punohet së bashku. Ne jemi këtu në kontakt të ngushtë dhe nuk ka mbivendosje”, shtoi ai.

Lidhur me kërcënimin e presidentit të SHBA-së Donald Trump për tarifa kundër Spanjës për shpenzimet e mbrojtjes, Rutte vlerësoi rolin e Trump në arritjen e objektivave të investimeve në mbrojtje të NATO-s.

“Presidenti Trump ka qenë jashtëzakonisht i rëndësishëm për ta bërë samitin e NATO-s një sukses… Gjëja e mirë është se në Hagë patëm unanimitet, të 32 unanimitet të plotë, Spanja u pajtua plotësisht me objektivat e aftësive. Pra, mendoj se është e rëndësishme të theksohet”, tha ai, raporton Anadollu./D.B/KP

Presidenti i Shteteve të Bashkuara të Amerikës, Donald Trump, ka kërcënuar Spanjën me sanksione tregtare, përfshirë tarifat, duke thënë se është i pakënaqur me refuzimin spanjoll për rritjen e shpenzimeve të mbrojtjes në 5 % dhe duke e quajtur këtë veprim mungesë respekti ndaj NATO-s.

“Jam shumë i pakënaqur me Spanjën. Është i vetmi vend që nuk e rriti numrin deri në 5 % … kështu që nuk jam i kënaqur me Spanjën. Po mendoja t’u jepja atyre ndëshkime tregtare përmes tarifave për shkak të asaj që bënë, dhe mendoj se mund ta bëj këtë”, u ka thënë Trump gazetarëve në Shtëpinë e Bardhë.

Trump i ka shtyrë vazhdimisht anëtarët e NATO-s të shpenzojnë më shumë për mbrojtjen dhe ka ngritur dyshime mbi gatishmërinë e Uashingtonit që t’iu dalë zot anëtarëve që nuk shpenzojnë mjaftueshëm.

Ai ka deklaruar javën e kaluar, ndërsa takoi presidentin e Finlandës, se NATO-ja duhet të ketë parasysh përjashtimin e Spanjës nga aleanca për shkak të refuzimit për planet e reja për shpenzime.

Duke përmendur kërcënimin e madh që paraqet Rusia që nga pushtimi i Ukrainës në vitin 2022, anëtarët e NATO-s kanë argumentuar se zotimi i mëparshëm i shpenzimeve prej 2 % të PBB-së më nuk është i mjaftueshëm.

Kryeministri spanjoll, Pedro Sánchez, kishte siguruar një përjashtim në minutën e fundit atëherë, duke thënë se Spanja do të shpenzonte vetëm deri në 2.1 për qind, të cilën do ta quante të mjaftueshme dhe realiste.

Madridi, i cili iu bashkua Organizatës së Traktatit të Atlantikut të Veriut në vitin 1982, ka argumentuar se kompenson shpenzimet më të ulëta me kontribute të forta trupash në misionet e NATO-s, duke përfshirë vendosjet në Letoni, Sllovaki, Rumani, Bullgari dhe Turqi./S.K/EO/