Policia e Kosovës ka konfiskuar tetë bimë të dyshuara të llojit kanabis sativa gjatë një kontrolli të realizuar në Kaçanik.

Sipas raportit policor, rasti ka ndodhur të hënën rreth orës 14:30 në rrugën “UÇK-ja”, pas pranimit të informatave se në një pronë po kultivoheshin bimë narkotike.

Njësitë policore kanë kryer kontroll në shtëpinë e një të dyshuari mashkull kosovar, ku kanë gjetur dhe sekuestruar tetë vazo me bimë të mbjella kanabis sativa, si dhe shishe që dyshohet se përdoreshin për ujitjen e tyre.

Lidhur me rastin është njoftuar prokurori kompetent, ndërsa deri më tani nuk raportohet për persona të arrestuar.

Hetimet për veprën penale “Kultivimi i bimës së hashashit, shkurres së kokainës ose bimës së kanabisit” janë duke vazhduar.

Në Kosovë janë raportuar tri raste të dhunës në familje në Prishtinë dhe Mitrovicën e Jugut, bëjnë të ditur raportet policore.

Në Prishtinë, më 15.06.2026 rreth orës 11:30, një viktimë femër kosovare ka raportuar se është sulmuar nga nëna dhe bashkëshorti i saj. Palët janë shoqëruar në stacion policor dhe pas intervistimit, në konsultim me prokurorin, rasti është proceduar në procedurë të rregullt.

Ndërkohë, në Mitrovicën e Jugut më 14.06.2026 rreth orës 21:00, një person mashkull kosovar është arrestuar pasi dyshohet se ka sulmuar fizikisht vajzën e tij. Pas intervistimit dhe konsultimit me prokurorin, i dyshuari është liruar në procedurë të rregullt.

Në një rast tjetër të po kësaj dite, rreth orës 23:51, policia është njoftuar për dhunë psikike të ushtruar vazhdimisht nga bashkëshorti ndaj viktimës. Palët janë intervistuar dhe pas inicimit të rastit, në konsultim me prokurorin, janë liruar në procedurë të rregullt.

/A.K/

Protestat kundër qeverisë së Shqipërisë, të udhëhequr nga kryeministri Edi Rama, kanë hyrë në ditën e 16-të radhazi në Tiranë, me qindra qytetarë që po vazhdojnë të mblidhen në kryeqytet.

Protestuesit kërkojnë transparencë institucionale dhe kundërshtojnë projektet turistike në zonat e mbrojtura të Sazanit dhe Zvërnecit, duke i cilësuar ato si të dëmshme për mjedisin dhe të paqarta në procedurat e miratimit.

Tubimet kanë nisur në Sheshin “Skënderbej”, për të vijuar më pas me marshime drejt Kryeministrisë dhe rrugëve kryesore të qytetit. Gjatë protestës, qytetarë të ndryshëm kanë mbajtur fjalime, duke përsëritur kërkesat e tyre dhe kritikat ndaj qeverisë.

Sipas raportimeve, protesta ka vijuar edhe pas incidentit të një nate më parë, kur marshimi drejt Aeroportit të Rinasit u ndalua nga policia disa kilometra larg tij.

Kryeministri Edi Rama, përmes një reagimi në rrjetin “X”, ka deklaruar se përfituesit kryesorë të protestës janë vetë qeveria dhe Partia Socialiste, duke shtuar se do të merren mësime nga shqetësimet e qytetarëve.

Ndërkohë, kreu i Partisë Demokratike, Sali Berisha, ka reaguar duke përshëndetur protestuesit dhe duke i cilësuar zhvillimet si “çlirim nga diktatura”, ndërsa ka akuzuar qeverinë për dëme të mëdha sociale dhe demografike në vend.

Protestat kanë nisur fillimisht si reagim ndaj projekteve turistike në Sazan dhe Zvërnec, por më pas janë zgjeruar në kërkesa më të gjera për llogaridhënie dhe kundërshtim të politikave qeveritare. Çështja është pasqyruar edhe në media ndërkombëtare, ndërsa organizata mjedisore kanë shprehur shqetësime për ndikimin në zonat e mbrojtura.

Burimi: KOHA

/A.K/

Tetë persona, përfshirë dy punonjës të kompanisë Boeing, kanë humbur jetën pasi një bombardues B-52 i Forcave Ajrore të Shteteve të Bashkuara është rrëzuar menjëherë pas ngritjes nga Baza Ajrore Edwards në Kaliforninë jugore.

Aksidenti ka ndodhur gjatë një misioni provë rutinë, ndërsa përplasja ka shkaktuar një re të madhe tymi të zi që është parë nga disa kilometra larg.

Zyrtarët ushtarakë kanë konfirmuar se viktimat ishin pjesë e një ekipi të përzier ushtarakësh, civilësh qeveritarë dhe kontraktorësh.

Shkaqet e rrëzimit ende nuk janë përcaktuar dhe autoritetet kanë njoftuar se hetimet fillestare mund të zgjasin deri në 30 ditë, ndërsa analiza e plotë e incidentit mund të marrë më shumë se gjashtë muaj.

Guvernatori i Kalifornisë, Gavin Newsom, e ka quajtur ngjarjen “tragjike” dhe ka shprehur ngushëllime për familjet e viktimave dhe komunitetin e Bazës Ajrore Edwards.

Burimi: Top Channel

/A.K/