Republika e Kosovës dhe Republika e Panamasë kanë nënshkruar marrëveshjen për heqjen e vizave për pasaportat diplomatike dhe zyrtare.

Ministria e Punëve të Jashtme dhe Diasporës, gjithashtu njofton se kanë nisur diskutimet edhe për liberalizimin edhe për pasaportat e rregullta

Marrëveshja u nënshkrua nga Zëvendësministri Kreshnik Ahmeti dhe Ministri i Punëve të Jashtme në detyrë i Republikës së Panamasë, Carlos A. Hoyos.

“Republika e Kosovës dhe Republika e Panamasë kanë shënuar një hap të rëndësishëm drejt thellimit të marrëdhënieve dypalëshe, përmes nënshkrimit të marrëveshjes për heqjen e vizave për mbajtësit e pasaportave diplomatike dhe zyrtare. Palët diskutuan për nisjen e procedurave drejt heqjes së vizave edhe për mbajtësit e pasaportave të rregullta, si dhe për zgjerimin e bashkëpunimit në fusha me interes të ndërsjellë, përfshirë sigurinë, arsimin e lartë dhe turizmin”, thuhet në njoftimin e MPJD-së.

Po ashtu, palët u dakorduan që raundi i ardhshëm i konsultimeve politike ndërmjet dy ministrive, në nivel të zëvendësministrave, të mbahet në Prishtinë në fund të vitit 2026.

Policia e Kosovës ka njoftuar se është gjetur personi që ishte raportuar si i zhdukur dy ditë më parë në Mitrovicën e Jugut.

Sipas raportit policor, viktima grua ishte larguar nga shtëpia e saj pasditen e 25 marsit, rreth orës 17:00. Pas angazhimit të njësive përkatëse, ajo është gjetur shëndoshë e mirë sot, më 27 mars.

“Është raportuar se më datë 25.03.2026, rreth orës 17:00, nga shtëpia ka dalë viktima femër kosovare, e cila me datën 27.03.2026 është gjetur,” thuhet në njoftimin e Policisë.

Pas fitores spektakolare 4-3 të Kosovës ndaj Sllovakisë në Bratislavë, “Dardanët” kanë marrë vëmendjen e shumë mediave prestigjioze botërore si Reuters, Marca, 433 dhe shumë të tjera, duke e cilësuar këtë sukses si një hap historik drejt Kupës së Botës.

Mediumi i njohur spanjoll Marca i ka kushtuar vëmendje të veçantë këtij triumfi, duke lavdëruar paraqitjen e Kosovës dhe duke theksuar disiplinën taktike dhe vendosmërinë e skuadrës në një ndeshje me ritëm të lartë.

“Muriqi dhe Kosova bëjnë histori në ndeshjen e çmendur në Bratislavë. Kosova ishte e vendosur, luajti me disiplinë të lartë, pa krijuar shumë raste të pastra”, shkruan Marca.
“Ata e mbyllën ndeshjen duke u mbrojtur pas golit në shtesë nga Sllovakia. Goli i Strelecit i dha shpresë tifozëve vendas, por mbeti vetëm ëndërr. Të martën, në finalen e madhe kundër Turqisë. Ëndrra për paraqitjen në Botërorin e parë vazhdon”.

Edhe Reuters e ka cilësuar rrugëtimin e Kosovës si një “përrallë”, duke theksuar se vendi është vetëm një ndeshje larg kualifikimit historik në Kupën e Botës.
“Kanë kaluar më pak se një dekadë që kur Kosova luajti për herë të parë në kualifikimet për Kupën e Botës, por tani ajo është vetëm një ndeshje larg një vendi në finalet e këtij viti”, shkruan Reuters.
“Jam shumë krenar për këtë ekip dhe mendoj se pas 90 minutash ishte një fitore e merituar”, citohet trajneri Franco Foda.

Ndërkohë platforma e njohur e futbollit 433 ka reaguar pas suksesit të Kosovës duke shkruar:

“Kosova arrin në finalen e play offit të kupës së botës”

Me këtë postim, 433 ka theksuar arritjen e madhe të “Dardanëve”, të cilët janë vetëm një hap larg një kualifikimi historik në Kupën e Botës.

Ndërsa, urime për këtë arritje historike të Kosovës nuk kanë munguar as nga Ambasada e Shteteve të Bashkuara të Amerikës. “Urime Kosovës për këtë fitore historike”.

Sipas të dhënave nga Football Meets Data, Kosova hyn në finalen e playoff-it me rreth 45% gjasa për kualifikim, duke u renditur si lider në mesin e skuadrave “jo-favorite”, ndërsa Turqia mbetet lehtësisht favorite me 55%.

Tashmë, të gjitha sytë janë të drejtuar nga finalja e madhe në Prishtinë ndaj Turqisë, një ndeshje që mund të kurorëzojë një rrugëtim të jashtëzakonshëm dhe të shkruajë historinë për futbollin kosovar, duke e çuar për herë të parë në një turne madhor si Kupa e Botës.

Sekretari amerikan i Shtetit, Marco Rubio, bisedoi të enjten me Kryeministrin e Qeverisë Rajonale të Kurdistanit, Masrour Barzani, njoftoi Departamenti i Shtetit, duke shtuar se ai shprehu “mirënjohje” ndaj Qeverisë Rajonale të Kurdistanit (KRG) për mundësimin e arritjes së naftës nga Iraku, përfshirë atë nga Kurdistani irakian, në tregjet globale.

“Sekretari gjithashtu shprehu mirënjohjen e tij për Qeverinë Rajonale të Kurdistanit për mundësimin e naftës nga Iraku, përfshirë Rajonin e Kurdistanit të Irakut, që të arrijë në tregjet globale,” tha Departamenti i Shtetit në një deklaratë.

Lufta me Iranin ka rritur çmimet e naftës dhe ka tronditur tregjet globale. Departamenti i Shtetit tha se Rubio “u shprehu ngushëllime familjeve të anëtarëve të Peshmerga-ve të vrarë në një sulm me raketa iraniane më 24 mars dhe u uroi shërim të shpejtë të lënduarve.”

Të paktën gjashtë luftëtarë kurdë Peshmerga u vranë dhe 30 u plagosën në një sulm me raketa në bazën e tyre në veri të Erbilit, në Kurdistanit irakian, thuhej në një deklaratë të Peshmerga-ve të martën.

Deklarata e Peshmerga-ve thoshte se Irani kreu një “sulm tradhtar,” duke shtuar se gjashtë raketa balistike iraniane goditën një selitë ushtarake të Peshmerga-ve në veri të Erbilit herët të martën.

Lufta me Iranin filloi më 28 shkurt, kur SHBA-ja dhe Izraeli sulmuan Iranin. Teherani u përgjigj më pas duke lëshuar sulmet e veta mbi Izraelin dhe shtetet e Gjirit ku gjenden baza amerikane. Sulmet e përbashkëta SHBA-Izrael në Iran dhe sulmet izraelite në Liban kanë vrarë mijëra njerëz.

Presidenti i SHBA-së, Donald Trump, ka ofruar objektiva dhe afate kohore të ndryshueshme për luftën, që variojnë nga përmbysja e qeverisë së Iranit deri te shkatërrimi i aftësive të tij ushtarake dhe raketore. Të enjten, ai tha edhe një herë se mendon se ana e tij e ka fituar luftën. /Reuters/