Samadrexha ka shkruar histori duke e fituar për herë të parë Kupën e Republikës së Kosovës në hendboll në konkurrencën e femrave.

Në finalen e zhvilluar të dielën në palestrën “Bill Clinton” në Ferizaj, Samadrexha triumfoi ndaj Istogu me rezultat 27:23, duke siguruar trofeun e parë të Kupës në historinë e klubit.

Ndeshja ishte e balancuar në pjesën e parë, ku istogaset kishin epërsi të lehtë, por pa arritur të krijojnë diferencë më të madhe se dy gola. Në pjesën e dytë, Samadrexha u shfaq më e organizuar dhe më efikase, duke përmbysur rezultatin dhe duke ruajtur avantazhin deri në fund.

Figura kryesore e ndeshjes ishte Jennifer Abreu me tetë gola, ndërsa Vitoria Oliveira shtoi shtatë të tjerë për fitueset. Në anën tjetër, për Istogun u dallua Joneide Olikaka me tetë gola, ndërsa Alda Bruna realizoi katër.

Në rrugën drejt finales, Samadrexha mposhti Ferizajn në gjysmëfinale, ndërsa Istogu eliminoi Shqiponjën.

Ky sukses shënon një moment historik për Samadrexhën, që për herë të parë ngre trofeun e Kupës së Kosovës.

Federata e Futbollit e Kosovës, në bashkëpunim me sponsorin zyrtar të Albi Mall Superliga e Kosovës, ka ndarë çmimin tradicional “Ylli i Javës”, i cili i jepet futbollistit më të dalluar të javës në kampionatin elitar kosovar.

Për javën e 30-të të edicionit aktual, ky çmim i është ndarë për herë të tretë futbollistit të FC Drenica, Kreshnik Uka, i cili shkëlqeu me dy gola në fitoren 3:2 ndaj FC Prishtina e Re.

Vlerësimi është bërë nga Komisioni i Veteranëve të Futbollit, i cili ka shpërblyer paraqitjen e tij të jashtëzakonshme në këtë xhiro të kampionatit.

Pas marrjes së çmimit, Uka u shpreh i lumtur për vlerësimin, duke theksuar rëndësinë e fitores dhe reagimin e ekipit në pjesën e dytë të ndeshjes. Ai tha se skuadra, pas disavantazhit 1:0 në pjesën e parë, arriti të rikthehet fuqishëm falë angazhimit të lojtarëve dhe stafit teknik, duke përmendur edhe bashkëpunimin brenda ekipit dhe mentalitetin e ri që po krijohet në klub.

Uka shtoi se synimi kryesor i klubit mbetet Kupa e Kosovës, por nuk përjashtojnë as objektiva të tjera në vazhdim të sezonit, duke theksuar se ekipi po punon me seriozitet dhe përkushtim në çdo ndeshje.

Ky çmim vlerësohet si një tjetër konfirmim i formës së mirë të Kreshnik Ukës në këtë edicion të Superligës.

Kuvendi i Kosovës ka ratifikuar marrëveshjen ndërmjet Kosovës dhe Shqipërisë për organizimin e Lojërat Mesdhetare Prishtina 2030, në një vendim unanim të miratuar në seancën e 27 prillit 2026.