Eliminimi i sheqerit nga dieta juaj nuk është vetëm çështje diete. Edhe para humbjes së peshës, duhet të ndaloni të hani sheqer për shëndetin tuaj.
I pranishëm në mënyrë natyrale në ushqime, sheqeri është më se i mjaftueshëm për të kënaqur nevojat e trupit dhe zvogëlimi i tij në minimum, nëse nuk eliminon plotësisht atë, sjell një sërë avantazhesh dhe përfitimesh të konsiderueshme për pamjen dhe shëndetin e organizmit.
Pas disa ditësh mungesë të tij, provohet që të jep varësi po aq sa droga dhe do të duhen disa javë për të parë përfitimet e një jete pa sheqer.
Përmirëson lëkurën
Sheqeri indukton një proces të quajtur glikacion i cili oksidon dhe dëmton qelizat duke shkaktuar rrudha, lëkurë të zbehtë dhe të thatë.
Për më tepër, konsumi i sheqerit ndërhyn në kolagjenin i cili ndihmon indet e trupit tonë të qëndrojnë të forta dhe elastike.
Sipas Dr. Harold Lancer, dermatolog i Kim Kardashian dhe Beyoncé, rezultatet e para mund të shihen pas 72 ose 96 orëve të detoksifikimit: “Do të ndiheni më mirë, ngjyra do të jetë më e gjallë, lëkura më pak e yndyrshme dhe më e hidratuar, do të reduktohen rrathët e errëta të syve dhe sistemi imunitar do të shmangë shfaqjen e papërsosmërive”.
Humbni peshë
Sheqeri bllokon një hormon proteinik të quajtur leptin, i cili është përgjegjës për ndjenjën e ngopjes që ndiejmë pas ngrënies.
Rezultati është që duke ngrënë ëmbëlsira kurrë nuk do të ndihemi plotësisht të kënaqur dhe do të jemi akoma të uritur.
Sheqernat e tepërta nuk treten, por shndërrohen në yndyrna të cilat grumbullohen dhe bëhen kile të tepërta.
Duke zvogëluar konsumin e sheqernave, trupi do të fillojë rregullimin e oreksit në mënyrën e duhur, duke zvogëluar numrin e kalorive.
Përmirësohen funksionet e trurit
Teprica e sheqernave, shkakton arritjen e kulmeve glicemike në të cilat trupi përgjigjet duke prodhuar më shumë insulinë dhe në këtë mënyrë mbingarkon pankreasin.
Ky proces në dukje i parrezikshëm është në të vërtetë një nga shkaqet kryesore të ndjenjës së lodhjes dhe përgjumjes.
Reduktimi i konsumit të sheqerit ndihmon për të rimarrë më shumë energji.
Por jo vetëm. Studimet kanë treguar se nivelet e larta të sheqerit në gjak mund të shkaktojnë dëmtime të trurit që ndikojnë në kujtesë.
Përmirëson gjendjen tuaj shpirtërore
Ne priremi të mendojmë se për të na përmirësuar humorin është ideale një ëmbëlsirë. Kjo është pjesërisht e vërtetë.
Çokollata e zezë, për shembull, kur konsumohet në doza të vogla mund të jetë e dobishme, por konsumi i tepërt i sheqerit është joproduktiv dhe rrezikon të shkaktojë një rreth vicioz.
Një studim i botuar në Psycology Today, në lidhje me njerëzit që vuajnë nga sulmet e panikut, tregoi se sheqeri nuk është përgjegjës për ankthin, por është një katalizator që amplifikon simptomat në vend që t’i qetësojë ato.
Një studim tjetër i botuar në British Journal of Psychiatry argumenton se ata që konsumojnë ushqime me shumë sheqer janë më të prirur të vuajnë nga depresioni.
Përmirëson performancën fizike
Nëse jeni një person sportiv ose keni vendosur të filloni ushtrime fizike për të humbur peshë, dijeni se eliminimi i sheqernave do të ketë një ndikim pozitiv në trupin tuaj edhe në lidhje me këtë lloj performance.
Sheqeri stimulon demineralizimin e kockave dhe dhëmbëve, me efekte negative edhe në nyje.
Është gjithashtu një nga shkaqet kryesore të inflamacionit, të muskujve dhe më gjerë.
Eliminimi i tij do të zvogëlojë rrezikun e infeksioneve kronike si edhe do të keni nyje dhe kocka më të forta dhe më shumë energji.
Përmirëson tretjen dhe shëndetin e përgjithshëm
Përtej efekteve të vetme të dobishme, është e qartë se si zvogëlimi i konsumit të sheqerit shkakton reaksion zinxhir në të gjithë trupin.
Sheqeri ushqen bakteret e këqija së bashku me parazitët dhe kërpudhat, veçanërisht në zorrë, me ënjtje relative, inflamacion dhe mungesë të asimilimit të lëndëve ushqyese.
Kjo nga ana tjetër dobëson sistemin imunitar, duke shkaktuar, kapsllëk dhe zorrë të irrituar.
Për të forcuar muret e zorrëve dhe florën bakteriale, është e këshillueshme që të eliminoni sheqernat e tepërta, ato që i asimilojmë përmes ëmbëlsirave, biskotave, pijeve dhe bustinave dhe të merrni probiotikë si kos dhe fermentë laktikë.
Përmirëson pjellorinë
Dieta është thelbësore për ekuilibrin hormonal dhe për këtë arsye edhe për pjellorinë. Një dietë me një nivel të lartë sheqeri stimulon çlirimin e insulinës, me pasojë lodhjen e pankreasit.
Prodhimi i tepërt i këtij hormoni, nga të cilët disa receptorë gjenden në vezore, mund të gjenerojë rezistencë, e cila është një faktor i rëndësishëm rreziku për sindromën e vezoreve policistike dhe gjithashtu mund të shkaktojë dëmtime të vezëve.
Proteina është një nga përbërësit më të rëndësishëm të një diete të shëndetshme dhe luan një rol kyç në funksionimin e të gjithë trupit.
Përveç ndihmës në ndërtimin e muskujve, proteina ndikon në energji, metabolizëm, pamjen e lëkurës, flokëve dhe thonjve.
Sa proteina na duhen? Shumica e njerëzve duhet të konsumojnë rreth 25 deri në 30 gramë proteina për çdo vakt. Problemi është se kjo sasi konsumohet vetëm në mbrëmje, ndërsa pjesa tjetër e ditës anashkalohet.
Trupi nuk e ruan proteinën, ajo zbërthehet në aminoacide dhe përdoret menjëherë, prandaj është e rëndësishme ta konsumoni rregullisht.
Nëse nuk jeni të sigurt nëse po konsumoni mjaftueshëm proteina, kushtoni vëmendje këtyre pesë shenjave.
Nëse e ndjeni veten të uritur shpejt pasi të keni ngrënë, është e mundur që vakti nuk ka pasur proteina të mjaftueshme. Proteina ju bën të ndiheni të ngopur dhe ndihmon në mbajtjen e niveleve të sheqerit në gjak të qëndrueshme.
Nëse gërvishtjet ose plagët e vogla shërohen ngadalë, trupit mund t’i mungojë një proteinë që është thelbësore për rigjenerimin e indeve dhe krijimin e qelizave të reja. Stërvitja e rregullt nuk do të sjellë rezultate nëse trupit i mungojnë proteinat.
Muskujt ndërtohen nga proteinat, kështu që pa sasi të mjaftueshme, masa e tyre mund të ngecë. Flokët kalojnë vazhdimisht nëpër faza rritjeje dhe pushimi. Nëse nuk konsumoni mjaftueshëm proteina, folikulat nuk kanë “ushqimin” e nevojshëm e flokët mund të bëhen më të hollë.
Thonjtë janë të përbërë nga keratina, një formë proteine. Pa proteina të mjaftueshme, bëhen të holla, të brishta e të zbehta, edhe nëse merrni suplemente vitaminash. Nuk keni pse t’i numëroni gramët menjëherë. Përfshini më shumë kos grek, gjizë, vezë, tofu ose salmon të tymosur në vaktet tuaja.
Është e rëndësishme t’i kushtoni vëmendje mëngjesit – shumë njerëz e anashkalojnë atë ose hanë diçka që nuk i mban të ngopur për një kohë të gjatë.
Një vakt proteinash në mëngjes mund ta ndihmojë trupin të marrë energji dhe lëndët ushqyese të nevojshme për të gjithë ditën. /A.Z/UBT News/
Shumë njerëz nuk i kushtojnë rëndësi mënyrës se si flenë, por disa pozicione mund të shkaktojnë probleme serioze shëndetësore.
Sipas Benden Health, shumica preferojnë të flenë në anën e djathtë, por pozicioni më i mirë është të flesh në anën e majtë. Ekspertët rekomandojnë të përdoret një jastëk nën gjunjë kur flini përmbys, ndërsa paralajmërojnë se shtrirja përmbys pa mbështetje mund të jetë e dëmshme.
Doktoresha Cheryl Lythgoe shpjegon se të flesh përmbys dëmton shtyllën kurrizore, nyjet dhe nervat, duke çuar në dhimbje kronike të qafës dhe shpinës.
Ky pozicion gjithashtu mund të rrisë rrezikun e problemeve të frymëmarrjes për shkak të presionit shtesë mbi mushkëri dhe organet e tjera të frymëmarrjes.
“Pozicionet e gjumit që ushtrojnë presion të tepërt mbi shpinë, si shtrirja përmbys ose pozicioni i fetusit shumë i përkulur, mund të përkeqësojnë shqetësimet fizike. Ato shpesh çojnë në pozicionim jo të duhur të shtyllës kurrizore dhe rritje të presionit në qafë dhe pjesën e poshtme të shpinës, duke rezultuar në dhimbje kronike dhe çrregullime të gjumit”, shpjegon ajo.
Të flesh në anën e majtë konsiderohet më i shëndetshëm, pasi ndihmon tretjen dhe përmirëson qarkullimin e gjakut. /A.Z/UBT News/
Përveçse na jep energji, ushqimi është aleati më i mirë i bukurisë. Vitaminat e duhura ndihmojnë në ngadalësimin e plakjes dhe ruajtjen e shkëlqimit natyral të lëkurës.
Ja lista me ushqimet e nevojshme që duhet t’i konsumoni.
Vitamina C – Ndihmon në prodhimin e kolagjenit dhe mbron nga dielli, ajo gjendet te specat, brokoli, agrumet, luleshtrydhet.
Vitamina E – Lufton radikalet e lira dhe ruan elasticitetin e lëkurës e cila gjendet te avokadot, bajamet, farat e lulediellit, embrioni i grurit.
Beta-karoteni – Transformohet në vitaminë A, ndihmon në rigjenerimin e qelizave, e gjejmë te karotat, kungulli, spinaqi, pjepri.
Omega-3 – Yndyra e mirë që ushqen lëkurën dhe ruan elasticitetin, e hasim te peshku i yndyrshëm te farat e linit e po ashtu te arrat.
Mos harroni të kombinoni çdo ditë fruta, perime dhe yndyra të shëndetshme — bukuria fillon nga brenda. /A.Z/UBT News/
Ora e kursimit të ditës u prezantua për herë të parë në Britaninë e Madhe në vitin 1916, gjatë Luftës së Parë Botërore, me qëllim kursimin e energjisë dhe shfrytëzimin më të mirë të dritës natyrore.
Sot, kjo praktikë zbatohet në rreth 70 vende, por studimet tregojnë se ndryshimi ka pasoja negative për shëndetin, veçanërisht gjatë pranverës, kur humbim një orë gjumë. Një studim amerikan i vitit 2014 zbuloi se numri i shtrimeve në spital për atak në zemër rritet menjëherë pas ndryshimit të orës.
Rezultate të ngjashme janë vërtetuar edhe nga kërkime në Suedi, Kroaci, Gjermani dhe vende të tjera.
Një meta-analizë e studimeve ekzistuese tregoi se rreziku për atak në zemër rritet me rreth 4% në këtë periudhë, raporton BBC.
Kkërkimet tjera kanë lidhur ndryshimin e orës në pranverë me rritje të goditjeve në tru, si dhe me përkeqësim të çrregullimeve të humorit, depresionit, ankthit dhe abuzimit me substanca. Edhe aksidentet fatale në trafik janë më të shpeshta pas kalimit në orën verore. Një studim në SHBA vlerësoi se rreziku për aksidente vdekjeprurëse rritet me 6%, për shkak të mungesës kolektive të gjumit.
Por pse ky ndryshim ka një ndikim kaq të madh?
Ekspertët shpjegojnë se arsyeja qëndron te prishja e ritmit biologjik, “ora e brendshme” që përcakton kur flemë dhe kur zgjohemi. Në mbrëmje, errësira nxit prodhimin e melatoninës, hormonit të gjumit, ndërsa drita e mëngjesit e ndalon këtë proces dhe stimulon kortizolin, hormonin që na zgjon.
Kur ora ndryshon në pranverë, drita e zgjatur e mbrëmjes vonon prodhimin e melatoninës, mëngjeset më të errëta i detyrojnë njerëzit të zgjohen më herët se trupi i tyre të jetë gati. Kjo “humbje” e një ore gjumë mund të ndikojë negativisht në përqendrim, energji dhe gjendje shpirtërore gjatë gjithë javës.
Nga ana tjetër, ndryshimi i orës në vjeshtë është lidhur me një rritje të rasteve të depresionit. Një studim danez zbuloi se frekuenca e episodeve depresive u rrit me 11% në dhjetë javët pas kalimit në orën dimërore.
Më 2019, Parlamenti Evropian votoi për heqjen e ndryshimit sezonal të orës, por vendimi ende nuk është zbatuar, pasi shtetet anëtare nuk kanë arritur marrëveshje nëse duhet të mbajnë orën verore apo dimërore. Sipas shumicës së biologëve, koha standarde dimërore do të ishte më e shëndetshme për organizmin, pasi përputhet më mirë me ritmet natyrore të trupit. /A.Z/UBT News/
