Deputetja nga radhët e komunitetit boshnjak dhe kryetare e Unionit Socialdemokrat, Duda Balje, ka deklaruar se partia e saj nuk ka ndryshuar qëndrim sa i përket bashkëpunimit me Lëvizjen Vetëvendosje. Deklarata e saj erdhi si përgjigje ndaj deputetit të VV-së, Arbër Rexhaj, i cili kishte përmendur një ofertë për pozitë ministrore ndaj Unionit Socialdemokrat.

“Unë jam mbrapa qëndrimit, të cilin e kemi marrë si parti. Ne nuk e ndryshojmë qëndrimin,” u shpreh Balje.

Ajo gjithashtu reagoi ndaj komenteve të Rexhajt lidhur me deputetët me pak vota, duke rikujtuar se ajo dhe partia e saj kanë mbështetur Vetëvendosjen në të kaluarën.

“Arbër Rexhaj ka pasur një pikëpyetje se çka është duke ndodhur me deputetët që i kanë pasur 500 vota. Unë e kam një përgjigje për Arbërin se ku ishte Arbëri kur ne kemi votuar për qeverisjen lokale të VV-së dhe për kryeministrin Kurti. Unë i them se kjo nuk ka logjikë prej Arbërit,” tha Balje

Ministri në detyrë i Financave, Hekuran Murati, ka deklaruar se propozimi i Vetëvendosjes për kandidatin për kryetare të Kuvendit, Albulena Haxhiu, do të mbetet i pandryshuar. Ai theksoi se ky propozim është bërë pas shfrytëzimit të të drejtës së Vetëvendosjes si fituese e zgjedhjeve.

Murati theksoi gjithashtu se zgjedhjet e reja nuk janë qëllimi i Vetëvendosjes dhe se ato do të ishin opsioni i fundit. Ai theksoi se duhet të arrihet një dakordim politik për nënkryetarët, duke shtuar se strategjitë aktuale janë më shumë taktizime.

“VV-ja si fitues e zgjedhjeve e ka të drejtën e propozimit të kandidatit dhe këtë të drejtë e ka shfrytëzuar duke propozuar Albulena Haxhiun. Këto sjellje janë më shumë taktizime. Kemi propozuar gruan më të votuar. Ky është propozimi ynë dhe nuk do të ndryshojë. Duhej dakordim politik, i cili mund të arrihet për nënkryetarët. Nuk është qëllimi ynë për të shkuar në zgjedhje. Ai do të ishte opsioni ynë i fundit”, tha Murati.

Pas dështimit të sërishëm të seancës konstituive, kryetari i PDK-së, Memli Krasniqi, ka deklaruar se nëse nuk arrihet një zgjidhje për konstituimin e Kuvendit, Kosova mund të shkojë në zgjedhje të reja në muajin maj ose qershor.

Krasniqi ka theksuar se partia në pushtet, Vetëvendosje, nuk ka arritur të sigurojë votat e nevojshme për formimin e qeverisë dhe për zgjedhjen e kryetarit të Kuvendit. Ai ka shtuar se nëse nuk ka një marrëveshje politike për të zhbllokuar situatën, zgjedhjet janë një opsion i mundshëm.

“Nuk i ka votat as për qeveri. Sikur t’i kishte votat për qeveri do t’i kishte edhe votat për kryetar të Kuvendit. Ose duhet konstituar Kuvendi ose një marrëveshje politike, ose të shkohet në zgjedhje. Duhet ta propozojmë dikë tjetër. Nuk dua t’ua imponoj kandidatin. Veten ta propozon ai (Albin Kurti). Nëse nuk dalim nga kjo situatë, zgjedhje do të kemi në maj ose në qershor. Albulena Haxhiu nuk kalon. I ftoj të ndërrojnë kandidatin, nxirreni dikë që i merr votat”, tha Krasniqi.

Konstitutimi i Kuvendit të Kosovës ka dështuar për të gjashtën herë, pasi kandidatja e Vetëvendosjes për kryeparlamentare, Albulena Haxhiu, nuk ka arritur të sigurojë më shumë se 57 vota. 

Emri i Albulena Haxhiut u hodh në votim pas propozimit të deputetit Glauk Konjufca, i cili kërkoi mirëkuptimin e deputetëve për të zhbllokuar situatën politike.

“Emri ynë i vetëm është Albulena Haxhiu, për kryetare të Kuvendit të Kosovës, ju kërkoj mirëkuptimin tuaj që ta zhbllokojmë situatën në të cilën kemi mbetur”, tha Konjufca para procesit të votimit.