Presidentja e Kosovës, Vjosa Osmani, uroi udhëheqësin e CDU-së në Gjermani, Friedrich Merz, dhe atë të CSU-së, Markus Soeder, për fitoren në zgjedhjet federale të 23 shkurtit.

“Vendet tona ndajnë një histori të gjatë të marrëdhënieve të shkëlqyera dhe mezi pres t’i thellojmë lidhjet tona të ngushta në vitet në vazhdim”, shkroi Osmani në platformën X.

Aleanca CDU/CSU i fitoi zgjedhjet me 28.5 për qind të votave.

Udhëheqësi i saj, Merz, pritet të nisë tani bisedimet për të zgjedhur partnerin e koalicionit.

Ai e ka përjashtuar mundësinë e bashkëpunimit me partinë e ekstremit të djathtë, Alternativa për Gjermaninë, e cila doli e dyta në zgjedhje.

Tre vjet më parë, Merz është takuar me kryeministrin e Kosovës, Albin Kurti, në margjina të Konferencës së Sigurisë në Munih.

Temë e atij takimi ishin integrimet evropiane dhe Ballkani Perëndimor, sipas një njoftimi të atëhershëm të Kryeministrisë së Kosovës.

Gjermania është ndër mbështetëset kryesore të Kosovës në Bashkimin Evropian.

Me mbi 260 ushtarë aktualisht, ajo është pjesë e misionit paqeruajtës të NATO-s në Kosovë, që nga përfundimi i luftës më 1999.

Gjermania, po ashtu, është ndër vendet e para që ka njohur pavarësinë e Kosovës në vitin 2008.

Në këtë vend jeton edhe pjesa më e madhe e diasporës së Kosovës./REL/

Faik Rexhepi, një figurë e njohur dhe simbol i qëndresës kundër regjimit të Sllobodan Millosheviqit, ka ndërruar jetë. Lajmin e bëri të ditur aktivisti i njohur i të drejtave të njeriut, Belgzim Kamberi, i cili njoftoi gjithashtu se varrimi i Faik Rexhepit do të bëhet nesër, më 25 shkurt 2025, në varrezat e qytetit në Dragodan, Prishtinë, në orën 15:00.

Faik Rexhepi ishte një burim frymëzimi për shumë njerëz, sidomos për guximin dhe qëndrimin e tij gjatë periudhës më të vështirë të okupimit. Në gusht të vitit 1990, Rexhepi, në atë kohë punonjës i ndërmarrjes “Feronikeli” në Drenas, së bashku me kolegët e tij, organizoi një protestë për të pritur një delegacion të Kongresit amerikan. Protesta, e cila ishte një akt i madh i rezistencës paqësore, u ndërpre ashpër nga policia serbe, e cila tentoi të shpërndante turmën me forcë.

Ndërkohë, Faik Rexhepi nuk u lëkund dhe qëndroi i palëkundur, duke u ulur këmbëkryq midis turmës, një veprim që simbolizonte qëndrimin e tij të palëkundur ndaj shtypjes dhe padrejtësisë. Ky moment mbeti në kujtesën kolektive, dhe disa vjet më vonë, në atë vend u vendos një monument në nderim të tij, i cili mban emrin “Burri që s’luajti vendit!”, si një përkujtim i veprës dhe guximit të tij.

Vdekja e Faik Rexhepit lë një boshllëk të madh në zemrat e atyre që e njohën si një njeri të guximshëm dhe simbol të luftës për liri dhe të drejta. Ai do të mbahet mend gjithmonë për kontributin e tij të pazëvendësueshëm në luftën kundër dhunës dhe padrejtësisë.

Në përkujtim të veprës dhe trashëgimisë së tij, kryetari i Këshillit Nacional të Shqiptarëve (KNSH), Enkel Rexhepi, ka shkruar:
“Fotografia e tij, ulur mes kaosit, me qetësinë e një njeriu që sfidon dhunën me dinjitet, ishte dhe do të mbetet përgjithmonë një dëshmi e guximit dhe e shpirtit të pathyeshëm të popullit tonë. Pusho në paqe, baca Faik!”

Po ashtu, kryetarja e Komunës së Preshevës, Ardita Sinani, ka shkruar në postimin e saj:
“Sot i japim lamtumirën Faik Rexhepit, njeriut që me një akt të thjeshtë, por të madh, u bë pjesë e historisë sonë të qëndresës. Në gusht të vitit 1990, në mes të dhunës shtypëse serbe, ai nuk u tërhoq. Kur të gjithë u shpërndanë, ai qëndroi, i ulur dhe i palëkundur, duke u bërë simbol i vendosmërisë shqiptare. Sot, Prishtina e kujton me një monument përballë Hotelit ‘Grand’, si një shenjë nderimi për guximin e tij. Presheva, Bujanoci dhe Medvegja kanë dhënë shumë për lirinë e Kosovës dhe mbeten në zemrën e çdo shqiptari.
Pusho në paqe, Faik Rexhepi! Emri yt do të mbetet përjetë në kujtesën tonë!”

Me këto mesazhe, shumë qytetarë dhe institucione kanë nderuar dhe kujtuar guximin e Faik Rexhepit, duke e cilësuar atë si një hero të pashoq dhe një simbol të qëndresës shqiptare./UBTNews/

Policia e Kosovës ka arrestuar dy persona të dyshuar për veprën penale penale ‘vrasje nё tentativё’.

Policia ka bërë me dije se në stacionin policor në Klinё, me datën 23 shkurt rreth orës 22:40, është njoftuar se nё rrugën “Ilir Merturi” ka tё shtёna me armё zjarri.

Policia ka njoftuar se menjëherë i është përgjigjur rastit, ku nё vendin e ngjarjes kanё hasur njёrin nga viktimat, i cili ishte i shtrirё dhe i lёnduar.

“I njëjti ёshtё dёrguar nё Spitalin Rajonal nё Pejё, gjithashtu edhe tre tё lënduarit tjerё janё dёrguar në Spitalin Rajonal nё Pejё. Tё dyshuarit janё larguar nga vendi i ngjarjes nё drejtim tё panjohur, ku pas njё pune intensive tё njёsiteve policore, ёshtё arritur identifikimi dhe arrestimi i dy (2) personave tё dyshuar”, thuhet në njoftim.

Gjatё arrestimit janё gjetur dhe janë sekuestruar njё armё pistoletё M57, njё karikator i sё njёjtёs armë, pesё fishekё kal: 7.62mm, dy gёzhoja kal: 7.62mm, njё mjet i mprehtë (brisk).

Sipas njoftimit tё dyshuarit, pas intervistimit nga hetuesit, me urdhër tё prokurorit tё shtetit, janё dёrguar nё mbajtje pёr 48 orё.