Me mbi 99 për qind të vendvotimeve të procesuara në nivel vendi, rezultatet preliminare të zgjedhjeve parlamentare tregojnë një pasqyrë të qartë të garës politike në komunat më të mëdha të Kosovës.

Sipas këtyre rezultateve, Lëvizja Vetëvendosje ka shënuar fitore bindëse në të gjitha komunat e mëdha të vendit.

Në Gjakovë, VV ka dalë e para me 48.72 për qind të votave, duke lënë pas Aleancën për Ardhmërinë e Kosovës me 27.49 për qind, Lidhjen Demokratike të Kosovës me 12.38 për qind dhe Partinë Demokratike të Kosovës me 6.97 për qind.

Në Gjilan, VV kryeson me 54.18 për qind, e ndjekur nga LDK me 22.04 për qind, PDK me 14.91 për qind dhe AAK me 3.22 për qind.

Në Mitrovicë, Lëvizja Vetëvendosje ka fituar bindshëm me 60.53 për qind të votave. PDK renditet e dyta me 26.02 për qind, LDK e treta me 9.14 për qind, ndërsa AAK me 1.78 për qind.

Në Pejë, VV ka marrë 42.73 për qind të votave, LDK 25.82 për qind, AAK 15.17 për qind dhe PDK 8.82 për qind.

Në Prishtinë, Vetëvendosje kryeson me 48.90 për qind, e ndjekur nga LDK me 24.44 për qind, PDK me 19.05 për qind dhe AAK me 5.13 për qind.

Në Prizren, VV ka siguruar 44.07 për qind të votave, PDK 22.12 për qind, LDK 12.51 për qind dhe AAK 3.05 për qind.

Në Ferizaj, VV ka dalë e para me 53.81 për qind, PDK me 24.76 për qind, LDK me 14.82 për qind dhe AAK me 2.64 për qind.

Rezultatet mbeten preliminare deri në përfundimin e numërimit të të gjitha votave dhe procesit të verifikimit.

Zgjedhjet e parakohshme të 7 qershorit nuk kanë ndryshuar renditjen e partive politike në Kosovë, por kanë reflektuar lëvizje në përqindjen e mbështetjes së tyre, sipas rezultateve preliminare me mbi 99.40 për qind të votave të numëruara.

Lëvizja Vetëvendosje ka dalë sërish e para me rreth 42.92–43 për qind të votave, duke shënuar rënie prej rreth 6.5 për qind krahasuar me zgjedhjet e kaluara. Ky rezultat nuk përfshin ende votat e diasporës, ato me kusht dhe votat e personave me nevoja të veçanta.

Partia Demokratike e Kosovës ka mbetur në vendin e dytë me 21.06 për qind të votave, duke shënuar një rritje shumë të lehtë prej 0.07 për qind.

Lidhja Demokratike e Kosovës është renditur e treta me 17.61 për qind, duke regjistruar rritjen më të madhe ndër partitë opozitare, rreth 4 për qind më shumë se në zgjedhjet e kaluara.

Aleanca për Ardhmërinë e Kosovës ka fituar 7.18 për qind të votave, duke shënuar rritje prej rreth 1.5 për qind dhe duke kaluar më lehtë pragun zgjedhor krahasuar me procesin e kaluar.

Partia Socialdemokrate nuk e ka kaluar pragun, duke marrë 0.27 për qind të votave.

Sipas të dhënave, pjesëmarrja në këto zgjedhje ka qenë dukshëm më e ulët. Në zgjedhjet e 7 qershorit kanë votuar 36.38 për qind e qytetarëve, krahasuar me 44.99 për qind në zgjedhjet e kaluara, që përbën rreth 200 mijë votues më pak.

Votat e diasporës, të cilat llogariten rreth 130 mijë, pritet të numërohen në fazat e ardhshme të procesit zgjedhor.

Ndërkohë, kandidati për kryeministër nga Vetëvendosje, Albin Kurti, ka shpallur fitoren dhe ka paralajmëruar bashkëpunim me partitë e tjera për formimin e institucioneve, përfshirë çështjen e presidentit. Në fjalimin e tij ai tha se vendi ka nevojë për Kuvend funksional dhe se qeveria mbetet e përkushtuar ndaj interesit publik.

Foto: Driton Paçarada

Në orën 19:00 janë mbyllur të gjitha qendrat e votimit në Kosovë, duke përfunduar zyrtarisht procesin e votimit për qytetarët që nuk kanë arritur të hyjnë brenda afatit të përcaktuar. Ndërkohë, personat që kanë qenë brenda qendrave të votimit deri në këtë orë kanë të drejtë ta përfundojnë votimin.

Sipas të dhënave preliminare, deri në orën 17:00 të drejtën e votës e kanë shfrytëzuar mbi 560 mijë qytetarë, që paraqet 29.32 për qind të trupit votues prej 1,959,962 votuesish me të drejtë vote.

Krahasuar me zgjedhjet e 28 dhjetorit, pjesëmarrja në votime deri në këtë fazë ka qenë rreth 200 mijë votues më e ulët.

Këto janë zgjedhje të jashtëzakonshme, të cilat po mbahen pas dështimit të zgjedhjes së Presidentit të vendit. Tashmë pritet numërimi i votave dhe publikimi i rezultateve preliminare nga institucionet përgjegjëse.

Foto: Kosovapress

Rektori i UBT-së, Prof. Dr. Edmond Hajrizi, në kuadër të vizitës së tij në Mbretërinë e Bashkuar, zhvilloi një vizitë pune edhe në Londër, në ambientet e Global UBT London, një qendër e rëndësishme e ekosistemit ndërkombëtar të UBT-së, e krijuar për të fuqizuar bashkëpunimin global në arsim, teknologji dhe inovacion.

Gjatë qëndrimit në Londër, Prof. Dr. Edmond Hajrizi zhvilloi takime me përfaqësues të kompanive dhe institucioneve nga vende të ndryshme të botës, me fokus zgjerimin e bashkëpunimit në fushën e arsimit ndërkombëtar, krijimin e partneriteteve të reja strategjike, si dhe promovimin dhe shtrirjen globale të shërbimeve dhe produkteve inovative të Global UBT.

Në kuadër të këtyre takimeve, u nënshkrua edhe një marrëveshje e rëndësishme bashkëpunimi me partnerë nga India, e cila synon zhvillimin e projekteve të përbashkëta në fushën e digjitalizimit dhe aplikimit të inteligjencës artificiale për rritjen e produktivitetit shkencor, akademik dhe inovativ.

Marrëveshja parasheh gjithashtu bashkëpunim për promovimin dhe shpërndarjen e platformave digjitale të UBT-së në vendet e Azisë, duke krijuar mundësi të reja për shkëmbimin e njohurive, zhvillimin teknologjik dhe forcimin e bashkëpunimit ndërkombëtar në sektorin e arsimit dhe kërkimit shkencor.

Sipas Prof. Dr. Edmond Hajrizit, zgjerimi i pranisë së UBT-së në qendrat kryesore ndërkombëtare dhe krijimi i partneriteteve me institucione dhe kompani lidere globale përbëjnë elemente kyçe të strategjisë së internacionalizimit të UBT-së dhe të zhvillimit të ekosistemit të saj inovativ.

Kjo vizitë në Global UBT London përfaqëson një hap të rëndësishëm drejt forcimit të rolit të UBT-së në skenën globale të arsimit, teknologjisë, inovacionit dhe transformimit digjital.