Lajmet

Ben-Meir: Kosova të ketë kujdes nga agjenda islamike e Erdoganit

Erdogan të lobojë te Rusia për njohjen e Kosovës.

Published

5 years ago

on

Profesori amerikan, njëherësh ekspert i çështjeve të Ballkanit Perëndimor, Alon Ben-Meir në një intervistë për Radion Evropa e Lirë thotë se institucionet e Kosovës duhet të tregohen të kujdesshme me iniciativën e presidentit të Turqisë, Recep Tayyip Erdogan, i cili ditë më parë tha se së bashku me presidentin amerikan, Joe Biden, do të angazhohet që të sigurojë njohje të reja për Kosovën.

Ben-Meir, që është profesor pranë Qendrës për Çështje Globale në Universitetin e Nju Jorkut, thotë se është në rregull që Kosova të ketë raporte të mira me Turqinë, por sipas tij Qeveria e Kosovës nuk duhet t’i nënshtrohet agjendës së këtij shteti si dhe agjendës islamike të Erdoganit.

Profesori Ben-Meir në këtë intervistë flet edhe për dialogun në mes të Kosovës dhe Serbisë, për të cilin proces nuk është shumë optimist se shpejt mund të përfundojë me një marrëveshje finale.

Pos tjerash, Ben-Meir është një ekspert në çështjet e Lindjes së Mesme, negociatat ndërkombëtare dhe zgjidhjen e konflikteve. Një pjesë të konsiderueshme të karrierës së tij e ka kaluar duke u marrë me konfliktin izraelito-palestinez.

Radio Evropa e Lirë: Janë bërë 13 vjet prej se Kosova shpalli pavarësinë. Po ashtu më 22 korrik janë bërë 11 vjet prej se Gjykata Ndërkombëtare e Drejtësisë (GJND) vendosi se shpallja e pavarësisë së Kosovës nuk binte ndesh me të drejtën ndërkombëtare. Por, përkundër kësaj Kosova vazhdon të jetë e pafuqishme në forcimin e subjektivitetit të saj ndërkombëtar. Mungojnë njohje si nuk është e anëtarësuar në organizatat kryesor e ndërkombëtare. Pse e kemi këtë situatë?

“Erdogan të kërkojë nga Putini që Serbia ta njohë Kosovën”

Alon Ben-Meir: Problemi kryesor është se ne nuk kemi pasur një rezolutë të Këshillit të Sigurimit të OKB-së për ta njohur pavarësinë e Kosovës. Kështu që ne kemi stagnuar në OKB dhe ky është problemi kryesor. Problemi i dytë është fakti se që Serbia dhe Kosova ende nuk i kanë normalizuar raportet, pra Kosovës i duhet njohja e Serbisë, si dhe anasjelltas. Pa njohjen e Serbisë është duke u bërë më e vështirë edhe për Bashkimin Evropian që të provojë që ta integrojë Kosovën.

Derisa OKB-ja nuk e njeh Kosovën dhe përderisa Serbia vazhdon të mohojë pavarësinë e Kosovës do të marrë kohë që shtete të reja të njohin Kosovën. Por, një gjë dua them, se pjesa më e madhe e vendeve të BE-së, po ashtu SHBA-ja si dhe shtete të tjera të rëndësishme, e kanë njohur Kosovën. Pra duhet ta kujtojmë faktin se janë mbi 100 shtete dhe janë disa nga shtetet më të rëndësishme në botë.

Radio Evropa e Lirë: Pesë shtete të Bashkimit Evropian vazhdojnë të mos e njohin Kosovën, por mungojnë njohje edhe nga shtete të tjera të rëndësishme. Çka duhet të bëjë Kosova që të sigurojë njohje të reja dhe që të anëtarësohet në organizata ndërkombëtare?

Alon Ben-Meir: Të jesh pjesë e organizatave ndërkombëtare sigurisht se është e rëndësishme, por ne gjithashtu duhet të dimë se Kosova ka një qeveri e cila duhet të fokusohet në zhvillimin e shtetit, zhvillimin ekonomik, reforma politike, luftimin e korrupsionit, pra të gjitha këto. Kjo mund të ndihmojë Kosovën duke dërguar një mesazh te komuniteti ndërkombëtar se ne nuk jemi të pavarur vetëm nga definicioni, por shikoni se çfarë kemi arritur brenda vendit. Kosova duhet të forcojë pozicionin e saj nga brenda, në çdo mënyrë. Kështu do të marrë më shumë vëmendje dhe më shumë njohje nga komuniteti ndërkombëtar.

Radio Evropa e Lirë: Para pak ditësh presidenti i Turqisë, Recep Tayyip Erdogan ka deklaruar se do të fillojë një iniciativë që së bashku me presidentin amerikan, Joe Biden, të sigurojnë njohje të reja për Kosovën. Pse beson se erdhi deri te kjo iniciativë dhe pse pikërisht tani?

Alon Ben-Meir: Çdokush që e mbështet apo që bën fushatë për t’i shtyrë shtetet e tjera që të njohin Kosovën, është i mirëseardhur. Por, sido që të jetë, unë kam dyshime serioze sa i takon synimeve të (Recep Tayyip) Erdogan dhe Turqisë. Presidenti Erdogan është një narcizist, egocentrik, nacionalist islamik dhe ndoshta çfarë dëshiron të bëjë është që të promovojë agjendën e tij dhe krejt çfarë mund t’i them popullit të Kosovës është se është shumë në rregull të kesh raporte të mira me Turqinë, por Qeveria e Kosovës nuk duhet t’i nënshtrohet agjendës së Erdoganit si dhe agjendës së tij islamike. Ky do të ishte gabim. Kjo është ajo që Turqia po bën sot, duke u përpjekur të tregojë që e mbështetë Kosovën, por në të njëjtën kohë Erdogani dëshiron të marrë diçka nga Kosova. Këtu i këshillojë njerëzit që të jenë të kujdesshëm sesa mund t’i besohet Erdoganit.

Erdogan të lobojë te Rusia për njohjen e Kosovës

Radio Evropa e Lirë: A është kjo një çështje me prioritet për SHBA-në dhe në të vërtetë, a mund të punojë SHBA-ja me Turqinë në sigurimin e njohjeve për Kosovën?

Alon Ben-Meir: Nëse Recep Tayyip Erdogan do të dëshironte që më shumë shtete ta njohin Kosovën, ai do të duhej që të përdorte raportet e tij të tërthorta dhe të bisedonte me Rusinë sepse Rusia është kundër faktit që Serbia ta njohë Kosovën. Pra, ai do të mund të përdorte këtë anë të tij, si një mik i presidentit të Rusisë, Vladimir Putin, që të kërkojë nga Serbia që ta njohë Kosovën. Ky do të duhej të ishte angazhimi i tij përpara se të mundohet që t’i bindë disa shtete që të njohin Kosovën. Këtu esenciale është njohja nga OKB-ja dhe njohja nga Serbia, dhe ky duhet të jetë fokusi. Çdo ndihmë që vjen nga kushdo është e mirëseardhur, edhe pse unë kam dyshime dhe jam dyshues sa i takon qëllimeve personale të Erdoganit dhe se çfarë në të vërtetë dëshiron të promovojë.

Radio Evropa e Lirë: Në të kaluarën kemi parë raporte të tensionuara në mes të SHBA-së dhe Turqisë, por kanë qenë lidhjet personale mes ish-presidentit Donald Trump dhe presidentit, Recep Tayyip Erdogan që kanë mbajtur larg tensionet. Tani me presidentin Biden në detyrë dhe problemet globale që kërkojnë zgjidhje më të shpejt, a mund të shihet iniciativa e presidentit turk si një përpjekje për t’u afruar me administratën Biden apo mund të qëndrojë diçka tjetër pas kësaj?

Alon Ben-Meir: Deri në një masë mund të themi se është kështu. Administrata Biden është shumë, shumë mbështetëse e Kosovës, e dimë këtë, dhe kjo është shumë e rëndësishme. Sikur Erdogan do të dëshironte të tregojë se edhe ai e mbështetë Kosovën dhe se në këtë apo në një mënyrë tjetër dëshiron të punojë së bashku me presidentin amerikan, Joe Biden, nuk do të kishte gjë të keqe këtu. Por, ajo që dua të ju them është se Erdogani gjithmonë ka agjendat e tij politike dhe ai nuk bën asgjë që t’i ndihmojë Kosovës apo ndonjë shteti tjetër, përderisa kjo nuk i ndihmon vetes së tij apo Turqisë. Kështu që çdo qeveri e Kosovës duhet të jetë shumë e kujdesshme me Turqinë pasi atij (Erdoganit) nuk mund t’i besohet.

Radio Evropa e Lirë: Kosova prej vitesh po përballet me një fushatë të Serbisë që kërkon tërheqjen e njohjeve të shtetit të Kosovës. Në anën tjetër e dimë se presidenti i Turqisë, Recep Tayyip Erdogan ka krijuar raporte shumë të mira me Serbinë dhe presidentin serb, Aleksandar Vuçiq. Mund të ketë tensionim raportesh?

Alon Ben-Meir: Nëse Erdogan dëshiron të ndihmojë Kosovën ai duhet të ndërmjetësojë, ai definitivisht është në një pozitë që të ndërmjetësojë sinqerisht ndërmjet Kosovës dhe Serbisë, nëse dëshiron, kuptohet. Por, ai dëshiron të përfitojë gjithmonë diçka. Unë nuk po them se ai mund të bindë Serbinë që të njohë Kosovën, por ai mund të luajë një rol mbështetës. Kjo do të duhej të ishte çështja në të cilën ai do të duhej të fokusohej në vend që të përpiqet që të takohet me presidentin Biden dhe që ta bëjë të duket si gjë e madhe fushatën për njohje të Kosovës.

Radio Evropa e Lirë: Siç e dini, në shtator të vitit të kaluar, Kosova dhe Serbia nënshkruan një marrëveshje në Uashington për normalizim ekonomik. Kjo marrëveshje po komentohet ndryshe në Kosovë e ndryshe në Serbi. Duket se asnjëra palë nuk dëshiron ta zbatojë. Çfarë duhet të ndodhë me zotimet që palët i kanë dhënë duke nënshkruar dokumentin në Shtëpinë e Bardhë?

Alon Ben-Meir: E gjithë ajo shfaqje që ish-presidenti, Donld Trump dëshironte ta kishte nuk ishte për Kosovën apo për Serbinë, ishte vetëm për vetveten e tij. Ai bëri atë vetëm se dëshironte të tregonte se është një lider dhe se mund të arrijë paqe në mes armiqsh dhe gjëra të tilla. Por, nëse e shihni me kujdes dokumentin e shihni se nuk ka asgjë të vlefshme.

Normalizimi “jo në llogari të pavarësisë së Kosovës”

Radio Evropa e Lirë: Serbia dhe Kosova vazhdojnë të mos pajtohen për një marrëveshje përfundimtare për paqe. Dialogu në Bruksel po vazhdon, por pa rezultat. A mendoni se është koha për të nënshkruar një marrëveshje përfundimtare?

Alon Ben-Meir: Nuk mund të them se do të ndodhë shumë shpejt, për një, dy apo tre vjet me shumë gjasë nuk do të ndodhë. Por, është më rëndësi që për të shtyrë përpara këtë proces të bëhet një lloj presioni mbi Serbinë. Për shembull komuniteti ndërkombëtar do të mund të punonte më shumë me Kosovën, më shumë sesa që janë duke punuar tani, që të ndihmojnë Kosovën që ta pastrojë shtëpinë e saj, që të ndihmojnë në zhvillim ekonomik, zhvillim institucional dhe zhvillim të demokracisë. Këtë do të duhej bërë në mënyrë që ta ofrojnë më shumë me kulturën dhe vlerat evropiane, në mënyrë që të jetë e gatshme për integrim në një pikë të caktuar.

Kjo qasje e BE-së me Kosovën mund të vendosë presion indirekt mbi Serbinë dhe Serbia do të shohë se Kosova është duke u ofruar çdo ditë e më shumë me BE-në. BE-ja po ashtu nuk duhet të ndalet kurrë duke adresuar një pikë: çdo çështje është e rëndësishme në negociatat në mes të Kosovës dhe Serbisë dhe është i mirëpritur çfarëdolloj normalizimi, por nuk mund të jetë në llogari të pavarësisë së Kosovës.

Radio Evropa e Lirë: A besoni se presidenti amerikan, Joe Biden do të përfshihet më shumë në gjetjen e një kompromisi në mes të Kosovës dhe Serbisë, kur e dimë faktin se ai ka një raport pak më personal me shtetin e Kosovës?

Alon Ben-Meir: Sinqerisht më duhet të ju them se unë kam qenë i përfshirë në konfliktin izraelito-palestinez për tri dekada dhe tani njerëzit me pyesin se cila është perspektiva dhe unë them se duhet një proces i pajtimit.

Kjo i nevojitet Kosovës dhe Serbisë, proces pajtimi. Serbia duhet t’i pranojë para botës krimet që i ka kryer ndaj kosovarëve. Kjo është fundamentale. Nuk mund të ketë normalizim marrëdhëniesh kur ke këtë të kaluar historike e cila nuk është adresuar plotësisht. Mendoj se është shumë kritike për SHBA-në dhe BE-në që të vendosin këtë lloj presioni mbi Serbinë që të ballafaqohet me realitetin, të ballafaqohet me të kaluarën e saj. Kjo është tepër me rëndësi në procesin e pajtimit sepse ndryshe pavarësisht sesa ke shkëmbime tregtare e kulturore e të tjera, përderisa ajo tragjedi historike nuk është adresuar, do të ketë gjithmonë njerëz që do të rezistojnë normalizimin e plotë të raporteve në mes të të dyja vendeve.

Radio Evropa e Lirë: Kemi dëgjuar zëra këtu në Prishtinë që thonë se për të arritur një marrëveshje finale është i nevojshëm një i dërguar special i presidentit amerikan për bisedimet Kosovë-Serbi. A mendoni se kështu mund t’i jepet një shtytje dialogut?

Alon Ben-Meir: Mendoj se për aq gjatë se SHBA-ja është një fuqi dhe partner i rëndësishëm në hemisferën perëndimore, SHBA-ja, sidomos tani e përfaqësuar nga presidenti, Joe Biden që krahasuar me ish-presidentin, Donald Trump, çfarë mund të them?! Presidenti Biden është një njeri fisnik që mund dhe do të bëjë shumë gjëra të mira. Pra të kemi një përfaqësues të tij në këtë dialog, gjithmonë është një ndihmë. Është mirë të kemi një përfaqësues të tillë dhe me sa kam informacione, do të emërohet një i tillë.

Related Topics:
Continue Reading

Lajmet

Influencer Marketing në Praktikë: Donna Gorani Sylaj dhe Lindrit Zogaj mbajnë ligjëratë me studentët e MBE Master në UBT

Published

10 hours ago

on

May 19, 2026

By

Në kuadër të lëndës “Menaxhimi i Marketingut”, studentët e Fakultetit MBE – niveli Master në UBT, të udhëhequr nga profesoresha Gonxhe Beqiri, mirëpritën në një ligjëratë të veçantë influenceren Donna Gorani Sylaj dhe gazetarin-influencerin Lindrit Zogaj. Aktiviteti u mbajt të martën, më 5 maj 2026, në ambientet e UBT-së në Prishtinë.

Gjatë ligjëratës, Donna Gorani Sylaj ndau me studentët përvojën e saj profesionale në fushën e marketingut influencues, duke folur për mënyrën se si funksionon Influencer Marketing në praktikë, strategjitë që përdoren për ndërtimin e një audience aktive, si dhe bashkëpunimet me bizneset dhe brendet e ndryshme.

Ajo theksoi rëndësinë e autenticitetit, kreativitetit dhe konsistencës në krijimin e përmbajtjes digjitale, ndërsa foli edhe për sfidat dhe avantazhet e të qenit aktive në këtë industri që po zhvillohet vazhdimisht. Një pjesë e diskutimit iu kushtua edhe përgjegjësive ligjore dhe obligimeve të influencerëve ndaj shtetit si taksapagues.

Ndërkaq, Lindrit Zogaj ndau me studentët perspektivën e tij mbi ndikimin e rrjeteve sociale në komunikim, median moderne dhe krijimin e përmbajtjes që arrin të ndikojë tek publiku.

Studentët treguan interesim të madh gjatë diskutimeve, duke parashtruar pyetje të ndryshme rreth mundësive që ofron tregu digjital, ndërtimit të brendit personal dhe mënyrave të zhvillimit të karrierës në fushën e marketingut dhe mediave sociale.

Në fund të takimit, studentët dhe stafi akademik falënderuan mysafirët për ligjëratën interaktive, këshillat profesionale dhe motivimin e ofruar për të rinjtë që synojnë të zhvillojnë ide inovative dhe të shfrytëzojnë mundësitë që ofron tregu në Kosovë.

Continue Reading

Lajmet

Mbi 131 mijë votues nga diaspora certifikohen për zgjedhjet e 7 qershorit

Published

12 hours ago

on

May 19, 2026

By

Komisioni Qendror i Zgjedhjeve ka njoftuar zyrtarisht se ka përfunduar procesi i shqyrtimit të aplikimeve për votuesit jashtë Kosovës për zgjedhjet e parakohshme të 7 qershorit, ku nga gjithsej 142 mijë e 802 aplikantë, janë aprovuar 131 mijë e 901 prej tyre, ndërsa 10 mijë e 906 kërkesa janë refuzuar.

Drejtori i Sekretariatit të KQZ-së, Besnik Buzhala, bëri të ditur gjatë mbledhjes së të martës se shqyrtimit të gjitha kërkesave ka përfunduar dje, ndërkohë që sot në orën 20:32 përfundon edhe afati ligjor për kundërshtimet administrative.

Gjatë kësaj periudhe, e cila zgjati nga 6 deri më 17 maj 2026, u regjistruan edhe 96 anullime të kërkesave nga votuesit që zgjodhën të rikthehen në listën e votuesve brenda Kosovës.

Paralelisht me procesin e certifikimit, KQZ ka miratuar edhe adresat e kutive postare për votimin nga jashtë, të cilat do të jenë funksionale në 22 shtete të ndryshme si Gjermani, Zvicër, ShBA, Shqipëri, Austri, e vende të tjera.

Anëtari i KQZ-së, Alban Krasniqi, theksoi se janë bërë vizita në terren për të verifikuar kapacitetet e mbledhjes së zarfeve, ndërsa Buzhala sqaroi se planet operative me Ministrinë e Punëve të Jashtme janë gati për të siguruar mbledhjen dhe dërgimin e sigurt të votave drejt Kosovës. /Kosova Press/

Continue Reading

Lajmet

FSK dhe Komanda Evropiane e Shteteve të Bashkuara zotohen për thellim të bashkëpunimit

Published

14 hours ago

on

May 19, 2026

By

Komandanti i Forca e Sigurisë së Kosovës, Bashkim Jashari, ka pritur në takim Zëvendës Shefin e J5/8 të Komandës Evropiane të Shteteve të Bashkuara (USEUCOM), gjeneral brigade Chris A. McKinney.

Gjatë takimit, të dy gjeneralët diskutuan për situatën e sigurisë në vend dhe rajon, si dhe për avancimin e kapaciteteve të Kosovës në fushën e mbrojtjes, përfshirë blerjet ushtarake dhe zhvillimin e industrisë së mbrojtjes.

Gjeneral Jashari theksoi rëndësinë e mbështetjes së Shtetet e Bashkuara të Amerikës si partner strategjik i Kosovës, ndërsa gjeneral McKinney përgëzoi punën dhe zhvillimet e shpejta të realizuara në sektorin e mbrojtjes dhe projektet e ardhshme të FSK-së.

Në takim u diskutua edhe për bashkëpunimin e deritanishëm ndërmjet FSK-së dhe USEUCOM-it, me theks të veçantë në nevojën për thellimin e këtij bashkëpunimi në të ardhmen dhe në rrugën e Kosovës drejt integrimit në NATO.

Po ashtu, të dy gjeneralët vlerësuan kontributin e FSK-së në kuadër të Forcës Ndërkombëtare Stabilizuese për Gazën (ISF), ku së shpejti pritet të dislokohet kontingjenti i parë nga Kosova.

Ndërkohë, gjeneral brigade Chris A. McKinney u takua edhe me ministrin e Mbrojtjes, Ejup Maqedonci. Gjatë këtij takimi u diskutua për ambientin e sigurisë në vend dhe rajon, avancimin e kapaciteteve mbrojtëse të Kosovës, blerjet ushtarake dhe zhvillimin e industrisë së mbrojtjes.

Ministri Maqedonci theksoi se Shtetet e Bashkuara të Amerikës mbeten partner kyç dhe i pazëvendësueshëm për Kosovën në fushën e mbrojtjes dhe sigurisë. Ai bëri të ditur se bashkëpunimi ndërmjet Kosovës dhe SHBA-së do të vazhdojë të thellohet me besim të plotë reciprok, në funksion të forcimit të ushtrisë dhe integrimit euroatlantik të vendit.

Në fund të takimeve, përfaqësuesit e Kosovës dhe ata amerikanë ritheksuan përkushtimin për vazhdimin e bashkëpunimit strategjik dhe mbështetjen e zhvillimit të mëtejmë të FSK-së.

 

 

Continue Reading

Lajmet

Ditari: lajmet kryesore që shënuan datën 19 maj – 1993-1998?

Published

16 hours ago

on

May 19, 2026

By

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1993-1998.

 (Foto: “New York Times” merrej intensivisht me çështjen e Kosovës)

 19 maj 1993

 “New York Times”: “Serbët të bombardohen menjëherë”

Në një artikull të botuar në “New York Times” me titull “Të bombardohen serbët menjëherë”, senatori amerikan, Denis De Konsini

argumenton se ndalja e ekspansionit serb është çështje shumë e rëndësishme për sigurinë kombëtare dhe integritetin moral të Amerikës. “Vonesa e mëtutjeshme nuk do të na linte tjetër zgjidhje përpos një lloj angazhimi ushtarak të cilin askush nga ne nuk e dëshiron”, thotë mes tjerash De Konsini.

Ndërsa të martën e kaluar, siq njofton UPI, ish-sekretari i shtetit, Xhorxh Shulc apeloi për një luftë masive nga ajri kundër forcave serbe si mënyrën e vetme për ta ndalur agresionin në Bosnjë.

Henri Kisinxheri, po ashtu sekretar i mëhershëm i shtetit amerikan, në gazetën “Uashington Post”, të së dielës shkruan se SHBA-të do të duhej ta krijonin një prezencë të NATO-s në Maqedoni, që ta parandalojë përhaphjen e luftës në Maqedoni e Kosovë.

Kisinxheri thotë se objektiva e Shteteve të Bashkuara do të përfshinte edhe ndaljen e luftës në Bosnje përmes sankcioneve apo forcës si “mjet të fundit” për të ndalur spastrimin etnik. Kisinxheri thotë se është kundër dërgimit të forcave tokësore në Bosnje, për çfarëdo qëllimi duke përfshirë edhe ruajtjen e paqës.

 

19 maj 1994

Kongresistë amerikanë kërkojnë vetëvendosje për Kosovën nga kryetari Klinton

Në një letër që i dërguan presidentit Klinton, njëmbëdhjetë kongresistë amerikanë shfaqën brengosjen e thellë për situatën në Kosovë dhe kërkuan vetëvendosje për popullin e Kosovës, njofton “Bujku” i sotëm.

“Komisioni i Kombeve të Bashkuara për të Drejtat e Njeriut, Komsioni i Helsinkit dhe Human Rights Ëatch kanë dokumentuar për abuzimet në shkallë të gjerë të të drejtave të njeriut që u bëhen shqiptarëve të Kosovës”, shkruajnë kongresistëtt amerikanë: Jose Serrano, Eliot Engel, Susan Molinari, Nita Loëey, John Olver, Peter King, Edolphus Toëns, David Levy, Dick Sëett, Sander Levin dhe Joseeph Kennedy.

Represoni i vazhdueshëm serb ka shkaktuar eskomunikimin e shqiptarëve nga çdo sferë e jetës dhe shkatërrimin e jetës normale në Kosovë. “Janë mbyllur ndërmarrjet dhe shkollat e shqiptarëve, ndërkaq anëtarëve të Parlamentit të Kosovës, të zgjedhur në mënyrë demokratike, nuk u është lejuar të mblidhen ç’prej se Serbia në korrik 1990 ka okupuar Kosovën dhe ka suspenduar Qeverinë e saj”.

Në letër tërhiqet vërejtja edhe për shtimin e represionit, gjatë muajve të fundt, duke e vlerësuar atë si një fushatë të “spastrimit etnik” serb.

“Shqiptarët etnikë, të cilët përbëjnë rreth 90 për qind të popullsisë së Kosovës, vazhdimisht arrestohen, ndiqen dhe dënohen pa gjyq. Ata sulmohen shpesh fizikisht nga autoritetet serbe. Edhe njëherë serbët po vazhdojnë fushatën e tyre të ‘spastrimit etnik’, duke i detyruar me forcë shqiptarët ta lëshojnë Kosovën.

Gjendja në Kosovë po keqësohet me të shpejtë, andaj është i domosdoshëm reagimi i menjëhershëm i bashkësisë ndërkombëtare, para se të jetë bërë vonë. Ne kërkojmë që Qeveria e Republikës së Kosovës të inkuadrohet në çfarëdo samiti që do të mbahet për Bosnjën, në të cilin do të marrë pjesë edhe pala amerikane. Represioni serb mbi popullatën shqiptare është një çështje e cila s’mund të përjashtohett nga këto bisedime po qe se dëshirohet arritja e një paqe të qëndrueshme në rajon”, thuhet në letër.

Kongresistët amerikanë përfundojnë se: “Populli i Kosovës e ka të drejtën e vetëvendosjes, e cila në mënyrë sistematke u është mohuar nga serbët. Kërkojmë nga Ju që këtë çështje ta vini në rend dite në ndonjë samit të ardhshëm, në mënyrë që ajo të zgjidhet para se të shkaktohet një konflikt tjetër”.

 

 19 maj, 1995

Procesi kundër ish-policëve të Kosovës fillon në Prishtinë më 29 maj

Njoftohet se më 29 maj të këtij viti në Prishtinë, serbët e instaluar në prokurorinë dhe Gjyqin e Qarkut në Prishtinë do të fillojnë procesin e montuar politik kundër 71 ish-policëve të Kosovës që u arrestuan prej nëntorit të vitit të kaluar dhe që janë mbajtur nën hetime në paraburgim në burgun e Prishtinës. Për shkak të numrit të madh të të akuzuarve, procesi gjyqësor do të mbahet në sallën e madhe të Kuvendit të Kosovës në Prishtinë.

Në muajin e kaluar, prokuroria serbe njoftoi se akuzohen këta persona: Avdija Mehmedoviqi (1953), Jonuz Tërstena (1952), i cili gjendet në arrati, Sherif Krasniqi (1939) – në arrati, Sheremet Ahmeti (1953), Hajrullah Tërrnava (1954) – në arrati, Fadil Krasniqi (1958) – në arrati, Blerim Olloni (1956), Hizri Ahmeti (1955), Ejup Kamerolli (1952), Murat Sahiti (1956), Afrim Karaxha (1954), Hakif Latifi (1954), Ramadan Ferizi (1947), Ilmi Sylejmani (1960), Arsim Mehmeti (1960), Bajram Munishi (1956), Destan Thaçi (1954), Vesel Rexhepi (1958), Idriz Jashari (1954), Hasan Avdyli (1957), Bejtullah Alidema (1943), Haki Mehmeti (1952), Fadil Hyseni (1954), Bajram Jakaj (1948), Fadil Berisha (1956), Izet Ymeri (1949), Isak Aliu (1948), Enver Hakiu (1947), Sylejman Berisha (1958), Ramiz Hoxha (1954), Fekir Tahiri (1955), Reshat Maliqi (1960), Adem Dulahu (1957), Rexhep Kamenica (1949), Kemajl Aliu (1962), Bajram Berisha (1962), Izet Azizi (1959), i cili gjendet në arrati, Tahir Çaka (1959), Sali Bruti (1944), Fahredin Mehmeti (1956), Ilaz Gashi (1954), Sejdi Ademi (1966), Agim Gashi (1956), Açif Berisha (1955), Muhamet Hajdari (1961), Qazim Omura (1950), Rexhep Haziri (1956), Sejfullah Sahatçiu (1943), Faton Zhubi (1942), Pleurat Macula (1957), Bedri Juniku (1953), Lah Lahu (1954), gjendet në arrati, Shaban Hajredini (1945) – në arrati, Shefqet Beçaj (1957), Xhavit Osmani (1944), Xhafet Sahatçiu (1947), Muhamet Nimani (1946), Remzi Tertica (1946), Zekë Beka (1948), Tahir Bezhani (1947), Bibë Biblekaj (1946), Zenel Rama (1947), Selim Çitaku (1955), Zejnullah Shala (1938), Enver Maxhuni (1949), Afrim Olloni (1957), Bedri Tahiri (1959), gjendet në arrati, Jonuz Loshaj (1950), Hamit Peci (1946), Abdyl Doroci (1945) dhe Shefqet Budakova (1957).

Këta ish-policë e përgjegjës të policisë së Kosovës akuzohen për gjoja formimin e Ministrisë së Punëve të Brendshme të Republikës së Kosovës.

Në aktakuzë thuhet se ata akuzohen për shkak se:

“Në periudhën prej vitit 1991 deri në nëntor të vitit 1994 në Kosovë kanë formuar shoqatën, i takuan të njëjtës, u përgatitën dhe kryen punët për ‘përpjekjen që në rrugë jashtëkushtetuese dhe me përdorimin e dhunës të rrezikojnë rregullimin kushtetues të Jugosllavisë, dhe territorin e Kosovës dhe pjesëve të tjera të banuara me shqiptarë ta shkëpusin nga Jugosllavia, të formojnë shtet të pavarur ose t’ia bashkangjesin Shqipërisë, në atë mënyrë që në iniciativë, në organizim dhe sipas urdhërit të Qeverisë së Republikës së Kosovës, duke u thirrur në dispozitat e ‘dekretligjit për organizimin e administratës republikane’ pas përgatitjeve dhe konsultimeve, gjatë vitit 1992 kanë formuar ‘Ministrinë e Punëve të Brendshme të Republikës së Kosovës’, dhe në kuadër të së njejtës, shërbimet e sigurimit publik dhe shtetëror, në nivel të shtatë ‘qendrave të sigurimit’ në të gjitha qytetet e mëdha në Kosovë, të lidhura në mënyrë hierarkike dhe konspirative me ‘ministrinë’, përgjegjës për punën e vet ‘kryetarit’, ‘kuvendit’, dhe Qeverisë së Republikës së Kosovës, zinin pozita të larta dhe angazhuan numër të madh njerëzish, kryesisht ish-punëtorë të SPB-së, hartuan lista dhe organizuan punën e këtij organi parapolicor, punuan në sigurimin e një sasie të madhe të armëve për armatimin e pjesëtarëve të tyre, një pjesë e të cilave i sollën në vend, siguruan mjete teknike dhe mjete tjera, siç janë radiostacionet me fuqi të lartë, radiostacione manuale, kompjuterë etj, organizuan funksionimin e pjesës së uniformuar dhe asaj operative me detyrë që të përcillet, të pengohet dhe të pamundësohet puna e organeve legale shtetërore, veçanërisht milicisë dhe ushtrisë dhe përcollën lëvizjet e njësive dhe punëtorëve të tyre, mblodhën të dhëna për aktivitetin e tyre, për armatimin, mjete teknike dhe numrin e pjesëtarëve, bënë vëzhgimin e lokacioneve të tyre dhe bënë vlerësimin e veprimit të tyre në gjendje të jashëzakonshme, përcollën gjendjen dhe krijuan mundësi operative për veprimin në sistemet me rëndësi të veçantë, siç është ai radiodifuziv, eleketroenergjetik, hekurudhor, PTT etj, bënë sigurimin dhe mbrojtjen kundërinformative të objekteve, ku u kryen aktivitetet e organeve ilegale të Republikës së Kosovës në vend dhe jashtë tij, formuan rrjetin e tyre informativ dhe atë të bashkëpunëtorëve, përcollën zhvillimin e kriminalitetit, mblodhën të dhëna të karakterit mbrojtës, organizuan dhe zbatuan stërvitjen e anëtarëve të tyre, duke planifikuar që përveç veprimeve të përmendura, të ndërmerrnin edhe masa e veprime nga kompetencat e milicisë serbe dhe me këtë të pengojnë dhe të paralizojnë punën e saj dhe të organeve tjera shtetërore dhe kështu të krijojnë kushtet për realizimin e qëllimit përfundimtar, dhe, për gjithë çka kanë bërë, përmes ‘buletinit’ dhe me gojë të informojnë ‘kryetarin’, ‘qeverinë’ dhe ‘kryetarin e Parlamentit të Republikës së Kosovës'”.

 

19 maj 1998

Në Çitak u vra Ajmane D. Çitaku (95)

Forcat serbe ndërmorrën dje një sulm të gjerë kundër fshatrave të Drenicës që po mbahen të rrethuara që nga fillimi i marsit. Sulmi ishte më i fortë ndaj fshatrave Çitak, Padalishtë e Leçinë, ndërsa u granatuan edhe Broja, Llausha, Kopiliqi e Vojnika.

Burime të LDK-së në Skënderaj njoftojnë se gjatë këtij sulmi është vrarë plaka 95 vjeçare Ajmane Dush Çitaku, është plagosur Hysen Selman Çitaku, ndërsa janë djegur dhjetë shtëpi, tetë në Çitak e dy në Padalishtë. Dyshohet se mund të ketë më shumë të plagosur dhe se pasojat e këtij sulmi mund të jenë më të mëdha.

Gjatë tërë kohës sa zgjati aksioni, ai u mbështet edhe nga tre helikopterë ushtarakë, të cilët vazhdimisht shtinë nga ajri mbi banorët e fshatrave. Ndërsa autoambulancat ushtarake hyn dhe dolën disa herë në rajon, gjë që lë të kuptohet se ka viktima në mesin e forcave sulmuese serbe.

Njoftohet se banorët e fshatrave të sulmuara, sidomos gratë, fëmijët dhe pleqtë, janë larguar nga fshatrat e sulmuara dhe janë strehuar në rajonet më pak të rrezikuara.

Forcat serbe vranë dje Ramadan Loshin nga Padalishta

Ramadan Loshi (68) nga Padalishta e Skënderajt është viktima e dytë e sulmit të djeshëm të forcave serbe kundër Padalishtës, Çitakut e Leçinës në Skënderaj.

“Dojçe vele” njoftoi sot se ai është gjetur i vdekur pas përrfundimit të sulmit.

Gjatë sulmit të djeshëm është vrarë edhe Ajmane D. Çitaku (95), ndërsa është plagosur Hysen Selman Çitaku.

Continue Reading

Të kërkuara