Barcelona pritet të përballet me kushte të pafavorshme atmosferike në ndeshjen e së martës kundër Aston Villës, në kuadër të Ligës së Kampionëve. Parashikimet meteorologjike paralajmërojnë reshje shiu dhe temperatura të ulëta në kryeqytetin katalanas.

Sipas mediumit spanjoll SPORT, reshjet pritet të vazhdojnë edhe në momentin e fillimit të ndeshjes, me rreth 2.3 milimetra shi të parashikuar. Megjithatë, intensiteti më i lartë i reshjeve, sipas Shërbimit Meteorologjik të Katalonjës (Meteocat), pritet të regjistrohet para orëve të mbrëmjes.

Departamenti i logjistikës së Barcelonës tashmë ka njoftuar mediat për kushtet e pritshme atmosferike, duke u rekomanduar tifozëve të vishen ngrohtë. Temperaturat gjatë ndeshjes pritet të jenë rreth 13 gradë Celsius, ndërsa shpejtësia e erës mund të arrijë deri në 14 kilometra në orë.

Pavarësisht reshjeve të paralajmëruara, gjendja e fushës nuk paraqet shqetësim për organizatorët. Sistemi i drenazhimit në stadiumin “Spotify Camp Nou” konsiderohet i aftë për t’i përballuar edhe reshjet e dendura të shiut.

Kushtet e vështira atmosferike janë përsëritur në disa prej ndeshjeve të rëndësishme të Barcelonës këtë sezon.

Reshje të ngjashme pati edhe në fitoren 5:1 ndaj Feyenoordit, kur moti i keq ndikoi në numrin e tifozëve të pranishëm në stadium.

Po ashtu, shi i rrëmbyeshëm shoqëroi edhe fitoren 7:2 ndaj Racing Santanderit, ndeshje që u ndoq nga 45.838 spektatorë.

Ndërkohë, kushte edhe më të vështira atmosferike u regjistruan në El Clasicon e femrave mes Barcelonës dhe Real Madridit, kur për shkak të reshjeve të dendura, fillimi i takimit u shty për dy orë.

D.L

Portieri i Kombëtares së Kosovës, Arijanet Muriqi, nuk u aktivizua as të hënën mbrëma në ndeshjen ku Sassuolo pësoi humbje 4:2 nga Fiorentina.

Kjo ishte disfata e katërt radhazi për Sassuolon, ndërsa Muriqi mungoi në formacion edhe në tri ndeshjet e fundit të skuadrës italiane.

Paraqitja e fundit e portierit kosovar ishte në humbjen 4:2 ndaj Frosinones. Pas kritikave dhe gabimeve në atë ndeshje, të zhvilluar më 10 tetor, Muriqi humbi vendin e titullarit.

Pas kësaj humbjeje, Sassuolo renditet në pozitën e 16-të me tetë pikë, aq sa ka edhe Fiorentina, e cila ndodhet një vend më lart në tabelën e klasifikimit.

D.L

Muajin e kaluar, UEFA i kishte dhënë FIFA-s afat deri më 2 nëntor për të publikuar detajet e këtij propozimi kontrovers dhe për t’iu përgjigjur më shumë se 100 pyetjeve që lidhen me qeverisjen dhe procesin e vendimmarrjes në organizatë.

Kjo kërkesë erdhi pas një mbledhjeje të Këshillit të FIFA-s, në të cilën presidenti Gianni Infantino kërkoi falje, por nuk dha shpjegime lidhur me mënyrën se si ishte hartuar propozimi. Ai kërkoi që pyetjet të dorëzoheshin me shkrim.

Vetëm pak orë para përfundimit të afatit të caktuar nga UEFA, sekretari i përgjithshëm i FIFA-s, Mattias Grafstrom, u dërgoi një njoftim anëtarëve të Këshillit, duke bërë të ditur se ata do të kenë mundësi t’i shqyrtojnë dokumentet vetëm në kushte të veçanta dhe personalisht, në selinë e FIFA-s në Cyrih.

Sipas tij, kjo procedurë synon të ruajë detyrimet e konfidencialitetit. Anëtarëve të Këshillit u është kërkuar që brenda dy javëve të ardhshme të regjistrojnë interesimin e tyre për të pasur qasje në dokumente.

Megjithatë, ende nuk është bërë e ditur se cilat dokumente do të vihen në dispozicion.

BBC Sport raporton se FIFA e konsideron të parealizueshëm afatin dyjavor të UEFA-s për t’iu përgjigjur më shumë se 100 pyetjeve. Kjo për shkak të angazhimeve të fundit të organizatës në përgatitjen e një Kupe të re të Botës për të rinj në Azerbajxhan, si dhe organizimit të një Kongresi të jashtëzakonshëm më vonë gjatë këtij muaji.

Nga ana tjetër, UEFA nuk ka përcaktuar se çfarë hapash do të ndërmarrë nëse FIFA nuk i përmbush kërkesat brenda afatit. Megjithatë, synimi i saj është të shtojë presionin ndaj Infantinos përpara 18 nëntorit, datë kur përfundon afati për kandidatët që dëshirojnë të konfirmojnë kandidaturën e tyre kundër tij në zgjedhjet presidenciale të FIFA-s vitin e ardhshëm.

Foto: Foto: Associated Press

D.L

Unai Emery do të rikthehet këtë javë në Barcelonë, për herë të parë në Ligën e Kampionëve, që nga humbja historike e PSG-së ndaj Barcelonës në vitin 2017, në një nga përmbysjet më të mëdha në historinë e futbollit evropian.

Të martën, nga ora 21:00, Aston Villa e drejtuar nga Emery do të përballet me Barcelonën në “Camp Nou”, në një nga ndeshjet më interesante të xhiros së katërt të Ligës së Kampionëve.

Skuadra angleze po kalon një formë të shkëlqyer në këtë garë dhe aktualisht renditet në pozitën e dytë në tabelën me 36 skuadra, prapa Paris Saint-Germainit.

Pikërisht me PSG-në, Emery kishte përjetuar një nga momentet më të vështira të karrierës së tij në Barcelonë, në mars të vitit 2017.

Skuadra franceze kishte fituar ndeshjen e parë të një të tetës së finales me rezultat 4:0, por Barcelona arriti një përmbysje të jashtëzakonshme, duke fituar 6:1 në ndeshjen e kthimit dhe duke siguruar kualifikimin me rezultat të përgjithshëm 6:5. Kjo përballje mbetet e njohur si “Remontada”.

Që nga ajo kohë, Emery nuk është rikthyer në “Camp Nou” në kuadër të Ligës së Kampionëve, ndërsa këtë herë do të paraqitet me një Aston Villa që po zhvillohet më shpejt se pritshmëritë.

Barcelona, kundërshtarja më e vështirë e Emeryt

Përballja e së martës do të jetë edhe një tjetër kapitull në rivalitetin e gjatë mes Emeryt dhe Barcelonës.

Gjatë karrierës së tij, trajneri spanjoll është përballur 30 herë me katalunasit, ndërsa skuadrat e tij kanë regjistruar vetëm tri fitore.

Dy prej tyre janë veçanërisht të paharrueshme: fitorja 4:0 e PSG-së në vitin 2017 dhe triumfi 2:0 i Villarrealit në “Camp Nou”, në maj të vitit 2022.

Ndërkohë, Aston Villa synon të vazhdojë formën pozitive edhe në këtë edicion të Championsit, ku ka regjistruar fitore radhazi dhe ka realizuar 12 gola. Nicolas Jackson është një prej futbollistëve që po spikat në repartin ofensiv.

Manchester Unitedi kërkon reagim ndaj Romës

Një tjetër përballje interesante e së martës do të zhvillohet në “Old Trafford”, ku Manchester Unitedi do të përballet me Romën.

Skuadra angleze po kalon një periudhë të vështirë, duke u renditur në vendin e 20-të në Ligën e Kampionëve dhe në pozitën e 17-të në Premier League.

Përballja me italianët shihet si një mundësi për reagim, ndërsa Roma nuk ka rezultate të mira në ndeshjet evropiane të zhvilluara në Angli. Skuadra italiane ka fituar vetëm një nga 21 përballjet e tilla.

Kane synon rekordin e Ronaldos

Vëmendje të veçantë do të ketë edhe Harry Kane, i cili synon të barazojë një rekord të Cristiano Ronaldos në Ligën e Kampionëve.

Portugezi mban rekordin për më së shumti ndeshje radhazi me gol në këtë garë, me 11 të tilla, gjatë të cilave realizoi 17 gola.

Sulmuesi anglez i Bayern Munichut është aktualisht në seri prej dhjetë ndeshjesh radhazi me gol në Champions, duke regjistruar 13 realizime.

Të martën, Bayerni do të ketë një sfidë të vështirë në udhëtim ndaj Atletico Madridit, ku Kane do të kërkojë ta vazhdojë ecurinë pozitive. Ai ka luajtur më parë në stadiumin “Metropolitano”, por nuk ka arritur të shënojë.

Ndërkohë, të mërkurën në program janë edhe disa përballje interesante, ku lideri i Premier Leagues, Arsenali, do të luajë në udhëtim ndaj Slavia Pragës, ndërsa Real Madridi do të përballet me AEK-un e Athinës.

Një tjetër ndeshje që pritet me interes është ajo mes Liverpoolit dhe Fenerbahçes, ku anglezët do të kërkojnë fitoren e parë në udhëtim ndaj një skuadre turke në historinë e tyre në Kupën Evropiane dhe Ligën e Kampionëve.

D.L