Presidenti Donald Trump lëshoi një urdhër ekzekutiv të mërkurën, duke udhëzuar Sekretarin e Shtetit, Marco Rubio, të implementojë ndryshime të rëndësishme në Shërbimin e Jashtëm për të siguruar zbatimin e politikës “Amerika e Para” në mënyrë të besueshme dhe efektive.

Ky urdhër vjen pas zhvillimeve të fundit në Agjencinë Amerikane për Zhvillim Ndërkombëtar (USAID), ku disa punonjës janë pezulluar ose u është dhënë leje e detyruar, si pjesë e përpjekjeve të administratës Trump për të pastruar shtetin nga burokratët që konsiderohen jobesnikë.

Në përputhje me urdhrin ekzekutiv, moszbatimi i politikave të presidentit do të çojë në masa disiplinore, përfshirë mundësinë e largimit nga puna për ata që nuk përputhen me agjendën e tij. Urdhri thekson se Sekretari i Shtetit duhet të krijojë një fuqi punëtore të jashtëzakonshme, të përkushtuar për zbatimin e politikës së jashtme të presidentit. Reforma do të përfshijë rregulla të reja për standardet e rekrutimit, vlerësimit të punës dhe mbajtjes së punonjësve në Shërbimin e Jashtëm.

Gjithashtu, Sekretari Rubio do të ketë mundësinë të rinovojë programet e Institutit të Shërbimit të Jashtëm dhe të rishikojë manualin e Punëve të Jashtme, që përfshin politikat, procedurat dhe strukturën organizative të Departamentit të Shtetit. Ky urdhër pason një veprim të ngjashëm të kryer nga Presidenti Trump më 20 janar, kur urdhëroi ngrirjen e pjesës më të madhe të ndihmës ndërkombëtare të Shteteve të Bashkuara, për të siguruar që ajo të përputhet me politikën e tij “Amerika e Para”.

Pas këtij urdhri, personeli i USAID-it u dha leje e detyruar dhe iu kërkua të mos paraqiteshin në punë në selinë e agjencisë në Uashington. Gjithashtu, tabelat me emrin e agjencisë u hoqën ose mbuluan, dhe faqja e internetit e USAID-it nuk është më funksionale. Në këtë kontekst, Sekretari Rubio është emëruar ushtrues i detyrës së administratorit të USAID-it, për të udhëhequr proceset e reformatore.

Kremlini ka deklaruar se është “i impresionuar” nga përpjekjet e presidentit amerikan Donald Trump për t’i dhënë fund luftës trevjeçare në Ukrainë, duke sinjalizuar një ndryshim të rëndësishëm në marrëdhëniet mes Moskës dhe Uashingtonit. Zëdhënësi i Kremlinit, Dmitry Peskov, konfirmoi se të dyja palët kanë vullnet politik për të gjetur një zgjidhje paqësore dhe se po bëhen përgatitjet për një takim mes Trump dhe presidentit rus Vladimir Putin.

Sipas Reuters, dy liderët zhvilluan një bisedë telefonike mbi një orë të mërkurën, ku diskutuan për skenarët e mundshëm të përfundimit të luftës. Trump më pas deklaroi se nuk e shihte si praktik anëtarësimin e Ukrainës në NATO, një kërkesë kyçe e Kievit për sigurinë e saj afatgjatë. Zëdhënësi i Kremlinit, Peskov, duke iu referuar qëndrimit të administratës së mëparshme amerikane, tha se ajo kishte bërë gjithçka për ta vazhduar luftën, ndërsa administrata e Trump po punonte për të ndalur konfliktin dhe për të sjellë paqen.

“Ne jemi të impresionuar nga ky qëndrim dhe të hapur për dialog”, deklaroi Peskov.

Trump ka sugjeruar që takimi me Putin të mbahet në Arabinë Saudite, por Kremlini ka theksuar se detajet ende po përpunohen dhe se ekziston gjithashtu një ftesë për Trump që të vizitojë Moskën. Peskov nuk dha detaje mbi formatin e negociatave apo rolin e vendeve evropiane në to, por theksoi se një zgjidhje paqësore përmes dialogut është e mundur.

“Ekziston një vullnet politik për të zhvilluar bisedime serioze dhe për të arritur një marrëveshje”, shtoi ai. Kjo lëvizje sinjalizon një moment kritik në përpjekjet për t’i dhënë fund luftës në Ukrainë, ndërsa mbetet për t’u parë se si do të reagojnë Kievi dhe aleatët e tij evropianë ndaj këtyre zhvillimeve./UBTNews/

Instituti Kombëtar i Statistikave i Spanjës (INE) ka bërë të ditur se popullsia e vendit për herë të parë ka tejkaluar 49 milionë, shifër e nxitur absolutisht nga emigracioni.

Në tremujorin e fundit të vitit 2024, Spanja shtoi mbi 115 mijë banorë të rinj, duke e çuar numrin e përgjithshëm të banorëve në pak më shumë se 49 milionë.

E gjithë kjo rritje ishte falë emigrantëve, të cilët tani përbëjnë afërsisht një të pestën e popullsisë së përgjithshme të Spanjës. Gjithashtu numri i banorëve të lindur jashtë vendit u rrit me mbi 136 mijë, ndërsa popullsia e lindur në Spanjë shënoi një rënie me mbi 20.500.

Të dhënat e fundit të institutit INE tregojnë se niveli i lindjeve në Spanjë në vitin 2023 u tkurr në një rekord të ulët prej 1,12 fëmijë për grua. Në tremujorin e fundit të vitit 2024, rreth 75 për qind e emigrantëve vinin nga tre vende, respektivisht nga Kolumbia, Venezuela dhe Maroku.

Mijëra të tjerë janë nga Peru, Italia, Hondurasi, Argjentina, Ekuadori dhe Ukraina gjithashtu u bënë banorë spanjollë. Rajonet me rritjen më të madhe të popullsisë janë Melilla, Valencia, Madridi dhe Katalonja.

Pavarësisht nivelit të ulët të lindjeve në vitet e fundit, që nga viti 1971 popullsia e Spanjës është rritur me rreth 15 milionë.

Ish-CEO, Eric Schmidt, ka deklaruar se është i shqetësuar se inteligjenca artificiale mund të përdoret nga terroristë ose shtete mashtruese për të dëmtuar njerëzit e pafajshëm.

“Frikat e vërteta që kam nuk janë ato për të cilat shumica e njerëzve flasin me inteligjencën artificiale, unë po flas për rrezik ekstrem”, tha Schmidt për BBC.

Miliarderi i teknologjisë, i cili mbajti poste të larta në Google nga viti 2001 deri në 2017, tha se “Koreja e Veriut, ose Irani, apo edhe Rusia” mund të adoptojnë dhe keqpërdorin teknologjinë për të krijuar armë biologjike.

Inxhinieri i softuerit u bëri thirrje shteteve të zbatojnë mbikëqyrjen mbi kompanitë private të teknologjisë që zhvillojnë modele të AI, por gjithashtu paralajmëroi se rregullimi i tepërt mund të mbysë inovacionin.

Schmidt mbështeti kontrollet e eksportit të SHBA-së në mikroçipet e fuqishme që fuqizojnë sistemet më të avancuara të inteligjencës artificiale.

Para se të largohej nga detyra, ish-presidenti i SHBA-së Joseph Biden kufizoi eksportin e mikroçipëve në të gjitha vendet, përveç 18 vendeve, në mënyrë që të ngadalësonte përparimin e kundërshtarëve në kërkimin e inteligjencës artificiale.