Konservatorët e kancelarit të ardhshëm të Gjermanisë, Friedrich Merz, dhe Partia Socialdemokrate e qendrës së majtë, e nënshkruan të hënën formalisht marrëveshjen për koalicion, në prag të fillimit të punës së Qeverisë së re gjermane të udhëhequr nga ta.

Merz, 69 vjeç, do të betohet të martën si udhëheqës i ri i vendit me ekonominë më të madhe në Evropë, duke i dhënë fund një ngërçi politik gjashtëmujor në Berlin.

Aleanca CDU/CSU e udhëhequr nga Merzi dhe partneri në koalicion, Partia Socialdemokrate (SPD), janë zotuar se do ta ringjallin ekonominë e dobësuar dhe se do ta rindërtojnë ushtrinë në një kohë kur presidenti i Shteteve të Bashkuara të Amerikës, Donald Trump, e ka vënë në dyshim të ardhmen e sigurisë dhe lidhjeve tregtare transatlantike.

Merz gjithashtu është zotuar se do ta frenojë emigracionin e parregullt dhe se do ta ndalë rritjen e partisë kundër emigracionit, Alternativa për Gjermaninë (AfD), e cila doli në vend të dytë në zgjedhjet e parakohshme të shkurtit.

AfD-ja u shpall të premten “grup ekstremist i krahut të djathtë” nga shërbimi i inteligjencës së brendshme të Gjermanisë – një veprim që ka nxitur një përplasje të re me administratën Trump, dhe kundër të cilit AfD-ja nisi veprime ligjore të hënën.

Nënpresidenti amerikan, JD Vance, e përshkroi AfD-në – e cila, si Trump, ka bërë fushatë kundër emigracionit – si “partinë më popullore në Gjermani”.

Sekretari amerikan i Shtetit, Marco Rubio, e cilësoi veprimin e agjencisë gjermane të inteligjencës si “tirani të maskuar”.

Që nga zgjedhjet e shkurtit, AfD-ja ka qenë në garë të ngushtë me CDU/CSU-në në sondazhe dhe herë pas here në avantazh.

Merz, i cili ka përvojë të madhe në biznes, por zero përvojë në poste drejtuese qeveritare, në ceremoninë e nënshkrimit të së hënës premtoi “qeverisje të fortë, të besueshme dhe të planifikuar mirë”.

“Ne jetojmë në kohë ndryshimesh të thella, përmbysjesh të thella… dhe pasigurie të madhe, dhe kjo është arsyeja pse ne e dimë se është detyra jonë historike të udhëheqim këtë koalicion drejt suksesit“, tha ai.

Marrëveshja e koalicionit, e cila ka 144 faqe dhe titullohet: “Përgjegjësia për Gjermaninë“, përshkruan një plan politik për katër vjetët e ardhshme të koalicionit ndërmjet dy partive më të mëdha tradicionale në vend.

Merz tha se Qeveria e re “është e vendosur të ecë përpara me reforma dhe investime” dhe gjithashtu premtoi “një Qeveri zëri i së cilës dëgjohet në Evropë dhe në botë”.

Qeveria në largim e kancelarit të SPD-së, Olaf Scholz, u shpërbë më 6 nëntor, në ditën kur Trump u rizgjodh president amerikan.

Vetë Scholz nuk do të jetë pjesë e kabinetit të ri, por do të qëndrojë në parlament si deputet.

Dhoma e ulët e Parlamentit të Gjermanisë do të mblidhet nga ora 09:00 të martën për një seancë në të cilën pritet që deputetët ta zgjedhin Merzin si kancelarin e 10-të të Gjermanisë moderne.

Pasi kreu i shtetit gjerman, presidenti Frank-Walter Steinmeier, ta ketë konfirmuar votimin, Merz pritet ta bëjë betimin në mesditë./REL/

Ministri i Jashtëm i Francës tha të martën se Parisi “e dënon shumë ashpër” fushatën e re ushtarake të Izraelit në Rripin e Gazës.

Deklaratat e tij vijnë një ditë pasi ushtria izraelite tha se operacionet e zgjeruara në Gaza do të përfshijnë zhvendosjen e “shumicës” së banorëve të saj, pasi kabineti i sigurisë i vendit miratoi një plan që, sipas një zyrtari izraelit, do të përfshijë “pushtimin e Rripit të Gazës dhe mbajtjen e territoreve”.

“Është e papranueshme”, tha ministri i Jashtëm francez, Jean-Noel Barrot në një intervistë në radio, duke shtuar se qeveria izraelite është “në shkelje të ligjit humanitar”.

Vendimi i Izraelit vjen ndërsa Kombet e Bashkuara dhe organizatat humanitare kanë paralajmëruar vazhdimisht për një katastrofë humanitare në terren, me rrezikun e urisë që rikthehet pas më shumë se dy muajsh bllokadë totale izraelite.

Pothuajse të gjithë 2.4 milionë banorët e Rripit të Gazës janë zhvendosur të paktën një herë gjatë luftës, e cila nisi pas sulmit të militantëve të Hamasit mbi Izraelin në tetor 2023 raporton AFP./REL/

Ukraina ndërmori një sulm me dronë mbi Moskën, i cili detyroi mbylljen e tre aeroporteve kryesore të kryeqytetit rus për disa orë, thanë zyrtarët rusë.

Të paktën 19 dronë ukrainas u shkatërruan teksa i afroheshin Moskës, tha kryetari i bashkisë Sergei Sobyanin në Telegram më 6 maj.

Sipas informacioneve paraprake, nuk pati “dëme serioze apo të lënduar” në vendin ku ranë mbetjet pranë njërës prej autostradave kryesore që çojnë në qytet.

Fluturimet u ndaluan në të katër aeroportet që shërbejnë Moskën — Vnukovo, Domodedovo, Sheremetyevo dhe Zhukovsky — për të garantuar sigurinë ajrore, njoftoi agjencia ruse e aviacionit në Telegram. Më pas, Rosaviatsia tha se fluturimet u rifilluan në të katër aeroportet.

Nuk pati asnjë koment të menjëhershëm nga Kievi për sulmin me dronë, por zyrtarët ukrainas më herët kanë thënë se sulme të tilla synojnë objektiva ushtarake dhe infrastrukturë që përdoret për të mbështetur përpjekjet e luftës së Moskës dhe janë një përgjigje ndaj sulmeve të vazhdueshme ruse mbi zonat e banuara dhe infrastrukturën energjetike ukrainase.

Guvernatori i rajonit rus të Kurskut, pranë kufirit me Ukrainën, tha më herët më 5 maj se forcat ukrainase sulmuan një nënstacion energjie në pjesën perëndimore të rajonit.

Guvernatori i Kurskut, Alexander Khinshtein, tha se forcat ukrainase kishin goditur nënstacionin në qytetin Rylsk, rreth 50 kilometra nga kufiri. Sulmi plagosi dy adoleshentë dhe dëmtoi dy transformatorë, tha ai. Dëmtimi ndërpreu furnizimin me energji elektrike në zonë.

“Të dashur banorë, armiku, në agoni, po vazhdon të ndërmarrë sulme ndaj territorit tonë,” shkroi Khinshtein në Telegram.

Irina Krynina u takua me partnerin e saj në Ukrainë pasi udhëtoi nga Rusia, kur mësoi se ai ishte marrë rob. Gruaja ruse vendosi të qëndronte në Ukrainë për të ndihmuar ushtarët e tjerë rusë të kapur që të rivendosin kontaktet me familjet e tyre dhe për të ndihmuar kthimin e të burgosurve nga të dyja palët në atdhe.

Zyrtarët ukrainas nuk komentuan situatën në Kursk, ku Ukraina kreu një inkursion surprizë në gusht 2024, duke shpresuar të ndryshonte momentumin në pushtimin e plotë të Rusisë dhe të tërhiqte forcat ruse nga zona të tjera.

Gjenerali më i lartë i Rusisë tha muajin e kaluar se trupat ukrainase ishin dëbuar nga Kursku, por Kievi nuk e ka pranuar se trupat e tij u dëbuan. Presidenti ukrainas Volodymyr Zelenskyy ka thënë se forcat e Kievit vazhdojnë të veprojnë në Kursk dhe në rajonin fqinj rus të Belgorodit.

Komandanti i Përgjithshëm i Ukrainës, Oleksandr Syrsky, tha në Facebook më 5 maj se operacioni në Kursk “ka arritur shumicën e objektivave të vendosura” dhe se zona tampon e krijuar nga Forcat e Armatosura të Ukrainës “mbetet e rëndësishme”.

Autoritetet lokale në rajonin Sumy u bënë thirrje banorëve të evakuohen nga shtëpitë e tyre në dy qytete pranë kufirit rus Belopolye dhe Vorozhba.

Të gjitha sinjalet e telefonisë celulare do të çaktivizohen në Vatikan të mërkurën, përpara konklavës shumë sekrete për zgjedhjen e Papës së ardhshëm, raportuan mediat shtetërore italiane.

Vatikani planifikon gjithashtu të përdorë bllokues sinjalesh rreth Kapelës Sistine, për të parandaluar çdo mbikëqyrje elektronike apo komunikim jashtë konklavës, ku 133 kardinalë do të votojnë për pasardhësin e Papa Françeskut, i cili do të udhëheqë 1.4 miliardë katolikët e botës, raportoi agjencia italiane e lajmeve ANSA.

Sinjali i telefonisë celulare do të ndërpritet në orën 15:00 sipas orës lokale (09:00 ET) të mërkurën, një orë e gjysmë përpara se kardinalët të nisen drejt Kapelës Sistine për të nisur konklavën papnore, raportoi të hënën transmetuesi shtetëror italian RAI.

Të gjithë 133 kardinalët që do të marrin pjesë në votimin për zgjedhjen e pasardhësit të Françeskut kanë mbërritur tashmë në Romë, konfirmoi Vatikani të hënën.

Prej shekujsh, udhëheqësi i Kishës Katolike zgjidhet në një mbledhje shumë sekrete të njohur si “konklavë” – fjalë që në latinisht do të thotë “me çelës” – që i referohet praktikës historike kur kardinalët mbylleshin derisa të zgjidhnin papën e ri. Procesi që ndjekin kardinalët për zgjedhjen e papës së ardhshëm është i hollësishëm dhe rrënjët e tij datojnë që në Mesjetë.

Kardinalët do të dorëzojnë telefonat dhe të gjitha pajisjet elektronike që nga e marta dhe nuk do t’i marrin sërish deri pas përfundimit të konklavës, tha një zëdhënës i Vatikanit.

Duke nisur nga e mërkura, kardinalët do të mbyllen në Kapelën Sistine, të izoluar plotësisht nga bota e jashtme. Të gjithë do të jenë në një regjim izolimi të rreptë dhe do të betohen për të respektuar “sekret absolut dhe të përhershëm”.

Çaktivizimi i sinjalit nuk do të ndikojë në Sheshin e Shën Pjetrit, ku publiku zakonisht mblidhet, sipas zëdhënësit. Megjithatë, masat e sigurisë janë shtuar në të gjithë sheshin, me pika kontrolli në hyrje dhe instalimin e detektorëve të metaleve dhe sistemeve anti-dronë, raportoi gazeta Corriere della Sera.

Kapela Sistine do të jetë nën një mbyllje totale gjatë konklavës për të garantuar sekretin absolut. Edhe gjatë konklavës së vitit 2013 që zgjodhi Papa Françeskun, u instaluan bllokues sinjalesh për të ndalur çdo thirrje, mesazh apo qasje në internet.

Elektricistët, hidraulikët dhe operatorët e ashensorëve që do të garantojnë funksionimin e Vatikanit gjatë konklavës do të bëjnë gjithashtu një betim për të ruajtur sekretin.

“Të gjithë bëjnë një betim dhe do të jenë në shërbim me kohë të plotë, duke qëndruar gjatë natës në Vatikan, pa asnjë kontakt me familjet e tyre”, thuhet në një deklaratë të Guvernatorit të Shtetit të Qytetit të Vatikanit.