Policia e Kosovës ka njoftuar për disa raste të dhunës në familje të regjistruara në rajone të ndryshme të vendit, ku janë arrestuar disa persona dhe disa ratse po hetohen.

Në autostradën Ferizaj-Prishtinë, një shtetase e Shqipërisë ka pranuar tretman mjekësor pasi është sulmuar fizikisht nga i dashuri i saj pas një mosmarrëveshjeje. I dyshuari është arrestuar nga policia dhe pas intervistimit është liruar në procedurë të rregullt me vendim të prokurorit.

Ngjashëm ka përfunduar edhe një rast në Podujevë, ku një grua ka raportuar se pëson dhunë të vazhdueshme psikike nga bashkëshorti i saj. Policia e ka intervistuar të dyshuarin dhe me urdhër të prokurorit edhe ai është liruar për t’u hetuar në procedurë të rregullt.

Ndërkohë, në Pejë është shënuar një tjetër incident ku një grua është sulmuar fizikisht nga bashkëshorti i saj. Edhe pse në këtë rast nuk është raportuar për të lënduar, pas intervistimit të palëve, prokurori ka vendosur që lënda të vazhdojë në procedurë të rregullt.

Në anën tjetër, dy raste të tjera kanë përfunduar me dërgim në mbajtje. Në Gjilan, policia ka prangosur një person të dyshuar për një rast të dhunës në familje që kishte ndodhur më parë, duke e dërguar atë në qendrën e mbajtjes me vendim të prokurorit.

Ndërsa në Gjakovë, një burrë i cili ndodhej nën ndikimin e alkoolit ka ushtruar dhunë psikike ndaj bashkëshortes së tij, gjë që ka sjellë arrestimin e tij të menjëhershëm dhe dërgimin në mbajtje.

Rina Lipa, motra më e vogël e këngëtares Dua Lipa, ka nisur një bashkëpunim të ri me gjigantin e modës online ASOS, i cili ka publikuar një seri fotografish ku modelja dhe kërcimtarja prezanton kombinime të ndryshme veshjesh.

25-vjeçarja, e cilësuar më parë si një nga “Gen Z It Girls”, vazhdon të tërheqë vëmendjen në botën e modës, ndërsa në kuadër të këtij bashkëpunimi do të mbajë rolin e Drejtoreshës Kreative për Dilemat e Stilit.

Në këtë rol, Rina do t’i ndihmojë ndjekësit të zgjidhin dilemat e përditshme të stilit përmes përmbajtjeve që do të publikohen në TikTok dhe Instagram, duke ofruar ide dhe kombinime të ndryshme mode.

“Drejtoresha jonë e Dilemave të Stilit sapo zbuloi vendin që ka të gjitha përgjigjet. Gardëroba juaj e verës tashmë është gati, e stiluar nga @rinalipa”, thuhet në postimin e ASOS.

Rina pason influenceren irlandeze Olivia O’Neill, e njohur si Out of Office Director e ASOS, e cila ia dorëzon simbolikisht rolin në videon promovuese të bashkëpunimit.

Në fotografitë e publikuara, Rina shfaqet me disa kombinime elegante verore. Në njërën prej tyre ajo vesh një fustan mini me grep në ngjyrë të verdhë, të zbukuruar me thekë argjendi, ndërsa në një tjetër paraqitet me një fustan mini ngjyrë argjendi, të kombinuar me këpucë të zeza dhe flokët e lëshuara.

Në një stil më casual, ajo pozon me një bluzë kafe me lidhje pas qafe, pantallona të shkurtra xhins dhe atlete Nike.

Përzgjedhja e Rinës për këtë rol nuk vjen rastësisht. Revista Tatler e ka cilësuar më parë si një nga emrat më premtues të brezit të ri në modë, ndërsa gjatë karrierës së saj ka modeluar për Red Valentino, ka bashkëpunuar me Nasty Gal dhe së fundmi ka siguruar edhe rolin e saj të parë të rëndësishëm në një film horror./A.K/

Grupi Konsultativ i Projektit është mbledhur për të diskutuar hartimin e Planit të Konservimit dhe Menaxhimit të Integruar të Çarshisë së Madhe në Gjakovë, ku janë prezantuar rezultatet e para të Studimit Preliminar të Strukturës Urbane.

Studimi, i realizuar nga QRTK Gjakovë me mbështetjen e UN-Habitat në Kosovë dhe Ministrisë së Kulturës dhe Turizmit, në bashkëpunim me Komunën e Gjakovës dhe Institutin e Kosovës për Mbrojtjen e Monumenteve (IKMM), analizon katër elemente kryesore: trashëgiminë kulturore, strukturën urbane, shfrytëzimin e tokës dhe rrjetin rrugor.

Bazuar në këto analiza, është prezantuar edhe propozimi fillestar për përcaktimin e kufijve të perimetrit dhe zonës mbrojtëse të Çarshisë së Madhe, i hartuar në përputhje me legjislacionin në fuqi për trashëgiminë kulturore dhe metodologjinë e UNESCO-s për Peizazhin Urban Historik.

Ky proces përfaqëson një hap të rëndësishëm drejt hartimit të një plani të integruar, i cili synon të mbrojë vlerat unike të Çarshisë së Madhe, duke mbështetur njëkohësisht zhvillimin e saj të qëndrueshëm dhe ruajtjen e trashëgimisë kulturore për brezat e ardhshëm.

Gjatë takimit u vlerësua angazhimi i anëtarëve të Grupit Konsultativ, të cilët kontribuuan me diskutime dhe propozime në avancimin e këtij procesi./A.K/

Në Gjilan dyshohet se ka ndodhur një dhunim, sipas raportit 24-orësh të Policisë së Kosovës.

Policia njofton se është duke e trajtuar rastin. Ndërsa, viktima me urdhër të prokurorit është dërguar në QKUK në Prishtinë për ekzaminime më të hollësishme mjekësore. Rasti është nën hetime.

Në raportin e policisë nuk ka më shumë informata nëse ka ndonjë të dyshuar deri më tani.