Një foshnje është dërguar pa shenja jete të martën paradite në Qendrën e Mjekësisë Familjare në Prelluzhë të Obiliqit.

Sipas raportit të Policisë së Kosovës, rasti është regjistruar në Plemetin.

Mjeku kujdestar ka konstatuar vdekjen e foshnjës në vendngjarje, ndërsa me urdhër të prokurorit kompetent trupi i pajetë është dërguar në Institutin e Mjekësisë Ligjore për obduksion.

Policia ka bërë të ditur se rasti është iniciuar si “Hetim mbi vdekjen”.

Një incident ka ndodhur dje në Pejë, ku janë sulmuar katër persona zyrtarë.

Sipas raportit të Policisë, ngjarja ka ndodhur më 18.05.2026 rreth orës 09:47, brenda qendrës korrektuese. Një i burgosur dyshohet se ka sulmuar fizikisht katër zyrtarë dhe i ka kanosur ata.

Si pasojë e sulmit, të katër zyrtarët kanë pësuar lëndime dhe kanë pranuar tretmanin e nevojshëm mjekësor.

Gjatë 24 orëve të fundit në Kosovë janë regjistruar dy raste të dhunës në familje, të cilat kanë ndodhur në Prishtinë dhe Malishevë.

Rasti i parë ka ndodhur në Prishtinë ku është arrestuar një person, pasi dyshohet se ka ushtruar dhunë psikike ndaj gruas me të cilën bashkëjetonte.

Pas intervistimit, me vendim të prokurorit, i dyshuari është liruar dhe rasti do të ndiqet në procedurë të rregullt.

Një person tjetër ne Malishevë ka sulmuar fizikisht një burrë tjetër të familjes, duke i shkaktuar lëndime trupore për të cilat viktima ka pranuar tretman mjekësor.

I dyshuari ndodhet ende në arrati, ndërsa policia po e heton rastin.

Në Policinë e Kosovës është raportuar për zhdukjen e një personi të moshës 31-vjeçare, i cili është larguar në drejtim të panjohur të hënën pasdite në Prishtinë.

Rasti është denoncuar në polici nga babai i tij. Sipas dëshmisë së dhënë nga familjari, ngjarja ka ndodhur në momentin kur ai kishte ndaluar automjetin për të kryer një blerje, duke e lënë djalin brenda në makinë.

Ankuesi ka specifikuar para autoriteteve se 31-vjeçari është me aftësi të kufizuara mendore. Gjatë kohës që babai ndodhej jashtë mjetit, i riu ka dalë nga automjeti dhe nuk është kthyer më.

Njësitë policore menjëherë kanë nisur hetimet për rastin dhe po punojnë intenzivisht për lokalizimin dhe gjetjen e personit të zhdukur.