Aktualitet

Avokati Jashari: Kosova po tregon përkushtim serioz në luftën kundër spiunazhit

Published

6 hours ago

on

Kosova ka nisur edhe luftën kundër spiunazhit, e institucionet e sigurisë tashmë kanë gjetur dhe fakte me të cilat i ngarkon disa persona, mesin e tyre dhe shqiptarë të cilët nuk hezituan të bëjnë argatin e Inteligjencës serbe-BIA.

Avokati Arbër Jashari ka lavdëruar Agjencinë Kosovare të Inteligjencës (AKI), e cila e ka cilësuar veprimtarinë e spiunazhit si krim serioz që cenon rendin kushtetues dhe sigurinë e Kosovës.

“Kosova për vite të tëra ka qenë, si të thuash, një oazë e shërbimeve të huaja, përfshirë edhe atyre që nuk ia duan të mirën këtij vendi. Nga vendet të cilat janë jo miqësore me Republikën e Kosovës, siç është Republika e Serbisë, ku ato kanë operuar pa e parë pasojën ose frikën se mund të zihen, të zbulohen apo dhe të arrestohen, viteve të fundit, sidomos nga viti 2023 e tutje, kemi parë një përkushtim më të madh të institucioneve të sigurisë, siç është Agjencia Kosovare e Inteligjencës dhe strukturat e sigurisë, të cilët kanë arrestuar disa persona; madje ka prej tyre që janë akuzuar nga prokuroria në një procedurë të mëtejshme dhe janë shpallur fajtorë. Kishim rastin ku një zyrtar i lartë, i cili ka punuar më herët në strukturat e shtetit të Kosovës, ka pranuar fajësinë dhe është dënuar nga Gjykata Themelore në Prishtinë. Disa raste janë në pritje e sipër. Kemi rastin e atyre personave në Ferizaj, Bedri Shabani dhe Muharremi Qerimi, për të cilët është ngritur aktakuzë në shkallë të parë dhe tashmë pritet vetëm vendimi i Apelit,” ka deklaruar Jashari.

Jashari ka përmendur edhe rastin e punonjës së OSBE-s, Jelena Gjukanoviq.

“Kemi raste, siç është ish-punëtorja e OSBE-së, të cilëve u është ngritur aktakuzë. Kemi parë një përkushtim të madh të institucioneve të sigurisë së Kosovës në luftimin e spiunazhit. Krejt kjo punë ka rezultuar me arrestime, aktakuza dhe në një rast apo dy ka pasur edhe aktgjykim. Është mirë që organet e Kosovës janë vetëdijesuar dhe kanë arritur në atë nivel që ta luftojnë këtë dukuri, sepse është dukuri e rrezikshme e cila natyrisht i bën dëm shtetit të Kosovës dhe tenton ta luftojë, ta minojë shtetësinë e Kosovës nga brenda. Përderisa të ketë struktura të organizuara të spiunazhit në shtetin e Kosovës, atëherë kjo paraqet një rrezik për sigurinë e këtij shteti”, tha ai.

Më tej ai ka thënë se Kosova ka qenë terren i shërbimeve të huaja, me theks ata që nuk ia duan të mirën Kosovës.

“Tani është koha kur institucionet e Kosovës kanë arritur një pjekuri dhe maturi dhe kanë arritur në një stad dhe në atë nivel që t’i identifikojnë dhe t’i kapin. Ndoshta në të kaluarën ky kriminalitet, sepse spiunazhi është krim, nuk ka qenë shumë prioritet i vetë institucioneve – për arsye që nuk i di. Fakti që ka pasur një mobilizim të madh kohëve të fundit tregon për një qasje të re të institucioneve, krahasuar me të kaluarën. Kemi një luftë më serioze nga ana e organeve të sigurisë kundër spiunëve dhe spiunazhit, i cili është i dëmshëm dhe nuk dyshoj që në të kaluarën, përmes kësaj veprimtarie kriminale të agjenturës, janë bërë shumë dëme shtetit të Kosovës”, shtoi avokati.

Të martën para trupit gjykues në Gjykatën Themelore të Prishtinës ka nisur gjykimi fillestar ndaj  Jelena Gjukanoviqit, e cila po akuzohet për spiunazh nga Prokuroria Speciale. Kjo e fundit, para trupit gjykues, nuk e ka pranuar fajësinë për akuzat që i ngarkohen.

Sipas aktakuzës Gjukanoviq ka kryer veprime të përsëritura që përbëjnë ndihmë aktive për veprimtarinë informative të një shërbimi të huaj, konkretisht të Agjencisë për Inteligjencë dhe Siguri të Republikës së Serbisë (e njohur si BIA), duke i ofruar të dhëna, dokumente dhe informacione të ndjeshme, të siguruara gjatë ushtrimit të detyrës së saj zyrtare në kuadër të aktivitetit të Misionit të OSBE-së, ndihmë kjo e realizuar përmes komunikimeve të shumta me tani të dënuarin për veprën penale të spiunazhit, Agjentit Rezident të BIA-së, Aleksandër Vllaiq.

Kujtojmë se deri më tani veç Gjukanoviqit, në Kosovë për spiunazh te BIA serbe janë arrestuar, Bedri Shabani, Muharrem Qerimi, Aleksandër Vllajiq, Bojan Jevtiq dhe Hysri Selimi./S.K/EO/

Related Topics:
Continue Reading

Aktualitet

Profesoresha e UBT-së, Jeta Kiseri – Kubati, me publikim në revistën ndërkombëtare IJBM

Published

5 hours ago

on

September 17, 2025

By

Prof. Asoc. Dr. Jeta Kiseri – Kubati, profesoreshë në UBT, ka botuar punimin e saj të fundit në revistën shkencore ndërkombëtare International Journal of Biomedicine (IJBM), e indeksuar në Scopus, një prej databazave më prestigjioze shkencore në botë.

Artikulli i titulluar: “Retention Practices of Orthodontists in the Western Balkans”, është rezultat i një bashkëpunimi ndër-rajonal mes UBT-së, Fakultetit të Stomatologjisë në Universitetin e Rijekës dhe Fakultetit të Stomatologjisë në Shkup.

Ky studim origjinal përfshiu një hulumtim të gjerë me mbi 450 ortodontë nga Kroacia, Maqedonia e Veriut dhe Kosova, duke analizuar praktikat dhe protokollet e mbajtjes pas trajtimit ortodontik. Rezultatet zbuluan dallime të rëndësishme mes vendeve sa i përket përdorimit të pajisjeve, ndjekjes së pacientëve dhe faktorëve që ndikojnë në zgjedhjen e metodave të mbajtjes.

Studimi thekson se:

  • Ortodontët në Kosovë i kushtojnë më shumë rëndësi moshës së pacientëve dhe rritjes biologjike,
  • Në Kroaci dhe Maqedoninë e Veriut përzgjedhja bazohet kryesisht në llojin e malokluzionit,
  • Praktikat e kujdesit dhe dhënies së udhëzimeve të shkruara për pacientët ndryshojnë dukshëm mes vendeve.

Ky publikim jo vetëm që pasuron literaturën shkencore ndërkombëtare në fushën e ortodonciës, por gjithashtu nënvizon rëndësinë e bashkëpunimit akademik rajonal dhe potencialin që ka UBT për të kontribuar në shkencë dhe inovacion.

Për më shumë, punimi është publikuar më 5 shtator 2025 dhe mund të lexohet në linkun zyrtar: Retention Practices of Orthodontists in the Western Balkans – IJBM

Continue Reading

Aktualitet

​Tërmet në Shqipëri

Published

5 hours ago

on

September 17, 2025

By

Një tërmet me magnitudë 3.0 të shkallës Rihter është regjistruar pasditën e djeshme në Shqipëri.

Sipas Qendrës Europiane dhe Mesdhetare të Sizmiologjisë (EMSC), lëkundjet u ndjenë rreth orës 17:26, me epiqendër 19 kilometra në jug të Tiranës dhe në një thellësi prej 10.7 kilometrash.

Tërmeti është ndjerë lehtë në disa zona përreth, por fatmirësisht nuk raportohet për dëme materiale apo të lënduar./S.K/KP/

Continue Reading

Aktualitet

​KFOR: Situata në Kosovë e qëndrueshme, por me rrezik eskalimi

Published

5 hours ago

on

September 17, 2025

By

Komandanti i Forcës së NATO-s në Kosovë (KFOR), Gjenerallejtënant Enrico Barduani ka deklaruar se situata në Kosovë është e qëndrueshme, por mbetet e me rreziqe të eskalimit të menjëhershëm, për shkak të një sërë çështjesh të pazgjidhura.

Barduani i bëri këto komente gjatë raportimit të shkurtër për përfundimin e misionit para Komitetit Ushtarak të NATO-s dhe Këshillit të Atlantikut të Veriut, të dyja në formatin e KFOR-it, në Shtabin e NATO-s në Bruksel.

Gjenerallejtënant Barduani ndau vlerësimin e tij mbi situatën e sigurisë, si dhe informacionet më të fundit mbi aktivitetet e KFOR-it dhe drejtimin e përgjithshëm të misionit.

Ai theksoi se situata në Kosovë është e qëndrueshme, por mbetet e nënshtruar ndaj rreziqeve të eskalimit të menjëhershëm, për shkak të një sërë çështjesh të pazgjidhura.

Barduani ka shtuar se pavarësisht sfidave në terren, KFOR ka ndihmuar për të mbajtur stabilitetin dhe për të shmangur situatat që mund të kishin çuar në incidente ose shpërthime të paqëndrueshmërisë, dhe duke kontribuar “në ruajtjen e një kornize sigurie që mund të mbështesë përpjekjet diplomatike të rëndësishme në vazhdim”.

Ai shtoi forcimin e misionit të KFOR-it, përfshirë përmes vendosjes së përkohshme të forcave rezervë, mbajtjen e një posture fleksibel dhe të shkathtë në terren, përmes patrullimeve të rregullta, angazhimeve me komunitetet lokale dhe aktiviteteve trajnimi si dhe thellimin e bashkëpunimit me partnerët kryesorë komunitetin ndërkombëtar, organizatat e sigurisë së Kosovës dhe Forcat e Armatosura Serbe.

Duke theksuar mbështetjen e vazhdueshme të NATO-s dhe KFOR-it ndaj dialogut të lehtësuar nga BE-ja për normalizimin e marrëdhënieve midis Beogradit dhe Prishtinës, Gjenerallejtënant Barduani vuri në dukje se: “KFOR ka treguar edhe një herë se është i gatshëm dhe i aftë të luajë rolin e tij dhe të përshtatë sipas nevojës, pasi rruga drejt sigurisë së qëndrueshme në Kosovë nuk është ushtarake por është politike.

Në Bruksel, Barduani gjithashtu u takua me kryetarin e Komitetit Ushtarak të Bashkimit Evropian (CEUMC), Gjeneral Sean Clancy, me të cilin mori në shqyrtim fushat e ndryshme të bashkëpunimit të KFOR-it me EULEX-in dhe me Operacionin Althea EUFOR në Bosnje dhe Hercegovinë./S.K/KP/

Continue Reading

Aktualitet

​Gjykata Evropiane e Auditorëve: Ndihma tregtare e BE-së për vendet më të varfra nuk arrin objektivin

Published

5 hours ago

on

September 17, 2025

By

Sipas një raporti të ri nga Gjykata Evropiane e Auditorëve, Bashkimi Evropian nuk ka gjasa të arrijë qëllimin e saj për të drejtuar 25% të fondeve të Ndihmës për Tregtinë drejt vendeve më pak të zhvilluara deri në vitin 2030.

Ndërsa strategjia përkatëse e BE-së u përditësua në vitin 2017 në mënyrë që të adresonte më mirë nevojat e këtyre vendeve, objektivi i financimit nuk u përkthye kurrë në një plan veprimi operativ, duke rezultuar në vështirësi për BE-në dhe shtetet e saj anëtare në aspektin e përparimit kolektiv drejt tij.

Shkalla e financimit në fakt ka rënë kohët e fundit në vend që të rritet.

“Në vendet në zhvillim, tregtia dhe veçanërisht tregtia ndërkufitare  është e rëndësishme për rritjen, e cila mund të nxjerrë miliona njerëz nga varfëria. Megjithatë, vendet më pak të zhvilluara përballen me sfida të rëndësishme që ndikojnë në aksesin e tyre në tregtinë rajonale dhe globale. Këto mund të përfshijnë mungesën e kapacitetit prodhues, barrierat tregtare në aspektin e praktikave rregullatore, administrative dhe qeverisëse, mjediset e dobëta të biznesit, infrastrukturën e dobët, mungesën e një sistemi të shëndoshë për standardizimin dhe certifikimin e eksporteve, një kornizë të dobët institucionale dhe akses shumë të vështirë dhe të kushtueshëm në financim për sektorin privat”, thuhet në njoftimin e Gjykatës Evropiane të Auditorëve.

Sipas këtij njoftimi, Programi i Ndihmës për Tregtinë i BE-së vepron në një mjedis kompleks që përfshin shumë palë të interesuara. Zbatimi i koordinuar në të gjitha nivelet dhe pronësia e fortë nga vendi partner janë, pra, jetike për suksesin.

“Është shumë e pamundur që BE-ja të arrijë objektivin e saj të financimit prej 25% deri në vitin 2030”, tha Bettina Jakobsen, anëtarja e ECA-s përgjegjëse për auditimin.

Midis viteve 2017 dhe 2022, BE-ja dhe shtetet e saj anëtare ndanë 17.2 miliardë euro përmes programit Ndihmë për Tregtinë për vendet më pak të zhvilluara – vetëm një pjesë e vogël e 105.8 miliardë eurove të dërguara në vendet e tjera në zhvillim.

Pjesa e tyre në fakt ra nga 18% (2010-2015) në vetëm 12% në vitin 2022. Auditorët zbuluan se Komisioni Evropian nuk ka kryer ndonjë analizë të detajuar të arsyeve për këtë rënie të pjesës së vendeve më pak të zhvilluara, edhe pse një analizë e tillë do të bënte të mundur planifikimin e masave korrigjuese./S.K/EO/

 

Continue Reading

Të kërkuara