Polemikat rreth pezullimit të dënimit të sulmuesit amerikan, Folarin Balogun, kanë marrë një kthesë dramatike. Mediat më të fuqishme botërore, duke u bazuar në një hulumtim të “The Times”, kanë zbuluar se vendimi për të lejuar Balogunin të luante ndaj Belgjikës – ndonëse në ndeshjen paraprake u ndëshkua me karton të kuq direkt – u mor ekskluzivisht nga kryetari i Komisionit Disiplinor të FIFA-s, Mohammad Al-Kamali, pa përfshirjen e 17 anëtarëve të tjerë të komisionit. Ky zbulim ka goditur rëndë integritetin e procesit disiplinor të FIFA-s, pasi rregullorja përcakton se kartoni i kuq sjell mungesë automatike në ndeshjen pasuese.

Balogun u ndëshkua me të kuq në ndeshjen ndaj Bosnjë-Hercegovinës dhe duhej të mungonte në fazën nokaut të Botërorit kundër Belgjikës. Megjithatë, Al-Kamali e ktheu pezullimin në dënim me kusht për një vit. Ky vendim skandaloz erdhi menjëherë pasi presidenti i SHBA-së, Donald Trump, i kërkoi personalisht kreut të FIFA-s, Gianni Infantino, rishikimin e rastit. Ndonëse SHBA-ja u eliminua duke humbur 4:1 nga Belgjika (me Balogunin në fushë), rasti mbetet një nga pikat më të errëta të turneut. Trump e mbrojti ndërhyrjen e tij duke thënë se thjesht kërkoi rishikim pasi nuk i u duk faul, ndërsa arbitrin brazilian të ndeshjes e quajti “pak të dyshimtë”.

Në anën tjetër, Infantino ka mohuar çdo ndikim, duke insistuar se organet gjyqësore të FIFA-s janë të pavarura dhe autonome. Megjithatë, dyshimet janë shtuar pasi “Fox Sports” raportoi se nga më shumë se 100 raste të ngjashme ku vendimet merren nga një anëtar i vetëm (zakonisht zëvendëskryetari Jorge Palacio), kjo ishte hera e parë që Al-Kamali veproi si vendimmarrës i vetëm. Ky veprim ka nxitur reagime të ashpra nga UEFA dhe personalitete të shumta të futbollit, ndërsa vetë FIFA ka refuzuar të publikojë arsyet zyrtare të këtij ndryshimi, duke shtuar edhe më tej dyshimet për favorizim politik. /D.L/

Edicioni i 17-të i Festivalit Ndërkombëtar të Animacionit Anibar nis zyrtarisht sot në Pejë, duke e shndërruar qytetin në një pikë takimi për artin, animacionin dhe kreativitetin nga data 12 deri më 18 korrik.

Për shtatë ditë me radhë, publiku do të ketë mundësi të ndjekë një program të pasur me filma të animuar, ekspozita, punëtori, diskutime dhe muzikë live, duke sjellë në Kosovë artistë, regjisorë dhe dashamirës të animacionit nga e gjithë bota.

Ceremonia e hapjes do të moderohet nga Hana Blakqorri, e njohur si Hana e Chart, ndërsa mbrëmja e parë do të sjellë edhe shfaqjen e tre filmave të përzgjedhur.

Një nga ekspozitat kryesore të festivalit është “Postera për Palestinën”, e cila do të hapet në Kinemanë “Jusuf Gërvalla”. Ekspozita bashkon punime nga artistë ndërkombëtarë si një thirrje për drejtësi dhe solidaritet, ndërsa fondet nga shitja e posterave do t’u dedikohen artistëve që punojnë në rrethana të vështira në Palestinë.

Në kuadër të festivalit do të zhvillohen edhe biseda me krijues filmash përmes programit “Kafe, raki dhe biseda: me krijuesit e filmave”, ku publiku do të ketë mundësi të njihet më afër me proceset krijuese pas animacionit.

Këtë vit, Anibar sjell një program të veçantë nga SWISS FILMS, me një përzgjedhje të filmave të shkurtër të animuar bashkëkohorë zviceranë, si dhe programin Helium Films, i cili prezanton mbi dy dekada krijimtari të kompanisë zvicerane të animacionit të themeluar nga Claude Barras dhe Cédric Louis.

Edicioni i sivjetmë sjell edhe tre filma të metrazhit të gjatë, përfshirë “Arco”, “Wanted 18” dhe “Savages”, duke prezantuar larminë dhe zhvillimet më të fundit të kinemasë së animuar.

Përveç filmave, festivali ofron edhe punëtori për kritikë filmi dhe krijimtari praktike, ndërsa mbrëmjet do të vazhdojnë me After Parties, ku skena muzikore do të dominohet nga artistë vendas.

Programi muzikor i këtij viti përfshin emra të njohur të skenës kosovare, si Gillespie, Uran B, Era M, Florent V, P.I.N.T me MC Kreshën dhe Lyrical Son, si dhe artistët nga Peja Nart K dhe Darin K.

Anibar edhe këtë vit mbetet një hapësirë ku animacioni lidhet me komunitetin, duke sjellë histori jo vetëm në ekran, por edhe përmes diskutimeve, bashkëpunimeve dhe përvojave të përbashkëta.

Programin e plotë të festivalit dhe përditësimet mund t’i ndiqni në uebfaqen dhe rrjetet sociale zyrtare të Anibar./A.K/

Një shtetas i huaj është arrestuar të dielën në pikën kufitare në Stanqiq, pasi kërkohej për dhunë dhe kërcënime ndaj përfaqësuesve të lartë të Republikës së Kosovës.

Arrestimi i tij u bë mbi bazën e një urdhërarresti të lëshuar nga Departamenti Special i Gjykatës Themelore në Prishtinë. Sipas policisë, i dyshuari e kishte kryer këtë vepër penale përmes një postimi në rrjete sociale në tetor të vitit të kaluar.

Me vendim të prokurorit, ai është dërguar në mbajtje. /E.A/

Reperi i famshëm amerikan, Kanye West, ka thyer heshtjen pas performancës së tij në kryeqytetin shqiptar, duke shprehur një mirënjohje të veçantë për kryeministrin Edi Rama dhe mbarë Shqipërinë. Përmes një postimi në platformën “X”, artisti ndau vlerësimet e tij të larta duke shkruar: “Faleminderit Edi Rama dhe gjithë Shqipërisë që ndërtuat një stadium dhe më mirëpritët në vendin tuaj të bukur”.

Koncerti i tij në Tiranë u përcoll me një interes jashtëzakonisht të madh nga publiku dhe shkaktoi një jehonë të gjerë në rrjetet sociale, duke u cilësuar si një nga ngjarjet më të rëndësishme muzikore të organizuara ndonjëherë në vend, me pjesëmarrjen e mijëra spektatorëve.

Ky reagim i ngrohtë i yllit botëror vjen pas një vale kritikash që rrethuan organizimin e këtij eventi, ndaj të cilave kishte reaguar më herët edhe vetë kreu i qeverisë.

Kryeministri Rama e kishte mbrojtur projektin duke theksuar se sjellja e emrave të tillë ndihmon direkt në promovimin ndërkombëtar të Shqipërisë dhe sjell përfitime të mëdha ekonomike për sektorë të ndryshëm.

Përmes mesazhit të tij, Kanye West jo vetëm që vlerësoi mikpritjen dhe organizimin e eventit, por e vulosi imazhin e Shqipërisë si një destinacion të bukur dhe të hapur për ngjarje të përmasave të tilla.