Presidentja e Komisionit Evropian, Ursula von der Leyen, u ka bërë thirrje autoriteteve hungareze për ta lejuar mbajtjen e Paradës së Krenarisë në Budapest, pasi policia e ndaloi zhvillimin e saj.

Në një reagim në platformën X, kryeministri i Hungarisë, Viktor Orban, tha se Komisioni Evropian duhet të përmbahet nga ndërhyrjet në çështjet e zbatimit të ligjit në vendet anëtare të bllokut, “ku nuk ka asnjë rol për të luajtur”.

Policia hungareze ndaloi javën e kaluar marshimin e caktuar për të shtunën nga komuniteti LGBTQ, duke u thirrur mbi një ligj të miratuar në mars, i cili thotë se mbrojtja e fëmijëve duhet të ketë përparësi ndaj të drejtës për tubim.

Megjithatë, kryetari liberal i Budapestit dhe organizatorët e aktivitetit deklaruan se marshimi do të zhvillohej pavarësisht ndalimit, pasi ai cilësohet si aktivitet komunal dhe nuk ka nevojë për leje nga autoritetet qendrore.

“U bëj thirrje autoriteteve hungareze për ta lejuar zhvillimin e Paradës së Krenarisë në Budapest pa frikë nga ndonjë sanksion penal apo administrativ ndaj organizatorëve apo pjesëmarrësve”, tha von der Leyen në një video të postuar në X të mërkurën në mbrëmje.

“Në Evropë, të marshosh për të drejtat e tua është liri themelore”, shtoi ajo.

I pyetur nëse policia mund ta shpërndajë me forcë marshimin të shtunën, Orban tha të enjten në Bruksel se Hungaria është “vend i civilizuar, nuk e lëndojmë njëri-tjetrin”.

Kritikët e shohin ndalimin e Paradës si pjesë e një goditjeje më të gjerë ndaj lirive demokratike para zgjedhjeve të përgjithshme të vitit të ardhshëm, ku nacionalisti Orban do të përballet me një kundërshtar të fortë opozitar.

Orban, që është në pushtet nga viti 2010, e paraqet veten si mbrojtës të vlerave familjare dhe në shkurt tha se organizatorët as nuk duhet të përpiqen të mbajnë Paradë Krenarie në Budapest këtë vit.

Të martën, ministri hungarez i Drejtësisë ia dërgoi një letër disa ambasadave të huaja, duke i njoftuar se Parada e Krenarisë është “tubim i ndaluar ligjërisht, organizimi dhe shpallja e të cilit përbën vepër penale të dënueshme me burg deri në një vit, sipas ligjit hungarez”.

Ministri Bence Tuzson e dërgoi letrën një ditë pasi diplomatët nga Britania, Franca, Gjermania dhe 30 vende të tjera shprehën mbështetje për komunitetin LGBTQ të Hungarisë dhe Paradën e Krenarisë në Budapest./REL

Prokurori i lartë i Gjermanisë paraqiti të mërkurën një urdhër të ri arresti bazuar në akuzat për terrorizëm për një burrë sirian i cili goditi me thikë dhe plagosi rëndë katër burra jashtë një restoranti në qytetin perëndimor të Bielefeldit muajin e kaluar.

Zyra e prokurorit federal tha në një deklaratë se i akuzuari, i cili është identifikuar vetëm si Mahmoud M. në përputhje me rregullat gjermane të privatësisë, “dyshohet urgjentisht për anëtarësim në një organizatë terroriste të huaj, tentativë vrasjeje dhe dëmtim të rrezikshëm trupor”.

I pandehuri dyshohet se sulmoi disa persona me thikë jashtë një restoranti në qendër të Bielefeldit më 18 maj.

Katër burra u plagosën rëndë në sulmin e mëngjesit të hershëm. Prokurorët pretendojnë se i dyshuari ndjek një ideologji islamiste-xhihadiste. Ai dyshohet se iu bashkua të ashtuquajturit grup Shteti Islamik në Siri në dhjetor 2014 në qytetin e Rakas, thanë ata.

Pasi hyri në Gjermani, prokurorët thanë se i akuzuari vendosi të vriste sa më shumë njerëz të zgjedhur rastësisht në Gjermani.

Ai e bëri këtë “në emër të një ‘lufte të shenjtë’ globale dhe në emër të Shtetit Islamik”, shtuan ata.

“Për këtë qëllim, në mëngjesin e hershëm të 18 majit 2025, ai i goditi me thikë mysafirët përpara një restoranti në Bielefeld, duke plagosur rëndë katër persona”, thanë prokurorët.

Urdhër-arresti i paraqitur rishtazi zëvendëson një të lëshuar nga një gjykatë e Bielefeldit më 20 maj, i cili ishte marrë nga zyra e prokurorit publik lokal.

Mahmoud M. u arrestua më 19 maj dhe që atëherë ndodhet në paraburgim.

Më 20 maj, zyra e prokurorit federal mori përsipër hetimin.

Ndër të tjera, zyra e prokurorit federal do të marrë përsipër çështjet që lidhen me terrorizmin nga prokurorët vendas në Gjermani.

Ministri i Mbrojtjes i Iranit ka udhëtuar drejt aleatit diplomatik dhe ekonomik, Kinës, në udhëtimin e tij të parë jashtë vendit që nga përplasja 12-ditore me Izraelin, e cila për pak kohë i futi SHBA-të në një konflikt të ri rajonal.

Aziz Nasirzadeh është një nga nëntë ministrat e mbrojtjes që media shtetërore kineze thotë se morën pjesë në një takim të Organizatës së Bashkëpunimit të Shangait (SCO) , një grupim rajonal sigurie i udhëhequr nga Kina dhe Rusia, i cili është bërë gjithnjë e më i rëndësishëm, ndërsa Pekini dhe Moska kërkojnë të ndërtojnë blloqe ndërkombëtare alternative ndaj atyre të mbështetura nga Shtetet e Bashkuara.

Takimi dy-ditor filloi të mërkurën në qytetin bregdetar kinez të Qingdaos, një ditë pasi një armëpushim midis Iranit dhe Izraelit shuajti ato që kishin qenë ditë të tëra sulmesh ajrore midis të dyjave, të ndërprera nga një sulm amerikan ndaj tre objekteve bërthamore iraniane.

Mbledhja e SCO-së përkoi me një takim të udhëheqësve të NATO-s në Hagë, ku Presidenti i SHBA-së Donald Trump tha se SHBA-të do të takohen me Iranin “javën e ardhshme” në lidhje me një marrëveshje të mundshme bërthamore.

Takimi i Pekinit, pjesë e ngjarjeve për kryesimin e saj të rradhës të SCO-së, nxori në pah rolin e Kinës si një lojtare kyçe ndërkombëtare, edhe pse ajo mbeti kryesisht në periferi të konfliktit Izrael-Iran – dhe rëndësinë që Teherani i kushton marrëdhënies së tij me Pekinin

Irani ka rihapur pjesërisht hapësirën e tij ajrore për fluturime në lindje dhe juglindje të vendit, transmeton Anadolu.

Sipas televizionit shtetëror iranian, zëdhënësi i Ministrisë së Rrugëve dhe Urbanizimit, Majid Akhavan bëri një deklaratë mbi këtë çështje.

Akhavan deklaroi se rajonet lindore dhe juglindore të vendit janë hapur për fluturime me miratimin e institucioneve përkatëse në mënyrë që fluturimet të kthehen gradualisht në normalitet dhe të sigurohet plotësisht siguria e fluturimeve.

Ai tha se rajoni është hapur për fluturime transiti kombëtar dhe ndërkombëtar. Akhavan vuri në dukje se fluturimet kanë filluar në aeroportet Bojnord, Sebzvar, Mashhad, Birjand, Zabul, Zahedan, Seravan, Chabahar, Iranshahr, Gonabad, Jiroft, Cask dhe Sarakhs.

Gjithashtu Akhavan tha se të gjitha aeroportet në veri, jug dhe perëndim të vendit, përfshirë aeroportet “Imam Khomeini” dhe “Mehrabad” të Teheranit, janë të mbyllura për fluturime deri në njoftim të mëtejshëm.