Honor ka zbuluar një funksion të ri që pritet të jetë revolucionar për përdoruesit e telefonave të saj. Me serinë e re Honor 400 dhe Honor 400 Pro, kompania po sjellë një veçori që për herë të parë e shndërron një foto të zakonshme në një video të gjeneruar nga inteligjenca artificiale.

Funksioni quhet “Foto në Video” dhe është zhvilluar në bashkëpunim me Google Cloud.

Ai do të jetë i integruar direkt në aplikacionin “Gallery”, ku përdoruesit do të shohin një opsion të ri në krye të ekranit me emrin “AI Image to Video”.

Ky funksion mundëson që fotografitë e vjetra të marrin jetë, duke i kthyer ato në video të shkurtra që rikrijojnë momentin e kapur. Kjo është hera e parë që një funksion i tillë ofrohet pa nevojë për aplikacione të jashtme.

Honor synon që me këtë teknologji, seria 400 të jetë telefoni më i mirë me kamera AI në segmentin e vet të çmimit.

Prezantimi zyrtar i pajisjeve do të bëhet më 22 maj në një ngjarje në Londër, ku do të zbulohen të dy modelet: Honor 400 dhe Honor 400 Pro. Gjithashtu, kompania nuk e ka përjashtuar mundësinë që ky funksion të vijë edhe në pajisjet flagship si Magic7 Pro dhe Magic V3 në të ardhmen.

Grand Theft Auto 6, një nga lojërat më të pritura, nuk do të dalë këtë vit siç ishte planifikuar fillimisht. Rockstar Games ka konfirmuar se loja publikohet në maj të vitit 2026, duke theksuar se nevojitet më shumë kohë për të arritur cilësinë që fansat presin dhe meritojnë.

Pritet të jetë një nga lansimet më të mëdha në historinë e industrisë së lojërave.

GTA 5, seria e fundit që doli më 2013, është fenomen global. Me më shumë se 185 milionë kopje të shitura, renditet si loja e dytë më e shitur e të gjitha kohërave e vazhdon të jetë e luajtur në versionin online.

Prezantimi i parë zyrtar i GTA 6 erdhi në dhjetor 2023 me trailer 90-sekondësh, që u bë viral e kaloi 100 milionë shikime në pak ditë.

Videoja zbuloi dy personazhe kryesorë dhe qytetin e ri të lojës – Leonida – një vend fiktiv i frymëzuar nga Florida.

Në deklaratë, Rockstar ka thënë se ishte “thellësisht e prekur” nga reagimi i fansave dhe theksoi se po punon për ta bërë lojën sa më të përsosur.

Rockstar njihet për procesin e zhvillimit, nuk është hera e parë që shtyn publikimin e një loje të madhe, njësoj ndodhi dhe me “Red Dead Redemption 2” në vitin 2018, por kompania është e njohur për cilësinë e jashtëzakonshme të lojërave.

Straus Zelnick, shefi i Take-Two Interactive, ka deklaruar se çdo projekt i ri i Rockstar “duhet të jetë që se keni përjetuar kurrë më parë”.

Mark Zuckerberg tha se themeluesit dhe sipërmarrësit e sotëm duhet të përfitojnë nga teknologjia që ai nuk mundi kur ndërtonte Facebook dy dekada më parë.

“Nëse do të fillonit çfarëdo që po filloni 20 vjet më parë, do të duhej të kishit ndërtuar të gjitha këto gjëra të ndryshme brenda kompanisë suaj, dhe tani ka platforma të shkëlqyera për ta bërë këtë”, ka thënë CEO i Meta në një konferencë këtë javë, përcjell Telegrafi.

Zuckerberg thotë se përdorimi i teknologjive si IA mund t’i ndihmojë themeluesit e sotëm “të përqendrohen në idenë kryesore” të një kompanie.

“Mendoj se kjo do të çojë në gjëra me cilësi shumë më të mirë që krijohen në të gjithë botën, sepse tani po jeni në gjendje të keni këto, si, ekipe shumë të vogla me talente që janë, si, të apasionuara pas një ideje”, tha Zuckerberg.

“Ndoshta në vitin 2025, ne në Meta, si dhe kompanitë e tjera që në thelb po punojnë në këtë, do të kemi një IA që mund të jetë në mënyrë efektive një lloj inxhinieri i nivelit të mesëm që keni në kompaninë tuaj që mund të shkruajë kod”, ka thënë ai.