Në përvjetorin e tretë të nisjes së pushtimit rus në Ukrainë, liderët e lartë politikë në Mbretërinë e Bashkuar kanë rikonfirmuar mbështetjen e tyre ndaj Kievit.

Kryeministri, Sir Keir Starmer, deklaroi se Mbretëria e Bashkuar do të vazhdojë të qëndrojë përkrah Ukrainës për ta ndihmuar në përpjekjet e saj për një paqe të drejtë dhe të qëndrueshme.

Përmes një postimi në rrjetet sociale, ai e përfundoi mesazhin e tij me fjalët “Slava Ukraini” (Lavdi Ukrainës), duke treguar mbështetjen e tij të qartë ndaj popullit ukrainas.

“Tre vjet pas pushtimit barbar në shkallë të plotë të Putinit në Ukrainë, ne përballemi me një moment kërcënimi për sigurinë dhe vlerat tona kolektive. Ne vazhdojmë të qëndrojmë me Ukrainën për një paqe të drejtë dhe të qëndrueshme. Slava Ukraina”, shkroi Starmer.

Nga ana tjetër, Kemi Badenoch, udhëheqësja e opozitës, theksoi unitetin politik në Britani përballë kësaj lufte, duke shtuar se parlamenti britanik ka qëndruar i bashkuar në vendosmërinë për të mbështetur Ukrainën.

Ndërkohë, ish-kryeministri Boris Johnson përshëndeti “heroizmin e vazhdueshëm të popullit ukrainas”, duke theksuar qëndrimin e tij kundër “të pavërtetave të çuditshme” që qarkullojnë mbi origjinën e luftës – një referencë e dukshme ndaj deklaratave të fundit të Donald Trump.

Mbështetja e Mbretërisë së Bashkuar për Ukrainën mbetet e palëkundur, ndërsa liderët britanikë bëjnë thirrje për forcimin e përpjekjeve ndërkombëtare për të garantuar stabilitetin në Evropë.

Shefja e politikës së jashtme të BE-së, Kaja Kallas, tha se çdo negociatë në lidhje me Ukrainën duhet të përfshijë Kievin dhe liderët evropianë, duke paralajmëruar se “asnjë marrëveshje pa Ukrainën dhe Evropën nuk mund të funksionojë”.

Duke folur para takimit të ministrave të Jashtëm të BE-së në Bruksel, Kallas hodhi poshtë nocionin se diskutimet midis Rusisë dhe palëve të tjera mund të përcaktojnë të ardhmen e Ukrainës pa përfshirjen e saj.

“Mund të diskutoni çfarë të doni me Putinin, por nëse bëhet fjalë për Evropën ose Ukrainën, atëherë Ukraina dhe Evropa gjithashtu duhet të bien dakord për këtë marrëveshje“, tha ajo.

Kallas theksoi gjithashtu shqetësimet për ndikimin rus në SHBA pas rizgjedhjes së Trumpit si president.

“Nëse shikoni mesazhet që vijnë nga Shtetet e Bashkuara, atëherë është e qartë se narrativa ruse përfaqësohet shumë fuqishëm“, vuri në dukje ajo, duke shtuar se ishte vendimtare për Evropën që të ruante unitetin në marrëdhëniet e saj me Washingtonin.

Sa i përket ndihmës ushtarake, Kallas ritheksoi angazhimin e BE-së për të mbështetur Ukrainën, duke thënë: “Nëse Ukraina qëndron e palëkundur, atëherë çdo plan pa Ukrainën apo Evropën thjesht nuk do të funksionojë”.

Ajo theksoi gjithashtu diskutimet mbi një Iniciativë të re të Mbrojtjes për t’i ofruar Ukrainës municione dhe pajisje ushtarake në afat të shkurtër.

Teksa lufta Moskë-Kiev vazhdon, Kallas paralajmëroi se “deri më tani, Putini dhe Rusia nuk duan paqe”, gjë që sipas saj, i bën diskutimet mbi sigurinë evropiane dhe mbrojtjen e Ukrainës edhe më urgjente.

Kancelari i ardhshëm i Gjermanisë, Friedrich Merz, nuk priti rezultatet përfundimtare të zgjedhjeve për të shpallur një epokë të re në Evropë. Në një deklaratë të fortë, ai vuri në dyshim të ardhmen e NATO-s dhe bëri thirrje për forcimin urgjent të mbrojtjes evropiane, duke sugjeruar se Europa duhet të bëhet më e pavarur nga SHBA.

Merz, i njohur si një mbështetës i zjarrtë i marrëdhënieve të ngushta me SHBA-në, befasoi shumë me tonin e tij të ashpër. Ai tha se administrata e Donald Trump nuk po tregon më kujdes për Evropën, duke e vënë në dyshim qëndrueshmërinë e aleancës transatlantike.

“Pas deklaratave të Donald Trump javën e kaluar, është e qartë se kjo administratë nuk shqetësohet më për fatin e Evropës,” tha Merz gjatë një debati pas zgjedhjeve të dielën. “Prioriteti im absolut do të jetë forcimi i Evropës, në mënyrë që të mund të arrijmë pavarësinë nga SHBA hap pas hapi.”

Ai madje sugjeroi se NATO, në formën e saj aktuale, mund të mos ekzistojë më në të ardhmen, duke nënkuptuar nevojën për një mbrojtje të pavarur evropiane.

Gjermania ka qenë tradicionalisht e kujdesshme në çështjet e sigurisë dhe mbrojtjes, por pas pushtimit të Ukrainës nga Rusia, ajo është bërë donatori i dytë më i madh i ndihmës ushtarake për Kievin, pas SHBA-së. Merz ka theksuar se mbështetja për Ukrainën do të vazhdojë, por u shpreh i rezervuar për dërgimin e trupave gjermane në Ukrainë.

Ndërkohë, ai ka sugjeruar që Gjermania të mbështetet te Franca dhe Britania për të krijuar një “ombrellë bërthamore evropiane” që do të zëvendësonte garancitë bërthamore amerikane – një ide që paraqet sfida të mëdha politike dhe strategjike.

Gjermanët ndihen më të pasigurt se kurrë më parë, veçanërisht përballë kërcënimit rus dhe pasigurive për të ardhmen e trupave amerikane të stacionuara në Gjermani. Aktualisht, rreth 35,000 trupa amerikane ndodhen në vend, duke shërbyer si një garanci sigurie për Evropën.

Por me ekonominë e Gjermanisë në një fazë të vështirë dhe nevojën për të gjetur konsensus me partnerët e koalicionit dhe aleatët evropianë, Merz përballet me sfida të mëdha për të realizuar vizionin e tij për një Evropë më të fortë dhe të pavarur në mbrojtje.

Zgjedhjet e fundit në Gjermani mund të sjellin një lidership më të fortë në Evropë, por mbetet për t’u parë nëse vendet e tjera evropiane janë të gatshme ta ndjekin këtë qasje dhe të pranojnë një rol më të madh të Gjermanisë në çështjet e mbrojtjes dhe sigurisë.