Rektori i UBT-së, Prof. Dr. Edmond Hajrizi, së bashku me Prof. Dr. Besnik Qehaja dhe anëtarë të tjerë të stafit akademik, kanë marrë pjesë në Konferencën Vjetore Shkencore të Universitetit Teknik të Sofjes, e cila u mbajt në qytetin Plovdiv në Bullgari.

Kjo ngjarje u zhvillua në kuadër të projektit strategjik “Përmirësimi i Kapaciteteve Kërkimore dhe Cilësisë për Njohje Ndërkombëtare dhe Qëndrueshmëri të TU–Sofia”, pjesë e Programit Kombëtar për Rimëkëmbje dhe Qëndrueshmëri të Bullgarisë, që synon ndërtimin e një rrjeti të institucioneve të arsimit të lartë kërkimor në Bullgari dhe më gjerë e mbështetur edhe nga Komisioni Evropian.

Pjesëmarrja e delegacionit të UBT-së u realizua në kuadër të programit “Research Fellowship Programme”, ku Rektori Hajrizi dhe Prof. Qehaja prezantuan punimet e tyre shkencore, në bashkëpunim me studiues të njohur ndërkombëtarë si Galia Marinova, Vasil Gulashki, Elton Boshnjaku dhe Behar Haxhismajli.

Që nga fillimi i programit në shkurt të këtij viti me Institutin për Kërkime Shkencore në Universitetin Teknik të Sofjes, stafi i UBT-së ka realizuar dy publikime shkencore të indeksuara ndërkombëtarisht, si dhe një kapitull libri në fushën e rrjeteve inteligjente energjetike (Smart Grid), Internetit të Gjërave (IoT) dhe Inteligjencës Artificiale – fusha këto me rëndësi strategjike për zhvillimin e teknologjive të avancuara dhe transformimin digjital.

Gjatë katër ditëve të konferencës, morën pjesë mbi 30 grupe kërkimore me rreth 200 shkencëtarë nga e gjithë bota, përfshirë studiues nga Italia, Portugalia, Rumania, India, Kolumbia, Franca, Irani, Finlanda, Jordania dhe Kongo. Në këtë kuadër, grupi kërkimor nga UBT spikati me rezultatet e arritura në një kohë shumë të shkurtër, por edhe me prezantime cilësore dhe relevante, të cilat u vlerësuan në mesin e punimeve më të avancuara ndërkombëtare.

Rektori Edmond Hajrizi, në prezantimin e tij, theksoi rolin dhe mundësitë infrastrukturore që po i ofron UBT Smart City për të zhvilluar hulumtime, teknologji dhe inovacione që ka UBT në rreth 150 fusha të jetës, duke e mbështetur ndërdisiplinaritetin, infrastrukturën e mençur dhe zhvillimin e qëndrueshëm.

Ai prezantoi platformën e zhvilluar për menaxhimin dhe kontrollin e mikrogrideve të mençura të energjisë, e cila, përveç të tjerash, po instalohet për përdorim në UBT Smart City, ndërsa profesori i asociuar Besnik Qehaja prezantoi pjesën e sigurisë së rrjetës dhe optimizimin e saj te pjesa e spitaleve dhe klinikave të mençura.

Konferenca gjithashtu shërbeu si platformë për rrjetëzim dhe bashkëpunim ndërkombëtar, ku u diskutuan projektet e përbashkëta, transferimi i teknologjisë, pronësia intelektuale dhe fuqizimi i rolit të universiteteve kërkimore në zhvillimin e qëndrueshëm ekonomik.

UBT vazhdon të shquhet si një institucion lider në rajon për hulumtim shkencor dhe inovacion, me pjesëmarrje aktive në programe evropiane dhe ndërkombëtare, dhe ka arritur rritjen më të shpejtë të publikimeve shkencore jo vetëm në Kosovë, por edhe më gjerë.

Jo rastësisht, në rangimin e fundit të Scimago, UBT në sesionin e shkencës renditet e para në Kosovë.

Pjesëmarrja në këtë konferencë jo vetëm që afirmon pozicionin e UBT-së në arenën ndërkombëtare akademike, por gjithashtu hap mundësi të reja për bashkëpunim, shkëmbim dijesh dhe krijim të projekteve të përbashkëta që ndikojnë drejtpërdrejt në zhvillimin shkencor dhe teknologjik të Kosovës dhe rajonit.

Stafi i UBT-së zhvilloi takime shumë të frytshme për bashkëpunime shkencore me shkencëtarë nga shumë vende të botës.

UBT ka publikuar librin shkencor të Kongresit të 3-të të Forenzikës Kosovë–Turqi, i cili u mbajt më 25-26 maj 2024 në hapësirat e Parkut Shkencor, Inovativ dhe Teknologjik të UBT-së në Lipjan. Ky libër përfaqëson një pasqyrë të gjerë të punimeve, hulumtimeve dhe diskutimeve shkencore të prezantuara në kongresin ndërkombëtar, ku u trajtuan temat më aktuale në fushën e shkencave forenzike.

Kongresi dhe botimi i librit janë dëshmi e bashkëpunimit të suksesshëm dhe të qëndrueshëm akademik ndërmjet UBT-së dhe institucioneve partnere nga Turqia, përfshirë Universitetin Katip Çelebi të Izmirit, Shoqatën e Shkencëtarëve Forenzikë të Turqisë, si dhe partnerë të tjerë akademikë dhe institucionalë nga Kosova, Shqipëria, Maqedonia e Veriut, Greqia, Azerbajxhani dhe rajoni i Azisë Qendrore.

Një botim i rëndësishëm me përmbajtje shkencore, multidisiplinare dhe ndërkombëtare

Libri, i redaktuar nga Prof. Dr. Edmond Hajrizi, Rektor i UBT-së dhe President i Kongresit, përmbledh 168 faqe me punime shkencore, abstrakte dhe diskutime profesionale, të cilat trajtojnë një gamë të gjerë temash si:

• toksikologjia forenzike,
• analizat digjitale në hetime,
• antropologjia forenzike,
• infermieria ligjore në situata fatkeqësie,
• identifikimi përmes odontologjisë forenzike,
• përdorimi i teknologjive si Web3 në forenzikë,
• krimet e luftës dhe përgjegjësia mjekësore,
• identifikimi i viktimave përmes analizave biokimike dhe mjetesh digjitale, etj.

Ky botim dokumenton gjithashtu edhe zhvillimet më të fundit në trajnimin dhe pajisjen e laboratorëve të forenzikës në Kosovë, veçanërisht përmes inaugurimit të laboratorit të parë të forenzikës në nivel universitar në vend, të vendosur në kuadër të kampusit të UBT-së.

Një platformë për bashkëpunim ndërkombëtar dhe shkëmbim dijesh

Kongresi, i cili është shndërruar tashmë në një traditë të përvitshme, nisi për herë të parë në vitin 2014 në Prizren dhe është zhvilluar me sukses në qytete si Foça (Turqi) dhe tani për herë të dytë në Kosovë. Kjo platformë është shembull i shkëlqyer i bashkëpunimit akademik ndërmjet vendeve dhe kulturave, duke sjellë së bashku dhjetëra profesorë, mjekë, ekspertë ligjorë, studiues dhe përfaqësues të institucioneve të drejtësisë dhe shëndetësisë.

Në parathënien e tij, Rektori i UBT-së, Prof. Dr. Edmond Hajrizi, thekson:

“Shkencat forenzike po shndërrohen në një element kyç për drejtësinë moderne, përmes përdorimit të provave të bazuara në shkencë. Ky libër dhe ky kongres janë dëshmi e përkushtimit të UBT-së për të kontribuar në ndërtimin e një shoqërie më të drejtë dhe më të sigurt.”

Ndërkaq, Mr. Sci. Arsim Gërxhaliu, bashkëdrejtues i kongresit dhe drejtor i Institutit të Shkencave Forenzike në UBT, shprehet:

“Përmes këtij botimi, përforcojmë misionin tonë për të promovuar shkencën si themel të drejtësisë dhe të bashkëpunimit ndërkombëtar. Çdo punim që përmban ky libër është një kontribut i drejtpërdrejtë për një sistem më të fuqishëm ligjor e shkencor.”

Një botim me standarde ndërkombëtare

Libri është kataloguar dhe arkivuar nga Biblioteka Kombëtare e Kosovës “Pjetër Bogdani”. Ai do të shërbejë si një referencë e vlefshme për studiuesit, ligjvënësit, profesionistët e sigurisë dhe studentët e fushave të drejtësisë, mjekësisë ligjore dhe kriminalistikës.

UBT, përmes Institutit të Shkencave Forenzike dhe bashkëpunimit me universitetet më të avancuara në rajon dhe më gjerë, po shndërrohet në një qendër ekselence në fushën e forenzikës dhe drejtësisë shkencore, duke kontribuar në reformimin e institucioneve të sigurisë, hetimit dhe gjyqësisë në Kosovë dhe më gjerë.

Genita Tahiri është një nga shembujt më të mirë se si arsimi cilësor në UBT dhe përkushtimi personal mund të çojnë në sukses ndërkombëtar. Ajo është ish-studente e programit Shkenca Kompjuterike dhe Inxhinieri në UBT, ndërsa sot është e punësuar si Software Engineer në një nga kompanitë më të njohura të teknologjisë në Evropë – Gen Digital në Pragë, Çeki.

Gjatë studimeve në UBT, Genita përfitoi nga një mjedis dinamik dhe praktik, ku njohuritë teorike shoqëroheshin gjithmonë me projekte konkrete dhe bashkëpunime ndërkombëtare. Ishin pikërisht këto përvoja që e ndihmuan atë të zhvillojë aftësitë e nevojshme teknike, të ndërtojë vetëbesim profesional dhe të jetë gati për tregun global të punës.

“UBT më ka ndihmuar të kuptoj jo vetëm bazat e forta të programimit dhe sistemeve, por edhe të zhvilloj mendim kritik, punë ekipore dhe lidership – që janë thelbësore në çdo kompani teknologjike”, thekson Genita.

Puna e saj në Gen Digital konsiston në zhvillimin dhe përmirësimin e produkteve softuerike të cilat përdoren nga miliona njerëz në mbarë botën. Ajo është pjesë e një ekipi ndërkombëtar, ku vlerësohet për përgatitjen e saj profesionale dhe kreativitetin që sjell në zgjidhjen e problemeve.

Rruga e Genitës është një dëshmi se studimet në UBT në fushën e Shkencave Kompjuterike hapin dyer të reja për studentët – që nga punësimi i menjëhershëm në Kosovë, e deri tek sukseset profesionale në vendet më të zhvilluara të botës.

Në kuadër të lëndës “Konstruksionet e Drurit të Lameluar”, e udhëhequr nga profesori Visar Krelani dhe asistuar nga asistent Ilir Hetemi, studentët e nivelit Master të Fakultetit të Inxhinierisë së Ndërtimit dhe Infrastrukturës në UBT patën mundësinë të ndjekin një ligjëratë të veçantë dhe mjaft frymëzuese mbi ndërthurjen e arkitekturës me inxhinierinë ndërtimore dhe rëndësinë e përdorimit të materialeve të qëndrueshme në ndërtim.

Ligjërata u mbajt nga Prof. Egzon Bajraktari, i cili theksoi rëndësinë e bashkëpunimit të ngushtë ndërmjet arkitektëve dhe inxhinierëve në çdo fazë të zhvillimit të një projekti. Ai prezantoi koncepte të rëndësishme për projektimin e qëndrueshëm, duke u ndalur në veçanti te potenciali i strukturave me dru të lameluar – një material inovativ dhe ekologjik, i cili po bëhet gjithnjë e më i përdorur në vendet e zhvilluara dhe tashmë po hyn fuqishëm edhe në tregun e ndërtimit në Kosovë.

Në vazhdim të ligjëratës, studenti në përfundim të studimeve master, Inxhinier Edvis Spahiu, prezantoi një zgjidhje konkrete strukturore, e shoqëruar me kalkulimet teknike të nevojshme për realizimin e saj, duke demonstruar njohuritë dhe aftësitë praktike të fituara gjatë studimeve në UBT.

Ligjërata u shoqërua me një diskutim të gjallë dhe interaktiv mes studentëve, profesorëve dhe të ftuarve, duke nxitur debate shumë pozitive dhe produktive që kontribuan në një përvojë të vlefshme akademike.

Përmes kësaj ngjarjeje, u dëshmua edhe një herë rëndësia e ndërdisiplinaritetit në UBT, ku bashkëpunimi mes fakulteteve është jo vetëm i inkurajuar, por thelbësor për përgatitjen e kuadrove profesionale të afta për tregun global të punës. Të dy fakultetet u zotuan të forcojnë më tej bashkëpunimin, duke mundësuar aktivitete të ngjashme edhe në të ardhmen.