Këngëtarja Lizzo po përballet me një padi për shkelje të të drejtave të autorit, pasi akuzohet se kopjoi një këngë të një artisti tjetër për të krijuar një nga këngët e saj të fundit virale.

Këngëtarja 37-vjeçare kishte postuar në gusht një fragment të shkurtër të këngës së saj ende pa titull, që tërhoqi vëmendjen e fansave.

Fragmenti përmendte edhe reklamën e Sydney Sweeney për American Eagle, e cila kishte shkaktuar polemika për promovimin e një mesazhi të kontestuar.

Sipas padisë të siguruar nga TMZ, GRC Trust ka ndërmarrë veprime ligjore kundër Lizzo-s dhe shtëpisë së saj diskografike, Atlantic Records, duke pretenduar se këngëtarja përdori dhe kopjoi pjesë të këngës së viteve 1970 “Win or Lose (We Tried)”, për të cilën ata zotërojnë të drejtat e autorit.

Një përfaqësues i Lizzo-s i tha TMZ-së: “U habitëm që GRC Trust ngriti këtë padi. Për të qenë të qartë, kënga nuk është publikuar ose monetizuar, dhe nuk ka pasur vendim në lidhje me publikimin e saj komercial.”

Padia shton se palët tentuan të arrijnë një marrëveshje, por dështuan, dhe GRC Trust po kërkon dëmshpërblim dhe një urdhër ndalimi për përdorimin e mëtejshëm të këngës.

Kjo nuk është hera e parë që Lizzo përballet me akuza të tilla. Në vitin 2019, tre producentë e paditën për këngën “Truth Hurts”, duke pretenduar se ajo ishte bazuar në këngën “Healthy”, të cilën ata e kishin shkruar së bashku me Lizzo-n në vitin 2017. /A.Z/UBT News/

Roger Goodell, komisioneri i Ligës Kombëtare të Futbollit Amerikan (NFL), ka reaguar ndaj kritikave që kanë shoqëruar njoftimin se Bad Bunny do të performojë gjatë pushimit të pjesës së parë të finales së Super Bowl-it.

Pavarësisht reagimeve të ndryshme, Goodell theksoi se nuk ka në plan të ndryshojë vendimin për zgjedhjen e artistit.

“Nuk jam i sigurt nëse kemi zgjedhur ndonjëherë një artist pa pasur kritika apo reagime nga publiku. Është sfidë kur ke qindra miliona shikues. Por ne duam të ofrojmë argëtim të lartë dhe Bad Bunny është një nga artistët më të njohur dhe me ndikim në botë,” tha Goodell.

Performanca e Bad Bunny-t është veçanërisht e pritur, duke pasur parasysh mungesën e koncerteve të tij në SHBA gjatë viteve të fundit, një vendim i artistit si protestë ndaj politikave antiemigrantore të administratës Trump.

Ai kishte frikë se koncertet mund të shërbenin si mjet për autoritetet për të identifikuar emigrantë ilegalë, duke rrezikuar sigurinë e fansave.

Performanca në Super Bowl, e transmetuar drejtpërdrejt në televizion, ofron mundësinë që adhuruesit ta shijojnë artistin pa u ekspozuar ndaj ndonjë rreziku.

Kjo zgjedhje tregon edhe angazhimin e NFL-së për të sjellë artistë me ndikim global, që tërheqin audiencë të gjërë dhe shtojnë vlerën e eventit më të madh sportiv në SHBA. /A.Z/UBT News/

Fansat po e presin me padurim sezonin e ri të serialit “Emily in Paris”, i cili do të publikohet zyrtarisht më 18 dhjetor në Netflix.

Platforma e njohur e filmave dhe serialeve ka ndarë tashmë një trailer të shkurtër për sezonin e pestë.

Siç mund të shihet, ky sezon premton më shumë dinamikë, stil dhe dramë – elemente që e kanë bërë serialin të dashur për publikun që nga fillimi.

Këtë herë, historia zhvendoset nga Parisi në Romë, duke sjellë një atmosferë krejt të re mes rrugëve dhe pamjeve të qytetit të lashtë italian.

Emily, e interpretuar nga Lily Collins, do të përballet me sfida të reja, romancë të papritur e situata plot humor në këtë mjedis të ri kulturor.

Zhvendosja e ngjarjes nga kryeqyteti francez në atë italian pritet t’i japë serialit një frymë të freskët dhe një pamje më të larmishme kulturore.

Ky ishte vetëm një trailer i shkurtër, ndërsa në javët në vijim Netflix pritet të publikojë edhe trailer-in e plotë të sezonit. /A.Z/UBT News/