Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998.

9 nëntor 1992 

Katër të vrarë, shumë të plagosur, 45 persona të dënuar në Shkup

Autoritetet e Maqedonisë vërtetuan lajmet se gjatë intervenimit të policisë së Maqedonisë ndaj protestuesve shqiptarë në lagjen Bit Pazar në Shkup, u vranë katër persona, me dhjetëra u plagosën, ndërsa, së paku 45 persona u dënuan me nga 30 ditë burg.

Nga të vrarët mirret vesh se Safet Sejfullai, 32 vjeçar u vra para portës së shtëpisë së tij. Ndërsa Viktorija Geshovska, 63 vjeçare u vra në dhomë të banesës së saj. I vrari i tretë, Shemsedin Ibrahimi, 38 vjeçar, vdiq në spital. Ndërsa viktima e katërt, që supozohet se është shqiptar, nuk është identifikuar ende. Në një raport nga Shkupi, të botuar sot në revistën “Shkëndija”, thuhet se i vrari i katërt është Sulejman Memishi, 22 vjeçar nga Shkupi.

Në raportet e ndryshme nga Shkupi, që mbështeten në burimet shqiptare, mirret vesh se policia maqedonase, arrestoi së paku 100 persona. Një numër i tyre është dënuar me burg, tha nënkryetari i Partisë për Prosperitet Demokratik, Sami Ibrahimi. Deri më tash janë dënuar 45 persona me nga 30 ditë burg: Rrahman Iliazi (1970), Fadil Luta (1955), Jakup Salievski (1973), Abdyl Hyseni (1964), Vehbi Neziri (1973), Abdyl Sylejmani (1962), Adnan Rufati (1974), Setki Sylejmani (1906), Zekiria Vishi (1966), Qamil Vishi (1969), Osman Miftari (1956), Selajdin Ismaili (1965), Muharrem Seta (1968), Halil Ramadani (1958), Ibish Llami (1968), Ismajl Myrtezi (1951), Sylejman Maksuti (1950), Safet Gashi (1962), Fatmir Jashari (1965), Ramiz Sefaj (1956), Feriz Jusufi (1964), Ruzhdi Aliu (1952), Adnan Jusufi (1964), Samet Samakova (1958), Hamdi Bislimi (1964), Abullah Berkiri (1962), Sadri Burhamedini (1965), ? Çajani (1968), Isen Sinani (1953), Sabit Rexhepi (1974), Nehat Haliti (1968), Ali Morina (1958), Hajrullah Mustafa (1962), Faredin Bakiu (1965), Isa Selmani (1972), Shaip Selmani (1973), Ferid Islami (1967), Sedat Ismaili (1954), Xhelal Jashari (1959), Reshat Musliu (1959) dhe me të holla u dënuan Abdyl Naser Muharremi, Abdyl Kadri Abdiu, Naser Poliku dhe Mensur Mema.

Gjendja e të plagosurve dhe e të lënduarve nuk dihet.

Burimet shqiptare dyshojnë se numri i të vrarëve është më i madh.

Varrimi i të vrarëve u bë sot.

9 nëntor 1993

Diskriminim nacional e social

Sindikata e Pavarura të policisë së Kosovës, në një kumtesë për opinion, thekson se me shkresën e Ministrisë së punëve të brendshme të Serbisë, nr.890/1 prej 5 majt 1993 punëtorët shqiptarë në ish-SKPB janë përjashtuar arbitrarisht nga procedura për blerjen e banesave. Në praktikë, thuhet më tej në kumtesë, punëtorët shqiptarë të ish-SKPB-së së Kosovës u hodhën dëbuan arbitrarisht nga banesat shoqërore. Vetëm në muajin tetor 1993 me dhunë arbitrare policia serbe nga banesat shoqërore e nxori Enver Magjunin, ish-kryeshef i Drejtoratit për punë të brendshme në Vushtrri, Ramadan Bytyqi, ish-poskomandant i milicisë së komunikacionit në Ferizaj, Halil Blakaj, ish-poskomandant i milicisë në Prizren dhe Sadri Dedushajn, ish-milic në Deçan, shfrytëzues legjitim shumëvjeçar në to u vendosën Milosavleviq Milivoje, Zhiviq Gradimir, Zharko N.etj.

Ndërsa, gjatë muajit të kaluar, për shkak të aktivitetit sindikal, fizikisht u maltretuan Jakup Ahmeti, Imri Shala, Ali Berisha, Shemsi Slameni në Prishtinë dhe Shaban Neziri në Podujevë, thuhet në mes tjerash në kumtesën e Sindikatave të Pavarura të policisë së Kosovës.

9 nëntor 1995

Policia dëmtoi varrezat e Besim Latifit e Skënder Monollit në Pollatë të Podujevës

Policia serbe dëmtoi dje në Pollatë rrethojën e varrezave të Besim Latifit e Skënder Monollit, të cilët u vranë në shtëpitë e tyre në shtator të vitit 1990 nga një ekspeditë e forcave serbe.

Katër autoblinda dhe një automjet i policisë serbe shkuan dje rreth orës 15:00 në fshatin Pollatë të Podujevës dhe pasi qëndruan rreth 15 minuta përballë shkollës fillore të këtij fshati, duke u kthyer në drejtim të Podujevës, me autoblindë rrënuan një pjesë të rrethojave të varrezave të Besim Latifit e të Skënder Monollit, njofton Komisioni për Informim i Degës së LDK-së në Podujevë.

Në këto varreza është varrosur edhe Shefki Latifi, i cili u mbyt me torturë nga policia serbe më 4 korrik të këtij viti në Podujevë.

Aksioni i policisë serbe në shtator të vitit 1990 shënon fillimin e aksionit të madh të torturimit e keqtrajtimeve që përfshiu Kosovën gjatë pesë viteve të kaluara nën pretekst të kërkimit të armëve.

9 nëntor 1996

Në një apartament të Torinos u gjetën të vrara dy vajza shqiptare 

Në një apartament të veçuar në afërsi të stacionit hekurudhor të Torinos, dy vajza shqiptare në moshë të re shtetase të Shqipërisë u gjetën të vrara. Njëra nga ato vdiq menjëherë në vendin e ngjarjes, ndërsa tjetra pas operacionit po ashtu vdiq në spitalin e qytetit të Torinos, thuhej në një njoftim  të emetuar parmbrëmë në BBC.

Nga i njëjti burim theksohej se në shënimet e gjetura në apartament, rezultonte se vajzat e mbytura me thikë kërkonin të shkëputeshin përfundimisht nga rrjeti i prostitucionit ku ishin futur me forcë nga shfrytëzuesit e tyre. Ndërkohë, burimet e policisë italiane njoftuan se vrasja barbare e këtyre dy vajzave shqiptare është pasojë e hakmarrjes së bandave të kriminelëve, ngase ato nuk dëshironin të mbeteshin në kthetrat e tyre. Vetëm gjatë këtij viti në mënyra të ngjashme kanë rënë viktima 8 vajza shqiptare.

9 nëntor 1998

Prizren: Nuk ka tërheqje, por ripozicionime të forcave serbe

Në komunën e Prizrenit, nuk ka asnjë shenjë të tërheqjes së forcave serbe, ndërsa ato vetëm se janë ripozicionuar dhe vazhdojnë t’i keqtrajtojnë qytetarë shqiptarë, njofton KI i Degës së LDK-së në Prizren.

Në fshatin Planejë të Hasit tash një muaj janë vendosur forca të mëdha të ushtrisë serbe. Në këtë fshat, ushtria serbe ka uzurpuar tri dyqane të këtij fshati, si dhe objektin e shkollës fillore “Vëllezërit Frashëri”.

Bëhet e ditur se ushtria serbe po i mban në izolim edhe disa lagje të këtij fshati, ndërsa çdo ditë po i ndalojnë qytetarët e këtushëm shqiptarë. Po ashtu në këtë fshat, ushtria serbe ka hapur edhe llogore.

Ndërkaq, forcat e policisë serbe po lëvizin shpesh edhe përgjatë rrugës Prizren-Prishtinë, veçanërisht në rrugën Duhël-Shtimje.

Dje rreth orës 11:00 në fshatin Zojz, policia serbe ka keqtrajtuar Halil Destanin. Në këtë fshat, qytetarët shqiptarë po keqtrajtohen nga një ekspeditë ndëshkuese e policisë serbe, e cila çdo ditë po dislokohet në fshatin Piranë, ndërsa po lëvizë edhe drejt fshatrave të tjera të Përdrinisë.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998.

7 nëntor 1992

Katër të vrarë e shumë të plagosur nga policia maqedonase

Bilanci tragjik i ndërhyrjes së policisë maqedonase në lagjen e banuar me shqiptarë Bit Bazar të Shkupit, është së paku dy persona të vrarë e me dhjetëra të plagosur.

Shërbimi për Informim i Partisë për Prosperitet Demokratik na njoftoi se dje pasdite, rreth orës l6, policia maqedonase ndërhyri kundër qytetarëve shqiptarë në Bit Pazar, që është qendër tregtare e shqiptarëve. Me këtë rast, policia maqedonase rrahu brutalisht një fëmijë, rreth 14 vjeç.

Ky veprim shkaktoi indinjatë, dhe pastaj reagime të shqiptarëve. Në mesin e qytetarëve të tubuar në Bit Pazar, u përhapën fjalë se fëmiu shqiptar kishte vdekur në spital. Duket se kjo u bë me qëllim që të rritet zemërimi i qytetarëve shqiptarë, të cilët kërkonin informata të sakta për gjendjen e fëmiut të rrahur dhe sqarime nga autoritetet maqedonase.

Ndërkohë, rreth orës 20, pa kurrfarë paralajmërimi policia maqedonase e cila kishte vënë gjendje të plotë shtetrrethimi në këtë lagje të banuar kryesisht me shqiptarë, ndërhyri egërsisht, duke përdorur bomba lotsjellësi, shkopinj gome, e, edhe armët e zjarrit. Sipas disa mjeteve të informimit, policia kishte për qëllim shpërndarjen e masës së madhe në grupe të vogla. Siç informojnë zyrtarët e Partisë për Prosperitet Demokratik, nga të shtënat e policisë u vra Safet Sejfullahu, 25 vjeçar. Mjetet e informimit pohojnë se janë vrarë dy persona. Me dhjetëra janë të plagosur nga armët e zjarrit, ose të lënduar nga intervenimi brutal i policisë. Mbi 85 qytetarë shqiptarë janë arrestuar mbrëmë dhe po mbahen ende në polici. Bëhet me dije se janë demoluar vetura e lokale të shumta në këtë lagje.

Ndërkaq, sot RadioShkupi, në emisionet e veta informative në gjuhën maqedonase, duke u mbështetur në informatat zyrtare, njofton se gjatë mbrëmë në Bit Pazar, janë vrarë dy shqiptarë, një grua maqedonase dhe një person i paidentifikuar ende.

Informata të hollësishme për këtë intervenim të policisë kundër popullësisë shqiptare nuk dhanë as organet zyrtare të Maqedonisë, e as partitë politike shqiptare në Maqedoni, ose degët e tyre në Shkup.

Gjatë natës të gjitha lidhjet telefonike me Shkupin ishin të bllokuara.

Kryetari i Partisë për Prosperitet Demokratik, Nevzat Halili, i deklaroi Qendrës për Informim se tërë kjo që ndodhi në orët e pasditës dhe të mbrëmjes në Bit Pazar ishte një skenar për destabilizimin e gjendjes në Maqedoni, përkatësisht në territoret ku jetojnë shqiptarët.Me këtë akt, policia maqedonase deshi të provokonte pakënaqësinë e grumbulluar për shkak të gjendjes së rëndë politike, ekonomike, kulturore në mesin e popullatës shqiptare. Ne do të insistojmë, tha ai më tutje, që e vërteta për tërë ngjarjen të dalë në shesh dhe që shkaktarët të mirren në përgjegjësi. Ai theksoi se momentalisht situata nuk është dramatike si mbrëmë. Veprimtarët e kësaj partie janë në kontakt me qytetarët shqiptarë dhe po bëjnë përpjekje që të ndërprerjnë daljen e situatës nga kontrolli. Gjendja e të plagosurve dhe e të lënduarëve nuk është në rrezik. Z. Halili shpreson se do të lirohen së shpejti të arrestuarit.

Nga burime të ndryshme, sidomos nga qytetarët shqiptarë që udhëtuan mbrëmë e sot nga Shkupi për në Kosovë, mirret vesh se policia maqedonase po bën një kontroll shumë të rreptë, sidomos në Shkup.

Brenda ditës së sotme pritet që me vlerësime e qëndrime zyrtare të dalin partitë politike shqiptare dhe organet maqedonase.

Qeveria e Maqedonisë, në të cilën shqiptarët kanë pesë ministra, dhe përfaqësuesit e popullit shqiptar në Maqedoni, që përbën rreth 40% të popullsisë, deri më tash nuk kanë arritur marrëveshje për rregullimin e shtetit maqedon dhe statusin e shqiptarëve. Në janar të vitit l992 shqiptarët organizuan një referendum, në të cilin u deklaruan par autonomi politikoterritoriale. Në bisedimet e drejtëpërdrejta me autoritetet maqedonase, si edhe në bisedimet që janë bërë me ndërmjetësimin e përfaqësuesve të Konferencës së Hagës e të Gjenevës, përfaqësuesit e shqiptarëve kanë kërkuar për shqiptarët statusin e kombit shtetformues. Mirëpo, deri më tash këto kërkesa nuk janë përfillur dhe bisedimet nuk kanë dhënë rezultat. Incidenti i djeshëm mund t’ i rëndojë këto marrëdhënie.

7 nëntor 1994

Represioni gjatë nëntë muajve në Istog

Gjatë nëntë muajve të kaluar në komunën e Istogut u bastisën 77 familje, u bënë pesë intervenime në institucionet legale, u morën në pyetje 96 shqiptarë, u shënuan dy raste plaçkitjeje ndërsa katër personave u janë marrë pasaportat.

Në raportin periodik të Komisionit për Informim të Degës së LDK-së në Istog thuhet se janë maltretuar 54 persona, 10 të tjerë janë mbajtur në stacionet e policisë deri në 3 ditë, procedura për ndëshkim është inicuar kundër 7 personave, 71 janë rrahur, 2 shqiptarë janë dënuar, ndërsa jtanë kthyer 13 refugjatë.

7 nëntor 1995 

Në qendër të Prishtinës u dogjën disa lokale

Dje në qendër të Prishtinës në një ndërtesë dykatëshe shpërtheu një zjarr, i cili u lokalizua pas tri orëve, por stihia e zjarrit dogji tri lokalet e një ndërmarrjeje private. Pas intervenimit të zjarrfikësve u pengua përhapja e zjarrit, i cili kishte përfshirë edhe lokalet e tjera përdhese dhe katin e sipërm të ndërtesës, ku banojnë familje. Sipas njoftimeve të shtypit serb, zjarri shpërtheu për shkak të instalimeve të dobëta të rrymës.

 7 nëntor 1996

Dhuna e përditshme në Kosovë

Viti: – Dje, rreth orës 6:00 të mëngjesit, policia serbe ia la thirrjen Musa Misinit, anëtar i Kryesisë së Degës së LDK-së në Viti që të paraqitet në stacionin e policisë serbe në Viti.

1. Misini u paraqit në polici, kur për rreth gjashtë orë u mor në pyetje për aktivitetin e tij politik.

Kamenicë: – Më 4 nëntor, policia serbe me pretekst të dorëzimit të armëve, thirri Muharrem Avdylin (66) nga Kromenata, i cili edhe u keqtrajtua fizikisht. Ai u urdhërua që të paraqitet sërish dje në polici, ndërsa bëhet e ditur se nga keqtrajtimi fizik i është lënduar syri.

7 nëntor 1997

Mitrovicë: Policia mori në pyetje dhe plaçkiti një të ri shqiptar

Dje, rreth orës 12:00 në afërsi të tregut të pemëve në Mitrovicë, policia serbe mori Berat R. Rrahmanin (18) nga Mitrovica, i cili u dërgua në stacionin e policisë serbe në Mitrovicë, njofton KI i Degës së LDK-së në Mitrovicë.

Njoftohet se Berat Rrahmani merret me shitjen e cigareve dhe ai gjatë një ore sa u mbajt në polici, u pyet se kush ka armë në lagjen e tij në “Tavnik”, ndërsa policët edhe i plaçkitën cigare në vlerë prej 320 dinarësh.

Sot, nga ora 8:00 deri në orën 12:00, policia serbe në afërsi të tregut të pemëve në Mitrovicë, legjitimuan dhjetëra të rinj shqiptarë.

7 nëntor 1998

Njoftohen emrat e 5 shqiptarëve të vrarë dje në Opterushë të Rahovecit

Nënkëshilli i KMDLNJ-së në Prizren bëti sot të ditur emrat e pesë të rinjve shqiptarë, të vrarë dje nga forcat serbe në Opterushë të Rahovecit.

Të vrarit janë Xhelal Hajda (31) e Selajdin Mullaabazi (30) nga Rahoveci, Bektesh Halili nga Gllavatini i Vushtrrisë, Hamdi Hajrizi nga Strofci i po kësaj komune dhe Nezir Ymeri nga Jezerci i Ferizajt, të gjithë pjesëtarë të UÇK-së. 

Foto: Shkupi

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998.

6 nëntor 1992

Shqiptarët trajtohen si “skllevër”

Revista franceze “Le monde diplomatique” pardje botoi një analizë të gjerë të procesev historike dhe aktuale në hapësirën e ishJugosllavisë. Një vëmendje të veçantë në këtë analizë autorja Ketrin Lutard ia kushton Kosovës dhe çështjes shqiptare. Ndër të tjera autorja thekson:  Qysh prej kohësh gjendja vlerësohet si shkatërruese dhe udhëheqësi i komunitetit shqiptar Ibrahim Rugova, pohon se bashkatdhetarët e tij janë trajtuar “si skllevër”. Represioni vazhdon të rritet. Kështu, sipas gazetës zyrtare të 25 korrikut 1992, Parlamenti serb i Beogradit vendosi të pezullojë drejtorët shqiptarë të uzinave Planinka, Rilindja, Ringos Ciglana, Buduqnost, Sutjeska, Energoinvest, Sharr dhe Proleter, të gjitha të vendosura në Kosovë, dhe për t’i zëvendësuar me serbë apo malazezë.

6 nëntor 1993

Spastrimet etnike serbe – në tekstet shkollore franceze e gjermane

Prej këtij viti shkollor në Francë dhe në Gjermani, janë paraqitur tekstet shkollore dhe materialet didaktike ku gjoja “në mënyrë tendencioze dhe të shtrembëruar janë paraqitur disa pjesë nga historia serbe, Serbisë e Jugosllavisë,” shkruan “Politika” e sotme.

Përse janë zemëruar aq shumë në të ashtuquajturën ministri federale të arsimit dhe të kulturës ndaj këtyre teksteve dhe përse ambasadës së tyre në Paris iu urdhërua të kërkojë procedurë gjyqësore për ndalimin e librit të historisë për klasën e katërt të gjimnazit? Për çka është fjala në të vërtetë?

Në librin e historisë në kaptinën “Kthimi i nacionalizmit”, siç thotë gazeta, shkruan: “Qëllimi ishte që të krijohet Serbia e madhe nëpërmjet ‘spastrimit etnik’ të territoreve ku gjenden serbët. Me terror dëbohet popullsia tjetër”.

Në kaptinën ku shpjegohen terminet nga libri, për spastrimin etnik shkruan se kjo “është teori të cilën e kanë krijuar anëtarët e Akademisë së shkencave në Beograd dhe nënkupton homogjenizimin etnik të territoreve të ish-Jugosllavisë, të cilat janë të banuar me serbë, të cilat duhet me anë të terrorit mbi popullsinë tjetër të realizojnë aneksimin definitiv të atyre territoreve nga ana e Serbisë”.

Përmbajtje të ngjashme, sipas gazetës, gjenden edhe në materialin didaktiko-informativ, që gjendet në programin shkollor në Gjermani.

6 nëntor 1995

U përkujtua ngjarja tragjike e Bit Pazarit

Me rastin e ngjarjeve të 6 e 7 nëntorit të vitit 1992, kur në Bit Pazar të Shkupit humbën jetën tragjikisht Sylejman Memishi, Safet Sejfullahu, Shemsedin Ibrahimi dhe Viktorija Geshovska, në lokalet e bashkësisë okale, që mban emrin e kësaj date tragjike “6 Nëntori” në Shkup u mbajt një tubim përkujtimor për këtë ngjarje të hidhur në jetën pluraliste të Maqedonisë.

Në këtë tubim morën pjesë anëtarët e familjeve të viktimave, qytetarë dhe personalitete të jetës politike dhe publike, në mesin e të cilëve edhe deputeti i kësaj njësie zgjedhore Mevlan Tahiri.

Lidhur me këtë rast tragjik u nënvizua se edhe pas tri vjetësh nuk u zbuluan vrasësit e viktimave të pafajshme, të cilat padyshim u vranë nga policia maqedonase në pragun e shtëpive të tyre.

Pasi Komisioni parlamentar, i themeluar për hulumtimin e këtij rasti, nuk dha përgjegje për autorët e krimit në Bit Pazar, në këtë mbledhje u theksua se familjet e të vrarëve duhet të ngrisin aktpadi kundër Ministrisë së Punëve të Brendshme të Maqedonisë.

6 nëntor 1996

Bill Klinton u rizgjodh president i SHBA-ve

Në zgjedhjet e djeshme presidenciale në SHBA, presidenti i tanishëm amerikan Bill Klinton u rizgjodh në këtë post edhe për një mandat katërvjeçar.

Ambasada amerikane në Beograd na përcolli njoftimin e agjencisë gazetare amerikane UPI ku thuhej se Klintoni triumfoi mbi rivalin e tij kryesor Bob Dol. Sipas këtij njoftimi Klinton fitoi me 50 kundrejt 42 për qind të votave, sa fitoi kundërshtari i tij republikan, ndërsa kandidati tjetër Ros Perot fitoi fare pak vota.

Pas Frenklin Ruzveltit, Bill Klinton është presidenti i dytë amerikan nga radhët e demokratëve që triumfoi për të dytën herë në postin e presidentit të SHBA-ve.

6 nëntor 1997

Dhuna e përditshme në Kosovë

Obiliq: – Dje, policia serbe, me pretekst të dorëzimit të armëve ishte në familjen e Ferat Mjekiqit (65) në Graboc të Epërm.

Njoftohet se Ferati është urdhëruar që të paraqitet në stacionin e policisë në Obiliq, së bashku me djalin e tij Nasuf Mjekiqin, kryetar i Aktivit të LDK-së në Graboc të Epërm.

Ferat Mjekiqi para gjashtë muajve ka dorëzuar një armë dhe për këtë ai ka edhe vërtetimin për armën e dorëzuar.

Po ashtu mbrëmë rreth orës 17:00, dy policë serbë ndërhynë në një mbledhje të një Aktivi të LDK-së në Obiliq. Bëhet e ditur se policët serbë kanë legjitimuar të pranishmit. Disa aktivistëve u janë marrë edhe shënimet personale.

Istog: – Më 31 tetor, dy inspektorë të sigurimit serb të stacionit të policisë në Pejë, bastisën familjen e Ali S. Mahajt në Dubovë të Vogël. Njoftohet se inspektorët serbë kërkuan djalin e tij Naim Mahajn (24), të cilit ia lanë thirrjen që të paraqitet në polici. Gjatë bastisjes, inspektorët serbë thyen e demoluan shumë orendi.

Sot, rreth orës 8:00 të mëngjesit, një grup huliganësh serbë i përbërë prej rreth 15 vetash, sulmuan pa kurrfarë shkaku Arben Boletinin, nxënës i gjimnazit “Haxhi Zeka” në Istog. Gjatë kohës sa Arbeni është keqtrajtuar, huliganët serbë e kanë kërcënuar atë se “kurrë nuk do të mësoni në shkollën shqipe, ndërsa atë kërkojeni në Shqipëri!”.

6 nëntor 1998

Suharekë: Të shtëna midis Samadraxhës e Opterushës – flitet edhe për të vrarë e të plagosur

Gjendja në komunën e Suharekës edhe më tej vazhdon të jetë shumë e tensionuar, njofton KI i Degës së LDK-së në Suharekë.

Sot rreth orës 12:00, në mes të fshatrave Samadraxhë e Opterushë janë dëgjuar të shtëna armësh, ndërsa dëshmitarët okularë kanë theksuar se ka të vrarë e të plagosur.

Ndërkaq dje, policia serbe është vendosur në lagjen Luboci në Grejçec. Policët serbë ia hoqën kulmin një shtëpie të këtij fshati dhe materialin e dërguan në një vend tjetër. Të njëjtit policë rreth orës 17:00 kanë shtënë me armë në drejtim të Grejçecit.

Bëhet e ditur se forcat e policisë serbe edhe më tej po qëndrojnë në fshatrat Duhël, Grejçec, Mohlan e Reshtan, ndërsa forcat e ushtrisë serbe edhe më tej janë të stacionuara në Qafë të Duhlës dhe në malet e Biraçit mbi Suharekë.

Në rubrikën Ditari, kemi përzgjedhur disa nga lajmet më të rëndësishme të kësaj dite, në periudhën 1992-1998. 

5 nëntor 1993

Bastisje, plaçkitje dhe keqtrajtime të policisë serbe në Kosovë

Është bërë pothuajse e zakonshme që policia serbe çdo të enjte, e cila është ditë tregu në Malishevë, t’i plaçkitë qytetarët dhe tregtarët e kësaj ane.

Edhe gjatë ditës së djeshme, policia serbe në Malishevë bllokoi të gjitha hyrje-daljet e kësaj qyteze, ndërsa më vonë nga tregtarët dhe qytetarët shqiptarë plaçkiti një sasi të konsiderueshme malli me vlerë prej afro 3.000 markash gjermane.

Komisioni për Informim i Degës së LDK-së në Malishevë, njofton se policia serbe rreth orës 13, arrestoi tre veta, të cilët i dërgoi në stacionin e policisë në Rahovec.

Ndërsa në Ferizaj, siç njofton Komisioni për Informim i Degës së LDK-së, më 2 nëntor në mëngjesi, një ekspeditë e policisë serbe, bastisi familjet e Muharrem, Izet, Kurtesh, Nazmi, Muhabi, Hamdush dhe Ejup Kurtit në fshatin Zllatar të Ferizajt.

Pretekst i kësaj bastisjeje ishte kërkimi i Shaban dhe Ejup Kurtit për vuajtjen e një dënimi, ndërsa policia mori me vete Halil Kurtin dhe të vëllanë e tij Shabanin, të cilët i mbajtën disa orë në stacionin e policisë në Ferizaj.

Pardje, rreth orës 15, policia serbe bastisi shtëpinë e Habib Çerkinit, si dhe të vëllezërve të tij: Ibrahimit dhe Baftiut. Pas bastisjes që u bë me pretekst të kërkimit të armëve, morën me vete Habibin dhe djalin e tij, Nazmiun, i cili ishte ish-epror ushtarak në armatën jugosllave, si dhe bashkëshorten e tij Muhabijen. Merret vesh se policët arrestuan edhe Xhemrush Çerkinin, nga të cilët deri tash është liruar vetëm bashkëshortja e Nazmiut, Muhabija, ndërsa të tjerët ende po mbahen në arrest.

Në Vushtrri, pardje, rreth orës 13, me pretekst të kërkimit të armëve, policia serbe bastisi shtëpinë e Bajram Pushkollit. Gjatë bastisjes, policët serbë thyen dhe demoluan të gjitha orenditë në këtë familje, ndërsa më vonë në prani të anëtarëve të familjes keqtrajtuan fizikisht Bajramin, si dhe dy djemtë e tij, Sheqirin dhe Agronin.

Komisioni për Informim i Degës së LDK-së në Vushtrri, njofton gjithashtu se dje policia serbe mori në pyetje në stacionin e policisë në Vushtrri për dy orë Bajram Latifin nga Sllatina, ish i burgosur i ndërgjegjes.

Në Mramor të Prishtinës, sot rreth orës 4 të mëngjesit, policia serbe bastisi shtëpinë e Sylë Gashit, nga i cili kërkonin një revole dhe një automatik. Më vonë Sylën dhe djalin e tij Fadilin, policët i dërguan në stacionin e policisë në lagjen Kodra e Trimave, ku i keqtrajtuan rëndë.

5 nëntor 1994

Mr. Ukshin Hotin e vizitoi në burg avokati i tij

Sot u mbushën 193 ditë që kur e paraburgosën mr. Ukshin Hotin, kryetar i Partisë së Unitetit Kombëtar, i cili, siç dihet, më 28 shtator në gjykatën serbe të qarkut në Prizren e dënuan me 5 vjet burg për veprën penale sipas neneve 116 e 138 të ligjit penal me “firmë” të së vetëshpallurës RFJ.

Njëri nga mbrojtësit, mr. Hazër Susuri, Ukshin Hotin e vizitoi pardje në burgun e Prizrenit dhe, me këtë rast i deklaroi gazetës “Bujku” se klienti i tij e ndien veten mirë, edhe pse lëngon nga sëmundja e sheqerit.

Po ashtu avokati Susuri i tha kësaj gazete se që nga koha e kumtimit të aktgjykimit, më 28 shtator, e deri më tash Ukshin Hotit nuk i është dorëzuar me shkrim aktgjykimi, kundër të cilit, së bashku me katër kolegët e tij, do të ankohej në “shkallën e dytë”, në Gjykatën Supreme të Serbisë.

Mendojmë se organizatat ndërkombëtare për mbrojtjen e të drejtave dhe lirive të njeriut duhet më me ngulm ta ngrenë zërin kundër këtij dënimi, theksoi ndër të tjera Hazër Susuri.

5 nëntor 1995 

Familjes Çetta dhe kryetarit Rugova po u arrijnë telegrame ngushëllimi

Familjes së profesor Anton Çettës dhe kryetarit të Republikës së Kosovës Ibrahim Rugova, po u arrijnë telegrame të shumta ngushëllimi nga institucione, parti, shoqata e individë nga Kosova dhe jashtë vendit.

Telegrame ngushëllimi dërguan shqiptarët me qëndrim të përkohshëm në Hagen të Gjermanisë, përkatësisht klubi shqiptar “Anton Çetta”, aktivi i LDK-së dhe anëtarë të PSHDK-së në këtë ë qytet.

Me rastin e vdekjes së profesor Çettës, telegrame ngushëllimi dërguan Ismail Bytyqi, kryetar i Degës së LDK-së për Beneluks, kryesia e shoqatës “Anton Çetta” në Bruksel, sekretari i Qendrës për Informim të Republikës së Kosovës për beneluks dhe Unionin Evropian – Ramadan Gashi, Art Klubi i Ulqinit, kryetari i Sindikatës së Pavarur të Administratës dhe Judikaturës së Kosovës – Ukë Bashota dhe institucione e individë të tjerë.

5 nëntor 1996

Dhuna e përditshme 

Podujevë: Më 4 nëntor, policia keqtrajtoi disa banorë të fshatit Llugë të Podujevës dhe shtatë udhëtarët e shoferin e një autobusi, i cili për shkak të një defekti ishte ndalur në këtë fshat. Për të ndihmuar në eliminimin e defektit ndihmë ofruan Haki B. Bulliqi, Ismail F. Bulliqi dhe Bedri R. Bulliqi, por derisa ata, bashkë me shoferin Jakup Jupolli, po punonin në eliminimin e defektit, atypari kaloi policia me një autoblindë dhe pasi legjitimoi të pranishmit i dërgoi në stacionin e policisë dhe i keqtrajtoi ata fizikisht deri në orën 3 pas mesnate. Të gjithë janë liruar nga policia, përveç Hakiut, njoftime për lirimin e të cilit nuk ka.

Po këtë ditë, policia ishte në disa familje të komunës së Podujevës me pretekst të kërkimit të armëve. Policia ishte në shtëpitë e Nezir, Sabit, Hamdi e Nazmi Restelicës në Podujevë, në shtëpitë e Ruzhdi e Hamdi Agushit, si dhe në shtëpinë e Islam Ademit në Pollatë.

Policia ndaloi në rrugë gjithashtu Naser Demën, i cili po ruante bagëtinë. Pasi ai nuk kishte letërnjoftimin me vete, policia e keqtrajtoi atë dhe shkoi bashkë me të në shtëpinë e tij. Policia urdhëroi Ademin dhe vëllain e tij Faikun që të paraqiten më 6 nëntor në polici.

Prishtinë: Për shkak të një mosmarrëveshje rreth rrugës së përbashkët mëse 26 vjet ndërmjet fqinjve Abdyl Llabjanit dhe Idriz Cakollit, banorë në rrugën “Jabllanica” në Prishtinë, Idrizi e denoncon Abdylin në policinë serbe. Më 20 tetor policia shkon në shtëpinë e Abdylit dhe e dërgon në stacionin e policisë ku e keqtrajton fizikisht, në prezencën e Idrizit. Policët iu kërcënuan Abdylit se nuk ka të drejtë të kalojë nëpër atë rrugë!

Vlen të theksohet se për këtë rast këshillat e pajtimit në kuadër të Degës së LDK-së në Kodrën e Trimave u munduan ta zgjidhin këtë mosmarrëveshje, mirëpo Idriz Cakolli nuk pranoi, por kërkoi ndihmë nga organet policore serbe.

5 nëntor 1997 

Shpërthim në qendër të Podujevës

Mbrëmë rreth orës 20. 15, në afërsi të ndërtesës së kuvendit komunal në Podujevë u dëgjuan dy shpërthime të njëpasnjëshme dhe një breshëri nga armët automatike.

Menjëherë pas kësaj, policia serbe keqtrajtoi kalimtarët e rastit.

Ndërsa, rreth orës 21, një ekspeditë e policisë serbe, e përbërë nga dhjetëra policë të armatosur dhe të shoqëruar me mjete të blinduara, bastisën shtëpinë e Shefki Maliqit në Podujevë. Pas bastisjes, në polici u morën Shefkiu me djalin e tij Hajdinin, si dhe dy mysafirët që ndodheshin në këtë familje, Bekim e Arben Fazliu nga Sveçla. Ata u mbajtën një kohë në polici, ku Hajdini, Bekimi e Arbeni u keqtrajtuan fizikisht, si dhe u liruan më vonë, thuhet në njoftim.

Ndërsa Këshilli për Mbrojtjen e të Drejtave dhe Lirive të Njeriut, duke njoftuar për këtë rast, thekson se shpërthimi ndodhi në afërsi të lokalit “Milloshev konak”, përballë ndërtesës së okupuar të Kuvendit Komunal, në një largësi 50 metra prej stacionit të policisë. KMDLNj thekson gjithashtu se lokali para të cilit ndodhi shpërthimi sot është i mbyllur dhe në të nuk vërehen dëmtime të mëdha.

Për këtë shpërthim njoftoi sot edhe radioja serbe e Prishtinës, e cila njoftoi se në momentin e shpërthimit të bombave, në ndërtesën e kuvendit komunal po mbahej mbledhja e këshillit të PSS-së për Podujevë. Nga shpërthimi i bombave nuk pati viktima, ndërsa u dëmtuan dy vetura private, si dhe pëlcitën xhamat në ndërtesën e komunës. Kjo radio thekson se në këtë kohë në rrugë nuk kishte kalimtarë.

5 nëntor 1998

Rahovec: Defilimet e policisë pengojnë kthimin e popullatës

Në fshatrat e komunës së Rahovecit edhe më tej ka lëvizje të vazhdueshme të forcave serbe. Burimet e LDK-së nga kjo komunë bëjnë të ditur se këto lëvizje janë sidomos të intensifikuara në fshatrat Opterushë e Drenoc, ku forcat serbe po provokojnë popullatën e pakët të kthyer në këto fshatra të cilat në masë të madhe janë shkatërruar gjatë ofensivave të fundit serbe. Për këtë shkak një numër i të kthyerve janë detyruar të largohen sërish nga shtëpitë e tyre.

Njoftohet se një ekspeditë e policisë serbe e përbërë nga dy autoblinda, një pizgauer e një kamion u vendosë në qendër të fshatit Drenoc në oborrin e kooperativës bujqësore “Bujku” dhe vetëm falë prezencës së rastësishme të vëzhguesve ndërkombëtarë u evitua konflikti i provokuar nga forcat serbe.

Nga Kosova janë larguar 144.500 shqiptarë

Sipas shënimeve të OKB-së, UNHCR-së, BE-së etj., që nga fillimi i luftës, në marsin e këtij viti, jashtë Kosovës janë larguar së paku 144.500 shqiptarë.

Më poshtë po japim shifrat dhe vendet ku janë vendosur të larguarit, gjithnjë sipas shënimeve të organizatave të lartpërmendura.

Në Mal të Zi janë vendosur më së shumti të larguar nga Kosova, 43.000, në Shqipëri 26.000, në Maqedoni 20.000, në Bosnje Hercegovinë 9.000, në Gjermani 23.000, në Zvicër 14.000, në Itali 1.500, në Austri 3.000, në Belgjikë 300, në Turqi 2.500, në Francë 500 dhe në SHBA e Angli 2.000.

Foto: Podujeva