Festivali ikonë Coachella ka zbuluar listën e plotë të artistëve për edicionin e vitit 2026, i cili do të zhvillohet në Indio, Kaliforni, gjatë dy fundjavave tradicionale: 10–12 prill dhe 17–19 prill.

Ashtu si çdo vit, eventi pritet të tërheqë dhjetëra mijëra vizitorë nga mbarë bota, duke e shndërruar shkretëtirën kaliforniane në një nga skenat më të mëdha të muzikës dhe kulturës moderne. Kryefjalë do të jenë tre superyje: Sabrina Carpenter, Justin Bieber dhe Karol G.

Sabrina Carpenter, në moshën 26-vjeçare, do të ketë privilegjin të hapë festivalin më 10 e 17 prill, rikthehet si një nga emrat më të kërkuar pas suksesit global të “Espresso” dhe publikimit të albumit të fundit “Man’s Best Friend”, që e ka konsoliduar si një ikonë të pop-it modern.

Justin Bieber, 31 vjeç, do të performojë më 11 e 18 prill, duke sjellë përzierje të hiteve të njohura me materialet e reja nga albumet “Swag” dhe “Swag II”. Rikthimi i tij në Coachella pritet të ngjallë entuziazëm të madh, pasi është një nga emrat më të dashur për publikun global.

Karol G, e cila më 2024 fitoi çmim Grammy u bë zëri më i fuqishëm i muzikës latine, do mbyllë netët e mëdha të festivalit më 12 dhe 19 prill. Ajo do të ngjitet në skenë pas publikimit të albumit, “Tropicoqueta”, duke e forcuar statusin si një nga artistet më me ndikim të dekadës.

Përveç tre emrave kryesorë, line-up i Coachella 2026 është një përzierje eklektike e ikonave të muzikës dhe artistëve të rinj në ngjitje.

Në listë bëjnë pjesë The Strokes, Nine Inch Noize, David Byrne, Iggy Pop, Addison Rae, Sexyy Redd, Teddy Swims, Moby, Kaskade, Major Lazer, FKA Twigs, PinkPantheress, BIGBANG, the xx, KATSEYE, SOMBR dhe shumë të tjerë, duke garantuar një eksperiencë muzikore të larmishme që prek çdo gjini – nga pop-i dhe rock-u, te elektronika, hip-hopi dhe muzika alternative.

Biletat do të dalin në shitje më 19 shtator, në orën 11:00 sipas kohës lokale, dhe organizatorët u kanë bërë thirrje fansave të regjistrohen paraprakisht për të pasur qasje të sigurt, pasi çdo vit ato shiten me shpejtësi rekord.

Coachella mbetet një nga festivalet më të rëndësishëm e prestigjiozë në botë, jo vetëm për performancat madhështore, por edhe për atmosferën unike që krijon – një vend ku bashkohen arti, moda, kultura dhe energjia rinore.

Çdo vit, lindin trende të reja, debutohen bashkëpunime të papritura dhe kthehen në skenë yjet më të mëdhenj të muzikës botërore. Edicioni i vitit 2026 pritet të jetë një nga më të fuqishmit e dekadës.

Përgatiti: A.Z. /UBT News/

Ceremonia prestigjioze e çmimeve Emmy këtë vit nuk ishte thjesht një mbrëmje e dedikuar për artin dhe talentin në televizion, por u shndërrua edhe në një platformë për të përcjellë një mesazh të fuqishëm politik dhe humanitar: ndalimin e luftës në Gaza.

Shumë prej yjeve të kinemasë shfrytëzuan faktin që vëmendja e botës ishte e përqendruar në këtë event për të shprehur solidaritetin me popullin palestinez dhe për të kërkuar armëpushim të menjëhershëm.

Aktorja e“Hacks”, Hannah Einbinder, e cila fitoi çmimin për Aktorja më e Mirë në Rol Dytësor për interpretimin në komedinë “White Lotus”, kishte vendosur në veshjen e saj një karficë me hashtag-un #Artists4Ceasefire (Artistët për Armëpushim). Ky gjest u pasua edhe nga aktorë të tjerë si Aimee Lou Wood, Natasha Rothwell, Ruth Negga dhe Chris Perfetti, të cilët bënë të njëjtën zgjedhje simbolike.

Kjo karficë është kthyer në simbol të thirrjes globale për SHBA-në dhe aleatët ndërkombëtarë, të ndërhyjnë për ndalimin e ofensivës izraelite në Gaza, duke i dhënë fund luftës, krizës së urisë dhe vrasjes së civilëve të pafajshëm. Ylli i mbrëmjes ishte aktori spanjoll Javier Bardem.

I nominuar për rolin e tij në serialin “Monsters: The Lyle and Erik Menendez Story”, ai u shfaq në tapetin e kuq me një shall palestinez (keffiyeh), simbol i rezistencës dhe identitetit palestinez.

Në një deklaratë, Bardem u shpreh: “Nuk do të punoj me asnjë kompani që nuk e dënon gjenocidin në Gaza. Mungesa në kinematografi është e parëndësishme, krahasuar me vuajtjet e popullit në Gaza.”

Ai foli për një lëvizje në rritje mes punonjësve të industrisë së filmit në mbështetje të Palestinës, duke përmendur organizatën Film Workers for Palestine. Që nga 2023, karfica e #Artists4Ceasefire është bërë një element i zakonshëm në tapetet e kuq të eventeve madhore si Oscars, Emmy, dhe Golden Globes, duke shërbyer si mjet i qetë, por shumë i fuqishëm proteste.

Lufta në Gaza, e cila nisi në tetor 2023, vazhdon të jetë intensive e përgjakshme. Çdo ditë raportohen viktima të pafajshme, kriza humanitare thellohet nga mungesa e ushqimit, ujit dhe ndihmave mjekësore.

Përgatiti: A.Z. /UBT News/

Mathew Knowles, babai i Beyoncé, dhe ish-menaxheri i saj, ka thënë se e ka kuptuar që vajza e tij do bëhej yll që kur ajo performoi për herë të parë në një shfaqje talentesh në shkollën fillore.

“Ndërsa po përgatitej për të performuar, Beyoncé tha: ‘Dua të nxitohem ta marr çmimin prej 100 dollarësh dhe kupën time… e di që do fitoj.’ Pastaj doli në skenë dhe u transformua në tjetër njeri. Në atë moment e kuptova që e donte me shpirt këtë gjë”, tha Knowless në një intervistë për The Times.

73 vjeçi ka qenë menaxheri i Beyoncés gjatë karrierës me “Destiny’s Child”, por edhe në hapat e parë të karrierës solo. Ai e konsideron veten si një nga menaxherët më të suksesshëm në historinë e muzikës.

“Pas 21 vjetësh si menaxher i Beyoncés, buzëqesh sa herë që shoh se edhe sot revistat e muzikës flasin për 20 këngët e saj më të mira pop, dhe 70 për qind e tyre janë nga katër albumet e para, për të cilat kam qenë unë pjesë e ekipit”, ka thënë tutje Knowles.

Ai ka thënë se ndihet krenar kur sheh sa e suksesshme ka qenë puna që ka bërë me vajzën ndër vite.

“Të dish që kam qenë pjesë e këtij suksesi, që i mësova rëndësinë e zhvillimit të markës, që 30-40 për qind e ekipit janë njerëz që i kam punësuar para 30 vjetësh… kjo më bën të ndjehem krenar. Kam ndërtuar rrugën e suksesit për Beyoncén, dhe kjo më jep një ndjesi shumë të mirë”, thotë Knowless.

Megjithatë, ai është shprehur se ndihet i nënvlerësuar dhe nuk do të njihet vetëm si “babai i Beyoncés”.

“Dua ta ndryshoj bisedën e t’i tregoj botës tërësinë e gjërave të mrekullueshme që kam bërë, sepse kam bërë shumë më tepër se Beyoncé dhe ‘Destiny’s Chilld’. Nuk flasim për disa nga artistët e tjerë me të cilët kam punuar. U bëra menaxher i tyre sepse isha i kualifikuar, jo vetëm sepse isha babai i dikujt të famshëm”, ka theksuar ai.

Knowles ka folur me shqetësim për paragjykimet racore që, sipas tij, kanë ndikuar në mënyrën si e ka trajtuar industria. Ai ka thënë gjithashtu se mendon se do të vlerësohej më shumë po të ishte i bardhë.

“Po të kisha të njëjtin sukses, por të isha me ngjyrë tjetër të lëkurës, do të kisha marrë më shumë vlerësime dhe çmime si menaxher dhe drejtues i suksesshëm”, ka thënë ai.

Përgatiti: A.Z. /UBT News/

Legjenda britanike e rock-ut, The Rolling Stones, është “pothuajse gati” për të publikuar albumin e tyre të ri, sipas Marlon Richards, djalit të Keith Richards.

Pas suksesit të albumit Hackney Diamonds më 2023, albumi i 24-të i studios dhe i pari me këngë të reja që nga A Bigger Bang në 2005 – grupi duket se nuk ka ndërmend të ndalet. Albumi, që përfshinte edhe regjistrimet e fundit të bateristit Charlie Watts, i cili vdiq në 2021, u ngjit menjëherë në krye të top-listave britanike dhe fitoi Grammy për albumin më të mirë rock.

Në një intervistë për Record Collector, Marlon Richards tregoi se anëtarët e mbetur të grupit po punojnë intensivisht në studio në Londër.

“Janë aty çdo ditë, deri natën vonë. Mendoj se janë pothuajse gati. Grammy i fundit i ka motivuar shumë,” tha ai.

Ai shtoi se zërat për një turne po rriten: “Duket se po planifikojnë një turne në Europë”. Kjo vjen pas anulimit të mundshëm të turneut të këtij viti për shkak të problemeve me datat dhe vendet e koncerteve, ku ishin diskutuar qytete si Parisi, Londra, Barcelona dhe Roma.

Mick Jagger, 82 vjeç, Keith Richards, 81 vjeç, dhe Ronnie Wood, 78 vjeç, vazhdojnë të sfidojnë kohën dhe, nëse gjithçka shkon sipas planeve, viti 2026 mund të sjellë rikthimin madhështor të grupit në skenat europiane.

Pyetja mbetet: a do të arrijnë fansat këtë herë të marrin atë që duan?

Përgatiti: A.Z. /UBT News/