Më 12 dhjetor 2010 u mbajtën zgjedhjet e para parlamentare dy vjet pas shpalljes së pavarësisë së Kosovës në shkurt 2008.

Në këto zgjedhje të drejtë vote kishin mbi 1.6 milionë qytetarë sipas Komisionit Qendror Zgjedhor, prej tyre 73.288 votues të rinj.

Zgjedhjet u mbajtën në gjithsej 746 qendra të votimit me 2 mijë e 280 vendvotime.

Për këto zgjedhje ishin certifikuar 29 subjekte politike me 1.265 kandidatë për deputetë dhe ato u përcollën nga 32.021 vëzhgues, prej tyre 26 mijë e 59 të partive politike, 493 të organizatave ndërkombëtare, 351 të ambasadave dhe 5 mijë e 108 nga organizatat joqeveritare.

Zgjedhjet u mbajtën pasi kryeparlamentari i atëhershëm Jakup Krasniqi kishte shpallur më 2 nëntor shpërndarjen e legjislativit, pas votimit në Kuvend të mocionit për mos besimin e Qeverisë së drejtuar nga kryeministri Hashim Thaçi.

Ngritja e mocionit të mosbesimit u iniciua nga Aleanca Kosova e Re (AKR), pas krizës institucionale si rrjedhojë e tërheqjes së Lidhjes Demokratike të Kosovës nga koalicioni qeveritar me PDK-në dhe dorëheqjes së Fatmir Sejdiut nga posti i presidentit.

PDK-ja fitoi zgjedhjet e 12 dhjetorit. LDK-ja u rendit e dyta. Lëvizja Vetëvendosje, e cila mori pjesë për herë të parë, u rendit e treta, pasuar nga AAK e AKR-ja.

Komandant i KFOR-it gjeneralmajor Enrico Barduani priti sot në takim ambasadorët dhe shefat e misioneve nga 29 vendet aleate dhe partnere që kontribuojnë me trupa në misionin paqeruajtës të NATO-s në Kosovë.

Diskutimi u fokusua në një sërë temash, duke përfshirë situatën e sigurisë dhe aktivitetet aktuale të KFOR-it dhe bashkëpunimin me komunitetin ndërkombëtar.

“Kam vënë theksin në unitetin e përpjekjeve dhe qëllimit, në mënyrë që së bashku të kontribuojmë për sigurinë e qëndrueshme në mbarë Kosovën dhe sigurinë rajonale”, tha komandanti i KFOR-it.

KFOR-i vazhdon të zbatojë mandatin e tij për të kontribuar në një mjedis të sigurt për të gjithë njerëzit dhe komunitetet në Kosovë dhe lirinë e lëvizjes, në çdo kohë dhe në mënyrë të paanshme. KFOR-i punon në koordinim të ngushtë me Policinë e Kosovës dhe EULEX-in.

Britania e Madhe dhe Kosova janë partnerë në luftimin e krimit, ka shkruar Ambasada britanike në Prishtinë.

Ambasada në një postim në rrjetin X ka njoftuar se sekretari i përhershëm britanik Simon Ridley diskutoi sot me ministrin e Brendshëm Xhelal Sveçla, drejtorin e Policisë së Kosovës, Gazmend Hoxha dhe drejtorin e Doganës Agron Llugaliu mbi angazhimin e përbashkët për luftimin e krimit të organizuar transnacional.

“Rritja e bashkëpunimit tonë e bën më të vështirë veprimin e kriminelëve”, shkruan ambasada.

Agjencia e Azilit të BE-së (EUAA) njoftoi sot se mbi 100 mijë kërkesa për mbrojtje ndërkombëtare të dërguara nga sirianët në mërgim në BE janë duke u shqyrtuar në 27 shtete anëtare.

Në fund të tetorit janë regjistruar pak më shumë se 108.200 kërkesa në pritje për vendimin e parë dhe përveç kësaj, bëhet e ditur se kërkesat e refuzuara mund të ankimohen, tha i njëjti burim.

Këto të dhëna u publikuan në një kohë kur Gjermania, Italia, Suedia dhe Belgjika, njoftuan se po pezullonin shqyrtimin e kërkesave për azil nga sirianët pas rënies së Bashar al-Assad.

Qe nga fillimi i luftës në Siri, mbi gjysma e popullsisë është larguar nga vendi ose 13 milionë njerëz, sipas UNHCR. Turqia, Libani, Jordania, Egjipti pranuan shumicën e gjashtë milionë refugjatëve sirianë, por shumë prej tyre u larguan në Evropë.

Gjermania ka pothuajse 800 mijë refugjatë sirianë, ndërsa Suedia është në vendin e dytë.

Belgjika thotë se rreth 35 mijë sirianëve u është dhënë mbrojtje në tokën e saj gjatë dekadës së fundit. Franca numëronte 45.600 refugjatë sirianë në vitin 2024. Të dy vendet thanë se po trajtonin rreth 4.500 kërkesa të reja për azil nga sirianë qe nga fillimi i këtij viti.