Teknologji

A do të heqë dorë Elon Musk nga kontrolli i Twitterit?

Musk tha të martën se ai do të tërhiqet sapo kompania të identifikojë një pasardhës.

Published

3 years ago

December 26, 2022

Betim Gashi

Nga Max Zahn

Elon Musk u zotua se do të japë dorëheqje nga posti i shefit ekzekutiv të gjigantit Twitter, por ai do të mbetet një forcë dominuese në kompani, thanë disa ekspertë të menaxhimit për ABC News.

Sipërmarrësi miliarder, i cili bleu Twitterin, tha të martën se ai do të tërhiqet sapo kompania të identifikojë një pasardhës. Vendimi i tij vjen pas një sondazhi në Twitter, në të cilin një shumicë e përdoruesve i kërkuan Musk-ut të mos e udhëheqë më kompaninë.

Megjithatë ai do të mbajë kontrollin mbi departamentet e softuerit dhe serverëve, ekipe të rëndësishme që do t’i japin atij kontroll të rëndësishëm mbi mënyrën se si funksionon platforma.

Autoriteti i tij për shkak të pronësisë së kompanisë, si dhe ngurrimi i Musk-ut për të deleguar detyra kyçe, do të rezultojë në vendime të diktuara kryesisht nga preferencat e tij, thanë ekspertët.

Kompania, së cilës i mungon një bord drejtorësh, ka gjasa të punësojë një pasardhës të zgjedhur vetë me pikëpamje që i përputhen ngushtë me ato të Musk dhe një profil publik që është jashtëzakonisht i vogël në krahasim me të.

“Elon Musk do të thotë se: “Janë paratë e mia në lojë, është reputacioni im në lojë – unë duhet të jem pjesë e çdo vendimi”, Peter Harms, profesor i menaxhimit në Universitetin e Alabama, i cili ka studiuar udhëheqjen e korporatës, tha për ABC News.

Sipas tij, deri më tani Musk nuk ka treguar vullnet me bizneset e tij për të deleguar autoritetin.

Qëkur e bleu Twitterin, Musk ka bërë ndryshime dramatike. Ai shkarkoi drejtuesit kryesorë dhe përgjysmoi fuqinë punëtore të kompanisë prej 7 mijë e 500 personash. Ai riktheu disa llogari që ishin pezulluar më parë, siç është rasti me ish-presidentin amerikan, Donald Trump. Ai bëri edhe disa ndryshime sa i përket abonimit në Twitter, me opsionin Twitter Blue, që u mundëson përdoruesve të verifikojnë llogaritë përmes pagesës së një tarife mujore prej tetë dollarësh. Ky vendim u pezullua, pasi bashkë me të lindën edhe llogari të rreme që imitonin figurat publike dhe markat e njohura. Më pas u rikthye ky opsion.

Vendimet e tilla Musk i arsyetoi dhe tha se këto po bëhen me qëllim për ta shpëtuar Twitterin nga rreziku financiar. Muajin e kaluar ai tha se kompania po humb 4 milionë dollarë në ditë.

Së fundmi, Musk postoi një sondazh në platformë duke pyetur përdoruesit nëse ai duhet të japë dorëheqje. Sondazhi përfundoi mëngjesin e të hënës, ku 57.5% të votuesve thanë se ai duhet të largohet nga ky post dhe 42.5% thanë se nuk duhet. Pas një dite heshtjeje për rezultatet, Musk njoftoi se përfundimisht do të tërhiqet. Megjithatë, duke mbajtur kontrollin e ekipeve kryesore të produkteve, Musk do të jetë shumë i përfshirë në mbikëqyrjen e kompanisë, thanë ekspertët.

Sipas Sandra Sucher, profesoreshë e menaxhimit në Shkollën e Biznesit të Harvardit, ky hap i tij është i pasinqertë. Ajo tha se ai do të mbajë kontrollin operacional mbi një pjesë të madhe të biznesit.

“Nuk ka dyshim se ai do të mbetet kreu de facto”, shtoi ajo. “Përsa i përket shqetësimeve rreth vendimmarrjes dhe mënyrës sesi ai po e formëson biznesin për të reflektuar pikëpamjet e tij personale, është e paqartë se çfarë do të bëjë ky ndryshim”, deklaroi ajo tutje.

Miliarderi Musk, i cili drejton kompaninë e automjeteve elektrike Tesla, është përballur me presion në rritje për të kthyer fokusin e tij te prodhuesi i automjeteve. Aksionet e kompanisë kanë rënë 60% këtë vit, pasi kompania po përballet me konkurrencë të shtuar dhe sfida të prodhimit që u shkaktuan nga pandemia.

Dorëheqja e Musk “është bërë një domosdoshmëri për shkak të hemorragjisë në Tesla”, tha për ABC News, Jeffrey Sonnenfeld, një profesor i menaxhimit në Universitetin Yale.

Pavarësisht nevojës për një dorë të qëndrueshme në Tesla, Musk do ta ketë të vështirë të shkëputet nga operacionet e përditshme në Twitter, tha Harms, nga Universiteti i Alabama-s.

Dinamika aktuale në krye të Twitter – një lider vizionar që ka nevojë për një partner të orientuar nga logjistika – është shfaqur në industri në shumë raste, tha Harms, duke iu atribuar ish-CEO-s së Apple, Steve Jobs dhe shefit ekzekutiv, Tim Cook.

“Elon Musk ka nevojë për Tim Cook-un e tij”, tha Harms./UBTNews/

Automobilizëm elektrikë

Porsche prezanton drejtuesin e ardhshëm të kompanisë

Published

10 hours ago

October 21, 2025

UBT News

Bordi Mbikëqyrës i Porsche AG ka emëruar Michael Leiters si Drejtor Ekzekutiv të kompanisë, me detyrën që do ta marrë zyrtarisht më 1 janar 2026.

Leiters do të pasojë Oliver Blume, i cili ka udhëhequr Porsche për 10 vjet dhe do të vazhdojë karrierën e tij si Drejtor Ekzekutiv i Grupit Volkswagen.

Sipas Wolfgang Porsche, kryetarit të Bordit Mbikëqyrës, Blume udhëhoqi kompaninë me sukses në periudha të vështira, duke arritur rezultate rekord financiare, hyrje në tregje të reja dhe suksese të rëndësishme në sportet motorike.

Blume deklaroi se pas një dekade në krye të Porsche, ka vendosur të përqendrohet plotësisht te Volkswagen.

Ndërkohë, Michael Leiters vjen nga pozicioni i Drejtorit Ekzekutiv të McLaren Automotive, ku punoi që nga viti 2022.

Më parë, ai ka qenë Drejtor i Teknologjisë në Ferrari për mbi tetë vjet dhe ka punuar për më shumë se 13 vjet në Porsche, ku ishte përgjegjës për modelet Macan dhe Cayenne. /A.Z/UBT News/

Teknologji

Meta mbyll Messenger për desktop në Windows dhe Mac

Published

14 hours ago

October 21, 2025

UBT News

Meta ka njoftuar se aplikacioni i Messenger për desktop në Windows dhe Mac do të mbyllet.

Që nga 15 dhjetori, përdoruesit do të duhet të përdorin direkt Facebook për të vazhduar bisedat nga kompjuteri i tyre.

Gjatë procesit të mbylljes, përdoruesit do të marrin një njoftim brenda aplikacionit dhe do të kenë 60 ditë për të përdorur Messenger përpara se të mbyllet përgjithmonë.

Meta rekomandon që përdoruesit të ruajnë historikun e bisedave para se aplikacioni të zhduket, përndryshe të dhënat mund të humbasin përgjithmonë.

Ndërkohë, aplikacioni Messenger për desktop nuk është më i disponueshëm në Apple App Store. /A.Z/UBT News/

Teknologji

WhatsApp vendos kuotë mujore për mesazhe

Published

16 hours ago

October 21, 2025

UBT News

WhatsApp po teston një shtojcë të re për mesazhet që kufizon numrin e mesazheve pa përgjigje që një llogari mund t’i dërgojë një marrësi.

Ky kufizim synon kryesisht dërguesit që dërgojnë shumë mesazhe dhe llogaritë mashtruese.

Mesazhet e individëve dhe bizneseve do të llogariten në këtë limit, përfshirë mesazhet e shumta të palexuara që u dërgohen përdoruesve. Nëse marrësi përgjigjet, mesazhet hiqen nga kuota mujore. WhatsApp gjithashtu do të paralajmërojë llogaritë që afrohen pranë këtij kufiri.

Kompania thekson se përdoruesit mesatarë ndoshta nuk do ta arrijnë këtë limit, duke e bërë këtë një mënyrë për të parandaluar që individët t’u dërgojnë mesazhe atyre që nuk përgjigjen.

Aktualisht, testimi është i fokusuar tek bizneset dhe llogaritë mashtruese, por në javët e ardhshme do të shtrihet në disa vende.

Meta ka ndërmarrë më parë hapa për të zvogëluar mesazhet mashtruese. Vitin e kaluar mundësoi anulimin e abonimit nga mesazhet promocionale, ndërsa në gusht të këtij viti njoftoi që përdoruesit do të informohen kur dikush jashtë listës së kontakteve i shton në një grup.

Deri në gjysmën e parë të vitit 2025, WhatsApp ka ndaluar mbi 6.8 milionë llogari të lidhura me qendrat e mashtrimit. /A.Z/UBT News/

Teknologji

Rrjeti global në kaos! Pse mijëra aplikacione u ndërprenë pas rënies së Amazon Web Services?

Published

18 hours ago

October 21, 2025

UBT News

AMAZON Web Services (AWS), gjigandi i njohur si shtylla kurrizore e internetit, ka pësuar një ndërprerje të madhe që preku mijëra biznese dhe miliona përdorues në mbarë botën.

Situata u përshkrua nga drejtuesi i kompanisë rivale Cloudflare, i cili pranoi se ishte i lehtësuar që problemi nuk kishte të bënte me ta, shkruan BBC. Platformat e goditura ishin: Snapchat dhe Reddit, banka si Lloyds dhe Halifax, dhe lojëra popullore Roblox dhe Fortnite.

AWS ofron infrastrukturën bazë për rreth një të tretën e internetit global, duke ofruar ruajtje të dhënash, menaxhim bazash të të dhënave dhe fuqi llogaritëse. Kjo u mundëson kompanive të shmangin koston e kompleksitetin e mirëmbajtjes së serverëve, ndërkohë që AWS kujdeset për nevojat teknologjike të tyre.

Problemi kishte të bënte me një çështje të zakonshme: një gabim në Sistemin e Emrave të Domaineve. Ekspertët e teknologjisë e përmendin shprehjen “Është gjithmonë DNS!”, duke nënkuptuar se ky është një nga burimet më të zakonshme të prishjeve në internet.

DNS funksionon si një hartë e internetit, kur një përdorues klikon një aplikacion ose faqe, sistemi i tij dërgon një kërkesë për lidhje.

Në këtë rast, AWS e “humbi” atë hartë: platformat si Snapchat dhe Canva ishin funksionale, por trafiku nuk dinte ku të drejtohej.

Ndërprerje të tilla ndodhin për shumë arsye, nga mirëmbajtja e planifikuar dhe dështimet e serverëve, deri te gabimet njerëzore apo konfigurimet e gabuara. Mund të bëhet fjalë edhe për sulme kibernetike, megjithëse në këtë rast nuk ka asnjë provë për një të tillë.

AWS konfirmoi se incidenti ndodhi në qendrën e të dhënave në Virxhinian Veriore, e cila është njëkohësisht më e madhja dhe më e vjetra.

Kjo ngjarje është shembull i qartë i rrezikut të varësisë nga një ofrues i vetëm i shërbimeve cloud. AWS është thelbësore për funksionimin e miliona bizneseve, dhe alternativa të vërteta janë shumë të pakta.

Në treg, konkurrentët kryesorë janë Microsoft Azure dhe Google Cloud Platform, ndërsa IBM, Alibaba Cloud dhe platforma evropiane Stackit (e lansuar nga kompania mëmë e supermarketit Lidl) mbeten lojtarë më të vegjël.

Për shkak të pozitës dominuese të gjigantëve amerikanë, shtrohet pyetja nëse Evropa dhe Mbretëria e Bashkuar duhet të zhvillojnë infrastrukturën e tyre cloud për të reduktuar varësinë nga SHBA, ndonëse ekspertët mendojnë se për këtë tashmë mund të jetë vonë. /A.Z/UBT News/