Kryeministri i Kosovës, Albin Kurti ka njoftuar se është takuar me Kancelarin Federal të Austrisë, Christian Stocker.

Përmes, një psotimi në profilin e tij në rrjetin social Facebook, Kurti ka shkruar se biseduan për mundësitë konkrete të bashkëpunimit ekonomik: energji, hekurudha dhe teknologji digjitale, sektor në të cilin kompanitë austriake dhe mërgata jonë po investojnë gjithnjë e më shumë.

“Para katër muajsh mes tjerash folëm për dy hapa konkretë: integrimin në SEPA dhe zonën roaming të BE-së. Për të parin tashmë kemi përmbushur edhe kushtin e fundit, me tërësinë e ligjeve të nevojshme, dhe për të dytin presim nisjen e negociatave së shpejti”, ka shkruar Kurti.

Postimi i plotë:

Në Vjenë u takuam vetëm dy ditë pas zgjedhjeve të parakohshme parlamentare të 7 Qershorit, ndërsa këtë mëngjes në Shën Stefan në detin Adriatik biseda me Kancelarin Federal të Austrisë, Christian Stocker, u përqendrua në prioritetet e Qeverisë në mandatin e ri dhe avancimin e mëtejmë të marrëdhënieve dypalëshe.

Biseduam për mundësitë konkrete të bashkëpunimit ekonomik: energji, hekurudha dhe teknologji digjitale, sektor në të cilin kompanitë austriake dhe mërgata jonë po investojnë gjithnjë e më shumë.

Para katër muajsh mes tjerash folëm për dy hapa konkretë: integrimin në SEPA dhe zonën roaming të BE-së. Për të parin tashmë kemi përmbushur edhe kushtin e fundit, me tërësinë e ligjeve të nevojshme, dhe për të dytin presim nisjen e negociatave së shpejti.

Mbështes deklaratën e Kancelarit Stocker se Bashkimi Evropian nuk është i plotë, i sigurt dhe i qëndrueshëm pa Ballkanin Perëndimor dhe se të gjithë kandidatët duhet të trajtohen njëlloj, me të njëjtat kushte. Në bazë të meritës, Republika e Kosovës është gati për avancim në rrugën evropiane, statusin e vendit kandidat dhe hapjen e negociatave.

Nga Ekonomia Online

Komisionerja për Zgjerim e Bashkimit Evropian, Marta Kos, ka vlerësuar se javët dhe muajt në vijim do të jenë vendimtarë për vendet e Ballkanit Perëndimor në rrugën drejt integrimit evropian, duke veçuar për Kosovën rëndësinë e respektimit të së drejtës ndërkombëtare dhe sundimit të ligjit.

Para fillimit të Samitit të Procesit të Berlinit në Mal të Zi, Kos ka përmendur sfidat kryesore me të cilat përballen vendet e rajonit, duke thënë se për Kosovën nevojiten vendime vendimtare për të vazhduar në përputhje me standardet ndërkombëtare.

Ajo ka theksuar se për Malin e Zi moment vendimtar është përfundimi i negociatave të anëtarësimit, për Serbinë zgjedhjet e ardhshme, ndërsa për Shqipërinë ruajtja e ritmit të integrimit evropian.

Deklarata e Kos vjen në kuadër të Procesit të Berlinit, i cili synon forcimin e bashkëpunimit rajonal dhe avancimin e perspektivës evropiane të vendeve të Ballkanit Perëndimor.

“Jam gjithmonë e lumtur të kthehem në këtë shtet, i cili është i vendosur të bëhet anëtar i BE-së. Kemi përpara javë dhe muaj me momente vendimtare. Për Malin e Zi, do të jetë vendimtare arritja në vijën e ‘finishit’ të procesit të anëtarësimit në BE; për Serbinë, zgjedhjet e së dielës së ardhshme; për Shqipërinë, ruajtja e ritmit në rrugën drejt integrimit evropian; ndërsa për Kosovën, zgjedhja vendimtare për të vazhduar në përputhje me të drejtën ndërkombëtare dhe sundimin e ligjit. Prandaj, mendoj se është shumë mirë që liderët e rajonit dhe të gjithë procesit të zgjerimit janë mbledhur sot në Mal të Zi”, tha ajo.

Kosova aplikoi për anëtarësim në Bashkimin Evropian në dhjetor të vitit 2022, mirëpo ende nuk e ka statusin e vendit kandidat dhe nuk ka nisur negociatat formale për anëtarësim.

Përveç reformave institucionale dhe forcimit të sundimit të ligjit, rruga evropiane e Kosovës ndërlidhet edhe me dialogun për normalizimin e marrëdhënieve me Serbinë, të ndërmjetësuar nga Bashkimi Evropian./KosovaPress/

Për herë të parë, Kosova mirëpret një nga ngjarjet e rëndësishme të komunitetit evropian të cilësisë, duke e vendosur Parkun Shkencor, Inovativ dhe Teknologjik të UBT-së në qendër të takimit të rëndësishëm ndërkombëtar të ekspertizës, inovacionit dhe vizionit për të ardhmen.

Me hapjen zyrtare të Kongresit të 67-të të Organizatës Evropiane për Cilësi, UBT shënon një moment të rëndësishëm për Kosovën dhe bashkëpunimin e saj evropian.

Hapjen e këtij Kongresi e bëri Presidenti dhe Rektori i UBT-së, Prof. Dr. Edmond Hajrizi, njëherësh president i Quality Kosova dhe Zëvendëspresident i Organizatës Evropiane për Cilësi (EOQ), i cili vlerësoi se cilësia në epokën moderne duhet të tejkalojë konceptin tradicional të standardeve dhe certifikimeve, duke u shndërruar në një forcë strategjike për zhvillim, inovacion dhe transformim shoqëror.

“Cilësia nuk mund të kuptohet më vetëm si përputhje me standardet, procedurat ose kërkesat e certifikimit. Cilësia duhet të bëhet një kapacitet strategjik për më tepër, cilësia duhet të mbetet thellësisht e lidhur me vlerat njerëzore, sepse përparimi teknologjik pa besim është i brishtë, dhe inovacioni pa përgjegjësi është i paplotë”, theksoi Rektori Hajrizi.

Duke u ndalur te rëndësia historike e këtij organizimi për Kosovën dhe UBT-në, Rektori Hajrizi vuri në pah se pritja e Kongresit të EOQ-së për herë të parë në Kosovë paraqet një hap të rëndësishëm drejt forcimit të lidhjeve me komunitetin evropian dhe ndërkombëtar të cilësisë, si dhe një mundësi për prezantimin e potencialit të vendit në arenën ndërkombëtare.

“Për Kosovën, pritja e Kongresit të EOQ-së për herë të parë është veçanërisht domethënëse. Ajo përfaqëson një mundësi për të lidhur institucionet, profesionistët dhe të rinjtë tanë më ngushtë me komunitetin evropian dhe ndërkombëtar të cilësisë, duke paraqitur një Kosovë ambicioze, të hapur nga jashtë dhe të përkushtuar ndaj inovacionit dhe bashkëpunimit evropian”, u shpreh Rektori Hajrizi.

Në këtë frymë, kongresi shërben si një platformë e rëndësishme për bashkimin e ekspertizës akademike, përvojës profesionale dhe vizionit institucional, duke krijuar hapësira të reja për bashkëpunim, shkëmbim të praktikave më të mira dhe avancim të standardeve të cilësisë në Kosovë dhe më gjerë.

Në hapjen zyrtare të kongresit mori fjalën edhe Presidenti i EOQ, Prof. Dr. Paulo Sampaio, i cili e vendosi këtë ngjarje në kontekstin e 70-vjetorit të EOQ-së, duke theksuar se ky përvjetor shënon jo vetëm një histori të gjatë të udhëheqjes në fushën e cilësisë, por edhe një thirrje për angazhim të përbashkët drejt së ardhmes.

“Është kënaqësi t’ju bashkohem këtu, në 70-vjetorin e Organizatës Evropiane për Cilësi dhe të uroj organizatën, si dhe UBT-në për bashkimin tonë në këtë ngjarje të përshtatshme dhe të rëndësishme. Ky përvjetor është një kremtim i shtatë dekadave të udhëheqjes në cilësi, por është gjithashtu një thirrje për veprim për Evropën dhe për Kosovën”, theksoi Prof. Dr. Paulo Sampaio.

Duke folur për rolin e njerëzve në zhvillimin e organizatave dhe në krijimin e vlerave të qëndrueshme, presidenti i EOQ-së nënvizoi se suksesi nuk mund të ndërtohet vetëm mbi strategji dhe plane, por mbi marrëdhënie të forta, besim dhe angazhim të përbashkët.

“Pasuria më e madhe e organizatës është te njerëzit e saj, te anëtarët e saj. Asnjë strategji nuk mund të zbatohet pa njerëz, dhe asnjë organizatë nuk mund të krijojë vlerë afatgjatë pa marrëdhënie”, u shpreh Sampaio.

Ai theksoi gjithashtu se e ardhmja e organizatave dhe e institucioneve varet nga aftësia për të bashkëpunuar dhe për të ndërtuar një vizion të përbashkët.

“E ardhmja nuk do të përcaktohet nga ajo që mund të arrijë një president, një bord apo një organizatë e vetme, por nga ajo që mund të arrihet bashkërisht përmes besimit dhe qëllimit të përbashkët”, deklaroi presidenti i EOQ-së.

Në ceremoninë hapëse mori pjesë edhe zëvendësministri i Industrisë, Ndërmarrësisë, Tregtisë dhe Inovacionit në Qeverinë e Republikës së Kosovës, Jeton Mehmeti, i cili theksoi rëndësinë e Kongresit të 67-të të EOQ-së për zhvillimin e kulturës së cilësisë në Kosovë, rritjen e konkurrueshmërisë së bizneseve dhe forcimin e integrimit të tyre në tregjet evropiane dhe ndërkombëtare.

“Për ne, cilësia nuk është thjesht zbatimi i standardeve apo i kërkesave teknike. Ajo është një element jetik i besimit të konsumatorit, një parakusht për konkurrencë të drejtë, një shtytës i inovacionit dhe një faktor i rëndësishëm në integrimin e bizneseve tona në tregun evropian dhe ndërkombëtar”, u shpreh Mehmeti.

Shefi i Seksionit Politik, Ekonomik dhe të Integrimit në Zyrën e Bashkimit Evropian në Kosovë, Boguslaw Gertruda, foli për rëndësinë strategjike të cilësisë në procesin e integrimit evropian të Kosovës, duke theksuar rolin e saj në forcimin e institucioneve, rritjen e konkurrueshmërisë dhe ndërtimin e besimit te qytetarët.

“Për Kosovën, ky mesazh është veçanërisht i rëndësishëm teksa ajo përparon në rrugën e saj evropiane. Konvergjenca me Bashkimin Evropian ka të bëjë me rrënjosjen e një kulture të cilësisë në qeverisje, në arsim dhe aftësi, në performancën industriale, në sistemet shëndetësore, në funksionimin e tregjeve të bazuara në rregulla dhe në besueshmërinë e institucioneve publike. Cilësia ndihmon në shndërrimin e reformave në rezultate dhe të ambicies në besim”, theksoi Gertruda.

Ndërkaq, drejtori i përgjithshëm i Drejtorisë së Përgjithshme të Akreditimit të Kosovës, Irfan Lipovica, foli për rëndësinë e akreditimit dhe avancimit të infrastrukturës së cilësisë, duke vënë në pah nevojën për harmonizim me standardet evropiane dhe ndërkombëtare, si dhe për forcimin e besueshmërisë së produkteve dhe shërbimeve.

“Përmes akreditimit dhe besueshmërisë së rezultateve, mbrojtja e konsumatorit dhe besimi te produktet dhe shërbimet forcohen. Për Drejtorinë e Përgjithshme të Akreditimit të Kosovës, avancimi i infrastrukturës së cilësisë, harmonizimi me standardet evropiane dhe ndërkombëtare, si dhe arritja e njohjes ndërkombëtare të rezultateve të vlerësimit të konformitetit janë prioritete shumë të rëndësishme”, u shpreh Lipovica.

Kongresi i 67-të i EOQ-së shënon një moment me rëndësi të veçantë për pozicionimin e Kosovës në diskutimet evropiane mbi cilësinë, standardizimin, akreditimin dhe inovacionin. Përmes këtij organizimi, UBT krijon një hapësirë të përbashkët për dialog ndërmjet akademisë, institucioneve publike dhe komunitetit profesional ndërkombëtar, duke e sjellë Kosovën në qendër të shkëmbimit të ideve dhe përvojave që synojnë përmirësimin e vazhdueshëm të sistemeve të menaxhimit dhe avancimin e standardeve profesionale.

Me organizimin e këtij kongresi, UBT dëshmon rolin e tij si një institucion që krijon ura bashkëpunimi ndërkombëtar dhe hap horizonte të reja për zhvillimin akademik, profesional dhe teknologjik të Kosovës. Ngjarja përfaqëson më shumë sesa një takim të ekspertëve: ajo është një platformë ku vizioni evropian për cilësinë takohet me potencialin e Kosovës, duke krijuar mundësi për partneritete të reja, shkëmbim të dijes dhe përfshirje më të madhe në rrjetet ndërkombëtare të ekspertizës.

Sesionet e Kongresit do të vazhdojnë sot dhe nesër, ku ekspertët botërorë do të prezantojnë për tematika të ndryshme.

Teksa në Senatin amerikan diskutohet një nismë për vendosjen e sanksioneve ndaj zyrtarëve serbë për shkak të bashkëpunimit me Rusinë, Kinën dhe Iranin, Beogradi zyrtar po thellon lidhjet me Teheranin në fushën e inteligjencës artificiale (IA) dhe të teknologjive të informacionit dhe komunikimit.

Në shkurt të vitit 2025, Serbia dhe Irani nënshkruan një memorandum bashkëpunimi në këtë fushë. Që atëherë, dy vendet janë pajtuar për krijimin e një komiteti të përbashkët për zbatimin e tij, ndërsa dy ministra të Qeverisë së Serbisë janë takuar me homologët iranianë për të diskutuar zgjerimin e bashkëpunimit.

Shtetet e Bashkuara janë në luftë me Iranin që nga 28 shkurti, teksa Teherani zyrtar është gjithashtu nën sanksionet e Bashkimit Evropian (BE), anëtarësimin në të cilin e synon Serbia.

Një nismë dypartiake për miratimin e një ligji për Serbinë është paraqitur së fundi në Senatin amerikan. Nisma propozon edhe vendosjen e sanksioneve për vizat dhe atyre financiare ndaj zyrtarëve serbë.

“Serbia dhe Irani kanë thelluar lidhjet teknologjike dhe politike, pavarësisht sanksioneve të gjera që SHBA-ja dhe bashkësia ndërkombëtare i kanë vendosur Iranit”, thuhet, ndër të tjera, në tekstin e paraqitur nga senatori republikan Chuck Grassley dhe kolegu i tij demokrat, Richard Blumenthal.

Megjithatë, në Serbi operojnë kompani të mëdha amerikane në fushën e zhvillimit të inteligjencës artificiale. Në fillim të tetorit, Beogradi zyrtar nënshkroi në Kombet e Bashkuara Deklaratën e Përbashkët për Partneritetin për Mundësitë në Fushën e Inteligjencës Artificiale, duke iu bashkuar partneritetit të udhëhequr nga SHBA-ja.

“Nuk e di se çfarë mund t’i ofrojë Irani Serbisë në aspektin teknologjik përmes këtij bashkëpunimi”, thotë për Radion Evropa e Lirë (REL) eksperti i inteligjencës artificiale, Aleksandar Linc Gjorgjeviq.

Për çfarë bisedoi ministri serb në Teheran?

Në fund të shkurtit të vitit 2025, Serbinë e vizitoi ministri iranian i Telekomunikacionit, Seyed Sattar Hashemi.

Gjatë kësaj vizite, ai nënshkroi me ministrin e atëhershëm të Informacionit dhe Telekomunikacionit të Serbisë, Dejan Ristiq, Memorandumin e Mirëkuptimit dhe Bashkëpunimit në fushën e teknologjive të informacionit dhe komunikimit (TIK).

Sipas njoftimit të Qeverisë së Serbisë, dokumenti përfshin teknologjitë e informacionit dhe komunikimit, sigurinë e informacionit, tregtinë elektronike, qeverisjen elektronike dhe zhvillimin e inteligjencës artificiale. Ristiq theksoi veçanërisht rëndësinë e veprimit të përbashkët të kompanive të të dyja vendeve në tregjet e treta.

Pala iraniane e paraqiti bashkëpunimin me synime edhe më ambicioze: përmendi teknologjinë 5G, infrastrukturën digjitale, sigurinë kibernetike, qeverisjen elektronike, transferimin e të dhënave, ndërmarrjet e reja teknologjike, laboratorët e përbashkët kërkimorë dhe shkëmbimin e ekspertëve.

Pak më shumë se një vit më vonë, ministri aktual i Informacionit dhe Telekomunikacionit i Serbisë, Boris Bratina, u takua me homologun e tij iranian, Hashemi, në Teheran. Ata ranë dakord për formimin e një komiteti të përbashkët për zbatimin e Memorandumit të Mirëkuptimit ndërmjet dy ministrive.

Takimi u mbajt në fillim të korrikut, gjatë vizitës së ministrit serb në Teheran, që nxiti polemika në Perëndim. Atje, ai përfaqësoi qeverinë e vendit të tij në funeralin e udhëheqësit suprem të Iranit, ajatollah Ali Khamenei, i vrarë në sulmet me raketa amerikane.

Sipas njoftimit zyrtar të ministrisë iraniane, Hashemi propozoi shkëmbimin e përvojave në fusha të ndryshme, përfshirë qendrat e të dhënave dhe inteligjencën artificiale.

“Irani është i gatshëm të ndajë me Serbinë përvojën e tij në prodhimin e pajisjeve të veta harduerike, zhvillimin e qendrave të të dhënave dhe të infrastrukturës në ‘cloud’, si dhe në realizimin e projekteve të përbashkëta në fushën e inteligjencës artificiale”, tha Hashemi.

Si një nga detyrat më të rëndësishme, ministri iranian përmendi “krijimin e një korridori për transmetimin e të dhënave ndërmjet Iranit dhe rajonit të Ballkanit”.

Deklarata të ngjashme dha edhe homologu i tij serb, Boris Bratina. Ai theksoi se “realizimi i projekteve që lidhen me rrjetet optike, inteligjencën artificiale, mësimin elektronik dhe industrinë e video-lojërave bën pjesë në fushat më të rëndësishme të bashkëpunimit ndërmjet dy vendeve”.

Ministria e Informacionit dhe Telekomunikacionit nuk iu përgjigj pyetjeve të Radios Evropa e Lirë (REL) nëse është shënuar ndonjë përparim i mëtejshëm në bashkëpunimin me Iranin dhe çfarë do të përfshinte konkretisht ky bashkëpunim.

“Akrobaci diplomatike”

Aleksandar Linc Gjorgjeviq, ekspert i teknologjisë dhe drejtor i konferencës “Data Science Conference”, nuk pret hapa konkretë në bashkëpunimin serbo-iranian.

“Ne kemi një konflikt të hapur ndërmjet Iranit dhe Shteteve të Bashkuara të Amerikës. Në të njëjtën kohë, shumica e kompanive që zhvillojnë inteligjencën artificiale në Serbi janë amerikane ose punojnë për tregun amerikan. Pyetja është se si mund të bashkëpunoni në një kontekst të tillë me një vend që është nën sanksione ndërkombëtare”, thotë Linc Gjorgjeviq.

Sipas të dhënave të Dhomës Amerikane të Tregtisë, në fushën e inteligjencës artificiale në Serbi operojnë gjigantët amerikanë të teknologjisë IBM, Microsoft dhe Oracle.

Në mars të vitit 2026, Zyra për Teknologjinë e Informacionit dhe Qeverisjen Elektronike pranë Qeverisë së Serbisë nënshkroi një Memorandum Mirëkuptimi për bashkëpunimin në fushën e teknologjisë së informacionit dhe inteligjencës artificiale me përfaqësues të kompanisë IBM.

Sipas Aleksandar Linc Gjorgjeviqit, përfshirja e Iranit në sistemin e informacionit dhe komunikimit të Serbisë mund të shihet si rrezik për kompanitë amerikane.

“Ato, me të drejtë të plotë, mund ta shohin një hap të tillë si sinjal negativ. Nëse bashkëpunimi me Iranin fillon të zbatohet në praktikë, jam i sigurt se administrata amerikane do të reagojë me pasoja të caktuara, duke pasur parasysh se Uashingtoni e ka ngritur çështjen e inteligjencës artificiale në nivelin më të lartë të mundshëm”, vlerëson Linc Gjorgjeviq.

Bashkëpunimin e Serbisë me Iranin në këtë fushë, bashkëbiseduesi i REL-it e sheh si një “akrobaci diplomatike” të Beogradit zyrtar, në përpjekje për të ruajtur marrëdhënie të mira në disa fronte njëkohësisht.

“Më duket se në Serbi askush nuk merret me çështjet në nivel strategjik, por gjërat bëhen në mënyrë ad hoc”, shton ai.

Çfarë kapacitetesh kanë Serbia dhe Irani në fushën e inteligjencës artificiale?

Për shkak të izolimit ndërkombëtar dhe qasjes së kufizuar në teknologjinë perëndimore, Irani prej vitesh është i detyruar të zhvillojë kapacitetet e veta vendore.

Një analizë e kompanisë amerikane “Recorded Future”, e cila merret me sigurinë kibernetike, thotë se Teherani po përpiqet të ndërtojë një ekosistem vendor të inteligjencës artificiale dhe kapacitete kërkimore, por pikërisht izolimi ekonomik ia kufizon qasjen në teknologji dhe kapital njerëzor.

Në nëntor të vitit 2021, udhëheqësi i atëhershëm suprem i Iranit, Ali Khamenei, e quajti inteligjencën artificiale “një çështje të rëndësishme që lidhet me të ardhmen”, e cila do të “luajë rol në qeverisjen e ardhshme të botës”. Ai i bëri thirrje Iranit që të bëhej një nga dhjetë vendet kryesore në fushën e inteligjencës artificiale.

Pas kësaj, Irani nisi hartimin e një udhërrëfyesi kombëtar për inteligjencën artificiale, në kuadër të të cilit u analizuan “dokumentet strategjike” të 23 vendeve në këtë fushë. U hartua gjithashtu një plan për realizimin e synimit të Khameneit deri në vitin 2032.

Objektivat e përcaktuara në këtë dokument parashikonin që “80 për qind e kërkimeve të orientoheshin drejt përmbushjes së nevojave të vendit, inteligjenca artificiale të zbatohej në 45 për qind të sektorëve industrialë, në këtë fushë të investoheshin tetë miliardë dollarë dhe pjesa e inteligjencës artificiale në Prodhimin e Brendshëm Bruto të arrinte në 12 për qind”, thuhet në raportin e kompanisë “Recorded Future”.

Serbia aktualisht nuk ka një ligj që rregullon fushën e inteligjencës artificiale. Në fuqi është Strategjia për Zhvillimin e Inteligjencës Artificiale për periudhën 2025-2030, si dhe Udhëzimet Etike për Zhvillimin dhe Përdorimin e IA-së, të cilat nuk janë ligjërisht të detyrueshme.

Aleksandar Linc Gjorgjeviq thotë se Serbia ka kapacitete të mira teknologjike në fushën e inteligjencës artificiale.

“Serbia renditet veçanërisht mirë sa i përket kompetencave të inxhinierëve”, thotë ai.

Në fund të vitit 2021, në Qendrën Shtetërore të të Dhënave në Kragujevc, në Serbinë qendrore, nisi punën Platforma Kombëtare për Inteligjencën Artificiale.

Sipas burimeve zyrtare, kjo platformë është një superkompjuter i gjeneratës së fundit, me performancë të lartë, i aftë të përpunojë sasi të mëdha të dhënash brenda një kohe të shkurtër.

Me kë bashkëpunojnë Serbia dhe Irani në fushën e TIK-ut?

Përveç Iranit, Beogradi zyrtar ka nënshkruar gjatë periudhës së fundit marrëveshje dypalëshe në fushën e teknologjive të informacionit dhe komunikimit, telekomunikacionit, sigurisë së informacionit ose inteligjencës artificiale me rreth dhjetë vende të tjera.

Mes tyre janë Kina, Katari, Emiratet e Bashkuara Arabe, Izraeli, Egjipti, Turqia, Mbretëria e Bashkuar, Burundi dhe Angola.

Që nga viti 2019, Serbia e ka intensifikuar bashkëpunimin me Kinën në fushën e inteligjencës artificiale. Në vitin 2026, përfaqësuesit e dy vendeve nënshkruan një memorandum bashkëpunimi në këtë fushë, si dhe një marrëveshje për themelimin e Organizatës Botërore për Bashkëpunim në Fushën e Inteligjencës Artificiale.

Për këtë arsye, Beogradi zyrtar është vënë në shënjestër të kritikave nga Shtetet e Bashkuara, por edhe nga Komisioni Evropian, i cili në një përgjigje të mëhershme për REL-in rikujtoi se Serbia është zotuar të harmonizohet me rregulloret e Brukselit, përfshirë kuadrin evropian për rregullimin e inteligjencës artificiale dhe Aktin e miratuar të BE-së për inteligjencën artificiale.

Nga ana tjetër, sipas dokumenteve që janë të qasshme publikisht, Ministria iraniane e Komunikimit dhe Teknologjisë së Informacionit ka marrëveshje bashkëpunimi që përfshijnë shprehimisht inteligjencën artificiale me Serbinë, Irakun dhe Rusinë.

Përveç kësaj, Irani ka edhe marrëveshje bashkëpunimi teknologjik me Kinën, ndërsa burimet zyrtare iraniane e përmendin inteligjencën artificiale si një nga fushat kryesore të bashkëpunimit dypalësh.

Burimi: Radio Evropa e Lirë