Lajmet

24 Janari, Dita Ndërkombëtare e Arsimit

Published

on

Dita Ndërkombëtare e Arsimit është një mundësi e shkëlqyer për të reflektuar mbi rëndësinë e arsimit dhe rolin që luan në zhvillimin e shoqërive dhe individëve. Arsimi është një e drejtë themelore për çdo individ, dhe siç e thotë Deklarata Universale e të Drejtave të Njeriut, ai duhet të jetë i disponueshëm për të gjithë, pa përjashtime. Kjo është thelbësore për krijimin e një shoqërie të barabartë, ku çdo individ ka mundësi të zhvillohet dhe të kontribuoni në shoqëri.

Përmes arsimit, individët mund të fitojnë njohuri dhe aftësi që i ndihmojnë të përballen me sfidat e jetës, të ndërtojnë mundësi më të mira për të ardhmen dhe të kontribuojnë në zhvillimin ekonomik dhe social të shoqërisë. Pavarësisht rëndësisë, arsimi ende nuk është i arritshëm për shumë fëmijë dhe të rinj, veçanërisht në disa rajone të botës, si në Afrikën Subsahariane dhe në rajone të tjera të varfra apo të përfshira në konflikte.

Sipas të dhënave të OKB-së, rreth 244 milionë fëmijë dhe adoleshentë janë jashtë shkollës. Ky është një problem shumë i madh, që kërkon vëmendje dhe ndërhyrje të menjëhershme. Përveç kësaj, edhe ata që janë në shkolla, nuk kanë gjithmonë mundësi për të marrë një arsim të mirëfilltë. Rreth 617 milionë fëmijë dhe adoleshentë nuk mund të lexojnë dhe të bëjnë matematikë bazë. Kjo do të thotë që, edhe pse ata janë fizikisht të pranishëm në shkolla, cilësia e arsimit që ata po marrin është e pamjaftueshme për t’i përgatitur ata për jetën dhe për sfidat që mund të hasin. Arsimi cilësor është një mundësi për të thyer ciklin e varfërisë.

Përmes një arsimi cilësor, individët mund të zhvillojnë aftësi që i mundësojnë të përfitojnë nga mundësitë e punës dhe të krijojnë jetesa më të mira për veten dhe për familjet e tyre. Ky është një aspekt shumë i rëndësishëm për të adresuar pabarazitë dhe për të arritur zhvillim të qëndrueshëm. Sipas OKB-së, investimi në arsimin e cilësisë është një nga mënyrat më efektive për të luftuar varfërinë dhe për të arritur qëllimet e zhvillimit të qëndrueshëm (SDGs).

Një problem i veçantë është mbështetja e arsimit për vajzat dhe gratë, veçanërisht në disa vende në zhvillim. Rreth 40% e vajzave në Afrikën Subsahariane përfundojnë shkollën e mesme të ulët, dhe shumë vajza ende nuk kanë mundësi të shkollohen për shkak të kushteve ekonomike, traditave dhe normave shoqërore që i ndalojnë ato të kërkojnë arsim.

Kjo ka pasoja të thella për barazinë gjinore dhe zhvillimin ekonomik të shoqërive. Një tjetër grup i vunerabël janë fëmijët dhe të rinjtë refugjatë. Rreth katër milionë fëmijë dhe të rinj refugjatë janë jashtë shkollës, një situatë që përkeqësohet për shkak të konflikteve të armatosura, pasojave të ndryshimeve klimatike dhe krizave humanitare. Ky është një realitet i hidhur, sepse këta individë janë ata që kanë më shumë nevojë për arsim dhe mundësi për të ndihmuar në rikuperimin e jetëve të tyre pas krizave, por shpesh janë të pamundur të kenë qasje në mundësi arsimimi. Në një botë gjithnjë e më të digjitalizuar, arsimi ka mundësi të zhvillohet përmes teknologjisë.

Mjetet e mësimit digjital dhe platforma online mund të ndihmojnë shumë fëmijë dhe të rinj në zonat e izoluara apo në situata emergjente për të pasur qasje në materiale arsimore dhe mundësi për të mësuar. Megjithatë, kjo gjithashtu kërkon investime në infrastrukturën teknologjike dhe përgatitjen e mësuesve për të përdorur këto mjete në mënyrë efektive. Ka shumë iniciativa globale që kanë për qëllim të përmirësojnë cilësinë dhe qasjen në arsim.

OKB-ja dhe organizata të tjera ndërkombëtare, si UNICEF dhe UNESCO, kanë nxitur shtetet që të investojnë në arsimin e fëmijëve dhe të rinjve, duke u përpjekur të përmbushin qëllimet për edukimin e të gjithë individëve, pa asnjë përjashtim. Kjo përfshin sigurimin e arsimit fillor falas dhe të detyrueshëm, ndihmën për vajzat dhe gratë, si dhe mundësi për të rinjtë refugjatë. Në përfundim, arsimi është një nga çelësat kryesorë për një të ardhme më të ndritur dhe një shoqëri më të barabartë. Pa investime serioze dhe përpjekje për të përmbushur nevojat e fëmijëve dhe të rinjve, shumë shoqëri do të vazhdojnë të humbasin potencialin e tyre të plotë dhe do të mbeten të ngecura në ciklin e varfërisë dhe pabarazisë. Kjo është një sfidë që kërkon angazhim global dhe bashkëpunim për të ofruar mundësi arsimimi për të gjithë./UBTNews/

 

 

Lajmet

Rektori Hajrizi u uron studentëve mirëseardhje dhe një fillim të mbarë të vitit akademik 2025/26

Published

on

Rektori i UBT-së, Prof. Dr. Edmond Hajrizi, u ka uruar mirëseardhjen studentëve të rinj dhe atyre aktualë në fillimin e vitit të ri akademik 2025/26. Në fjalën e tij, Rektori Hajrizi theksoi rëndësinë e këtij fillimviti, i cili sjell mundësi për suksese, përvoja të reja edukative dhe zhvillim personal e profesional.

Lexoni mesazhin e plotë të Rektorit Hajrizi:

Të dashur studentë të rinj dhe studentë aktualë të UBT-së,

Në emër të UBT-së dhe në emrin tim personal, ju urojmë mirëseardhje në fillimin e vitit të ri akademik 2025/26.

Ky është një fillimvit që na bashkon për më shumë suksese, përvoja të reja edukative e akademike, si dhe mundësi për zhvillim personal dhe profesional.

UBT mirëpret gjeneratën e re të radhës, e cila bashkë me studentët aktualë, që kanë besuar në edukimin dhe zhvillimin profesional të ofruar nga UBT, do të kontribuojë në një vit të pasur akademik.

Besojmë fuqimisht se, ashtu si gjithmonë, do të veprojmë për të arritur synimet tona kryesore: Top Education for Top Students, duke mbështetur jo vetëm studentët, por edhe zhvillimin e vendit dhe suksesin e Kosovës në arenën globale.

Ju keni zgjedhur të studioni në institucionin më prestigjioz, tashmë të dëshmuar edhe në nivel global, ku cilësia dhe inovacioni janë parimet themelore.

UBT është ranguar ndër universitetet më të mira në botë për cilësi, inovacion, ndërmarrësi, zhvillim të qëndrueshëm, teknologji dhe inteligjencë artificiale, dhe së fundmi, renditet në vendin e parë në botë për angazhimin dhe impaktin në shoqëri.

Për herë të parë në Kosovë dhe në rajon, UBT ka integruar Inteligjencën Artificiale, teknologjitë më të avancuara dhe infrastrukturën e kompletuar të një Qyteti të Mençur, së bashku me një staf cilësor, në rritje, dhe shumë të përkushtuar, në mënyrë që ju të jeni sa më të suksesshëm.

Kështu, gjatë studimeve, ju do të keni mbështetje të plotë nga profesorët, mentorët dhe strukturat tona akademike, duke ju dhënë hapësirën e duhur për të mësuar, krijuar dhe ndërtuar karrierën tuaj.

Ne jemi të përkushtuar t’ju ofrojmë një përvojë studimi të pasur, që jo vetëm do të ndikojë në jetën tuaj personale, por gjithashtu do të kontribuojë në shoqëri dhe në zhvillimin e Kosovës.

Ju uroj një vit akademik të suksesshëm, të mbushur me dije, përvoja dhe arritje të reja. Le të jetë ky vit një hap i sigurt drejt realizimit të ëndrrave tuaja!

Me respekt,

Prof. Dr. Edmond Hajrizi

President dhe Rektor i UBT-së

Continue Reading

Lajmet

​Ndeshja Serbi-Shqipëri pa tifozë dhe me masa të rrepta sigurie

Published

on

Federata e Futbollit të Serbisë (FSS) ka njoftuar për ndeshjen mes Serbisë dhe Shqipërisë që do të zhvillohet më 11 tetor në stadiumin “Dubocica” të Leskovacit se nuk do të ketë bileta në shitje për publikun.

Ky vendim është marrë nga Komiteti i Emergjencave i FSS-së, në përputhje me vlerësimin e FIFA-s, udhëzimet e Ministrisë së Punëve të Brendshme të Serbisë, konsultimet me UEFA-n dhe përvojën e keqe nga ndeshja e ndërprerë në vitin 2014.

Sipas njoftimit zyrtar, pjesëmarrja në tribuna do të sigurohet vetëm përmes shpërndarjes së biletave të personalizuara për komunitetin e futbollit federatat rajonale, klubet, nxënësit e shkollave të futbollit dhe prindërit e tyre, organizatat profesionale, sponsorët, mediat e akredituara, si dhe stafet mjekësore e organizative.

Në hyrje të stadiumit do të zbatohen kontrolle të rrepta sigurie, ndërsa çdo person do të duhet të paraqesë dokument identifikimi (kartë identiteti ose pasaportë), në përputhje me standardet më të larta të sigurisë.

FSS ka kujtuar se ndeshja e tetorit 2014 mes Serbisë dhe Shqipërisë në Beograd u ndërpre, çka solli pasoja të rënda për kombëtaren serbe, përfshirë humbjen e një vendi në Kampionatin Evropian 2016.

Për këtë arsye, ndeshja e ardhshme është shpallur me rrezikun më të lartë të sigurisë nga FIFA, Ministria e Brendshme e Serbisë dhe vetë federata. FIFA do të dërgojë dy oficerë sigurie në Leskovac, ndërsa nuk do të ketë tifozë mysafirë në tribuna.

“Federata e Futbollit të Serbisë u bën thirrje të gjithë pjesëmarrësve që përmes sjelljes së tyre të kontribuojnë në një atmosferë të drejtë dhe sportive, në mënyrë që kombëtarja jonë të ketë kushtet më të mira për rezultat pozitiv në fushë”, thuhet në fund të njoftimit./S.K/KP/

Continue Reading

Lajmet

​Kosova me pesë mungesa ndaj Sllovenisë

Published

on

Kombëtarja e Kosovës në futboll do të luajë pa pesë lojtarë të rëndësishëm në ndeshjen e radhës kualifikuese të Kampionatit Botëror 2026 kundër Sllovenisë.

Lajmin e bëri të ditur menaxheri i kombëtares Bajram Shala në një konferencë për media, i cili theksoi se për shkak të lëndimeve mungojnë në fushë Amir Rrahmani, Leart Paqarada, Florent Hadërgjonaj, Baton Zabërgja dhe Vesel Dermaku.

Përkundër këtyre mungesave, trajneri Franco Foda u shpreh optimist se ndaj Sllovenisë mund të arrihet në rezultat pozitiv, sidomos duke ditur faktin se ndeshja zhvillohet në Prishtinë ku mbështetja e tifozëve nuk do të mungojë.

Ai tha se nga lojtarët do të kërkojë të japin më të mirën pasi kjo ndeshje edhe mund të përcaktojë një pjesë të rëndësishme të rrugëtimit të Dardanëve në këto kualifikime./S.K/KP/

Continue Reading

Lajmet

Dyshimet për burime të financimit, KQZ refuzon akreditimin e shtatë OJQ-ve për vëzhgimin e zgjedhjeve

Published

on

By

Komisioni Qendror i Zgjedhjeve (KQZ) ka miratuar rekomandimin e Zyrës për Regjistrim, Certifikim dhe Kontroll Financiar për moscertifikimin e shtatë organizatave joqeveritare dhe vëzhguesve të tyre.

Bëhet fjalë për këto OJQ: Qendra Rinore Shtime, Centre for Social Inclusion Gracanica (CSIG), NVO PBG, Shoqata Qytetare RESTART, Udruženje Žena Povratnica Naš Dom, Fuqia e Zërit – Poëer of Voice dhe Qendra Kulturore Orfeu.

Anëtari i KQZ-së nga radhët e Vetëvendosjes, Sami Kurteshi, kërkoi sqarime lidhur me burimin e financimit të vëzhguesve, duke theksuar se “nëse vëzhguesit paguhen, duhet të dihet prejardhja e mjeteve”.

Ai shtoi se transparenca për fondet e përdorura është e domosdoshme, pasi çdo shfrytëzim i mjeteve publike duhet të jetë i qartë për publikun.

“Me sa e di vëzhguesit e kanë një ditë pune dhe për atë ditë punë nuk e di a janë vullnetar apo paguhen, ndoshta pak është e rregulluar që ata duhet të paguhen me një shumë simbolike është mirë të shihet edhe prejardhja e mjeteve, 259 vëzhgues nëse ka pagese simbolike mbërrin një shumë të caktuar, nëse i paguajnë prej dikujt duhet të vijnë ato mjete. Secili njeri e shfrytëzon paratë e shtetit ka të bëjë me publikun. Duhet të dihet prej burimit nga vijnë dhe si janë ato burime”, ka thënë Kurteshi.

KQZ në mbledhjen e sa të së hënës mori vendim për miratimin e procedurës për Qendrën e Numërimit dhe Rezultateve (QNR) për Zgjedhjet Lokale 2025. Ky dokument përcakton në mënyrë të detajuar të gjitha aktivitetet dhe procedurat që zhvillohen në QNR.

Në QNR bëhet numërimi i fletëvotimeve nga votimi me kusht, i fletëvotimeve nga votimi i personave me nevoja të veçanta, i fletëvotimeve nga votimi jashtë Kosovës, rinumërimi eventual i vendvotimeve me vendim të KQZ-së, PZAP-së dhe Gjykatës Supreme, si dhe tabulimi dhe publikimi i rezultateve përfundimtare./D.B/EO

Continue Reading

Të kërkuara