Më 4 dhjetor 1912, me propozimin e Isa Boletinit, Mehmet pashë Dërralla u zgjodh ministër i Luftës në Qeverinë e Përkohshme të Shqipërisë, duke fituar 42 vota dhe duke u renditur i treti pas Luigj Gurakuqit me 54 vota dhe Myfit Bej Gjirokastrës (Libohovës) me 52 vota.
Ky emërim i rëndësishëm i shënoi një moment të veçantë në historinë e Shqipërisë së re, pasi Dërralla, një ushtarak i njohur dhe me përvojë, mori detyrën që do të ishte kyçe për mbrojtjen e Pavarësisë së Shqipërisë. Ndonëse ishte në moshën 69-vjeçare, Mehmet pashë Dërralla e pranoi me përgjegjshmëri të plotë detyrën e ministrit të Luftës, duke e angazhuar veten me pasion dhe përkushtim në organizimin e ushtrisë shqiptare.
Me përvojën e tij 40-vjeçare në drejtimin dhe komandimin e forcave ushtarake, ai u angazhua menjëherë në krijimin e Komandës së Përgjithshme dhe Shtabit Madhor, duke strukturuar ushtrinë dhe duke krijuar një kuadër të mirëorganizuar për luftën e shtetit të sapoformuar shqiptar.
Puna e tij e rëndësishme nuk u kufizua vetëm në strukturimin e ushtrisë, por gjithashtu kontribuoi në hartimin e “Rregullores për organizimin e përkohshëm të Ministrisë së Luftës” dhe të “Rregullores së përkohshme mbi formimin e strukturës së Milicisë Shqiptare”.
Ai mori gjithashtu masa për ruajtjen e rendit dhe qetësisë publike, një detyrë po aq e rëndësishme në këto ditë të pas-luftës për konsolidimin e shtetit shqiptar.
Ushtarët që ai drejtonte ishin të shumtë nga shkollat ushtarake dhe nga radhët e ushtrisë turke, që kishin kaluar një edukim dhe disiplinë të ashpër ushtarake.
Për nder të punës dhe kontributit të tij të jashtëzakonshëm në forcimin e shtetit shqiptar, 4 dhjetori u caktua si Festë Kombëtare e Forcave të Armatosura Shqiptare, duke e shënuar përjetësisht Mehmet pashë Dërrallën si ministrin e parë të Luftës së shtetit shqiptar, një figurë të rëndësishme dhe simbol të luftës për liri e pavarësi./UBTNews/
