Lajmet

11 metodat e bazuara në shkencë për të frenuar urinë dhe oreksin

Në këtë listë keni 11 mënyra të bazuara në shkencë për të ndihmuar në uljen e urisë dhe oreksit.

Published

3 years ago

on

Në përgjithësi, uria dhe oreksi janë sinjale që trupi juaj jep për të treguar se nevojë për energji ose dëshiron një lloj të caktuar ushqimi.

Por nëse ndjesia e urisë vazhdon edhe kur sapo keni mbaruar një vakt, kjo mund të jetë një shenjë që nuk po hani mjaftueshëm ose nuk po konsumoni kombinimet e duhura të ushqimeve.

Nëse jeni duke u përpjekur të humbisni peshë, duke ndjekur një rutinë të re vaktesh si agjërimi, mund të pyesni veten se në çfarë mënyrë të reduktoni ndjesinë e urisë përgjatë ditës.

Për ta bërë më të lehtë, në këtë listë keni 11 mënyra të bazuara në shkencë për të ndihmuar në uljen e urisë dhe oreksit.

Konsumoni mjaftueshëm proteina

Shtimi i proteinave në regjimin tuaj ushqimor mund të frenojë ndjenjën e urisë, të ulë nivelet e hormoneve të urisë dhe mund t’ju ndihmojë të konsumoni më pak ushqim në vaktin tuaj të ardhshëm. Proteinat, qoftë ato shtazoret apo ato bimoret, janë të dobishme për t’ju mbajtur të ngopur për një kohë të gjatë. Kjo mund t’ju ndihmojë në humbjen e peshës, pjesërisht duke reduktuar oreksin e tepërt.

Zgjidhni ushqime të pasura me fibra

Fibrat ju ndihmon të ngopeni duke ngadalësuar tretjen dhe duke ndikuar në çlirimin e hormoneve të ngopjes. Ndjekja e një regjimi me fruta, perime, fasule, arrorë dhe fara mund të promovojë gjithashtu shëndetin tuaj afatgjatë, përkrah rënies nga pesha.

Pini ujë

Shkencëtarët besojnë se konsumi i rreth 500 ml ujë mund të dërgojë sinjale të ngopjes në tru. Meqenëse uji zbrazet shpejt nga stomaku, kjo këshillë mund të funksionojë më mirë të konsumoni ujë sa më afër vaktit. Fillimi i vaktit me një supë, mund të veprojë në të njëjtën mënyrë! Të ulë urinë dhe të reduktoje marrjen e kalorive të tepërta nga vakti. Megjithatë, ky mund të mos jetë rasti për të gjithë. Gjenetika, lloji i supës që hani dhe faktorë të tjerë të ndryshëm janë të gjithë në lojë.

Hani me kujdes dhe me ngadalë

Të ngrënit shumë shpejt ose ndërkohë që jeni të hutuar apo të shpërqëndruar, e bën më të vështirë për trurin tuaj që të vërejë sinjalet e ngopjes që trupi dërgon. Ngadalësimi i ritmit me të cilin hani mund të jetë një mënyrë për të frenuar tendencën për të ngrënë tepër, së bashku me eleminimin e çdo paisjeje që ju shpërqëndron gjatë ngrënies.

Mësoni se cilat enë funksionojnë për ju

Zvogëlimi i madhësisë së enëve tuaja mund t’ju ndihmojë gjithashtu të zvogëloni në mënyrë të pandërgjegjshme racionet e vaktit dhe të konsumoni më pak ushqim pa u ndjerë të privuar. Shpesh ngrënia nga një pjatë më e vogël ose përdorimi i një ene me madhësi të caktuar mund t’ju ndihmojë të hani më pak.

Ushtrohuni rregullisht

Ushtrimet aerobike dhe ato me rezistencë mund të ndihmojnë në rritjen e hormoneve të ngopjes dhe të çojnë në uljen e urisë dhe marrjes së kalorive. Aktivitetet me intensitet më të lartë mund të kenë efekte edhe më të mëdha.

Flini mjaftueshëm gjumë

Gjumi i mjaftueshëm dhe cilësor mund të ndihmojë gjithashtu në uljen e urisë dhe mbrojtjen kundër shtimit të peshës. Sipas ekspertëve, të paktën 7 orë gjumë në natë ka të ngjarë të zvogëlojë nivelet e urisë gjatë gjithë ditës.

Menaxhoni nivelet e stresit

Stresi i tepërt dihet se rrit nivelet e hormonit kortizol. Edhe pse efektet mund të ndryshojnë nga personi në person, nivelet e larta të kortizolit përgjithësisht mendohet se rrisin dëshirën për të ngrënë. Megjithatë disa njerëz reagojnë ndryshe ndaj stresit. Ku në periudhat akute të stresit, këta individë kanë tendencë të mos kenë fare oreks.

Konsumoni pak xhenxhefil

Përveç shtimit të shijes dhe qetësimit të stomakut, xhenxhefili mund të ndihmojë në uljen e ndjenjës së urisë. Megjithatë, nevojiten më shumë kërkime për të konfirmuar këtë efekt.

Zgjidhni ushqime të plota

Për të nxitur ndjenjën e ngopjes, zgjidhni ushqime me përmbajtje të lartë të proteinave, të fibrave, të yndyrnave të shëndetshme dhe të karbohidrateve komplekse.

Mos e privoni veten

Marrëdhënia midis oreksit, urisë dhe dëshirave është komplekse dhe përfshin shumë rrugë biologjike. Shijimi i ushqimeve që dëshironi në mënyrë të moderuar mund të jetë më efektiv në reduktimin e urisë dhe dëshirave tuaja, sesa t’i privoni plotësisht ato.

Në fund të fundit, uria dhe oreksi janë funksione normale trupore. Në mënyrë tipike, ato janë thjesht një shenjë se trupi juaj ka nevojë për energji dhe është koha për të ngrënë. Këshillat e lart përmendura janë vetëm disa mënyra të thjeshta për të reduktuar oreksin dhe urinë gjatë kohës kur ndiheni sikur ato ndjesi janë më të larta se zakonisht. /AgroWeb.org

Related Topics:
Continue Reading

Lajmet

​Arrestohet një person, dyshohet se shtiu me kallashnikov në qendër të Podujevës

Published

1 hour ago

on

January 28, 2026

By

Pasditen e sotme një person i dyshuar ka shtënë me armë zjarri në rrugën “Zahir Pajaziti” në Podujevë, ndërsa policia ka reaguar menjëherë duke arrestuar të dyshuarin

Lajmin për arrestimin e të dyshuarit e ka konfirmuar zyrtarja për informim në Policinë Rajonale të Prishtinës, Flora Ahmeti.

Sipas saj, ngjarja ka ndodhur rreth orës 13:30, moment kur njësitë policore kanë pranuar informatën dhe kanë dalë menjëherë në vendin e ngjarjes.

“Rreth orës 13:30 është raportuar për të shtëna me armë zjarri në rrugën ‘Zahir Pajaziti’ në Podujevë. Menjëherë pas marrjes së informatës, policia ka dalë në vendin e ngjarjes dhe ka arrestuar personin e dyshuar”, ka deklaruar Ahmeti.

Continue Reading

Lajmet

VV dorëzon në polici kërkesë për hetim të kontratës 950 mijë euro të Komunës së Prishtinës për mbeturinat

Published

2 hours ago

on

January 28, 2026

By

Lëvizja Vetëvendosje ka dorëzuar sot në Policinë e Kosovës një kërkesë për inicimin e hetimeve lidhur me kontratën në vlerë prej 950 mijë eurosh, të cilën Komuna e Prishtinës e ka dhënë për menaxhimin e mbeturinave.

Këtë e ka bërë të ditur asamblisti i VV-së, Çlirim Gërbeshi. Sipas VV-së, kjo kontratë, e negociuar pa njoftim paraprak, është në kundërshtim me normat ligjore në fuqi.

VV-ja pretendon se i gjithë procesi që i ka paraprirë lidhjes së kësaj kontrate paraqet indicie serioze dhe lë hapësirë të gjerë për hetim nga ana e organeve kompetente.

“Sot, në emër të Qendrës së Prishtinës të Lëvizjes Vetëvendosje!, kemi dorëzuar në Policinë e Kosovës kërkesë për inicimin e hetimeve lidhur me kontratën në vlerë prej 950 mijë eurosh, të cilën Komuna e Prishtinës e ka dhënë për menaxhimin e mbeturinave.

Sipas vlerësimit tonë, kjo kontratë, e negociuar pa njoftim paraprak, është në kundërshtim me normat ligjore në fuqi. Po ashtu, i gjithë procesi që i ka paraprirë lidhjes së kësaj kontrate paraqet indicie serioze dhe lë hapësirë të gjerë për hetim nga ana e organeve kompetente.

Institucionet publike janë të obliguara të veprojnë me transparencë, ligjshmëri dhe përgjegjësi ndaj qytetarëve, ndërsa çdo devijim nga këto parime duhet të hetohet dhe të marrë përgjigje ligjore. Prishtina meriton qeverisje të ndershme, jo marrëveshje të dyshimta në kurriz të interesit publik”, ka shkruar Gërbeshi.

Continue Reading

Lajmet

Rinumërohen mbi 80% apo 2,061 nga 2,557 vendvotime, 30 komuna përmbyllin procesin

Published

3 hours ago

on

January 28, 2026

By

Në Qendrën e Numërimit dhe Rezultateve është duke vazhduar numërimi i fletëvotimeve sipas listës së vendvotimeve për të cilat KQZ ka marrë vendim që të rinumërohen.

Nga fillimi i këtij procesi (e martë, 13 janar 2026, ora 18:00) dhe deri më tani (e mërkurë, 28 janar 2026, ora 10:00) janë rinumëruar mbi 80% apo 2,061 nga 2,557 vendvotime.

Në platfomën e KQZ-së për rezultate https://resultsparliamentary2025.kqz-ks.org/  në hapësirën QNR > Rinumërim, do të paraqiten rezultatet pas numërimit të çdo vendvotimi.

Continue Reading

Lajmet

Komuna e Prishtinës hap konkurs për projektimin e Memorialit Përkujtimor “Adem Jashari”

Published

3 hours ago

on

January 28, 2026

By

Komuna e Prishtinës ka hapur konkurs publik për projektimin e Memorialit Përkujtimor kushtuar komandantit legjendar Adem Jashari dhe sakrificës së familjes së tij, për të cilin ka ndarë një buxhet prej 150 mijë eurosh.

Sipas dosjes së konkursit, ky memorial synon të përjetësojë sakrificën unike të familjes Jashari nga Prekazi i Skenderajt, e cila përfaqëson një nga rastet më kulminante të gatishmërisë për sakrificë mbinjerëzore për liri. Rënia e komandantit të Ushtrisë Çlirimtare të Kosovës, Adem Jashari, së bashku me 58 anëtarë të familjes së tij, përfshirë fëmijë, gra dhe pleq, konsiderohet si një ngjarje e veçantë në historinë e njerëzimit në emër të idealit universal të lirisë.

Sipas vizionit të projektit, memoriali do të vendoset në një nga hapësirat publike me potencial në kryeqytet, me qëllim që kjo sakrificë sublime të bëhet pjesë e pandashme e jetës së përditshme urbane dhe e manifestimit të lirisë në hapësirë publike, përmes ndërveprimit të vazhdueshëm me qytetarët.

Projekti është në përputhje edhe me vizionin e kryetarit të Prishtinës, Përparim Rama, për një kryeqytet bashkëkohor, gjithëpërfshirës dhe një fener të trashëgimisë kulturore. Memoriali përkujtimor i familjes Jashari pritet të kontribuojë në forcimin e identitetit kulturor dhe historik të qytetit, shkruan IndeksOnline.

Sa i përket lokacionit, memoriali parashihet të ndërtohet në qendër të Prishtinës, mes ndërtesës së Kuvendit të Republikës së Kosovës dhe Xhamisë së Gurit. Ai do të jetë pjesë e projektit për ndërlidhjen e shëtitores ekzistuese që përfundon me sheshin “Ibrahim Rugova” dhe vazhdimin e saj drejt pjesës së vjetër të qytetit, përmes nënkalimit në rrugën “Agim Ramadani”.

Sipas këtij projekti urban, rruga “Agim Ramadani” do të bëhet nëntokësore, ndërsa pjesa sipër saj do të shndërrohet në pllato për këmbësorë, duke mundësuar lidhjen funksionale mes bulevardit ekzistues dhe qytetit të vjetër. Pikërisht mbi këtë pllato është paraparë dizajnimi i memorialit dhe hapësirës përreth tij, që është edhe subjekt i konkursit.

Continue Reading

Të kërkuara