Sulmuesi francez, Kylian Mbappe, vazhdon të shkruajë historinë në arenën ndërkombëtare. Me dy golat e shënuar në fitoren 3:1 të Francës ndaj Senegalit, ai fillimisht barazoi rekordin e Lionel Messit prej 13 golash në Kupat e Botës dhe më pas e tejkaloi atë, duke arritur në kuotën e 15 realizimeve.

Mbappe e arriti këtë sukses në vetëm 15 paraqitje në Botëror, ndërsa Messi kishte zhvilluar 26 ndeshje për të arritur të njëjtin numër golash. Tashmë francezi ndodhet vetëm dy gola larg rekordit absolut të ish-sulmuesit gjerman Miroslav Klose, golashënuesit më të mirë në historinë e Kupave të Botës.

Njëkohësisht, Mbappe është bërë edhe golashënuesi më i mirë i të gjitha kohërave për Francën, me 58 gola të shënuar, duke lënë pas Olivier Giroudin.

Në ndeshjen hapëse të Grupit I, të zhvilluar në stadiumin “MetLife” në New Jersey para 80.545 shikuesve, pjesa e parë përfundoi pa gola, pavarësisht rasteve të mira të Senegalit.

Nicolas Jackson goditi shtyllën në minutën e 25-të, ndërsa Ismaila Sarr shpërdoroi një mundësi të artë në fund të pjesës së parë.

Megjithatë, në fraksionin e dytë të lojës, Franca rriti ritmin dhe gjeti epërsinë në minutën e 66-të. Mbappe finalizoi me sukses një aksion të bukur pas një asistimi të shkëlqyer nga Michael Olise.

Bradley Barcola dyfishoi rezultatin në minutën e 82-të pas pasimit të Adrien Rabiotit, duke i afruar francezët drejt fitores.

Senegali riktheu shpresat në minutën e 95-të, kur Ibrahim Mbaye shënoi për 2:1. Megjithatë, reagimi i kampionëve të botës ishte i menjëhershëm. Vetëm një minutë më vonë, Mbappe realizoi golin e tij të dytë personal dhe vulosi rezultatin përfundimtar 3:1.

Interesant është fakti se gjatë pjesës së parë Mbappe pati vetëm 14 prekje të topit, më pak se çdo lojtar tjetër në fushë. Por në pjesën e dytë ai tregoi klasin e tij, duke qenë vendimtar në triumfin e Francës.

Franca do ta zhvillojë ndeshjen e dytë të grupit më 22 qershor kundër Irakut, ndërsa Senegali një ditë më vonë do të përballet me Norvegjinë e udhëhequr nga Erling Haaland.

D.L

Photo: Associated Press

Tetë hendbolliste të reja, anëtare të Kombëtares U17 të Kosovës, po marrin pjesë në një kamp ndërkombëtar të hendbollit që po zhvillohet në Poreč, me synim avancimin e aftësive të tyre sportive dhe teknike.

Hendbollistet kosovare, të cilat janë pjesë e klubeve vendore, po stërviten krahas talenteve të tjera në këtë kamp që ka nisur më 14 qershor dhe do të përfundojë më 19 qershor. Pjesë e kampit është edhe Faruk Shala, trajner i Kombëtareve të reja të Kosovës dhe kryetar i Shoqatës së Trajnerëve të Hendbollit të Kosovës.

Kampi udhëhiqet nga eksperti i njohur kroat Nenad Šoštarić, ndërsa në procesin e punës me sportistet e reja janë të angazhuar edhe trajnerë të tjerë me përvojë dhe reputacion në hendbollin kroat.

Sipas Faruk Shalës, programi i kampit është i fokusuar në zhvillimin e aftësive individuale dhe grupore, si dhe në avancimin e elementeve teknike të lojës së hendbollit.

“Programi i kampit është i fokusuar në ngritjen e aftësive individuale dhe grupore, si dhe në avancimin e elementeve teknike të lojës së hendbollit. Mënyra se si është organizuar kampi mundëson punë të specializuar dhe të përshtatur për të gjitha pjesëmarrëset. Kampi është mundësi e mirë për hendbollistet tona të reja që të përfitojnë nga përvoja e trajnerëve me renome ndërkombëtare dhe të zhvillojnë më tej aftësitë e tyre sportive”, ka deklaruar Shala.

Ai shtoi se përvoja e fituar në kampin e Poreçit do të jetë shumë e vlefshme për zhvillimin e mëtejmë dhe karrierën sportive të hendbollisteve të talentuara të Kosovës.

Federata e Hendbollit e Kosovës vazhdon t’i kushtojë rëndësi të veçantë zhvillimit dhe avancimit të hendbollistëve të rinj, duke krijuar mundësi për pjesëmarrje në aktivitete ndërkombëtare dhe programe edukative që kontribuojnë në ngritjen e cilësisë së sportit në vend.

D.L

Pas muajsh të mbushur me basketboll spektakolar 3×3 në qytete të ndryshme të Kosovës, edicioni i dytë i Alley Oop u mbyll me një finale emocionuese që solli rivalitet dhe adrenalinë deri në sekondat e fundit.

Në turneun final morën pjesë gjashtë skuadrat kampione të qyteteve: Prishtina, Prizreni, Mitrovica, Peja, Gjakova dhe Suhareka, të cilat dhuruan ndeshje cilësore dhe atmosferë të jashtëzakonshme për tifozët e basketbollit 3×3.

Finalja e madhe vuri përballë ekipet Bero Kingdom dhe Prishtinën. Në një ndeshje dramatike dhe të luftuar deri në fund, bardhekaltrit arritën të triumfojnë me rezultat 19:17, duke fituar titullin e kampionit të Alley Oop 2026 dhe duke ndërprerë dominimin e kampionëve të edicionit të parë.

Përveç trofeut, skuadra e Prishtinës u shpërblye edhe me 1,000 euro, si fituese e turneut.

Organizatorët vlerësuan paraqitjet e të gjitha skuadrave pjesëmarrëse, të cilat kontribuuan në suksesin e një tjetër edicioni të Alley Oop. Projekti vazhdon të ketë si mision kryesor masivizimin dhe promovimin e basketbollit 3×3 në të gjithë Kosovën.

Alley Oop organizohet nga Federata e Basketbollit e Kosovës me mbështetjen e FIBA Europe.

D.L

Talenti i Lamine Yamal ka reaguar pas barazimit 0:0 të Spanjës ndaj Kepit të Gjelbër në ndeshjen e parë të Grupit H në Kupën e Botës 2026.

Yamal u rikthye në fushë pas një dëmtimi dhe luajti vetëm 19 minutat e fundit të takimit, në një ndeshje ku Spanja nuk arriti të marrë më shumë se një pikë ndaj debutuesve.

Në një postim në rrjetet sociale, ai u shpreh i lumtur për rikthimin në fushë, pavarësisht rezultatit të ekipit.

“Ndeshja e parë e Kupës së Botës dhe morëm një pikë. E dimë që është një garë e gjatë dhe qëllimi është ende larg, por do të vazhdojmë të punojmë. Jam mirënjohës që u riktheva pas dëmtimit dhe falënderoj familjen time për mbështetjen,” shkroi Yamal.

Spanja tani do të përqendrohet te ndeshja e radhës kundër Arabisë Saudite, ndërsa edhe kjo e fundit e nisi turneun me barazim ndaj Uruguait, duke bërë që të katër skuadrat e Grupit H të kenë nga një pikë pas xhiros së parë.

D.L