William Baeten është njëri prej futbollistëve më të paguar në futbollin kosovar, të paktën sipas shifrave të publikuara nga mediumi rumun ProSport.

Futbollisti belg, i cili iu bashkua Dritës në verën e vitit 2026, raportohet se përfiton rreth 12 mijë e 500 euro në muaj.

Nëse kjo shifër është e saktë, Baeten përfiton rreth 150 mijë euro në vit vetëm nga paga bazë, pa përfshirë bonuset dhe përfitimet e tjera që mund të jenë pjesë e marrëveshjes me klubin gjilanas.

Belgu 29-vjeçar iu bashkua Dritës pas një karriere me disa ndalesa, fillimisht në futbollin rumun e më pas në atë shqiptar.

Ai ishte transferuar te FCSB nga FCU Craiova për rreth 300 mijë euro, por nuk arriti të sigurojë një rol të rëndësishëm në skuadrën rumune dhe u largua pas vetëm një viti, pa kompensim transferimi.

Pas aventurës në Rumani, Baeten nënshkroi me Flamurtarin në Shqipëri, por qëndrimi i tij zgjati vetëm rreth gjashtë muaj. Në fillim të vitit 2026, ai u largua nga klubi shqiptar për të vazhduar karrierën në Kosovë, ku iu bashkua Dritës.

Emri i mesfushorit belg ishte përmendur edhe në mediat rumune për shkak të një kontesti financiar me ish-klubin FCSB dhe pronarin e tij, Gigi Becali.

Më 23 shtator 2026, FIFA i kishte shqiptuar klubit rumun ndalesë për regjistrimin e futbollistëve në tri afatet e ardhshme kalimtare, për shkak të një borxhi prej rreth 50 mijë eurosh ndaj Baetenit.

Megjithatë, FCSB më pas e shlyeu detyrimin financiar ndaj futbollistit, duke e zgjidhur çështjen që kishte sjellë sanksionin. Kështu, Baeten arriti të marrë shumën që i takonte nga ish-klubi.

Ndërkohë, aventura e tij te Drita është shoqëruar edhe me vështirësi. Pasi kishte nisur të luante rregullisht, belgu pësoi një dëmtim muskulor që e mbajti jashtë fushave për rreth dy muaj.

Ai mungoi në pesë ndeshje, ndërsa në dy përballjet e fundit ishte në bankën rezervë, por nuk u aktivizua.

Deri më tani, Baeten ka regjistruar 11 paraqitje me Dritën në të gjitha garat, duke kontribuar me dy asistime.

D.L

Ylli i New York Red Bulls, Adri Mehmeti, është përfshirë në listën e përfaqësueses së Shteteve të Bashkuara të Amerikës për ndeshjet kualifikuese të Ligës së Kombeve të CONCACAF-it, nga përzgjedhësi Mauricio Pochettino.

Mesfushori i talentuar ishte një nga dëshirat e mëdha të Shqipërisë, por ka vendosur që në nivelin ndërkombëtar ta përfaqësojë SHBA-në.

Mehmeti ishte ftuar për herë të parë në muajin tetor, kur Pochettino e kishte përfshirë në ekip për ta vlerësuar nga afër. Paraqitjet e tij duket se kanë bindur teknikun argjentinas, i cili tashmë i ka besuar një vend edhe në listën për ndeshjet zyrtare.

Talenti shqiptar do të jetë në mesin e emrave të njohur të futbollit amerikan, si Weston McKennie i Juventusit, Malik Tillman i Bayer Leverkusenit dhe Christian Pulisic i Milanit.

Në këtë fazë të garës, SHBA-ja do të përballet me Haitin.

D.L

Prishtina ka fituar ndeshjen e mbetur të xhiros së dytë në Superligën e Kosovës në futboll, duke e mposhtur kampionen në fuqi, Dritën, me rezultat 2:1.

Ndeshja u zhvillua të mërkurën në fushën me bari artificial në Gjilan, pasi ishte shtyrë për shkak të angazhimit të Dritës në garat evropiane.

Kryeqytetasit kaluan herët në epërsi me golin e ish-futbollistit të Dritës, Blend Baftiu.

Megjithatë, vendasit reaguan shpejt, duke barazuar shifrat në minutën e 19-të. Për 1:1 realizoi sulmuesi Blerim Krasniqi, rezultat me të cilin u mbyll edhe pjesa e parë.

Në pjesën e dytë, Prishtina arriti të shënojë edhe golin e fitores. Ardian Hasani realizoi me kokë për 2:1, ndërsa goli u konfirmua pas rishikimit të situatës përmes sistemit VAR.

Kujtojmë se këto dy skuadra ishin përballur edhe më 25 tetor në Kampin Nacional të FFK-së në Hajvali, ku Drita kishte triumfuar me rezultat të thellë 3:0.

Me këtë fitore, Prishtina ngjitet në pozitën e parë të tabelës me 29 pikë, dy më shumë se Malisheva që renditet e dyta.

Në anën tjetër, Drita mbetet në pozitën e tretë me 23 pikë.

D.L

Kampioni në fuqi, Drita, dhe klubi më i trofeshëm në futbollin kosovar, Prishtina, do të përballen sot në Gjilan në kuadër të ndeshjes së mbetur nga xhiroja e dytë e Albi Mall Superligës. Sfidë kjo ku tri pikët mbajnë një peshë të jashtëzakonshme në luftën për kreun e tabelës.

Ballafaqimi i dy gjigantëve të futbollit vendor do të zhvillohet në stadiumin ndihmës me bari artificial në Gjilan, ku ambalazhohet një përplasje e fortë taktike. Për skuadrën e Dritës, ky takim përfaqëson shansin ideal për të vazhduar ecurinë pozitive dhe për t’u barazuar me Prishtinën në pozitën e dytë me 26 pikë. Në krahun tjetër, bardhekaltërit nga kryeqyteti synojnë një fitore që do t’i ngjiste në kuotën e 29 pikëve, duke parakaluar lideren aktuale, Malishevën, që udhëheq me 27 pikë.

Format e të dyja ekipeve paralajmërojnë një duel mjaft interesant. Drita hyn në këtë përballje pas katër fitoreve radhazi në kampionat, përfshirë edhe një triumf bindës 0-3 të arritur pikërisht ndaj Prishtinës në kryeqytet. Ndërkaq, Prishtina – e cila e e nisi këtë edicion me shtatë fitore rresht – ka regjistruar dy fitore, dy barazime dhe një humbje në pesë dulet e fundit, duke kërkuar kësisoj këndelljen në një nga transfertat më të vështira të sezonit.

Peshën e takimit e rrit edhe bilanci i historikut mes tyre. Në dhjetë përballjet e fundit, Drita dominon me pesë fitore kundrejt dy të Prishtinës, ndërsa tri sfida janë mbyllur me barazim. Sidoqoftë, Prishtina mbetet skuadra më e dekoruar në vend me 11 tituj kampioni, nëntë Kupa dhe 11 Superkupa pas pavarësimit të futbollit kosovar. Nga ana tjetër, Drita ka konsoliduar suksesin në futbollin e pasluftës me pesë tituj kampioni, dy prej të cilëve radhazi në edicionet e fundit, duke i dhënë këtij derbi të gjitha përbërësit e një përplasjeje të madhe sportive. /E.A/