Malisheva dhe Prishtina kanë luajtur baras 1 me 1 në derbin e xhiros së nëntë të Superligës së Kosovës në futboll.

Takimi i zhvilluar të enjten në stadiumin “Liman Gegaj” nisi më mirë për vendasit, të cilët kaluan në epërsi në minutën e 29-të, falë golit të Xhemal Ibishit.

Prishtina reagoi në pjesën e dytë, duke barazuar rezultatin në minutën e 76-të përmes Assane Diattas, i cili realizoi nga pika e bardhë.

Pas këtij barazimi, Malisheva vazhdon të kryesojë tabelën me 20 pikë, aq sa ka edhe Prishtina në pozitën e dytë.

Skuadra nga kryeqyteti mbetet e pamposhtur këtë sezon dhe ka një ndeshje më pak të zhvilluar, atë ndaj kampiones në fuqi, Dritës.

D.L

Futbolli evropian vazhdon sot me një numër të madh ndeshjesh në Ligën e Evropës dhe Ligën e Konferencës, ku priten përballje interesante mes skuadrave të njohura.

Në Ligën e Evropës, vëmendja do të jetë te përballja mes Salzburgut dhe Milanit, që nis nga ora 18:45. Në të njëjtin orar zhvillohen edhe ndeshjet Lyon – Crystal Palace dhe Torrense – Sunderland.

Ndërkohë, nga ora 21:00, Benfica përballet me Celticin, Celta Vigo pret Juventusin, ndërsa Hoffenheimi luan kundër Besiktasit.

Ndeshje interesante priten edhe në Ligën e Konferencës. Nga ora 18:45, Universitatea Craiova përballet me Getafen, Hajduk Spliti me Ajaxin dhe Lugano me Crvena Zvezdën.

Programi vazhdon nga ora 21:00, me përballjet Brighton – Kauno Zalgiris dhe Freiburg – Jablonec.

Të dyja garat pritet të sjellin një mbrëmje dinamike futbolli, me skuadrat që synojnë rezultate pozitive në arenën evropiane.

D.L

Barcelona do të paraqitet me një fanellë të re në përballjen ndaj Real Madridit, e cila do të zhvillohet më 25 tetor në stadiumin “Camp Nou”, në kuadër të xhiros së dhjetë të La Ligas.

Sipas gazetës spanjolle Mundo Deportivo, klubi katalunas do të vazhdojë traditën e bashkëpunimit me Spotify, duke ndërthurur futbollin, muzikën dhe modën në një edicion të veçantë për El Clasicon.

Këtë herë, në qendër të bashkëpunimit do të jetë artisti amerikan Tyler, The Creator, marka e të cilit, “Golf Wang”, do të shfaqet në fanellat e futbollistëve të Barcelonës gjatë përballjes me rivalin historik.

Fanella e re pritet të dalë në shitje në dyqanet zyrtare të klubit nga e enjtja e ardhshme, me çmime që fillojnë nga 499.99 euro.

Ndryshe nga bashkëpunimet e mëparshme, këtë herë artisti amerikan do të ketë një rol më të gjerë, pasi përveç prezantimit të markës së tij në fanellë, do të udhëheqë edhe drejtimin krijues të fushatës vizuale dhe audio.

Ky bashkëpunim është pjesë e strategjisë së Barcelonës dhe Spotify për të sjellë elemente të muzikës dhe kulturës në futboll, veçanërisht në ndeshjet më të rëndësishme të sezonit.

D.L

Kosova rrezikon të humbasë të drejtën e organizimit të Lojërave Mesdhetare 2030, pas paralajmërimeve nga Komiteti Ndërkombëtar i Lojërave Mesdhetare (ICMG) për mospërmbushjen e detyrimeve financiare dhe administrative.

Përmes një letre drejtuar kryeministrit Albin Kurti, kryetarit të Prishtinës, Përparim Rama, dhe presidentit të Komitetit Olimpik të Kosovës, Ismet Krasniqi, ICMG-ja ka shprehur shqetësimin për vonesat në përgatitjet e këtij organizimi madhor sportiv.

Sipas dokumentit të publikuar nga Rama, institucionet përgjegjëse nuk i janë përgjigjur letrës së dërguar më 21 shtator 2026. Po ashtu, mungon garancia bankare që duhej të sigurohej në janar, ndërsa mbetet e papaguar edhe tarifa e muajit qershor.

ICMG-ja ka paralajmëruar se këto mangësi mund të rrezikojnë seriozisht organizimin e Lojërave Mesdhetare në Prishtinë.

Më 19 dhjetor, Komiteti Ekzekutiv pritet të shqyrtojë mundësinë e thirrjes së një Asambleje të Jashtëzakonshme, e cila do të vendosë për të ardhmen e këtij eventi.

Pas publikimit të letrës, kryetari i Prishtinës, Përparim Rama, ka akuzuar kryeministrin Albin Kurti për situatën e krijuar, duke e cilësuar rrezikun e humbjes së organizimit si një goditje të madhe për sportin kosovar.

Ai ka theksuar se mungesa e përgjigjeve institucionale dhe mosrealizimi i obligimeve po e vënë në pikëpyetje një mundësi historike për vendin.

Fitimi i së drejtës për organizimin e Lojërave Mesdhetare 2030 ishte vlerësuar si një nga arritjet më të rëndësishme në historinë e sportit të Kosovës, ndërsa zhvillimet e fundit kanë ngritur shqetësime për realizimin e këtij projekti.

D.L