Lajmet

Rama: Nuk është Shqipëria që vendos sanksione për Rusinë

Ai nuk e sheh rrezikun që kriza e Ukrainës të zhvendoset në Ballkan.

Published

4 years ago

February 25, 2022

Betim Gashi

Pas samitit të jashtëzakonshëm të NATO-s, kryeministri i Shqipërisë, Edi Rama deklaroi se për sanksionet ndaj Rusisë duhet të vendos NATO, e jo Shqipëria.

Ai nuk e sheh rrezikun që kriza e Ukrainës të zhvendoset në Ballkan, por siç tha Rama, në rast të shpërthimit të Luftës së Tretë Botërore nuk do të mund ta evitojnë. Mes tjerash, është pyetur edhe për iniciativën “Open Ballkan” dhe pozicionimin e Serbisë në këtë situatë.

Kryeministri i Shqipërisë, Edi Rama tha se pushtimi i Ukrainës nga Rusia është një situatë tragjike, por edhe zhvillim, i cili ka sfiduar gjithë arkitekturën e sigurisë në Evropë.

“Është një situatë tragjike, por nga ana tjetër është një zhvillim i cili ka sfiduar gjithë arkitekturën e sigurisë në Evropë, të gjithë ngrehinën institucionale duke goditur themelin e saj, të drejtën ndërkombëtare dhe ligjin ndërkombëtar. Mu duk e udhës të zhvillonim këtë konferencë të jashtëzakonshme për të folur pak më shumë për implikimet e kësaj lufte mbi Shqipërinë, e cila shumë nga vendet e ndryshme të NATO-s, nuk ka varësira të konsiderueshme të natyrës ekonomike apo tregtare me Rusinë, por sidoqoftë nuk është krejt pa lidhje, qoftë me Rusinë, qoftë me Ukrainën që urojmë dhe shpresojmë të kthehet në normalitet, por është shumë larg sot nga normaliteti”, ka thënë Rama në konferencë.

Ai është pyetur edhe për vendosjen e sanksioneve për Rusinë, ku tha se e gjithë aleanca e NATO-s duhet të bëjë një gjë të tillë.

“Është e vërtetë që sanksionet e Shqipërisë ndaj Rusisë janë i-relevante në aspektin e volumit. Nuk është Shqipëria që vë sanksione ndaj Rusisë, është gjithë aleanca që bie dakord të vendosi sanksione. Shqipëria është pjesë e kësaj aleance dhe nuk ka diskutim që i përqafon të gjitha vendimet e aleancës. Të njëjtën gjë bëjnë edhe vendet të cilat janë të lidhura me aleancën, pavarësisht që nuk janë anëtare të aleancës. Siç është Kosova. Ne besojmë që nga hulumtimi që kemi bërë që nuk do të kemi efekte shumë shqetësuese”, u shpreh Rama.

Ndërkaq, sa i përket “Open Ballkan” dhe mundësisë për rishikimin e marrëdhënieve me Serbinë pas qëndrimit të saj neutral përballë ofensivës ruse, Rama tha se situata do të shihet hap pas hapi.

“Një qëndrim i dyjëzuar tipik për politikën e jashtme serbe. Ndërkohë që sot çka po diskutojmë është goxha më e rëndësishme. Ndërsa, sa i përket ecurisë të mëtejshme të Ballkanit të hapur kjo është çështje që pret dhe nuk kemi asnjë urgjencë për të nxjerrë konkluzionet. Sepse do të shikojmë në vijim shumë gjëra për të parë. Jo në raport me Serbinë, por në raport se si do të zhvillohet ky proces. Sepse sot jemi në kushtet që nga ora në orë, por mund të shohim lidershipin e zgjedhur demokratik të Ukrainës të vrarë apo të marrë peng. Mund të shikojmë vendosjen e një qeverie kukull atje, mund të shikojmë një vend që kalon në një botë tjetër komplet duke u kontrolluar ushtarakisht. Nga ana tjetër ka filluar vendosja e sanksioneve dhe do të duhej të shikojmë dinamikat dhe si do të sillen vendet e aleancës , BE, ShBA-të me vendet tjera që janë neutrale me dy këndvështrime”, tha ai në konferencën e mbajtur pasditen e së premtes.

Kreu i ekzekutivit në Shqipëri deklaroi se situata në Ukrainë është luftë reale dhe se ka impakt në ekonomi.

“Është luftë reale, nuk është dokumentar apo playstation apo ngjarje që ndodhë në një kontinent tjetër. Është luftë reale në dyert e Bashkimit Evropian. Dhe në shumë vende të BE-së kanë shumë aktivitet në Rusi. Që do të thotë që gjithë këto sanksione krijojnë shtrëngesa të cilat natyrisht reflektohet jo thjeshtë në jetën ekonomike të atyre vendeve që kanë drejtpërdrejt marëdhënie të tilla, por edhe vendeve të tjera që janë në marëdhënie me to”, tha kryeministri shqiptar.

Më tej, ai potencoi se anketimet që qeveria bën vazhdimisht, tregojnë se ka një pjesë njerëzish se janë të shqetësuar se kjo luftë do të vijë në Shqipëri dhe se nuk janë të pajisur me avionë.

“Shqipëria është një vend anëtar në NATO që ka një sërë prioritetesh të vetat të koordinuara për bukuri me aleancën. Ka një plan të vetin të fuqizimit të ushtrisë, ka sot investim që po kryhet për një bazë ajrore të NATO-s, që do të kemi avionët e NATO-s aty. Në këtë aspekt nuk ka shqetësime. Sigurisht që nëse Lufta e Tretë Botërore shpërthen atëherë as nuk e parashikojmë dot, as nuk e evitojmë dot nëse të tjerët e nisin, njësoj siç nuk e parashikojmë dot kur dalim nga shtëpia ndodhë diçka”, ka deklaruar ai.

Rama është zotuar se Shqipëria është e gatshme për të strehuar qytetarët ukrainas që largohen lufta.

Në konferencën e sotme, ministrja e Punëve të Jashtme Olta Xhaçka foli dhe për një komunitet të vogël shqiptarësh atje, por kontaktet e qeverisë shqiptare tha se kanë qenë me 4-5 prej tyre, të cilët kanë kërkuar asistencë për t’u larguar.

lajme

30 për qind bursë për ish-studentët e UBT-së në programet më inovative Master – regjistrohu sot!

Published

5 hours ago

August 12, 2026

ubtnews

UBT po u ofron të gjithë të diplomuarve të tij një mundësi të veçantë për të vazhduar rrugëtimin akademik dhe profesional, duke përfituar 30% bursë për studimet Master në UBT.

Në një treg pune që po ndryshon me shpejtësi, avancimi i vazhdueshëm profesional po bëhet gjithnjë e më i rëndësishëm. Për këtë arsye, ish-studentët e UBT-së kanë mundësinë të rikthehen në universitet për të thelluar njohuritë, fituar specializime të reja dhe zhvilluar kompetenca të avancuara, tashmë me një përfitim të veçantë prej 30% bursë.

Kjo mundësi vlen për programet Master të UBT-së, të cilat përfshijnë disa nga fushat më të kërkuara dhe inovative të tregut bashkëkohor, duke u dhënë të diplomuarve mundësinë të zgjedhin një program që përputhet me profesionin, interesat dhe objektivat e tyre të karrierës.

Programet Master në UBT përfshijnë:

Menaxhment, Biznes dhe Ekonomi
FinTech dhe Menaxhimi i Inovacionit
Shkenca Kompjuterike dhe Inxhinieri
Sistemet e Informacionit dhe Menaxhment
Inxhinieri e Mekatronikës
Inxhinieri e Ndërtimit dhe Infrastrukturë
Inxhinieri e Trafikut dhe Transportit
Inxhinieri e Energjisë dhe Mjedisi
Arkitekturë dhe Planifikim Hapësinor
E Drejta Penale
E Drejta Civile dhe Pronës
E Drejta Komerciale
Gjuhë, Media dhe Komunikim
Politika Publike dhe Menaxhim
Shkenca Politike
Studime të Sigurisë
Psikologji
Shkencat dhe Teknologjia e Ushqimit
Shëndet Publik dhe Menaxhim
Biokimi
Shkencat Paramjekësore
Agrikulturë dhe Mjedis
Shëndet dhe Aktivitet Fizik

Përmes programeve të orientuara drejt inovacionit dhe nevojave të tregut, UBT synon që studentët Master të fitojnë jo vetëm njohuri të avancuara akademike, por edhe kompetenca profesionale të aplikueshme në praktikë.

Për ish-studentët e UBT-së, kjo është mundësia për ta vazhduar aty ku e nisën – duke e kthyer përvojën universitare në një nivel të ri profesional.

Regjistrohu sot dhe përfito 30% bursë!

Vendi

PDK paralajmëron veprime jashtë Kuvendit pas refuzimit të kërkesës për seancë

Published

5 hours ago

August 12, 2026

UBTNews

Sekretarja e Përgjithshme e Partisë Demokratike të Kosovës ka deklaruar se refuzimi për thirrjen e seancës më 12 gusht është një model i sjelljes politike nga Lëvizja Vetëvendosje dhe kryesuesi Avni Dehari, e jo thjesht një incident procedural. Sipas saj, shkelja e afatit 30-ditor dhe shpërfillja e rregullit për vazhdimin e seancës çdo 48 orë përbëjnë zbatim selektiv të Kushtetutës dhe bllokim të mandatit të deputetëve të zgjedhur më 7 qershor.

Ajo i bëri thirrje Albin Kurtit që ta kthejë vendin në binarë kushtetues, duke theksuar se PDK-ja nuk kërkon pushtet apo marrëveshje partiake, por funksionalizimin e shtetit. Gjithashtu, ajo bëri me dije se PDK-ja do të dorëzojë sërish kërkesë zyrtare për seancë pas 48 orësh dhe do të jetë çdo ditë në Kuvend.

Paralelisht me punën në Kuvend, ajo paralajmëroi zhvendosjen e aktivitetit politik edhe jashtë tij, përmes bashkëbisedimeve me qytetarë dhe grupe të ndryshme shoqërore. Në fund, ajo denoncoi edhe cënimin e integritetit fizik të disa deputetëve të PDK-së nga mbrojtja e afërt, duke njoftuar se për këtë rast do t’i drejtohen Inspektoratit Policor të Kosovës. /E.A/

Vendi

Prokuroria Speciale ngre aktakuzë për krime lufte në Vushtrri

Published

7 hours ago

August 12, 2026

UBTNews

Prokuroria Speciale e Republikës së Kosovës ka ngritur aktakuzë ndaj të pandehurit me inicialet S.S., i cili akuzohet për veprën penale “Krime lufte kundër popullsisë civile”.

Sipas aktakuzës, i pandehuri S.S., më 6 prill 1999 në fshatin Reznik të Vushtrrisë, në bashkëpunim me pjesëtarë të tjerë të forcave serbe, mori pjesë në vrasjen e nëntë civilëve shqiptarë. Në këtë ngjarje përfshihet edhe S.T., i cili tashmë është i dënuar nga Gjykata Themelore në Prishtinë.

Lidhur me këtë rast, Prokuroria Speciale bën me dije se dërgimi i lëndës në gjykatë është hap i rëndësishëm drejt drejtësisë: “Sjellja e përgjegjësve para drejtësisë mbetet prioritet yni kryesor për të vendosur të vërtetën dhe për të sjellë lehtësim për familjarët e viktimave.”

Rasti tanimë i është kaluar Organeve të Drejtësisë për shqyrtim të mëtejshëm gjyqësor. /E.A/

Lajmet

Etnofest përmbyll edicionin e 16-të me ndarjen e 21 çmimeve artistike

Published

8 hours ago

August 12, 2026

UBTNews

Mbrëmë është mbyllur edicioni i 16-të i EtnoFest-it, ku janë ndarë çmimet për 21 performanca dhe kategori të ndryshme artistike.

Para ceremonisë së ndarjes së çmimeve, publiku pati mundësinë të ndiqte performancën artistike “Echoes of Origin”, me Flaka Gorancën, e cila solli këngë të njohura shqiptare në një ndërthurje mes traditës dhe muzikës klasike.

Juria profesionale e përbërë nga Bislim Muçaj (kryetar), Artan Arifi (anëtar) dhe Agron Gerguri (anëtar), ndau çmimet në kategoritë e mëposhtme:Etnoperformanca më e mirë: “Echoes of Origin” – Flaka Goranci, për trajtimin artistik të rrënjëve, ku zëri unik dhe ndërthurja e traditës me modernen krijuan një lidhje të veçantë me kujtesën kulturore.

Etnoansambli më i mirë: “Vullkani i Istogut” – Istog, për energjinë, autenticitetin dhe ruajtjen e traditës së Istogut përmes një interpretimi të fuqishëm skenik.

Instrumentisti më i mirë: Blerim Grubi, për mjeshtërinë e lartë në interpretim dhe stilin e veçantë që i jep muzikës tradicionale.

Instrumentistja më e mirë: Lule Elezi, për teknikën e sigurt në piano dhe interpretimin e përpunuar, duke përcjellë melodinë me qartësi, finesë dhe emocion.

Kostumografia më e mirë: Ansambli “Devolli” – Korçë, për kostumet tradicionale të Korçës, të pasura me ngjyra, ornamente dhe të punuara me kujdes.

Koreografia më e mirë: Gjergj Prevazi me “Void”, për kombinimin e lëvizjes, ritmit dhe hapësirës në një koreografi të saktë dhe të fuqishme skenikisht.

Valltaret më të mira: Katerina Gogadhe dhe Chiara Xoxi, për harmoninë e rrallë skenike, sinkronizimin dhe komunikimin e natyrshëm përmes lëvizjes.

Valltari më i mirë: Vasjar Hysa me ansamblin “Afërdita” – Belsh, për ritmin e sigurt, lëvizjet e fuqishme dhe prezencën e spikatur skenike.

Këngëtarja më e mirë: Arta Jashari, për zërin me ngjyra unike, interpretimin dhe ndjeshmërinë e veçantë që përcjell këngën me origjinalitet.

Këngëtari më i mirë: Mustafë Ramaj, për vokalin e fuqishëm dhe interpretimin emocionues, të realizuar me mjeshtëri skenike.

Orkestra më e mirë: Ansambli “Dardanus” nga Tetova, për harmoninë instrumentale dhe interpretimin elegant të trashëgimisë muzikore.

Koncerti artistik më i mirë: Grupi “Tavera” – Izrael, për koncertin që solli në skenë tingujt e traditës së tyre muzikore, duke krijuar një atmosferë të veçantë për publikun.

Shfaqja më e mirë: “Pylli”, produksion i Teatrit “Bekim Fehmiu” në Prizren, për realizimin mbresëlënës skenik dhe trajtimin e thellë të emocioneve njerëzore.

Regjia më e mirë: Ilir Bokshi, me shfaqjen “Pesë fytyrat e heshtjes”, produksion i Teatrit “Migjeni” në Shkodër, për vizionin e ndërtuar me mjeshtëri dhe ndjeshmëri të thellë regjisoriale.

Aktori më i mirë: Adrian Morina, me shfaqjen “Pesë fytyrat e heshtjes”, për interpretimin bindës, emocionet e fuqishme dhe thellësinë psikologjike të rolit.

Aktorja më e mirë: Hajat Toçilla, me shfaqjen “Pylli”, për interpretimin plot emocione dhe vërtetësi që i dha personazhit.

Skenografia më e mirë: Bekim Korça, me shfaqjen “Pylli”, për konceptin pamor origjinal dhe krijimin e një universi skenik funksional e domethënës.

Çmimi për inovacion artistik: “Soloist of GOB” nga Bolonja, Itali, për trajtimin artistik dhe inovativ të motiveve të frymëzuara nga okarina e Runikut, një prej instrumenteve më të hershme të gjetura në trojet shqiptare.

Çmimi special i EtnoFest-it: Armend Baloku me performancën “Lahuta e Malcís”, për një performancë të jashtëzakonshme që përcolli fuqinë e trashëgimisë epike shqiptare dhe mbajti publikun të përfshirë.

Çmimi i karrierës: Selman Jusufi, për një karrierë mbi katër dekada, më shumë se 200 role dhe një kontribut të çmuar në skenën artistike, duke lënë gjurmë të veçanta në teatrin dhe kinematografinë shqiptare.

Me këtë ceremoni, edicioni i 16-të i EtnoFest-it u përmbyll duke vlerësuar artistë, ansamble dhe krijues nga Kosova, Shqipëria e vende të tjera, të cilët përmes artit dhe performancës kontribuojnë në ruajtjen e trashëgimisë kulturore. /A.M/