Aktualitet

​Punëtorët e Lotarisë protestuan para Qeverisë së Kosovës

Published

4 years ago

on

Punëtorët e Lotarisë së Kosovës kanë protestuar sot para Qeverisë së Kosovës, për shkak të mos marrjes së pagave për afro një vit. Këta punëtorë thonë se janë lënë në harresë nga Qeveria e Kosovës dhe se janë në gjendje të vështirë financiare.

Ata janë pritur në takim nga ministri në detyrë i Financave, Agim Krasniqi, e nga i cili kanë marrë premtim se do të shqyrtohen të gjitha mundësitë për të arritur një zgjidhje për ata. Punëtorët i kanë dhënë afat qeverisë deri në fund të kësaj jave që të bëjë zgjidhje për pagat, e më pastaj nuk e përjashtojnë mundësinë që sërish të protestojnë.

Shpresa Gosalci, përfaqësuese e Sindikatës së Punëtorëve të Lotarisë së Kosovës, tha se punëtorët gjenden në gjendje të keqe ekonomike dhe se qeverisë me ligj i takon që t’i kryejë obligimet që i ka ndaj punëtorëve të saj. Ajo thotë se punëtorët kanë mbetur pa punë qysh kur ka hyrë në fuqi ligji për ndalimin e lojërave të fatit, ani pse, sipas saj, bastoret kanë vazhduar punën edhe ilegalisht.

“Arsyeja pse punëtorët e Lotarisë së Kosovës janë duke protestuar para Qeverisë është kërkesa e tyre për përmbushjen e pagave, të cilat që gati u bë 1 vit që nuk i kanë marrë, sidomos në këtë kohë të rëndë pandemie gjendja e tyre ekonomike është rënduar tej mase, shumica e punëtorëve të Lotarisë janë femra, janë gra, kemi nëna vetushqyese të cilat mbajnë familjen. Qeveria e Kosovës është pronare, njëkohësisht aksionare e Lotarisë së Kosovës, si dhe me ligj i takon që t’i kryejë obligimet që i ka ndaj punëtorëve të saj”, tha ajo.

Ajo tha se në vazhdimësi i janë drejtuar institucioneve për të realizuar të drejtën e tyre për paga, por që tha se e gjitha që kanë marrë janë premtimet se do të gjendet një zgjidhje.

Pas takimit me ministrin në detyrë të Financave, ajo tha se do t’i japin afat deri në fund të kësaj jave që të realizohet kërkesa e tyre.

“U takuam me ministrin e Financave dhe si rezultat i këtij takimi doli se Ministria e Financave, ministri do të shqyrtojë të gjitha mundësitë që të shoh në arritjen e një zgjidhje për punëtorët e Lotarisë së Kosovës. Se çka do të jetë përfundimi mbetet ta shohim. Afati kohor do të jetë deri në fund të kësaj jave, pastaj do të shohim. Ne do të mbajmë një takim të radhës me punëtorët e Lotarisë së Kosovës, të shohim edhe cila do të jetë kërkesa apo vendimi i tyre se si të vazhdojmë më tutje”, u shpreh ajo.

Punëtorët shprehen të zhgënjyer që aksionari, në këtë rast Qeveria e Kosovës, nuk ka ndërmarrë asnjë veprim që ata të mund të marrin pagat e tyre.

Bashkim Sherifi, punëtor i Lotarisë së Kosovës në Ferizaj, tha se janë në gjendje të rëndë financiare pasi që kanë obligime edhe ndaj bankave. Ai thotë se si punëtorë të Lotarisë janë lënë pas dore nga qeveria e vendit dhe se nuk po merren parasysh kërkesat e tyre.

“Po mbijetojmë dhe është më e keqja që fajtor më së paku jemi ne për këta çka kemi mbetur pa punë, fajtor dihet, fajtor është qeveria që e kanë bërë në mënyrë arbitrare e kanë mbyllur një biznes që ka funksionuar me vite të tëra. Vështirë është boll, kemi pasur obligime dhe kemi obligime prapë ndaj bankave. Tërësisht na ka lënë pas dore, nuk janë interesuar për ne se me numër jemi pak punëtorë 60 punëtorë jemi edhe për atë. Premtime kanë dhënë, gjithmonë i kanë dhënë premtime sindikatës që do të shihemi do të bëjmë diçka për juve, mirëpo kanë mbetur vetëm premtime. Thjeshtë kemi pritur deri në këtë ditë, tash varet nga sindikata, varet nga menaxhmenti a do të vazhdojnë me protesta apo jo, ne jemi për protesta me i vazhdua rregullisht”, tha ai.

Kuvendi i Kosovës në prill të vitit 2019 ka miratuar ligjin për ndalimin e lojërave të fatit, e që nga ajo kohë Lotaria e Kosovës ka ndërprerë veprimtarinë e saj.

Related Topics:
Continue Reading

Bota

Hetimi: Ndërprerësit e karburantit të aeroplanit Air India u ndalën pak para rrëzimit

Published

2 days ago

on

July 12, 2025

By

Ndërprerësit për kontrollim të karburantit në motorët e aeroplanit të kompanisë ajrore Air India, i cili është rrëzuar pak pasi është nisur dhe ka lënë të vdekur 260 persona muajin e kaluar, e kanë ndryshuar statusin nga pozicioni i “ rrjedhshëm” në të “ndalur” pak para se të ndodhte incidenti, është thënë në një raport paraprak hetimor të shtunën.

Në raportin e lëshuar nga Byroja për Hetimin e Aksidenteve të Aeroplanëve të Indisë, nuk janë dhënë përfundime apo se kush ka faj për katastrofën e 12 qershorit, mirëpo sipas të dhënave të kutisë së zezë, një pilot e ka pyetur tjetrin se pse e ka ndalur karburantin dhe i dyti i ka thënë se nuk ka vepruar ashtu.

Aeroplani i llojit Boeing 787-8 ishte nisur nga Ahmedabadi, qytet në perëndim të Indisë, për në Londër. Si pasojë e rrëzimit të aeroplanit kanë vdekur 242 persona në bord dhe 19 tjerë që kanë qenë në vendin e përplasjes.

Një pasagjer ka mbijetuar mrekullisht. Ai ka qenë një shtetas britanik, i cili ka arritur të largohet nga copëzat e aeroplanit dhe tashmë është liruar nga spitali.

Në raportin prej 15 faqesh, byroja për hetime ka thënë se sapo aeroplani ka arritur në shpejtësinë e duhur “ndërprerësit për karburant të motorëve 1 dhe 2 janë ndalur me një distancë nga njëri-tjetri prej 1 sekonde”.

Menjëherë pas këtij veprimi, raportohet se aeroplani e ka humbur drejtimin.

Sipas raportit, ndërprerësit janë rikthyer sërish në pozicionin “rrjedhës” dhe motorët kanë fituar fuqi, mirëpo njëri prej pilotëve veçse e ka nisur sinjalin për emergjencë.

Kontrollorët e trafikut ajror i kanë pyetur pilotët se çfarë ka ndodhur, mirëpo e kanë parë aeroplanin të rrëzuar dhe e kanë angazhuar menjëherë personelin për emergjenca në vendin e ngjarjes.

Continue Reading

Bota

Gjermania planifikon të blejë më shumë avionë luftarakë F-35 nga SHBA-ja

Published

3 days ago

on

July 11, 2025

By

Gjermania po planifikon të blejë 15 avionë luftarakë të tjerë F-35 nga SHBA-ja, transmeton Anadolu.

Berlini planifikon të rrisë madhësinë e flotës së saj të avionëve F-35 nga 35 në 50, njofton “Politico”. Në këtë kontekst, Gjermania planifikon të blejë 15 avionë luftarakë të tjerë F-35 nga kompania amerikane “Lockheed Martin”.

Vlen të përmendet se porosia e re e mundshme e Gjermanisë për avionët F-35 vjen pasi NATO kohët e fundit ra dakord për objektiva të reja për armët dhe nivelet e trupave.

Qeveria gjermane porositi 35 avionë luftarakë F-35 nga SHBA si pjesë e programit të ri të modernizimit të ushtrisë prej 100 miliardë eurosh.

Avionët luftarakë F-35 nga prodhuesi “Lockheed Martin”, janë planifikuar të zëvendësojnë avionët luftarakë “Tornado” të përdorur nga Forcat Ajrore Gjermane që nga viti 1980 dhe janë të vetmit avionë luftarakë gjermanë të aftë të mbajnë bomba bërthamore amerikane.

Ndërsa mosmarrëveshja midis Gjermanisë dhe Francës në lidhje me partneritetin e Sistemit të Avionëve Luftarakë Ajror të Gjeneratës së Ardhshme (FCAS) rritet, këtë javë në mediat evropiane doli lajmi se Franca donte të merrte 80 për qind të pjesës së punës në këtë projekt.

Continue Reading

Bota

Trump: Armët amerikane do të dërgohen në Ukrainë përmes NATO-s

Published

3 days ago

on

July 11, 2025

By

Trump ka thënë se do të bëjë një “deklarim të madh” për Rusinë më 14 korrik. Ai nuk ka dhënë më shumë hollësi në këtë aspekt, mirëpo ka folur për dërgimin e armëve.

“Po i dërgojmë armë NATO-s, dhe NATO-ja po paguan për këto armë 100%. Pra, çfarë po bëjmë është se armët që po nisen, po shkojnë në NATO, dhe më pas NATO-ja do t’i dorëzojë këto armë në Ukrainë dhe NATO-ja do të paguajë për këto armë”, ka thënë Trump në një intervistë për transmetuesin amerikan NBC.

Më herët gjatë javës, Trump ka thënë se do të kërkojë nisjen e disa armëve për mbrojtje për Ukrainën, pas komenteve negative të disa anëtarëve të Kongresit rreth njoftimit të Pentagonit, më 2 korrik, që disa armë nuk do të dërgohen, pas shqetësimeve se rezervat amerikane kanë rënë në mënyrë të konsiderueshme.

Trump duket se e ka përmbysur këtë vendim më 8 korrik, kur ka thënë se Shtetet e Bashkuara do të dërgojnë armë për mbrojtje të Ukrainës, teksa intensifikohen sulmet ruse.

Ai, gjithashtu, është shprehur i zemëruar me presidentin rus, Vladimir Putin, duke thënë se po e shqyrton mundësinë e vendosjes së sanksioneve të reja ndaj Moskës.

Trump ka thënë se është duke e studiuar propozimin e senatorëve Lindsey Graham dhe Richard Blumenthal për vendosjen e sanksioneve dhe tarifave ndaj shteteve që mbështesin luftën e Rusisë, dhe masa tjera ndëshkuese për sistemin bankar të Rusisë.

“Besoj se do të bëj një deklarim të madh për Rusinë të hënën”, ka thënë Trump gjatë intervistës.

Presidenti ukrainas, Volodymyr Zelensky u ka bërë thirrje aleatëve që t’i përdorin “asetet ruse” për rindërtim të Ukrainës dhe ka kërkuar më shumë armë, investime dhe prodhim të përbashkët të armëve për mbrojtje.

Më 10 korrik, Sekretari amerikan i Shtetit, Marco Rubio ka thënë se ia ka përsëritur homologut të tij rus, Sergei Lavrov se Moska duhet të jetë më fleksibile.

Dy diplomatët janë takuar në margjina të një samiti në Malajzi.

“Na duhet një plan veprimi për të ecur përpara për zgjidhje të këtij konflikti”, ka thënë Rubio, duke shtuar se administrata Trump është angazhuar me Senatin amerikan rreth asaj se si mund të duken sanksionet e reja ndaj Rusisë.

“Patëm bisedë të sinqertë. Ishte e rëndësishme”, ka thënë Rubio pas takimit në Kuala Lampur.

Ministria e Jashtme ruse ka thënë se Rubio dhe Lavrov kanë pasur “këmbim të sinqertë dhe substantial të pikëpamjeve të tyre”.

Rubio ka thënë se njoftimi i Pentagonit për dërgimin e armëve në Ukrainë është keqkuptuar, dhe që shumica e ndihmës amerikane nuk është ndalur kurrë për Ukrainën.

Ai e ka pranuar që Ukraina ka nevojë për më shumë sisteme Patriot dhe që disa janë “të qasshme në shumë shtete në Evropë, por askush nuk dëshirojë t’i ndajë me ta”, prandaj ka thënë se beson që situata do të ndryshojë.

Ai ka thënë se Rusia i ka humbur 100.000 ushtarë prej janarit, dhe që ata janë vrarë, nuk janë vetëm të plagosur.

Ukraina, sipas tij, ka humbur më pak ushtarë përgjatë asaj periudhe.

“Ndonëse shifra është më e vogël, megjithatë është e konsiderueshme”, ka deklaruar mes tjerash Rubio.

Lufta në Ukrainë ka nisur më 24 shkurt të vitit 2022.

Presidenti rus, Vladimir Putin, e quan luftën “operacion special ushtarak” për të çmilitarizuar Ukrainën.

Perëndimi është përgjigjur ndaj Rusisë, duke goditur ekonominë e këtij shteti me sanksione të ashpra.

Si pasojë e luftës kanë vdekur mijëra persona dhe miliona të tjerë janë zhvendosur nga shtëpitë e tyre./REL

Continue Reading

Kërkime

Profesori i UBT-së, Musa Sabedini, publikon punim shkencor në revistën ndërkombëtare JGPSCD në SHBA

Published

3 days ago

on

July 11, 2025

By

Profesori i UBT-së, Musa Sabedini, ka realizuar një tjetër sukses akademik me publikimin e punimit shkencor në revistën ndërkombëtare Journal of Global Perspectives on Society, Culture, and Development (JGPSCD), e cila botohet në Shtetet e Bashkuara të Amerikës nga MK Science Set Publishers, me ISSN 3067‑8358 dhe me sistem vlerësimi shkencor “double-blind peer review”.

Punimi me titull “A janë lajmet e rreme (dezinformimi) armiku më i madh i Etikës, në gazetarinë profesionale në Kosovë?” trajton një tematikë aktuale dhe me rëndësi të veçantë për zhvillimin e gazetarisë etike dhe profesionale në Kosovë, në një kohë të mbushur me sfida të dezinformimit dhe lajmeve të rreme.

Ky punim, i cili është i pajisur me DOI zyrtar, përbën një kontribut domethënës në fushën e studimeve të gazetarisë dhe etikës mediale, duke pasuruar kështu literaturën akademike dhe duke rritur profilin ndërkombëtar të UBT-së në kërkim shkencor.

Profesori Sabedini është autor i tre librave shkencorë në fushën e gazetarisë dhe etikës, përfshirë:

  • Etika, mburojë e gazetarisë profesionale (2025), promovuar në UBT
  • Gazetaria Online në Kosovë dhe në rajon: Etika dhe sfidat e vetërregullimit (2024)
  • Mediet, etika, raportimet për situata të ndjeshme (2023)

Ai ka prezantuar mbi 11 punime shkencore në konferenca ndërkombëtare dhe gëzon mbi 33 vite përvojë në gazetarinë informative dhe hulumtuese. Është themeltar dhe redaktor i portalit RajoniPress, i njohur për raportime profesionale mbi çështje të ndjeshme si korrupsioni dhe krimi i organizuar.

Për angazhimin e tij në gazetari, Sabedini është katër herë fitues i çmimit “Gazetari i Vitit” në Kosovë, ndërsa ka ndjekur trajnime të avancuara në SHBA, përfshirë edhe në University of Missouri – Columbia, në fushën e gazetarisë hulumtuese dhe luftës kundër korrupsionit.

Continue Reading

Të kërkuara