Aktualitet

PSD nis fushatën përmes së cilës prezanton programin “BAZË” të saj

Programi përbëhet nga 5 shtylla kryesore.

Published

4 years ago

October 12, 2022

UBT news

Partia Socialdemokrate nga sot ka nisur fushatën 1 mujore ku nëpër sheshe të ndryshme të Kosovës do të prezantoj programin e ri të quajtur “Bazë“, i cili përbëhet nga 5 shtylla kryesore.

Shtyllat të cilat u prezantuan edhe sot në sheshin “Skënderbeu” në Prishtinë ishin zhvillimi i hershëm i fëmijëve, shëndetësi publike, pagë bazë për secilin qytetar, fondi i sigurimit social si dhe tatimi progresiv dhe taksat e mirëqenies.

Kryetari i PSD-së, Dardan Molliqaj u shpreh se ky subjekt politik po rritet çdo ditë e më shumë.

“Jemi subjekti që ka simpati shumë të madhe jashtëzakonisht të madhe e cila për çdo ditë po shndërrohet në strukturim dhe anëtarësim. Mund të them po ashtu me përgjegjësinë e madhe që jemi subjekti që ka më së shumti anëtarësime brenda ditës apo brenda javës. Prej krejt subjekteve të mëdha jemi shumë larg me ta, ama trendi është tjetër kah, trendi është që neve për çdo ditë na rritet anëtarësia”, u shpreh Molliqaj.

Ai para mediave propozoi edhe disa modele të tatimit duke shtuar taksat për ata që trashëgojnë pasuri, rritje të tatimit për korporata në 23% por edhe futjes në funksion të tatimit për dividendë.

“Prandaj, ne kemi vendosur që të propozojmë një model tjetër të taksimit në njërën anë duke i shtuar taksat, dy taksa të cilat ne besojmë që janë të rëndësishme e para ka të bëjë me trashëgiminë. Ne besojmë që shteti me kalimin e kohë është dashur me zhduk hendekun mes atyre që trashëgojnë shumë dhe atyre që nuk trashëgojnë fare, në këtë kuptim e kemi vendosur taksën e trashëgimisë e cila secili që ka trashëgimi prej paraardhësve do të duhet të paguaj tatim në një shkallë progresive….Kjo bënë një rritje të kohezionit social dhe një zhdukje të hendekut të pabarazive. E dyta që është shumë e rëndësishme është taksa në dividendë. Kosova është i vetmi vend në Ballkan, Evropë që nuk ka taksë në dividendë. Dividenda është shuma e parave që tërhiqet nga tregu dhe ekonomia. Taksa në dividendë do të jetë 33%. Pra do të duhej që nëse 100 milionë euro do të ishin dividendë të bankave në Kosovë do të duhej mesatarisht përafërsisht 33 milionë euro të ishin në shtetin e Kosovës me u shpërnda. Po ashtu mendojmë se duhet të rriten taksat në të ardhurat e korporatave. Nuk ka kuptim si një punëtorë, si një biznes i vogël, si një biznes i mesëm me pagu si një korporatë. Deri më tani ka qenë 10% ne do ta propozojmë të jetë 23%. Nuk po flasim me ua shtrëngua lakun bizneseve por po flasim me nda fitimin”, tha ai.

Kreu i PSD-së u shpreh se në programin e tyre “Bazë“ parashihet edhe rritja e tatimit në të ardhura për të gjithë ata që kanë pagë mbi 750 euro, si dhe Fondin e Sigurimit Social që rregullon pagesa për pushime të lehonisë, pensione por edhe familje që jetojnë nga skema sociale.

Molliqaj u shpreh se në këtë kohë krizash nuk është ndërhyrja e duhur ndihma me nga 100 euro në vit për pensionistët dhe familjet me asistencë sociale.

“Jemi vazhdimisht në kriza një pjesë e qytetarëve janë nën minimumin jetik dhe besojmë që ishte dashur me pas parasysh që kjo është ndërhyrja e duhur, nuk besojmë që është ndërhyrja e duhur që pensionistëve t’ua japësh nga 100 euro në vit, nuk është ndërhyrje e duhur që familjeve me asistencë sociale 1 herë në vit t’ ua japësh 100 euro, ndërhyrja e duhur është që tu vendosësh bazën nën të cilët nuk bien në çfarëdo rrethane dhe ajo bazë duhet të jetë bazë e cila minimalisht e krijon mundësinë për jetesë“, theksoi ai.

Kurse, Donjeta Demolli anëtare e kryesisë në PSD tha se programi i kësaj partie synon që për secilin qytetar pa asnjë kusht të ofrohet paga universale bazë prej 60 eurosh.

Ndërsa, theksoi se për shkak të përqindjes së ulët të fëmijëve në çerdhe, propozojnë që të ndërtohen 700 çerdhe në Kosovë për të siguruar zhvillim të hershëm të fëmijëve.

Lajmet

Moti sot në Kosovë: Diell dhe temperatura deri në 35°C

Published

23 minutes ago

August 25, 2026

UBTNews

Dita e sotme në Kosovë do të karakterizohet nga mot kryesisht me diell dhe vranësira të shpërndara.

Sipas Institutit Hidrometeorologjik të Kosovës (IHMK), temperaturat minimale do të lëvizin nga 11 deri në 15 gradë Celsius, ndërsa ato maksimale do të arrijnë ndërmjet 30 dhe 35 gradë Celsius.

Era do të fryjë nga drejtimi i verilindjes me një shpejtësi të lehtë prej 1 deri në 4 m/s. /E.A/

Lajmet

Juridiku në UBT: Rrugëtimi ideal drejt një karriere të suksesshme në drejtësi

Published

16 hours ago

August 24, 2026

UBTNews

Fusha e drejtësisë kërkon dije, integritet dhe aftësi për të parë përtej një rregulli, për të kuptuar një çështje dhe për të ndërtuar argumentin e duhur. Në një shoqëri ku ligji është pjesë e çdo fushe të jetës, nevoja për profesionistë të përgatitur juridikisht është gjithnjë më e madhe. Pikërisht për këtë, UBT ofron Programin Bachelor në Juridik si një rrugëtim akademik dhe profesional që i pajis studentët jo vetëm me njohuri të thelluara juridike, por edhe me aftësitë praktike të nevojshme për t’i zbatuar ato në realitet.

Programi Bachelor në Juridik në UBT ofrohet në Prishtinë dhe në Kampusin e UBT-së në Prizren, duke u krijuar studentëve mundësinë të ndjekin studimet në një mjedis modern dhe të orientuar drejt zhvillimit profesional. Programi synon të ofrojë cilësinë më të lartë të edukimit juridik dhe të përgatisë studentë të aftë për të përballuar kërkesat e profesionit, për të kontribuar në forcimin e sundimit të ligjit dhe për të luajtur një rol aktiv në zhvillimin e shoqërisë.

Gjatë studimeve, studentët ndërtojnë njohuri të qëndrueshme në fushat kryesore të së drejtës, duke përfshirë të drejtën civile, penale, administrative, tregtare dhe kushtetuese, si dhe dimensionet e së drejtës ndërkombëtare. Ata mësojnë të analizojnë legjislacionin, të interpretojnë normat juridike dhe të kuptojnë mënyrën se si parimet dhe rregullat juridike zbatohen në raste konkrete.

Por një jurist i mirë nuk mjaftohet vetëm me njohjen e ligjit. Për këtë arsye, programi i kushton rëndësi të veçantë zhvillimit të mendimit kritik, aftësive analitike, komunikimit profesional dhe argumentimit juridik. Studentët mësojnë të analizojnë çështje të ndryshme ligjore, të hartojnë dokumente juridike dhe të ndërtojnë argumente të strukturuara, duke përdorur edhe metodën IRAC – Çështja, Rregulla, Analiza dhe Përfundimi. Kjo qasje i ndihmon ata të zhvillojnë një mënyrë sistematike të të menduarit dhe të zgjidhjes së problemeve juridike.

Programi i nxit studentët edhe në fushën e hulumtimit dhe analizës juridike. Ata angazhohen në projekte që kërkojnë mbledhjen, analizimin dhe interpretimin e legjislacionit të Kosovës, vendimeve gjyqësore dhe çështjeve të së drejtës kombëtare e ndërkombëtare. Në këtë mënyrë, studentët zhvillojnë aftësinë për të hulumtuar në mënyrë të pavarur, për të vlerësuar burimet juridike dhe për të ndërtuar përfundime të bazuara në argumente profesionale.

Përveç njohurive individuale, rëndësi i kushtohet edhe aftësisë për të bashkëpunuar dhe komunikuar në mënyrë profesionale. Studentët përgatiten për punë ekipore dhe bashkëpunim me institucionet e drejtësisë, policinë, prokuroritë, gjykatat, organizatat joqeveritare dhe sektorin privat. Kjo i pajis ata me kompetenca që janë të rëndësishme jo vetëm për profesionin juridik, por për çdo mjedis profesional ku kërkohet përgjegjësi, analizë dhe vendimmarrje.

Me përfundimin e studimeve, të diplomuarit synohet të jenë të përgatitur për të vazhduar rrugëtimin e tyre profesional dhe akademik në fusha të ndryshme të drejtësisë. Ata fitojnë një bazë të fortë për zhvillimin e mëtejshëm në profesionet juridike, në institucione publike, organizata, sektorin privat dhe fusha të tjera ku kërkohen njohuri dhe kompetenca juridike.

Juridiku në UBT është një përvojë që ndërthur dijen, praktikën, kërkimin dhe zhvillimin personal. Është vendi ku studenti mëson jo vetëm çfarë thotë ligji, por edhe si ta analizojë, ta interpretojë dhe ta përdorë atë me përgjegjësi. Në Prishtinë dhe Prizren, UBT u hap rrugën të rinjve që duan ta shndërrojnë interesimin për drejtësinë në një profesion dhe një karrierë me ndikim.

Lajmet

UBT, lider i institucioneve akademike në rajon në ndikimin e qëndrueshmërisë

Published

16 hours ago

August 24, 2026

UBTNews

UBT ka shënuar një tjetër arritje të rëndësishme në Times Higher Education (THE) Impact Rankings 2026, duke u renditur si institucioni më i lartë në mesin e institucioneve akademike nga Kosova, Shqipëria dhe Maqedonia e Veriut të përfshira në këtë krahasim rajonal.

UBT: 801–1000 në nivel global

Pozicioni i përgjithshëm i UBT-së në renditjen globale është përmirësuar krahasuar me vitet e mëparshme, duke kaluar nga grupi 1001–1500 në vitet 2024 dhe 2025, në grupin 801–1000 në vitin 2026. Ky progres dëshmon për forcimin e profilit ndërkombëtar të UBT-së në fushën e qëndrueshmërisë dhe rritjen e ndikimit të tij në nivel rajonal.

Performanca më e fuqishme e UBT-së në objektivat e zhvillimit të qëndrueshëm është veçanërisht e dukshme në:

SDG 7 – Affordable and Clean Energy: 50.6–55.3
SDG 2 – Zero Hunger: 54.4–62.7
SDG 1 – No Poverty: 56.4–62.7

UBT ka shënuar gjithashtu rritje të dukshme në disa nga SDG-të krahasuar me vitet e mëparshme, me progres të veçantë në reduktimin e varfërisë, shëndetin dhe mirëqenien, barazinë gjinore, ujin e pastër, energjinë e pastër dhe punën e denjë.

Me një pikëzim të përgjithshëm në THE Impact prej 53.7–60.6, UBT qëndron në krye të institucioneve të përfaqësuara nga Kosova, Shqipëria dhe Maqedonia e Veriut.

Ky rezultat shkon përtej një pozicioni në renditje. Ai pasqyron ndikimin në rritje të kërkimit shkencor, edukimit, politikave institucionale, angazhimit me komunitetin dhe përkushtimit të UBT-së ndaj Objektivave të Zhvillimit të Qëndrueshëm të Kombeve të Bashkuara.

Lajmet

Paralajmërohet grevë e punëtorëve teknikë të shkollave në Prishtinë më 1 shtator

Published

16 hours ago

August 24, 2026

UBT News

Punëtorët teknikë të shkollave fillore dhe të mesme të Komunës së Prishtinës kanë paralajmëruar grevë më 1 shtator 2026, nëse deri më 31 gusht nuk u paguhen pagat për punën e kryer gjatë muajit korrik.

Lajmin e ka bërë të ditur kryetari i Sindikatës së Punëtorëve të Sektorit Privat të Kosovës, Jusuf Azemi.

Sipas njoftimit të sindikatës, punëtorëve ende nuk u është realizuar pagesa për punën e kryer në muajin korrik.

“Pas diskutimit, të gjithë kryetarët e shoqatave u dakorduan që, nëse pagat e punëtorëve nuk janë në llogaritë e tyre bankare deri më 31.08.2026, nga data 1 shtator 2026 do të fillojë grevë e punëtorëve teknikë në shkollat fillore dhe të mesme të Komunës së Prishtinës”, thuhet në njoftimin e sindikatës.

Sindikata ka theksuar se kërkesa e punëtorëve është e qartë: “Puna e kryer duhet të paguhet.”/A.K/