Taylor Swift ka thyer rekordin e presidentit amerikan Donald Trump për numrin më të madh të ndjekësve në një podcast brenda orës së parë të publikimit.

Të mërkurën në mbrëmje, ajo u shfaq në “New Heights”, që udhëhiqet nga i dashuri i saj Travis Kelce dhe vëllai i tij Jason Kelce. Episodi, i cili zgjati mbi dy orë dhe u publikua në orën 19:00, u ndoq nga rreth 1.3 milionë njerëz vetëm në orën e parë në YouTube, sipas The Daily Beast dhe të konfirmuara nga përfaqësuesit e Swiftit, ka raportuar SYRACUSE.

Ky numër e kaloi rekordin që më parë mbahej nga Trump. Në tetor 2024, ishte i ftuar në “Joe Rogan Experience”, ku brenda orës së parë u regjistruan 800 mijë shikime, sipas të dhënave të analistit të CNN, Harry Enten.

Madje, numri i madh i shikuesve gjatë episodit me Swift ishte aq i lartë saqë videoja në YouTube u rrëzua pas 1 orë e 44 minutash transmetim.

Jason Kelce ka shkruar me shaka në platformën “X” pak para se videoja të dilte.

“Ky fakt që videoja ka 1.3 milionë shikime është mishërimi i numerologjisë”, ka shkruar ai.

Gjatë episodit rekord, Swift ka prezantuar kopertinën dhe listën e këngëve të albumit të saj të ardhshëm “The Life of a Showgirl”, foli për rikthimin e kontrollit mbi të drejtat e këngëve të saj origjinale dhe për marrëdhënien me Travis Kelce.

Thyerja e këtij rekordi vjen vetëm tre muaj pasi Trump kishte deklaruar në platformën e tij, Truth Social, se popullariteti i Swift po binte për shkak të tij.

“Ka vënë re dikush se, që kur thashë ‘E URREJ TAYLOR SWIFT’, ajo nuk është më ‘E NXEHTË’?”, ka shkruar ai në muajin maj.

Trump e pati sulmuar publikisht këngëtaren për herë të parë në muajin shtator 2024, pasi shpalli hapur mbështetjen për Kamala Harris në zgjedhje.

Që prej asaj kohe, ai ka vazhduar ta përmendë me kritika spontane, madje edhe në një fjalim në muajin prill, kur skuadra e Eagles vizitoi Shtëpinë e Bardhë pas fitores në Super Bowl. Swift, nga ana e saj, kurrë nuk i ka komentuar publikisht deklaratat e Trump.

Pippo Baudo, një ndër prezantuesit më të famshëm në Itali, ka ndërruar jetë në moshën 89-vjeçare, më 16 gusht 2025, në Romë.

Lajmin e trishtë e konfirmuan familjarë të Pippo-s, si dhe avokati dhe miku i tij i ngushtë, Giorgio Assumma.

Pippo Baudo u lind në Militello më 7 qershor 1936 e ka pasur karrierë të pasur me pjesëmarrjen në emisione dhe televizione të ndryshme.

Ai është nderuar me titullin “Kalorësi i Madh i Kryqit të Urdhrit të Meritës së Republikës Italiane”, të cilin e mori në Quirinale më 22 shtator 2021, ka drejtuar 13 festivale të Sanremos, 5 prej të cilave, për vite radhazi.

Ai ka marrë pjesë në mbi 150 programe, mes tyre “Settevoci”, “Canzonissima”, “Domenica In”, “Fantastico” etj, si dhe ka qenë drejtor i Operës së Katanias.

Për humbjen e një legjende të tillë kanë shprehur ngushëllime figura të njohura të spektaklit italian. Prezantuesi, i njohur edhe si “mbreti i ekranit”, ka qenë në Shqipëri 2 herë, më 2009 dhe kur bashkëprezantoi “Këngën Magjike 2014”, së bashku me Anna Oxa dhe Ardit Gjebrean.

“Pippo ishte si baba për mua,” u shpreh Giancarlo Magalli dhe “Me të largohet një pjesë e jetës sime,” tha me dhimbje Mara Venier.

Kryeministrja e Italisë, Giorgia Meloni shkroi: “Fytyra dhe zëri i tij kanë shoqëruar breza të tërë, duke dhuruar emocione, buzëqeshje dhe çaste të paharrueshme. Faleminderit për gjithçka”.

Modelja dhe prezantuesja televizive ruse, Kseniya Alexandrova, e cila mori pjesë në konkursin “Miss Universe në vitin 2017”, ka ndërruar jetë në moshën 30-vjeçare, ka raportuar USA TODAY.

Lajmin e konfirmoi agjencia e saj e modelimit, “Modus Vivendis”, përmes një postimi emocional në Instagram. Shkaku i vdekjes nuk u bë publik nga agjencia, por mediat ruse raportuan se Alexandrova humbi jetën në një aksident trafiku më 12 gusht, teksa po udhëtonte me bashkëshortin e saj.

Sipas RIA Novosti, makina e tyre u përplas ballë për ballë me një dre që kishte dalë në rrugë, dhe Alexandrova pësoi goditje fatale në kokë.

“Kseniya ishte e ndritshme, e talentuar dhe jashtëzakonisht e veçantë. Ajo dinte si të frymëzonte, të mbështeste dhe t’u jepte ngrohtësi të gjithëve përreth. Për ne, ajo do të mbetet gjithmonë simbol i bukurisë, mirësisë dhe forcës së brendshme”, shkroi agjencia “Modus Vivendis”.

Modelja ishte martuar vetëm pak muaj më parë, në mars, siç kishte njoftuar vetë në një postim në Instagram më 2 prill.

E lindur në Moskë, Alexandrova përfaqësoi qytetin e saj në konkursin “Miss Russia 2017”, ku u shpall nënkampione.

Ajo kishte diplomuar një vit më parë në Universitetin Ekonomik Plekhanov të Rusisë, ku mori një diplomë në financë.

Pasi fituesja e “Miss Russia”, Polina Popova, vendosi të përfaqësonte vendin në “Miss World”, Alexandrova mori pjesë në “Miss Universe 2017”.

“Dua që njerëzit anembanë botës të besojnë në vetvete dhe të kenë gjithmonë një ëndërr. Duhet të jemi të fortë, të mos dorëzohemi kurrë dhe të besojmë se në këtë botë gjithçka është e mundur”, tha ajo në një intervistë gjatë garës.

Organizata “Miss Universe” ka publikuar një homazh në rrjete sociale më 14 gusht, duke shprehur “ngushëllimet më të sinqerta për familjen, miqtë dhe të gjithë ata që u prekën nga drita e ‘Miss Universe Russia 2017’”.

“Hiri, bukuria dhe shpirti i saj lanë gjurmë të pashlyeshme në familjen e ‘Miss Universe’ dhe më gjerë. Qoftë kujtimi i saj frymëzim për mirësinë, forcën dhe dashurinë tek të gjithë ata që patën fatin ta njihnin”, thuhet në homazhin në fjalë.

Përveç suksesit si modele, Alexandrova kishte vazhduar edhe studimet. Në një postim në nëntor 2022, kishte treguar se punonte si terapiste e psikodramës.

Victoria Beckham ka treguar se jeta në qendër të vëmendjes për më shumë se 30 vite i ka sjellë shumë vështirësi.

Në një dokumentar të ri të Netflix, që do të publikohet në shtator, zbulon se presioni i mediave dhe kritikat e ashpra në vitet ’90 i shkaktuan probleme me imazhin trupor dhe e shtynë drejt një diete shumë të kufizuar.

Victoria shfaqet e emocionuar e pranon se ka pasur lot gjatë rrëfimit, kujton si ndihej e gjykuar nga publiku e mediat britanike, madje edhe në momente delikate të jetës private. Një prej rasteve më të vështira ishte kur më 1999 u detyrua të peshohej live në televizion dy muaj pas lindjes së djalit, Brooklyn.

Burime pranë saj thonë se ky presion e bëri të rreptë me veten, duke stërvitur çdo ditë dhe duke ndjekur një regjim ushqimor të njëjtë për dekada.

David Beckham ka pranuar se bashkëshortja e tij ka konsumuar për 25 vite vetëm peshk dhe perime të ziera, vetë Victoria ka rrëfyer se e vetmja “shkelje” e vogël ka qenë një gotë tequila. Dokumentari ndalet edhe tek rrugëtimi i saj nga këngëtare e “Spice Girls” në një nga emrat më të njohur të botës së modës.

Victoria tregon se nuk ka qenë e lehtë të fitonte respekt dhe se është përballur me skepticizëm, por ka arritur të krijojë markën e saj dhe të vendoset në skenën e madhe të javës së modës në Paris.